འདི་ནི་འགོ་ཚུགས་མཛད་སྒོའི་ཐོག་སློབ་མ་ཚོས་ཚོགས་པའི་ལུས་སྦྱོང་བྱེད་བཞིན་ཡོད་པ།

ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བ་དང་བོད་ཞི་བས་བཅིངས་འགྲོལ་བཏང་ནས་ལོ་ངོ་70འཁོར་བར་རྟེན་འབྲེལ་ཞུ་ཆེད། ཚེས་11ཉིན་གྱི་སྔ་དྲོ་ལྷ་ས་དགེ་འོས་ཆེད་ཚན་སློབ་གྲྭར“གླུ་ཞིག་བླངས་ནས་ཏང་ལ་འབུལ། དུས་རབས་གསར་པར་འབད་འབུངས་བྱེད”ཅེས་པའི་སློབ་གྲྭའི་རིག་གནས་སྒྱུ་རྩལ་དུས་ཆེན་འགོ་ཚུཌ་པ་རེད།

“སློབ་གྲྭའི་དགེ་སློབ་ཡོངས་ཀྱིས་མཉམ་དུ་སློབ་གྲྭའི་རིག་གནས་སྒྱུ་རྩལ་དུས་ཆེན་གྱི་གྲ་སྒྲིག་བྱས་ནས། ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བ་དང་བོད་ཞི་བས་བཅིངས་འགྲོལ་བཏང་ནས་ལོ་ངོ་70འཁོར་བར་རྟེན་འབྲེལ་ཞུས་ཏེ། སློབ་གྲྭའི་རིག་གནས་ཐོག་ནས་ཏང་ལ་བསྟོད་གླུ་འབུལ་བ་དང་བོད་ལྗོངས་གསར་པར་བསྟོད་གླུ་ཕུལ་ནས་ཏང་དང་མེས་རྒྱལ་ལ་བཅངས་པའི་ལྷག་བསམ་མཚོན་པར་བྱས་པ་དང་ཆབས་ཅིག་ཕུགས་བསམ་དང་དད་སེམས་བརྟན་དུ་གཏོང་བ་དང་རྒྱལ་གཅེས་འབད་འཐབ་ཀྱི་སྙིང་སྟོབས་མཚོན་པར་བྱས་ཡོད། དེ་དང་ཆབས་ཅིག་ང་ཚོས་ལོ་བཅུ་གྲངས་རིང་གི་སློབ་གཉེར་གྲུབ་འབྲས་མཉམ་སྤྱོད་བྱས་པ་མ་ཟད། སློབ་མ་ཚོས་རིག་གནས་སྒྱུ་རྩལ་ཁྲོད་ནས་རིག་གནས་སྒྱུ་རྩལ་གྱི་ཉམས་འགྱུར་ཤེས་རྟོཌ་དང་། རིག་གནས་ཀྱི་མེ་ཏོག་བཞད་ཐུབ་པ། སྒྱུ་རྩལ་གྱི་རྣམ་པ་མངོན་པ་བཅས་བྱས་ཏེ་སློབ་གྲྭའི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་ཡོད”ཅེས་ལྷ་ས་དགེ་འོས་ཆེད་ཚན་སློབ་གྲྭའི་ཏང་ཨུད་ཀྱི་ཧྲུའུ་ཅི་སློབ་སྤྱི་གཞོན་པ་ཡུས་ཧྥེང་ཕིང་གིས་བཤད།

ད་ཕན་ལོ་ཤས་རིང་ལྷ་ས་དགེ་འོས་ཆེད་ཚན་སློབ་གྲྭས་ལྗོངས་ཏང་ཨུད་དང་སྲིད་གཞུང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག“མི་གང་འདྲ་ཞིག་གསོ་སྐྱོང་བྱེད་པ་དང་། གསོ་སྐྱོང་ཇི་ལྟར་བྱེད་པ། སུའི་ཆེད་དུ་གསོ་སྐྱོང་བྱེད་པ”བཅས་ཀྱི་རྩ་བའི་གནད་དོན་དེར་དམ་པོར་དམིགས་ཏེ། ཀུན་སྤྱོད་ལ་བརྟེན་ནས་མི་སྣ་གསོ་སྐྱོང་གི་རྩ་བའི་ལས་འགན་མཐའ་འཁྱོངས་ཀྱིས་ཏང་གི་བསམ་བློ་འཛུགས་སྐྱོང་ལ་ཟམ་མི་ཆད་པར་ཤུཌ་སྣོན་རྒྱག་པ་དང་། མཐུན་སྒྲིལ་མཛེས་སྡུག་དང་ཤེས་དཔལ་ཞི་མཐུན་གྱི་སློབ་གྲྭའི་རིག་གནས་ཀྱི་རྣམ་པ་ཧུར་ཐག་གཏོད་པ། སློབ་གསོ་སློབ་ཁྲིད་ཀྱི་སྤུས་ཚད་བརྟན་པོའི་ངང་མཐོ་རུ་གཏོང་བ་བཅས་བྱས་པར་བརྟེན་ཤེས་ལྡན་པ་གསོ་སྐྱོང་གི་ནུས་པ་ཆེ་རུ་དང་སློབ་གཉེར་དང་སློབ་གྲྭ་བཅོས་སྐྱོང་གི་ཆུ་ཚད་མངོན་གསལ་དོད་པོས་མཐོ་རུ་ཕྱིན་པ་མ་ཟད། སློབ་གྲྭའི་བྱ་གཞག་ཁག་སྤུས་ཚད་མཐོ་བའི་འཕེལ་རྒྱས་ཀྱི་དུས་མཚམས་སུ་སླེབས་ཡོད། མིག་སྔར་སློབ་གྲྭ་དེར་ཁྱོན་སློབ་མ་4900དང་དགེ་རྒན་དང་ལས་བཟོ་350ཙམ་ཡོད་པ་རེད།

འཁྲབ་སྟོན་བལྟས་རྗེས་གསར་འགོད་པ་ལས་དོན་མི་སྣ་དང་མཉམ་དུ་སློབ་གྲྭའི་ཐང་ཆེན་དུ་སྐྱོད་སྐབས་སློབ་མ་ཚོས་ལག་ཤེས་བཟོ་རྩལ་དང་། ཡིག་གཟུགས། དམངས་སྲོལ་རོལ་དབྱངས་སོགས་རིག་གནས་སྒྱུ་རྩལ་གྱི་བརྩམས་ཆོས་འགྲེམས་སྟོན་བྱེད་བཞིན་འདུག

ཧོ་ནན་ཤིན་ཤང་ནས་ཡིན་པའི་2020ལོའི་དབྱིན་ཡིག་ཆེད་ལས་འཛིན་གྲྭ་གསུམ་པའི་སློབ་མ་ཀོན་ཡན་གྱིས་རང་ཉིད་ཀྱི་བོད་ཡིག་ཡིག་གཟུགས་སྟོན་བཞིན་གསར་འགོད་པར“ང་བོད་ཀྱི་རིག་གནས་ལ་དགའ་པོ་ཡོད་པས། ཡིག་རྒྱུགས་བཏང་ནས་བོད་ལ་ཡོང་བ་ཡིན། ངས་བོད་རིགས་སློབ་མ་དང་དགེ་རྒན་གྱི་ས་ནས་བོད་ཡིག་དང་བོད་ཡིག་ཡིག་གཟུགས་སྦྱངས་པ་མ་ཟད། རྩམ་པ་ཟ་སྟངས་ཀྱང་སྦྱངས་པ་ཡིན”ཞེས་བཤད།

“ལྷ་ས་དགེ་འོས་ཆེད་ཚན་སློབ་གྲྭ་1975ལོར་བཙུགས་པ་ནས་ད་བར་ལོ་46ཙམ་འགྲོ་ཡི་ཡོད། འབྲིང་རིམ་ཆེད་ལས་སློབ་གྲྭ་ནས་ད་ཆ་ཆེད་ཚན་སློབ་གླིང་དང་སློབ་གྲྭར་འཕེལ་རྒྱས་ཕྱིན་པའི་ནང་ཕུལ་བྱུང་སློབ་ཐོན་སློབ་མ་ཁྲི་4ལྷག་ཙམ་གསོ་སྐྱོང་བྱས་ཏེ་ལྗོངས་ཡོངས་ཀྱི་རྨང་གཞིའི་སློབ་གསོ་འཕེལ་རྒྱས་གཏོང་བའི་འགན་འཁུར་བཞིན་ཡོད”ཅེས་ལྷ་ས་དགེ་འོས་སློབ་གྲྭའི་ཏང་ཨུད་ཀྱི་ཧྲུའུ་ཅི་གཞོན་པ་སློབ་སྤྱི་འཇམ་དཔལ་གྱིས་བཤད།