“འདི་ལོ་ནི་སླར་ཡང་ལོ་ལེགས་ཡག་པོ་ཡོང་བའི་ལོ་ཞིག་ཡིན་ངེས་རེད” ཅེས་གཞིས་རྩེ་གྲོང་ཁྱེར་གཏིང་སྐྱེས་རྫོང་ཀོ་ལྕག་ཤང་གནས་གྲོང་ཚོའི་དབུལ་སྒྲོལ་དུད་ཚང་གི་གྲོང་མི་བཟང་པོ་བཀྲ་ཤིས་ཀྱིས་དགའ་ཚོར་ཆེན་པོས་བཤད།

གནས་གྲོང་ཚོ་ནི་ཧི་མ་ལ་ཡའི་རི་རྒྱུད་དུ་ཆགས་པའི་གྲོང་ཚོ་ཆུང་ཆུང་ཞིག་རེད། དམར་མདངས་བཀྲ་བའི་སྐར་ལྔའི་དར་དམར་གནས་གྲོང་ཚོའི་དུད་ཚང་ཚང་མའི་ཐོག་ཁར་ལྷབ་ལྷུབ་ཏུ་གཡོ་བཞིན་ཡོད་པ་དང་། གྲོང་ཚོ་ཡོངས་ལ་གཞིས་ཆགས་དུད་ཚང་10ཡི་མི་58ཡོད་པ་ཚང་མ་དབུལ་ཞྭ་ཕུད་ཟིན།

དེ་སྔ་གྲོང་ཚོ་ཆུང་བ་དང་། མི་འབོར་ཉུང་བ། ལམ་ཐག་རིང་བ། ཐོན་ལས་འཕེལ་རྒྱས་གཏོང་དཀའ་བ་བཅས་ལས་གནས་གྲོང་ཚོའི་འཕེལ་རྒྱས་ལ་དཀའ་ངལ་མང་པོ་འཕྲད་ཡོད། དབུལ་སྒྲོལ་འགག་སྒྲོལ་བྱས་ཚུན། ཏང་གི་སྲིད་ཇུས་ཀྱི་རོགས་སྐྱོར་འོག་དང་གཏིང་སྐྱེས་རྫོང་ཨུད་དང་རྫོང་སྲིད་གཞུང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག གནས་གྲོང་ཚོས་གྲོང་མིའི་ནང་སྐྱེས་འཕེལ་རྒྱས་ཀྱི་སྒུལ་ཤུགས་ཆེ་རུ་ཧུར་ཐག་བཏང་ནས་ཡུལ་བབ་དང་བསྟུན་ཏེ་ཐོན་ལས་འཕེལ་རྒྱས་བཏང་ཞིང་། 2019ལོར“ཏང་ཀྲི་པུའུ་དང་། མཉམ་ལས་ཁང་། གྲོང་མི། དུད་ཚང་དབུལ་པོ་བཅས་ཟུང་དུ་འབྲེལ་བའི”མ་རྐང་མཉམ་འཇོག་གི་གཉེར་སྐྱོང་བྱེད་སྟངས་ལ་བརྟེན་ནས་གཏིང་སྐྱེས་རྫོང་གནས་པ་གསོ་ཚགས་ཆེད་ལས་མཉམ་ལས་ཁང་བཙུགས་ཏེ། ཏང་འཛུགས་སྐྱོང་ལ་བརྟེན་ནས་ཁྱད་ལྡན་ཐོན་ལས་འཕེལ་རྒྱས་ལ་སྐུལ་ཁྲིད་དང་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ལེན་རྒྱུར་རམ་འདེགས་བྱས་པས། གྲོང་མིར་འབབ་འཕར་ཕྱུག་འགྱུར་བྱུང་བ་རེད།

བཟང་པོ་བཀྲ་ཤིས་ཀྱིས། མཉམ་ལས་ཁང་མ་བཙུགས་གོང་། ང་ཉིན་ལྟར་ལུག་འཚོ་ཞོར་དུ་ཕྲུ་གུར་ལྟ་རྟོག་བྱེད་དགོས་པས་སྟབས་བདེ་པོ་མེད་པ་དང་ལུག་ཀྱང་ཡག་པོ་གསོ་ཐུབ་ཀྱི་མེད་རྐྱེན་ཡོང་འབབ་ཀྱང་མང་པོ་མི་འདུག གནས་པ་གསོ་ཚགས་མཉམ་ལས་ཁང་བཙུགས་རྗེས་ངའི་ཁྱིམ་གྱི་ལུག་30ཚང་མ་མཉམ་ལས་ཁང་གི་མ་རྐང་ནང་བཅུག་པ་ཡིན། ཕྱོགས་གཅིག་ནས་མཉམ་ལས་ཁང་གི་མ་རྐང་ནང་ཞུགས་པ་བརྒྱུད་ངལ་རྩོལ་ནུས་ཤུགས་ལ་བཅིངས་འགྲོལ་ཆེན་པོ་ཐོབ་པ་དང་། ཞིང་དལ་དུས་སུ་ད་དུང་གླ་པ་རྒྱུག་ནས་ཁྱིམ་ཚང་གི་ཡོང་འབབ་མང་དུ་གཏོང་ཐུབ་ཀྱི་འདུག ཕྱོགས་གཞན་ཞིག་ནས་ཏང་ཀྲི་པུའི་ཁོངས་གཏོགས་ཀྱིས་ཚན་རིག་དང་མཐུན་པའི་སྒོ་ནས་གཅིག་སྡུད་གསོ་ཚགས་དང་ལུགས་མཐུན་གཉེར་སྐྱོང་བྱས་པ་བརྒྱུད་ལོ་ལྟར་ང་ལ་ཡོང་འབབ་མང་པོ་རག་གི་འདུག་ལ། ཁྱིམ་ཚང་ལ་ལྟ་རྟོག་ཀྱང་ཡག་པོ་ཐུབ་ཀྱི་འདུག་ཅེས་གསར་འགོད་པར་བཤད་བྱུང་།

ན་ནིང་བཟང་པོ་བཀྲ་ཤིས་ཀྱི་ཁྱིམ་ལ་མཉམ་ལས་ཁང་གིས་ཤ་སྐལ་དུ་ལུག་8སྤྲད་པ་དང་ལོ་མཇུག་ཏུ་ད་དུང་དངུལ་སྨར་སྒོར་7685.61བགོས་པ་རེད། བཟང་པོ་བཀྲ་ཤིས་ཀྱིས་འཛུམ་དམུལ་དམུལ་ངང“བགོ་འགྲེམས་རྒྱག་པའི་ཉིན་དེར་ང་ལ་དངུལ་མང་པོ་ལེན་རྒྱུ་བྱུང་བས་ཚང་མས་ངའི་ངོ་གདོང་ལས་འཛུམ་མདངས་འཕྱུར་གྱི་འདུག་ཅེས་བཤད་བྱུང་། གུང་ཁྲན་ཏང་དང་ཏང་གི་སྲིད་ཇུས་བཟང་པོར་ཐུགས་རྗེ་ཆེ་ཞུ་རྒྱུ་ཡིན”ཞེས་བརྗོད།

འཚོ་བ་ཇི་ཙམ་བསྐྱལ་བ་དེ་ཙམ་གྱིས་ལེགས་སུ་འགྲོ་བ་མཐོང་སྐབས་གནས་གྲོང་ཚོའི་གྲོང་མི་རྣམས་སྙིང་སྟོབས་རབ་ཏུ་འཕེལ་ནས་དབུལ་སྒྲོལ་འགག་སྒྲོལ་གྱི་གྲུབ་འབྲས་ནུས་ཤུགས་ཡོད་རྒུས་སྲ་བརྟན་དང་རྒྱ་སྐྱེད་བཏང་སྟེ། གྲོང་གསེབ་དར་རྒྱས་ལ་སྐུལ་འདེད་ཧུར་ཐག་གཏོང་བཞིན་ཡོད།

བཟང་པོ་བཀྲ་ཤིས་ཀྱི་བཟའ་ཟླ་བསོད་ནམས་བུ་ཁྲིད་རྩལ་ནུས་གསོ་སྦྱོང་ནང་ཞུགས་རྗེས་གྲོང་ཚོ་ཡོངས་ཀྱི་དོན་དངོས་དང་ཟུང་འབྲེལ་བྱས་ནས། གྲོང་ཚོའི་རྒྱ་ཆེའི་བུད་མེད་དང་ལྷག་པར་དུ་དབུལ་སྒྲོལ་བུད་མེད་དང་མཉམ་དུ་གཏིང་སྐྱེས་རྫོང་སྐྱིད་ཤོས་གཡང་འཕེལ་སྣམ་བུ་ཆེད་ལས་མཉམ་ལས་ཁང་བཙུགས་པ་རེད། བསྡོམས་རྩིས་བྱས་པར་གཞིགས་ན། 2020ལོར་མཉམ་ལས་ཁང་གཉེར་འགོ་བཙུགས་མ་ཐག་ཏུ་ལོ་ཧྲིལ་པོར་ཡོང་འབབ་སྒོར་ཁྲི་3.5བྱུང་ནས་མཉམ་ལས་ཁང་གི་ཁོངས་མི་ཡོངས་ཀྱི་མི་རེར་ཆ་སྙོམས་ཡོང་འབབ་སྒོར་2400ཙམ་འཕར་རྒྱུར་ཐད་ཀར་སྐུལ་ཁྲིད་ཐུབ་ཡོད།

གནས་གྲོང་ཚོའི་ཏང་ཀྲི་པུའི་འགན་འཁུར་བས། མཉམ་ལས་ཁང་ལ་གྲུབ་འབྲས་ཐོབ་པ་དེས་གྲོང་མི་ཡོངས་ཀྱི་ཡོང་འབབ་མང་དུ་ཕྱིན་པའི་ཁར་ལས་གནས་མཁོ་འདོན་ཐུབ་པ་དང་། ཕྱུག་འགྱུར་གྱི་ཐབས་ལམ་ཇེ་ཡངས་སུ་ཕྱིན་པས། དེ་ནི་གྲོང་མི་ཡོངས་ཀྱིས་མིག་མཐོང་ལག་ཟིན་ཐུབ་པའི་ཐོན་ལས་དར་རྒྱས་ཀྱི་ལམ་བུ་ཞིག་རེད། གོམ་སྟབས་རྗེས་མར་གནས་གྲོང་ཚོས་མཉམ་ལས་ཁང་ཚད་ལྡན་དང་རྒྱ་ཆེར་བཏང་ནས་མཉམ་ལས་ཁང་གི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་ཆབས་ཅིག ཏང་འཛུགས་སྐྱོང་སྣེ་ཁྲིད་དུ་བྱས་ཏེ་ཏང་ཀྲི་པུས་སྣེ་ཁྲིད་ཡག་པོ་བྱས་ནས“ཐོན་ལས་དར་རྒྱས་དང་། སྐྱེ་ཁམས་སྡོད་མལ་ལ་འཚམ་པ། ཡུལ་སྲོལ་ཡ་རབས། བཅོས་སྐྱོང་ནུས་ལྡན། འཚོ་བ་འབྱོར་ཕྱུག”བཅས་ཀྱི་སྤྱིའི་བླང་བྱ་གཞིར་བཟུང་། གྲོང་མི་ཡོངས་ཀྱི་སྣེ་ཁྲིད་དེ་གོམ་ཞེང་ཆེན་པོས་གྲོང་གསེབ་དར་རྒྱས་ཀྱི་བདེ་སྐྱིད་ལམ་ཆེན་དུ་བསྐྱོད་རྒྱུ་རེད་ཅེས་བརྗོད་པ་རེད།