འཁྱུག་ཙམ་ཞིག་ལ་ཟླ་བའི་བུ་མོ་ཆུང་བ་སྒྲོལ་མ་སློབ་གྲྭ་ཆེ་མོ་ཐོན་པ་མ་ཟད། མགྱོགས་མྱུར་ལས་གནས་སུ་སྐྱོད་གྲབས་ཡོད། ལོ་43ལ་སླེབས་པའི་ཟླ་བའི་ཁྱིམ་ནི་གྲ་ནང་རྫོང་གྲ་ཕྱི་ཤང་ཟུར་མཁར་གྲོང་ཚོ་ནས་ཡིན་ཞིང་། གྲོང་ཚོར་ཚོང་ཁང་བཙུགས་ནས་ལོ་14ཙམ་འགྲོ་ཡི་ཡོད། རང་ཉིད་ཀྱི་དཀའ་སྤྱད་འབད་འཐབ་ལ་བརྟེན་ནས་སློབ་གྲྭ་ཆེ་མོ་བ་གཉིས་གསོ་སྐྱོང་བྱས་པ་དང་། འཚོ་བ་ཡང་ཉིན་བཞིན་སྐྱིད་དུ་འགྲོ་ཡི་ཡོད།

“གཏན་འཇཌ་ཁ་པར་བརྒྱབ་མ་ཐག་དངོས་ཟོག་སྒོ་ཁར་སྐྱེལ་གྱི་འདུག”

ཟླ་བའི་བདེ་སྐྱིད་ལྡན་པའི་འཚོ་བ་ཨ་ཕ་པ་སངས་ཀྱི་རོགས་རམ་དང་ཁ་འབྲལ་ཐབས་མེད། པ་སངས་འདི་ལོ་ལོ་68ལ་སླེབས་པ་དང་། ཁོང་ནི་གྲོང་ཚོའི་ནང་ཀུན་གྱིས་ཁས་ལེན་པའི“སྤྱང་གྲུང་ལྡན་པའི་མི་ཞིག”རེད། 2001ལོ་ནས་བཟུང་ཁོང་གིས་ཁྱིམ་གྱི་གསོག་དངུལ་ལ་བརྟེན་ནས་ཤར་རླུང་རྟགས་ཅན་གྱི་འདྲུད་འཐེན་འཕྲུལ་འཁོར་ཅིག་ཉོས་ཏེ། འཕྲུལ་ཆས་ཅན་གྱི་རྨོ་འདེབས་བྱེད་འགོ་བརྩམས། “སྐབས་དེ་དུས་ལྷ་ས་ནས་འདྲུད་འཐེན་འཕྲུལ་འཁོར་ཉོ་བར་སྒོར་ཁྲི་1.1བཏང་བ་ཡིན། ཉོས་རྗེས་ང་རང་གཅིག་པུས་ལྷ་ས་ནས་འདྲུད་འཐེན་འཕྲུལ་འཁོར་བཏང་སྟེ་ཕ་ཡུལ་དུ་ལོག་པ་ཡིན། སྐབས་དེ་དུས་ངའི་ཁྱིམ་གྱིས་འདྲུད་འཐེན་འཕྲུལ་འཁོར་ལ་བརྟེན་ནས་མུའུ་17ཙམ་གྱི་ཞིང་ཁ་འདེབས་ཀྱི་ཡོད་ལ། ད་དུང་སྒོ་ཕྱུགས་ཁག་གཅིག་གསོ་ཡོད། འཚོ་བའི་འགྲོ་སོང་ཕུད་ན་ད་དུང་དངུལ་ཕྲན་བུ་གསོག་ཐུབ་པས། གྲོང་ཚོའི་ནང་གི་དཔལ་འབྱོར་ཆ་རྐྱེན་ཡག་ཤོས་གྲས་སུ་རྩིས་ན་འགྲིག་གི་ཡོད”ཅེས་པ་སངས་ཀྱིས་སྤོབས་སེམས་ཀྱིས་ཁེངས་བཞིན་དེ་ལྟར་བཤད། པ་སངས་ལ་འབབ་འཕར་ཕྱུག་འགྱུར་གྱི་བསམ་གཞིག་མང་བ་དང་། དེ་ནི་ཁོང་སྤྱི་ཚོགས་ཀྱི་ཆ་འཕྲིན་སྣ་ཚོགས་ལ་དོ་ཁུར་ཟབ་མོ་བྱེད་པའི་གོམས་གཤིས་དང་འབྲེལ་བ་ཟབ་མོ་ཡོད། 2003ལོར་ཁོང་གིས་གྲོང་ཚོ་ཡོངས་ཀྱི་སྔོན་ལ་

གཏན་འཇགས་ཁ་པར་འཁྲིད། “སྐབས་དེ་དུས་གཏན་འཇགས་ཁ་པར་འཁྲིད་པར་རྙོག་དྲ་ཚ་པོ་མེད། གློག་འཕྲིན་ཅུས་སུ་སྔོན་མངགས་བྱས་ན་ལས་དོན་མི་སྣ་ཁྱིམ་དུ་ཡོང་ནས་ཁ་པར་སྒྲིག་སྦྱོར་བྱེད་ཀྱི་ཡོད། ཁ་པར་ཡོད་པ་ནས་བཟུང་ཧ་ཅང་སྟབས་བདེ་པོ་འདུག དོན་དག་ཡོད་སྐབས་ཁ་པར་ནས་སྐད་ཆ་འདྲི་ཆོག་པས་སྔོན་ཆད་ལྟར་དོན་མེད་ཡར་རྒྱུག་མར་རྒྱུག་བྱེད་དགོས་དོན་མེད”ཅེས་པ་སངས་ཀྱིས་བཤད།

2007ལོར་པ་སངས་ཀྱི་ཤུགས་རྐྱེན་དང་རྒྱབ་སྐྱོར་འོག་ཟླ་བས་གྲོང་ཚོའི་གཞུང་ཁང་གཡར་ནས་གྲོང་ཚོ་ཨུ་ལྷན་གྱི་ཉེ་འགྲམ་དུ་ཟུར་མཁར་གྲོང་ཚོའི་ཙག་ཙིག་ཚོང་ཁང་ཐོག་མ་དེ་བཙུགས།

ཙག་ཙིག་ཚོང་ཁང་བཙུགས་ན་ལོ་གཅིག་ལ་ཡོང་འབབ་སྒོར་5000ལྷག་ཙམ་གསོག་ཐུབ་པ་ནས་ད་ཆའི་ལོ་གཅིག་ལ་ཡོང་འབབ་སྒོར་ཁྲི་བཞི་ལྔ་ཙམ་གསོག་ཐུབ་པའི་བར་ཟླ་བའི་ཁྱིམ་གྱི་དཔལ་འབྱོར་གནས་བབ་གྲོང་ཚོའི་འབྲིང་རིམ་ཡན་དུ་གནས་ཡོད།

“ངའི་ཁྱིམ་ཚང་གི་འཚོ་བ་ཡར་ངོའི་ཟླ་ལྟར་འཕེལ་རྒྱས་འགྲོ་གི་འདུག་ལ། གྲོང་ཚོ་ཡང་འཕེལ་རྒྱས་མྱུར་པོ་འགྲོ་གི་འདུག”ཅེས་ཟླ་བས་གྲོང་ཚོའི་ཐོག་བརྩེགས་ཁང་ཆེན་ལ་མཛུབ་མོ་འཛུགས་བཞིན་དུ“2000ལོའི་གོང་གྲོང་ཚོར་སྤྱིར་ན་ཐོག་བརྩེགས་ཁང་ཆེན་མཐོང་རྒྱུ་མེད། ད་ཆ་ཁྱིམ་ཚང་མང་ཆེ་བས་ཐོག་སོ་ཉིས་ལྡན་གྱི་ཁང་པ་བསྐྲུན་ཡོད། ད་དུང་གཞུང་ལམ་ཤར་གཏོང་ཐུབ་པ་དང་གློག་འཕྲིན་དྲ་བ་ཡང་སྦྲེལ་མཐུད་བྱས་ཡོད”ཅེས་བཤད།

“རྩ་གཉིས་ཨང་རྟགས་བཤེར་ཙམ་བྱས་ན་དེ་མུར་དངུལ་འབྱོར་ཐུབ”

ཙག་ཙིག་ཚོང་ཁང་གི་ཡོང་འབབ་ཉིན་བཞིན་མང་དུ་ཕྱིན་པས། ཟླ་བའི་ཚོང་ལས་རྒྱ་ཆེར་གཏོང་བའི་གདེང་ཚོད་སྔར་བས་ཆེ་རུ་ཕྱིན་ཡོད། 2017ལོར་ཁོང་གིས་ཙག་ཙིག་ཚོང་ཁང་འགྲམ་གྱི་གཞུང་ཁང་གཡར་ནས་ཇ་ཁང་བཙུགས། “ཅ་ལག་ཉོ་མཁན་མང་དུ་ཕྱིན་པས། སྐབས་རེ་སྡོད་ས་ཡང་མེད། ངས་པ་ལགས་ལ་ཇ་ཁང་གཉེར་རྒྱུའི་སྐོར་སྐད་ཆ་བྱས་པ་ཡིན”ཞེས་ཟླ་བས་བཤད།

དཔལ་འབྱོར་དང་སྤྱི་ཚོགས་བྱ་འཕུར་བ་ལྟར་འཕེལ་རྒྱས་བྱུང་བས། ཟླ་བར་ཚོང་རྒྱག་རྒྱུ་ཧ་ཅང་སྟབས་བདེ་རུ་ཕྱིན་པའི་སྣང་བ་བྱུང་བ་དང་། ལྷག་དོན་དུ་ལག་ཐོགས་ཁ་པར་དང་གློག་འཕྲིན་དྲ་བ་ཁྱབ་པས། ཁོ་མོས་ཧ་ཅང་སྟབས་བདེ་པོ་ཡོད་པའི་ཚོར་སྣང་བྱུང་ཡོད།

2008ལོར་ལག་ཐོགས་ཁ་པར་ཐེངས་དང་པོ་ཉོས་པ་ནས་བཟུང་། ད་བར་ཟླ་བས་ལག་ཐོགས་ཁ་པར་གསུམ་བཞི་བརྗེས་ཡོད། བུ་མོ་གཉིས་ཀྱི་འཚོ་བའི་འགྲོ་གྲོན་ཡང་སྐད་འཕྲིན་ནས་བསྐུར་གྱི་ཡོད། ད་ཆ་ཟླ་བའི་ཕྲུ་གུ་གཉིས་ཀ་སློབ་མཐར་ཟིན་པས། ཁོ་མོའི་ཕྲག་ཐོག་གི་ཁུར་པོ་ཡང་དུ་ཕྱིན་པའི་སྣང་བ་བྱུང་ཡོད། ཁོ་མོས“ཕྲུ་གུ་ཚོ་ས་ཕྱོགས་གཞན་དུ་ལས་ཀ་བྱེད་སྲིད། ད་ཆ་ཁ་པར་དང་བརྙན་ལམ་ལ་སོགས་ཧ་ཅང་སྟབས་བདེ་པོ་ཡོད་པས། ཁོང་ཚོ་སྐྱིད་པོ་བྱུང་ན་གང་དུ་འཚོ་བ་བསྐྱལ་ཡང་གཅིག་པ་རེད”ཅེས་བཤད།

“ཁ་པར་གྱི་བརྙན་ཤེལ་འབྲད་པ་ཙམ་གྱིས་ཤེས་བྱ་གང་རུང་སྦྱངས་ཐུབ”

ཟླ་བ་སློབ་སྦྱོང་བྱེད་རྒྱུར་ཧ་ཅང་དགའ་པོ་ཡོད། ཁོམ་པ་ཡོད་རིམ་བཞིན་ཁོ་མོས་ཁྱུག་དབྱིངས་ནས་ཤེས་བྱ་སྦྱོང་གི་ཡོད། ཉེ་དུས་ཁོ་མོ་ཁབ་བསླས་ལ་དབྱིངས་ཞུགས་ཡོད། ཁོ་མོས་ཁྱུག་དབྱིངས་སྟེང་གི་སློབ་ཁྲིད་བརྙན་ལམ་བརྒྱུད་བསླས་མ་སླ་སྟངས་སྦྱངས་ཏེ། ཁ་གདན་ཁ་ཤས་བསླས་ཡོད། ཟླ་བས་མིག་ཟུང་རང་ཉིད་ཀྱིས་བསླས་པའི་ཁ་གདན་ལ་ཕྱོགས་ནས“འདི་ཚོ་ཚང་མ་ངས་ཁྱུག་དབྱིངས་ནས་སྦྱངས་པ་ཡིན། ད་ཆ་ལག་ཐོགས་ཁ་པར་ཧ་ཅང་སྟབས་བདེ་པོ་འདུག གང་ཞིག་སྦྱོང་འདོད་ཀྱང་ཁྱུག་དབྱིངས་ནས་འཚོལ་ཐུབ”ཅེས་གསར་འགོད་པར་བཤད་བྱུང་།

ཁབ་བསླས་ཕུད། ཟླ་བས་ད་དུང་ལག་ཐོགས་ཁ་པར་ནས་ཚལ་བཟོ་སྟངས་མི་ཉུང་བ་ཞིག་ཤེས་ཡོད། སྒྲོལ་མས“ཨ་མ་འབྲས་ཚལ་བཟོ་མཁས་པོ་ཡོད། ཁོང་གིས་བཟོས་པའི་ཅའོ་ཙེ་ཡང་ཟ་མཁན་ཧ་ཅང་མང་པོ་ཡོད”ཅེས་བཤད།

གཏན་འཇགས་ཁ་པར་ནས་རིག་ནུས་ལག་ཐོགས་ཁ་པར་བར། སྐྱེ་ས་འཚར་ས་རི་གྲོང་ནས་ཡིན་པའི་ཟླ་བས་མཛེས་སྡུག་ལྡན་པའི་འཚོ་བའི་ཕྱོགས་སུ་སྐྱོད་པའི་འབད་འཐབ་ལམ་བུ་མིག་མཐོང་ལག་ཟིན་བྱུང་ཡོད། “ད་ཆ་གྲོང་གསེབ་འཕེལ་རྒྱས་ཡག་པོ་བྱུང་ཡོད། གྲོང་གསེབ་དར་རྒྱས་ལ་སྐུལ་འདེད་གཏིང་ཟབ་བཏང་བ་བརྒྱུད། ཕྱིས་སུ་ང་ཚོའི་གྲོང་གསེབ་ཏུའང་གྲོང་ཁྱེར་ལྟར་འཕེལ་རྒྱས་འགྲོ་ངེས་ཡིན”ཞེས་ཟླ་བས་ཡིད་ཆེས་ཀྱིས་ཁེངས་བཞིན་དུ་བཤད།