ལྷོ་ཁ་གྲོང་ཁྱེར་གྱིས་དབུལ་སྒྲོལ་འགག་སྒྲོལ་དང་གྲོང་གསེབ་དར་རྒྱས་ཟུང་འབྲེལ་དམ་ཟབ་བྱས་ནས་དབུལ་སྒྲོལ་འགག་སྒྲོལ་གྱི་གྲུབ་འབྲས་མུ་མཐུད་སྲ་བརྟན་དང་ཆེ་རུ་བཏང་སྟེ་དབུལ་པོ་བསྐྱར་ལོག་དང་དབུལ་པོར་འགྱུར་རྒྱུ་མཐའ་གཅིག་ཏུ་སྔོན་འགོག་བྱས་ནས་དབུལ་པོའི་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་རྒྱུན་ཆད་མེད་པར་ཆེ་རུ་བཏང་བ་རེད།

སྒྲིག་སྲོལ་ལམ་ལུགས་བཟོས་ནས་དབུལ་པོ་བསྐྱར་ལོག་སྔོན་འགོག་མཐའ་གཅིག་ཏུ་བྱས་པ།

2020ལོར་ལྷོ་ཁ་གྲོང་ཁྱེར་གྱིས་དབུལ་ཞྭ་ཕུད་པའི་ཕན་འབྲས་སྲ་བརྟན་དང་ཆེ་རུ་བཏང་ནས་སྤུས་ཚད་ལེགས་པའི་དབུལ་སྒྲོལ་ལ་དམ་པོར་དམིགས་ཏེ་སྒྲིག་སྲོལ་དང་ལམ་ལུགས་བཟོ་བར་ཤུགས་སྣོན་བརྒྱབ་ཅིང་། མིག་སྔའི་བར《དབུལ་པོ་བསྐྱར་ལོག་སྔོན་འགོག་གི་ལས་དོན་ལམ་ལུགས》དང《དབུལ་སྒྲོལ་བརྟན་པོ་ཡོང་བའི་ཕུགས་ཕན་ལམ་ལུགས》སོགས་ལམ་ལུགས་ཁག་10བཟོས་པ་དང་ཆབས་ཅིག རྫོང(ཆུས)ཁག་གིས་དབུལ་པོ་བསྐྱར་ལོག་སྔོན་འགོག་གི་སྔོན་བརྡའི་ལམ་སྲོལ་བཟོས་ནས་དབུལ་པོ་བསྐྱར་ལོག་གི་འཕྲལ་སྡོམ་ཆེད་དོན་མ་དངུལ་བཀོད་སྒྲིག་བྱས་པ་དང་། འགུལ་རྣམ་ལྟ་ཞིབ་ཚད་ལེན་ལ་ཤུགས་སྣོན་བརྒྱབ་ནས་གྲོང་གསེབ་ཀྱི་མ་མཐའི་འཚོ་བ་འགན་ལེན་དང་། སྐྱེ་ཁམས་ལས་གནས་དབུལ་སྒྲོལ། སློབ་གྲྭ་ཆེ་མོ་བའི་རོགས་དངུལ། དབང་པོ་སྐྱོན་ཅན་གྱི་ཁ་གསབ་སོགས་ཀྱི་ཐ་སྐྱོང་སྲིད་ཇུས་དོན་འཁྱོལ་གནད་སྨིན་བྱས་པ་རེད། སྲིད་ཇུས་དེ་དག་གི་རོགས་རམ་འོག་ན་ནིང་གྲོང་ཁྱེར་དེས་མཐའ་མཚམས་ཀྱི་དུད་ཚང་དབུལ་པོ་43གྱི་མི་150དབུལ་སྒྲོལ་ཐུབ་པ་དང་དབུལ་སྒྲོལ་བརྟན་པོ་མ་ཐུབ་པའི་དུད་ཚང་81གི་མི་256དབུལ་སྒྲོལ་ཐུབ་ཡོད། “སྡེ་ཁུལ་གྱི་ལས་བྱེད་པ་རྟག་ཏུ་ཁྱིམ་དུ་བདེ་སྡུག་འདྲི་བར་ཡོང་ནས་ང་ལ་འཕེལ་རྒྱས་ཀྱི་ཡིད་ཆེས་བརྟན་དུ་བཏང་ནས་འཚོ་བ་ཡག་པོ་སྐྱེལ་དགོས་པའི་ལྕག་སྐུལ་བྱས་བྱུང”ཞེས་པད་མ་ཆོས་འཛོམས་ཀྱིས་བརྗོད་པ་དང་། ཁོང་གིས“ཏང་དང་སྲིད་གཞུང་གིས་མང་ཚོགས་དབུལ་པོར་ཐུགས་ཁུར་དང་དྲོ་སྐྱིད་སྦྱིན་ཡོད་ལ། མང་ཚོགས་དབུལ་པོར་འབད་འཐབ་ཀྱི་ཁ་ཕྱོགས་ཀྱང་འཚོལ་རོགས་བྱས་བྱུང”ཞེས་བརྗོད།

དཀའ་ངལ་ལ་མི་འཛེམ་པར་མདུན་དུ་བསྐྱོད་དེ་འཕེལ་རྒྱས་བརྟན་པོ་དང་འབབ་འཕར་ཡོང་བར་སྐུལ་འདེད་བཏང་བ།

རིམས་ནད་ཀྱི་ཤུགས་རྐྱེན་མཐའ་གཅིག་ཏུ་ཆུང་དུ་བཏང་ནས་ནུས་ཤུགས་ཡོད་རྒུས་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་བླངས་ཤིང་། 2020ལོར་ཏོག་གསར་གློ་ཚད་རིམས་ནད་ཀྱི་མདུན་དུ་ལྷོ་ཁ་གྲོང་ཁྱེར་གྱིས་ཕྱོགས་གཅིག་ནས་རིམས་ནད་སྔོན་འགོག་དང་ཚོད་འཛིན་ལ་དམ་འཛིན་དང་། ཕྱོགས་གཞན་ཞིག་ནས་འཕེལ་རྒྱས་དང་བརྟན་ལྷིང་ལ་དམ་འཛིན་མཐའ་འཁྱོངས་བྱས་ནས། བྱེད་ཐབས་རབ་དང་རིམ་པ་སྤྱད་དེ་དབུལ་སྒྲོལ་འགག་སྒྲོལ་ལ་ཤུགས་རྐྱེན་ཐེབས་ཤུགས་ཆུང་དུ་བཏང་ཡོད།

2020ལོར་ལྷོ་ཁ་གྲོང་ཁྱེར་གྱིས《ལྷོ་ཁ་གྲོང་ཁྱེར་གྱི་ཁེ་ལས་ཀྱི་ལས་འགོ་བསྐྱར་འཛུགས་དང་ཐོན་སྐྱེད་སླར་གསོའི་ལས་དོན་གྱི་ལག་བསྟར་ཇུས་གཞི》བཟོས་པ་དང་འབྲེལ། དོན་འཁྱོལ་ནན་པོ་བྱས་ནས་དབུལ་སྐྱོར་རྣམ་གྲངས་ཚང་མ་ལས་འགོ་བསྐྱར་འཛུགས་དང་ཐོན་སྐྱེད་སླར་གསོ་ཐུབ་པའི་འགན་ལེན་བྱས་ཡོད། དེ་དང་ཆབས་ཅིག《འཛད་སྤྱོད་ཀྱི་དབུལ་སྐྱོར་བྱེད་སྒོ་སྤེལ་རྒྱུའི་སྐོར་གྱི་ལྷོ་ཁ་གྲོང་ཁྱེར་གྱི་ལག་བསྟར་ཇུས་གཞི》བཟོས་ནས་བཏོན་ཏེ་ལས་ཁུངས་དང་། ཁེ་ལས། བྱ་གཞག་ཚན་པ་བཅས་ཀྱིས་སྔོན་ལ་ཉོ་སྒྲུབ་དང་། ཆ་སྒྲིག་རོགས་སྐྱོར། འཛད་སྤྱོད་ཀྱི་དབུལ་སྐྱོར་ལས་སྟེགས་སྐྲུན་པ་སོགས་ཀྱི་བྱེད་ཐབས་སྤྱད་དེ་དབུལ་སྐྱོར་ཁེ་ལས་དང་། མཉམ་ལས་ཁང་། མང་ཚོགས་དབུལ་པོ་བཅས་ལ་དབུལ་སྐྱོར་ཐོན་རྫས་བྲིན་ཁ་མི་རྒྱུག་པའི་གནད་དོན་རིམ་བཞིན་ཐག་གཅོད་བྱེད་རོགས་བྱས་པ་རེད། “དྲ་ཐོག་གྲགས་ཅན+སྤྱི་ཚོགས་འབྲེལ་བའི་ལས་སྟེགས”དང་། “སྐད་འཕྲིན་ཚོང་པ+སྤྱི་ཚོགས་འབྲེལ་བའི་ལས་སྟེགས”“རྫོང་དཔོན་གྱིས་ཚོང་ཟོག་འོས་སྦྱོར་བྱེད་པ”སོགས་ཀྱི་བྱེད་སྟངས་འཚོལ་ཞིབ་ཧུར་ཐག་བྱས་ཏེ་དབུལ་སྐྱོར་ཐོན་རྫས་ཕྱིར་ཚོང་ལ་སྐུལ་འདེད་བཏང་བ་རེད། བསྡོམས་རྩིས་ལ་གཞིགས་ན། 2020ལོར་ལྷོ་ཁ་གྲོང་ཁྱེར་གྱི་དབུལ་སྐྱོར་ཐོན་རྫས་ཕྱིར་ཚོང་བྱེད་ཚད་སྒོར་དུང་ཕྱུར་3.25ཟིན་པ་དང་། གྲོང་ཁྱེར་དེ་ཡོངས་ཀྱི་ཏང་སྲིད་ལས་ཁུངས་དང་སྤྱི་ཚོགས་ཚོགས་པས་ས་ཁུལ་དབུལ་པོའི་ཞིང་འབྲོག་ཐོན་རྫས་ཉོ་སྒྲུབ་བྱེད་ཚད་སྒོར་ཁྲི་607.84ཟིན་པ། འཛད་སྤྱོད་ཀྱི་དབུལ་སྐྱོར་ཐོན་རྫས་ཀྱི་ཚོང་གཉེར་ཡོང་འབབ་སྒོར་ཁྲི་217.49ཟིན་ནས་ས་ཁུལ་དབུལ་པོའི་ཐོན་རྫས་བྲིན་ཁ་མི་རྒྱུག་པའི་གནད་དོན་ཐག་གཅོད་ནུས་ལྡན་ཐུབ་ཡོད་པ་རེད།

གཞན་ཡང་ངལ་ནུས་ཕྱིར་གཏོང་གནད་སྨིན་བྱ་རྒྱུ་མཐའ་འཁྱོངས་བྱས་ཤིང་། མིག་སྔར་ལྷོ་ཁ་གྲོང་ཁྱེར་གྱིས་རིམ་རྩིས་བྱས་ན། ཞིང་འབྲོག་ལས་མིའི་མཉམ་འབྲེལ་རུ་ཁག་432བཙུགས་ནས་ངལ་རྩོལ་ནུས་ཤུགས་མི་ཁྲི་4.68ལས་ཞུགས་གཞན་སྒྱུར་ཐུབ་རྒྱུར་སྐུལ་ཁྲིད་བྱས་པ་དང་ངལ་ནུས་ཡོང་འབབ་སྒོར་དུང་ཕྱུར་4.08བཏོད་ཡོད།

ཞན་ཆ་བསལ་ནས་འཕེལ་རྒྱས་ཀྱི་སྒུལ་ཤུགས་ཆེ་རུ་བཏང་བ།

2020ལོར་ལྷོ་ཁ་གྲོང་ཁྱེར་གྱིས“འགན་ལེན་གསུམ”གྱི་གྲུབ་འབྲས་ནུས་ཤུགས་ཡོད་རྒུས་སྲ་བརྟན་དུ་བཏང་ཞིང་། མིག་སྔར་སློབ་ཞུགས་གོང་གི་སློབ་གསོ་དང་། སློབ་ཆུང་གི་སློབ་གསོ། དམའ་རིམ་སློབ་འབྲིང་གི་སློབ་གསོ། མཐོ་རིམ་སློབ་འབྲིང་གི་སློབ་གསོ། ལས་རིགས་སློབ་གསོ། དམིགས་བསལ་སློབ་གསོ་བཅས་ཚུད་པའི་ཅུང་འཐུས་སྒོ་ཚང་བའི་དེང་རབས་ཀྱི་མི་རིགས་སློབ་གསོའི་མ་ལག་ཅིག་གཞི་རྩའི་ཆ་ནས་བསྐྲུན་ཡོད།

“སྔོན་ལ་སྨན་བཅོས་དང་རྗེས་སུ་སྨན་རིན་རྩིས་ཞུའི”ལམ་ལུགས་ཕྱོགས་ཡོངས་ནས་ཁྱབ་གདལ་བཏང་སྟེ་ཡིག་ཚགས་དང་གཱ་བཟོས་པའི་མི་འབོར་དབུལ་པོ་འགན་བཅོལ་ལ་ཞུགས་ཚད་100%ཟིན་པ་དང་། ཡིག་ཚགས་དང་གཱ་བཟོས་པའི་དུད་ཚང་དབུལ་པོ་དང་སྨན་པའི་དབར་གན་རྒྱ་འཇོག་ཚད་100%ཟིན་ཡོད།

དུས་མཚུངས་སུ་ཐོན་ལས་ཀྱི་ཕན་འབྲས་འདོན་སྤེལ་ལ་མཐོང་ཆེན་བྱས་ཤིང་། “ལོ་ལྔ་ཚན་བཅུ་གསུམ་པའི”རིང་། ལྷོ་ཁ་གྲོང་ཁྱེར་གྱིས་འདེབས་འཛུགས་ལས་རིགས་དང་། གསོ་ཚགས་ལས་རིགས། ལས་སྣོན་ལས་རིགས། ཚོང་དོན་འཁོར་རྒྱུག་ལས་རིགས། རིག་གནས་ཡུལ་སྐོར་ལས་རིགས། ཐོན་ཁུངས་གསར་སྤེལ་བེད་སྤྱོད་སོགས་རིགས་ཆེ་གྲས་6གི་ཐོན་ལས་རྣམ་གྲངས་217ལག་བསྟར་བྱ་རྒྱུའི་འཆར་འགོད་བྱས་པ་དང་། ཁྱོན་མ་དངུལ་སྒོར་དུང་ཕྱུར་44.8བཏང་ནས་མི་ཁྲི་2.8ལ་ཡོང་འབབ་འཕར་བར་ཁྱབ་འགྱེད་སྐུལ་ཁྲིད་བྱས་པས་མི་16850ཐོན་ལས་དབུལ་སྒྲོལ་ཐུབ་ཡོད།

ཏང་དང་སྲིད་གཞུང་གི་ཐུགས་ཁུར་འོག་ལྷོ་ཁ་གྲོང་ཁྱེར་ལྷོ་བྲག་རྫོང་ཚེ་སྨད་སྡེ་ཁུལ་གྱིས་བོད་བྱ་གསོ་ཚགས་མཉམ་ལས་ཁང་བཙུགས་ནས་དུད་ཚང་42ཀྱི་མི་172ལ་ཡོང་འབབ་འཕར་བར་སྐུལ་ཁྲིད་བྱས་པ་ལས་དུད་ཚང་དབུལ་པོ་13གྱི་མི་31ཡོད་པ་རེད། “ད་ཆ་ང་ཚོས་བོད་བྱ་གསོ་ཚགས་བྱེད་པ་མ་ཟད། ད་དུང་དྲོད་ཁང་ཆེ་མོའི་སྔོ་ཚལ་འདེབས་འཛུགས་ཀྱང་བྱས་པས‘འབབ་འཕར་ལམ་བུ’ཇེ་ཡངས་སུ་ཕྱིན་སོང”ཞེས་ཚེ་སྨད་སྡེ་ཁུལ་གྱི་ཏང་ཀྲི་པུའི་ཧྲུའུ་ཅི་ཡོན་ཏན་གྱིས་དགའ་ཚོར་ཆེན་པོས་བརྗོད།