ཐོན་ལས་དར་རྒྱས་ཡོང་བ་བྱ་རྒྱུ་ནི་གྲོང་གསེབ་དར་རྒྱས་གཏོང་བའི་རྨང་གཞི་ཡིན་ལ་ཝུའུ་ཧན་གྱི་བོད་སྐྱོར་ལས་དོན་གྱི་ལས་འགན་གལ་ཆེན་ཨང་དང་པོ་དེའང་ཡིན་པ་རེད། ཉེ་བའི་ལོ་ཤས་རིང་། ཝུའུ་ཧན་གྱི་བོད་སྐྱོར་ལས་དོན་རུ་ཁག་ཁག་དགུ་པའི་རོགས་རམ་འོག་ལྷོ་ཁ་གྲོང་ཁྱེར་སྣེ་གདོང་ཆུས་ཕོ་བྲང་ཤང་བསོད་ནམས་གྲོང་ཚོས་ཨ་བི་ཥ་དཔེ་སྟོན་འདེབས་འཛུགས་ཐོན་ལས་འཕེལ་རྒྱས་བཏང་བར་ཕན་འབྲས་མངོན་གསལ་དོད་པོ་ཐོན་ཡོད་པ་རེད། སྲོལ་རྒྱུན་གྱི་འདེབས་འཛུགས་ལས་རིགས་ལས་མུའུ་རེ་ནས་ཡོང་འབབ་ལྡབ་10ཙམ་འཕར་བ་མ་ཟད། ཕོ་བྲང་ཤང་གིས་ཀྱང་གྲོང་གསེབ་ཀྱི་ཐོན་ལས་འཕེལ་རྒྱས་ཐད་གོམ་སྟབས་བརྟན་པོ་ཞིག་སྤོས་ཡོད།

2019ལོར། ཝུའུ་ཧན་གྱི་བོད་སྐྱོར་ལས་དོན་རུ་ཁག་ཁག་དགུ་པས་གྲོང་གསེབ་དར་རྒྱས་ཏང་ཀྲི་པུས་གཞི་རིམ་བཅོས་སྐྱོང་བྱེད་སྟངས་གསར་པ་ཁྱབ་གདལ་བཏང་སྟེ་རྩ་འཛུགས་དར་རྒྱས་ལ་བརྟེན་ནས་ཐོན་ལས་དར་རྒྱས་གཏོང་རྒྱུ་སྣེ་ཁྲིད་དུ་བྱ་རྒྱུ་དམ་འཛིན་བྱ་གཞིར་བྱེད་པ་དང་། “ཤང་ཧྲིལ་པོར་སྐུལ་འདེད་གཏོང་བ་དང་ཁུལ་ཧྲིལ་པོར་རིམ་སྤོར་བྱ་རྒྱུ”དམིགས་ཚད་དུ་བྱས་ནས་ཕོ་བྲང་ཤང་དུ་གྲོང་གསེབ་དར་རྒྱས་ཀྱི་ཏང་ཀྲི་པུའུ་ཚོད་འཛུགས་ལ་མཛུབ་ཁྲིད་དང་། བོད་སྨན་སྨན་རྒྱུ་འདེབས་འཛུགས་ཀྱི་ཏང་ཚོགས་ཆུང་འཛུགས་པ། 《གྲོང་གསེབ་དར་རྒྱས་ཀྱི་ཏང་ཀྲི་པུའུ་འཛུགས་སྐྱོང་ལས་དོན་གྱི་ལག་བསྟར་ཇུས་གཞི》བཟོས་ནས་ཐོན་ལས་འཕེལ་རྒྱས་དང་གྲོང་གསེབ་དར་རྒྱས་གཏོང་བའི་ལས་དོན་མཉམ་འདྲེས་གཏིང་ཟབ་བྱས་ཏེ་ཏང་རྩ་འཛུགས་ཀྱིས་ཁྱོན་ཡོངས་ལ་གཅིག་འདོམས་དང་། ཁྱོན་ཡོངས་ལ་ཁྱབ་པ། ཁྱོན་ཡོངས་ནས་ལག་བསྟར་བྱ་རྒྱུའི་འགན་ལེན་བྱས་པ་རེད།

ཞིང་དུད་ཀྱི་ཧུར་བརྩོན་རང་བཞིན་སྐོང་འཐེན་གང་ལེགས་བྱས་ནས་ས་ཆའི་ཐོན་ཁུངས་ནུས་ལྡན་ངང་སྤྱོད་ཆེད། བསོད་ནམས་གྲོང་ཚོའི“ཨུ་ལྷན་གཉིས”དང་བོད་སྐྱོར་ལས་དོན་རུ་ཁག་གིས་རྒྱ་ཁྱབ་ངང་སྐུལ་སློང་དང་དྲིལ་བསྒྲགས་ཤུགས་ཆེན་བྱས་ཏེ་2019ལོར་བསོད་ནམས་གྲོང་ཚོའི་ཞིང་དུད་སྒྲིག་འཛུགས་ཀྱིས་ཨ་བི་ཥ་མུའུ་20ཚོད་འདེབས་བྱས་པ་དང་འདེབས་འཛུགས་ཁྱབ་གདལ་བཏང་བར་གྲུབ་འབྲས་ཐོབ་རྗེས་2020ལོར་སླར་ཡང་མྱུ་གུ་མུའུ་20དང་ས་བོན་ཞིང་ཁ་མུའུ་5འདེབས་འཛུགས་བྱས་པ་རེད།

གཞན་ཡང་ཐོན་ལས་རྒྱུན་མཐུད་ཆོག་པའི་འཕེལ་རྒྱས་འགྲོ་རྒྱུ་འགན་ལེན་བྱ་ཆེད། བསོད་ནམས་གྲོང་ཚོས་ན་གཞོན་ཞིང་འབྲོག་པ་མང་དག་ཅིག་ཏང་ཡོན་དང་ཨ་བི་ཥ་འདེབས་འཛུགས་ལག་རྩལ་པར་གསོ་སྐྱོང་བྱས་པ་དང་། ཏང་ཡོན་དང་ལག་རྩལ་པ་ལས་གཏོད་འཇོན་ཐང་ཅན་དུ་གསོ་སྐྱོང་བྱས་པ། ལས་གཏོད་ཤེས་ལྡན་པ་གྲོང་གསེབ་དར་རྒྱས་ཀྱི་འཐབ་ཇུས་དོ་དམ་ཤེས་ལྡན་པར་གསོ་སྐྱོང་བྱས་པ་དང་ཆབས་ཅིག ཕྱིར་ཚོང་ཐབས་ལམ་ཟམ་མི་ཆད་པར་རྒྱ་ཆེར་བཏང་ནས་ཨ་བི་ཥ་འདེབས་འཛུགས་མ་བྱས་གོང་ནས་ཚོང་པས་རང་འགུལ་ངང་མངགས་ཉོ་བྱེད་པར་ཡོང་གི་ཡོད།

 བྱེད་ཐབས་སྣ་མང་མཉམ་སྤྱོད་བྱས་པ་བརྒྱུད། ཕོ་བྲང་ཤང་གིས“ཁྱད་ལྡན་དང་། སྤུས་ལེགས། ཕན་ཆེ”བཅས་ཀྱི་ཨ་བི་ཥ་འདེབས་འཛུགས་འཕེལ་རྒྱས་ཀྱི་ལམ་བུར་གྲུབ་འབྲས་ཐོབ་པའི་ངང་བསྐྱོད་དེ་ཁྱོན་ཡོངས་ནས་གྲོང་གསེབ་དར་རྒྱས་འགྲོ་རྒྱུར་ཐབས་ལམ་གསར་པ་ཞིག་བཏོད་ཡོད།

འདི་ལོའི་ཟླ་5པར་བསོད་ནམས་གྲོང་ཚོའི་ཨ་བི་ཥ་འདེབས་འཛུགས་རྟེན་གཞིར་ཐོན་འབབ་བསྡུ་བའི་དུས་ལ་སླེབས་ཡོད། སྣེ་གདོང་ཆུས་ཕོ་བྲང་ཤང་བསོད་ནམས་གྲོང་ཚོའི་ཨ་བི་ཥའི་ཞིང་ནང་དུ་མེ་ཏོག་སྨུག་པོས་ཁེངས་ཤིང་། སྐྱེ་འཚར་བཟང་བའི་ཨ་བི་ཥ་དེ་དག་བསོད་ནམས་གྲོང་ཚོའི་ཚོགས་ཆུང་བཞི་པའི་གྲོང་མིའི་ལོ་ལེགས་ཀྱི་རེ་བ་ཞིག་ཏུ་གྱུར་ཡོད། འདེབས་འཛུགས་དུད་ཚང་ཚེ་རིང་དོན་གྲུབ་ཀྱིས“གཞེས་ཉིང་ངའི་ཁྱིམ་གྱིས་ཨ་བི་ཥ་མུའུ་0.8བཏབ་པ་ཡིན། འདི་ལོའི་ཐོན་འབབ་ནས་བལྟས་ཚེ་ཡོང་འབབ་སྒོར་ཁྲི་3ཙམ་ཡོང་བཟོ་འདུག སྐྱེ་དངོས་གཞན་བཏབ་པ་ལས་ཁེ་བཟང་ཆེ་བ་དང་ཡོང་འབབ་མང་བ་འདུག”ཅེས་དགའ་སྤྲོའི་ངང་བཤད།

ཏང་གི་དམངས་ཕན་སྲིད་ཇུས་རབ་དང་རིམ་པའི་སྐུལ་ཁྲིད་ནུས་ལྡན་འོག ཝུའུ་ཧན་གྱི་བོད་སྐྱོར་ལས་དོན་རུ་ཁག་ཁག་དགུ་པ་དང་གྲོང་གསེབ་དར་རྒྱས་ཀྱི་ཏང་ཀྲི་པུའི་ཐུན་མོང་འབད་བརྩོན་བརྒྱུད། ཨ་བི་ཥ་འདེབས་འཛུགས་ཀྱི་གདམ་ག་བྱས་པ་ལས་ས་ཞིང་སྤྱོད་ཚད་མཐོ་རུ་ཕྱིན་པ་མ་ཟད། ད་དུང་ངལ་ནུས་ལ་བཅིངས་འགྲོལ་ཐོབ་པ་དང་གྲོང་མི་ཚོའི་སྲོལ་རྒྱུན་གྱི་འདེབས་འཛུགས་ལས་རིགས་ལ་འགྱུར་ལྡོག་སོང་ནས་ཕན་ནུས་ཆེ་བའི་ཐོན་སྐྱེད་ཁྲོད་ཞུགས་ཐུབ་པ་བྱུང་ཡོད། ཀླུ་བདུད་ནག་པོ་བཏབ་པ་ཁོ་ནས་དུད་ཚང་45ཡི་མི་200ལྷག་ཙམ་ལ་ཐད་ཀར་འབབ་འཕར་ཡོང་རྒྱུར་སྐུལ་ཁྲིད་ཐུབ་ཡོད།

བསོད་ནམས་གྲོང་ཚོའི་གྲོང་ཚོ་ཨུ་ལྷན་གྱི་ཀྲུའུ་རེན་པ་སངས་ཟླ་བས“ད་ཆ་ཨ་བི་ཥ་བཏབ་པའི་ཡོང་འབབ་ཞིང་ལས་སྐྱེ་དངོས་གཞན་དག་ལས་མཐོ་བ་ཡོད་ལ། ས་བོན་གྲོང་ཚོས་ཉོ་གི་ཡོད་པ་དང་ཚོང་ལམ་ལ་དེ་བས་སེམས་ཁྲལ་བྱེད་དགོས་མེད། ཨ་བི་ཥ་འདེབས་མཁན་གྲོང་མི་ཚོའི་ཧུར་སེམས་ཧ་ཅང་ཆེན་པོ་ཡོད། གོམ་སྟབས་རྗེས་མར་ང་ཚོས་ཨ་བི་ཥ་འདེབས་ཁྱོན་ཆེ་རུ་གཏོང་བ་དང་ཨ་བི་ཥའི་ཐོན་ལས་སྟོབས་ཆེར་བཏང་སྟེ་གྲོང་མི་དེ་བས་མང་བར་འབབ་འཕར་ཕྱུག་འགྱུར་ཡོང་རྒྱུར་སྐུལ་ཁྲིད་བྱེད་ཀྱི་ཡིན”ཞེས་བཤད།