ཉེ་ཆར། རང་སྐྱོང་ལྗོངས་སྤྱི་ཁྱབ་བཟོ་ཚོགས་ཀྱིས་གཙོ་གཉེར་བྱས་པའི“ཀྲུང་གོའི་ཕུགས་འདུན། ངལ་རྩོལ་པའི་ཉམས་བཟང་། — ནམ་ཡང་ཏང་གི་རྗེས་སུ་འབྲངས་ནས་རྒྱང་སྐྱོད་ཀྱི་ལམ་བུ་གསར་པར་མདུན་སྐྱོད་བྱེད”ཅེས་པའི་ལྗོངས་ཡོངས་ཀྱི་ལས་བཟོའི་གཏམ་བཤད་འགྲན་བསྡུར་གྱི་མཐའ་བསྡུར་ལྷ་སར་བྱས་པ་རེད།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་བྱེད་སྒོའི་དམིགས་ཡུལ་ནི་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བ་དང་བོད་ཞི་བས་བཅིངས་འགྲོལ་བཏང་ནས་ལོ་ངོ་70འཁོར་བར་རྟེན་འབྲེལ་ཞུ་བ་དང་། ཏང་གི་ལོ་རྒྱུས་སློབ་སྦྱོང་སློབ་གསོ་དང“དེ་བས་གསུམ”གྱི་ཆེད་དོན་སློབ་གསོ་གཏིང་ཟབ་སྤེལ་བ། ལྗོངས་ཡོངས་ཀྱི་རྒྱ་ཆེའི་ལས་བཟོའི་འབད་འབུངས་སྟོབས་བརྩོན་དང་། ཐོག་མའི་བསམ་འདུན་མ་བརྗེད་པ། དྲིན་ཚོར་མདུན་སྐྱོད་བཅས་ཀྱི་སྙིང་སྟོབས་དང་ཉམས་འགྱུར་གང་ལེགས་མངོན་པ་བཅས་བྱ་རྒྱུ་དེ་ཡིན་ཞིང་། འདི་ལོའི་ཟླ་བཞི་པར་བྱེད་སྒོ་སྤེལ་འགོ་ཚུགས་ཚུན། ལྗོངས་ཡོངས་ཀྱི་རིམ་ཁག་བཟོ་ཚོགས་ཀྱིས་རྒྱ་ཆེའི་ལས་བཟོ་སྒྲིག་འཛུགས་བྱས་ཏེ་གཏམ་བཤད་འགྲན་བསྡུར་ཐེངས་150ལྷག་ཙམ་བྱས་པ་དང་ལས་བཟོ་1100ལྷག་ཙམ་གྱིས་རང་འཁྲིའི་ལས་གནས་སུ་གཞི་ཚུགས་ནས་ངལ་རྩོལ་ལ་བརྟེན་ནས་བདེ་སྐྱིད་ལྡན་པའི་འཚོ་བ་བཏོད་པ་དང་འབད་བརྩོན་བྱས་ནས་ཕུགས་བསམ་སྒྲུབ་པའི་གཏམ་རྒྱུད་གསོན་ཉམས་དོད་པོས་བརྗོད་ཡོད། རིམ་པ་རེ་རེ་བཞིན་འདེམས་སྒྲུག་བྱས་པ་བརྒྱུད་གྲོང་ཁྱེར(ས་ཁུལ)སྤྱི་ཁྱབ་བཟོ་ཚོགས(བཟོ་ཚོགས་དོན་གཅོད་ཁྲུའུ)དང་། ལྗོངས(ཀྲུང་དབྱང)ཐད་གཏོགས་ཐོན་ལས་ཁག་གི(ཁོངས་གཏོགས)བཟོ་ཚོགས། ལྗོངས(ཀྲུང་དབྱང)ཐད་གཏོགས་ལས་ཁུངས་ཁག(བྱ་གཞག་ཚན་པ)སོགས་ཀྱི་འཐུས་མི་རུ་ཁག་40ཡི་བདམས་ཐོན་པ་78བསྐྱར་འགྲན་ནང་ཚུད་པ་དང་བདམས་ཐོན་པ་13མཐའ་བསྡུར་ནང་ཚུད་པ་རེད།

འགྲན་བསྡུར་འཁྲུག་པོ་བྱས་པ་བརྒྱུད་མཐའ་བསྡུར་ནང་བྱ་དགའ་ཨང་དང་པོ་2དང་། བྱ་དགའ་ཨང་གཉིས་པ་3 བྱ་དགའ་ཨང་གསུམ་པ་5 ཕུལ་བྱུང་བྱ་དགའ་3བཅས་ཐོན་ཡོད་པ་རེད།