ཉིན་ཤས་གོང་གསར་འགོད་པར་ལྗོངས་ཡོངས་ཀྱི་ཞིང་འབྲོག་ལས་ཀྱི་ལས་དོན་ཚོགས་འདུའི་ཐོག་ནས་ཤེས་རྟོགས་བྱུང་བར། “ལོ་ལྔ་ཚན་བཅུ་གསུམ་པའི”རིང་ལྗོངས་ཡོངས་ཀྱི་རིམ་ཁག་ཞིང་ལས་དང་གྲོང་གསེབ་སྡེ་ཚན་གྱིས་ཞིང་འབྲོག་ལས་ཀྱི་མཁོ་སྤྲོད་ཕྱོགས་ཀྱི་གྲུབ་ཆའི་རང་བཞིན་གྱི་སྒྱུར་བཅོས་མུ་མཐུད་གཏིང་ཟབ་ཏུ་བཏང་བར་དགའ་འོས་པའི་གྲུབ་འབྲས་ཐོབ་ཡོད། 2020ལོའི་ལོ་མཇུག་བར་རང་ལྗོངས་ཀྱི་འབྲུ་རིགས་ཐོན་ཚད་ཏུན་ཁྲི་103ཟིན་པ་ལས། ནས་ཀྱི་ཐོན་ཚད་ཏུན་ཁྲི་79.5ཟིན་ཏེ་འབྲུ་རིགས་ཐོན་ཚད་ལོ་6བསྟུད་མར་ཏུན་ཁྲི་100ལས་བརྒལ་བ་དང་། སྔོ་ཚལ་ཐོན་ཚད་ཏུན་ཁྲི་100ཟིན་ནས་དབྱར་དུས་སུ་གྲོང་ཁྱེར་དང་གྲོང་རྡལ་གཙོ་བོར་སྔོ་ཚལ་རང་མཁོ་རང་སྤྲོད་ཐུབ་ཚད་85%ལས་བརྒལ་བ། ཤ་དང་འོ་མ་ཐོན་ཚད་ཏུན་ཁྲི་100ཟིན་ནས། ཆ་སྙོམས་མི་རེས་ཤ་དང་འོ་མ་བཟུང་ཚད་རྒྱལ་ཡོངས་ཀྱི་མདུན་གྲལ་དུ་སླེབས་ཏེ། 2020ལོར་རྒྱལ་སྲིད་སྤྱི་ཁྱབ་ཁང་གིས་རང་ལྗོངས་ལ་དཀྲིས་པའི་ཕག་པ་གསོ་ཚགས་སླར་གསོའི་ལས་འགན་ཚད་ལས་བརྒལ་ནས་ལེགས་གྲུབ་བྱུང་ཡོད་པ་རེད།

“ལོ་ལྔ་ཚན་བཅུ་གསུམ་པའི”རིང་རང་ལྗོངས་ཀྱིས་ཚད་གཞི་མཐོ་བའི་ཞིང་ཁ་མུའུ་ཁྲི་200.08གསར་སྐྲུན་བྱས་པ་དང་། ལོ་རེར་ཆ་སྙོམས་བྱས་ན་ལོ་ཏོག་གི་སོན་བཟང་མུའུ་ཁྲི་200ཡན་ཁྱབ་གདལ་བཏང་བ། རིམ་རྩིས་བྱས་ན་རྒྱུད་བཟང་ཕྱུགས་རིགས་མགོ་གྲངས་ཁྲི་510གསོ་ཚགས་བྱས་པ་དང་མི་ཐབས་ཀྱི་སྤུས་ལེགས་གཟན་རྩྭའི་རྟེན་གཞི་མུའུ་ཁྲི་135བསྐྲུན་པ། རྩྭ་ཐང་ལ་གོང་གི་ལོ་གསུམ་ནང་ལྕགས་དྲ་མུའུ་ཁྲི་1000བསྐོར་རྒྱུའི་ལོ་འཁོར་གྱི་ལས་འགན་ཚད་ལས་བརྒལ་ནས་ལེགས་སྒྲུབ་བྱས་ཡོད།

“ལོ་ལྔ་ཚན་བཅུ་གསུམ་པའི”རིང་རང་ལྗོངས་ཀྱིས་ནས་དང་། འབྲི་གཡག བོད་ཕག བོད་ལུག དཀར་ཆུའི་ལས་རིགས། སྔོ་ཚལ། གཟན་རྩྭ་བཅས་ཀྱི་ཐོན་ལས་ཆེན་པོ་བདུན་གཙོ་གནད་དུ་བཟུང་བའི“7+N”ཐོན་ལས་འཕེལ་རྒྱས་ཀྱི་རྣམ་པ་ཞིག་ཆགས་པར་བྱས་པ་དང་ས་མཐོའི་ཁྱད་ལྡན་སྐྱེ་དངོས་ཐོན་ལས་རྟེན་གཞི་བཅུ་གཙོ་བོར་བཟུང་བའི་རྒྱལ་ཁབ་ཀྱི་ས་མཐོའི་ཁྱད་ལྡན་ཞིང་ལས་ཐོན་རྫས་ཀྱི་རྟེན་གཞི་གལ་ཆེན་བསྐྲུན་ཡོད། སྣེ་འདྲེན་ཁེ་ལས་དང་ཞིང་འབྲོག་པའི་ཆེད་ལས་མཉམ་ལས་ཁང་162དང་13475སོ་སོར་ཟིན་པ་དེ་2015ལོ་དང་བསྡུར་ན་65%ཟིན་པ་དང་ལྡབ་1.9འཕར་ཡོད། སྣེ་འདྲེན་ཁེ་ལས་དང་ཞིང་འབྲོག་ཐོན་རྫས་ལས་སྣོན་ལས་རིགས་ཀྱི་ཐོན་རྫས་རིན་ཐང་བསྡོམས་འབོར་2015ལོ་དང་བསྡུར་ན་ལྡབ་འཕར་བྱུང་བ། ཞིང་འབྲོག་ཐོན་རྫས་ལས་སྣོན་ཕྱོགས་བསྡུས་གཞན་སྒྱུར་བྱེད་ཚད་15%ཟིན་ནས་ཞིང་འབྲོག་ལས་ཐོན་ལས་ཅན་དུ་འགྱུར་རྒྱུ་དེ་མགྱོགས་ལམ་དུ་སླེབས་ཡོད།

“ལོ་ལྔ་ཚན་བཅུ་གསུམ་པའི”རིང་། རང་ལྗོངས་ཀྱིས་གྲོང་གསེབ་ཀྱི་འགན་གཙང་ས་ཆའི་བདག་དབང་གཏན་འཁེལ་ཐོ་འགོད་དང་ལག་ཁྱེར་སྤྲོད་པའི་ལས་དོན་གཞི་རྩའི་ཆ་ནས་ལེགས་གྲུབ་ཟིན་ཏེ་ལག་ཁྱེར་སྤྲོད་ཚད་99.62%ཟིན་པ་དང་། གྲོང་ཚོའི་མཉམ་སྡེབ་བདག་དབང་ལམ་ལུགས་སྒྱུར་བཅོས་ལས་དོན་ལྗོངས་ཡོངས་ཀྱི་ཁྱབ་ཁོངས་སུ་ཁྱབ་གདལ་བཏང་བ། རྒྱུ་ནོར་གཙང་བཤེར་དང་མ་རྩ་ཞིབ་རྩིས་ཀྱི་ལས་དོན་ཕྱོགས་ཡོངས་ནས་ལེགས་གྲུབ་ཟིན་པ། ཆུ་ཤུར་དང་བྲག་ཡིབ་སོགས་རྫོང(ཆུས)10ཡིས་ཀྲུང་དབྱང་གི་གྲོང་གསེབ་ཀྱི་མཉམ་སྡེབ་བདག་དབང་ལམ་ལུགས་སྒྱུར་བཅོས་ཀྱི་རྫོང(ཆུས)ཧྲིལ་པོའི་ཚོད་ལྟའི་ལས་འགན་བདེ་བླག་ངང་ལེགས་སྒྲུབ་བྱས་པ། “1+6”གྲོང་གསེབ་སྒྱུར་བཅོས་ཚོད་ལྟ་ཁུལ་གྱི་ལས་དོན་ལ་བདེ་བླག་ངང་སྐུལ་འདེད་བཏང་བ། ས་རྒོད་གསར་སྦོལ་གྱི་རྒྱལ་ཁབ་ལ་དབང་བའི་ཞིང་རའི་སྒྱུར་བཅོས་ལས་དོན་གཞི་རྩའི་ཆ་ནས་ལེགས་སྒྲུབ་བྱུང་བ། ཆུ་ཤུར་རྫོང་དང་སྣེ་གདོང་ཆུས་ཀྱི་གྲོང་གསེབ་ཀྱི་ཁང་སའི་ལམ་ལུགས་སྒྱུར་བཅོས་ཚོད་ལྟའི་ལས་དོན་དངོས་སུ་སྤེལ་འགོ་ཚུགས་པ། སྒྱུར་བཅོས་ལས་དོན་ཁག་ཕྱོགས་ཡོངས་ནས་སྤེལ་བས་ཞིང་འབྲོག་ཁུལ་གྱི་འཕེལ་རྒྱས་གསོན་ཤུགས་ཇེ་ཆེར་སོང་ཡོད།