སྐྱེ་ཁམས་ཁོར་ཡུག་པུའུ་དང་། ཀྲུང་དབྱང་ཤེས་དཔལ་སྲོལ་གཏོད་གཞུང་དོན་ཁང་། མཚོ་སྔོན་ཞིང་ཆེན་མི་དམངས་སྲིད་གཞུང་བཅས་ཀྱིས་གོང་ཚེས་ཉིན་ཟི་ལིང་དུ་མཉམ་དུ་དྲུག་ལྔ་ཁོར་ཡུག་ཉིན་མོའི་རྒྱལ་ཁབ་ཀྱི་གཙོ་གཉེར་བྱེད་སྒོ་སྤེལ་བ་རེད།
འདི་ལོའི་དྲུག་ལྔ་ཁོར་ཡུག་ཉིན་མོའི་བརྗོད་དོན་གཙོ་བོ་ནི“མི་དང་རང་བྱུང་ཁམས་ཞི་མཐུན་མཉམ་གནས་བྱེད”ཅེས་པ་ཡིན་ཞིང་། དེའི་དམིགས་ཡུལ་ནི་སྤྱི་ཚོགས་ཡོངས་ཀྱིས་སྐྱེ་ཁམས་ཤེས་དཔལ་ལག་བསྟར་གྱི་འདུ་ཤེས་སྔར་བས་ཟབ་ཏུ་གཏོང་བ་དང་། སྤྱི་ཚོགས་ཡོངས་ཀྱི་རང་རྟོགས་བྱ་སྤྱོད་ལ་འགྱུར་རྒྱུར་སྐུལ་འདེད་བཏང་ནས་སྦགས་བཙོག་འགོག་བཅོས་ཀྱི་འགག་སྒྲོལ་དམག་འཐབ་མུ་མཐུད་རྒྱག་པ་དང་། བློ་བརྟན་འགྱུར་མེད་ངང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད། མི་དང་རང་བྱུང་ཁམས་ཞི་མཐུན་མཉམ་གནས་ཀྱི་དེང་རབས་ཅན་འཛུགས་སྐྲུན་ཧུར་ཐག་བྱེད་པའི་ཐུན་མོང་ངོས་འཛིན་གཅིག་སྒྲིལ་དང་སྟོབས་ཤུགས་གཅིག་སྡུད་བྱེད་རྒྱུ་དེ་རེད།
བྱེད་སྒོ་སྤེལ་སར། མཉམ་འབྲེལ་རྒྱལ་ཚོགས《སྐྱེ་དངོས་སྣ་མང་ཅན་གྱི་སྤྱི་ཆིངས》ཀྱི་ཆིངས་ཡིག་འཇོག་མཁན་ཕྱོགས་ཀྱི་ཚོགས་ཆེན་ཐེངས་བཅོ་ལྔ་པ་ཚོགས་ཡུལ་ཡུན་ནན་ཞིང་ཆེན་གྱི་དྲུག་ལྔ་ཁོར་ཡུག་ཉིན་མོའི་དྲིལ་བསྒྲགས་བྱེད་སྒོ་དང་དེ་བཞིན་མཚོ་སྔོན་པོའི་ཙོང་ཉ་རྒྱུད་འཕེལ་གློད་པ་དང“མཚོ་སྔོན་པོ་སྲུང་སྐྱོང་བྱེད། ང་ནི་དང་བླངས་པ་ཡིན”ཞེས་པའི་སྤྱི་ཕན་དྲིལ་བསྒྲགས་བྱེད་སྒོ་སྤེལ་ཞིང་། ས་ཡུལ་དངོས་སུ་ད་དུང་2022ལོའི་དྲུག་ལྔ་ཁོར་ཡུག་ཉིན་མོའི་རྒྱལ་ཁབ་ཀྱི་གཙོ་གཉེར་བྱེད་སྒོ་ལེའོ་ཉིང་ཞིང་ཆེན་དུ་སྤེལ་རྒྱུའི་ཁྱབ་བསྒྲགས་ཀྱང་བྱས་པ་རེད།
འདི་ལོའི་དྲུག་ལྔ་ཁོར་ཡུག་ཉིན་མོའི་རྒྱལ་ཁབ་ཀྱི་གཙོ་གཉེར་བྱེད་སྒོར་ལྗང་མདོག་ཐཱན་ཉུང་གི་འདུ་ཤེས་ལག་བསྟར་དང་། ཐཱན་ཚད་སྙོམ་སྦྱོར་གྱི་སྤྱི་ཕན་བྱ་སྤྱོད་སྒྲིག་འཛུགས། བྱེད་སྒོ་ཆེ་འབྲིང་གི་ཐཱན་ཚད་སྙོམ་སྦྱོར་གྱི་འབྲེལ་ཡོད་བླང་བྱ་དོན་འཁྱོལ་བཅས་བྱས་པ་རེད།