དབྱར་ཁ་ཤར་ནས་ཡུན་རིང་མ་སོང་ཡང་གངས་ལྗོངས་ས་མཐོ་ལྗང་ཐིང་ངེར་གྱུར་པ་འདི་ནི་ཉེ་བའི་ལོ་ཤས་རིང་བོད་ཀྱིས་རྒྱལ་ཁབ་ས་ཆ་སྔོ་འགྱུར་ལ་སྐུལ་འདེད་ཤུགས་ཆེན་བཏང་ནས“ནགས་ཚལ་མེད་པའི་ཤང་དང་གྲོང་རྡལ་དང་། ནགས་ཚལ་མེད་པའི་གྲོང་ཚོ་དང་ཚོགས་ཆུང་། ལྗང་མདོག་མེད་པའི་སྒོ་ར། ནགས་ཚལ་མེད་པའི་ཞིང་དུད། ཤིང་འཛུཌ་སྟོང་ཆ་བཅས་མེད་པར་བཟོ་བའི”“མེད་པར་བཟོ་བ་ལྔའི”བྱ་སྤྱོད་སྤེལ་བ་ལས་བྱུང་བ་ཞིག་རེད། མིག་སྔའི་བར། “སྐྱེ་ཤིང་མེད་པའི་གྲོང་ཚོ”1079དང“སྐྱེ་ཤིང་མེད་པའི་དུད་ཚང”ཁྲི་10.47ལྷག་ཙམ་གྱིས་གྲུབ་འབྲས་ཐོབ་པའི་ངང་སྐྱེ་ཤིང་བཙུགས་ནས། བོད་ཀྱི་རྩྭ་ཐང་གི་ཕྱོགས་བསྡུས་སྔོ་ཁེབས་ཁྱབ་ཚད་46.71%བར་ཟིན་པར་སྐུལ་ཁྲིད་བྱས་ཡོད་པ་རེད།

“སྔོན་ཆད་སྐྱེ་ཤིང་ཡོད་མེད་ལ་ཁྱད་པར་མི་འདུག་སྙམ་མོད། ད་ཆ་རང་གི་སྒོ་རའི་ནང་དང་ཡང་ན་གྲོང་ཚོར་ལྗོན་ཤིང་སྐྱེས་ཡོད་པ་མཐོང་ཚེ་ས་བབ་དམའ་བའི་ཁུལ་དུ་བསླེབས་པ་ལྟར་ཧ་ཅང་དགའ་པོ་འདུག” ད་ཆ་སྔོ་འགྱུར་ལས་དོན་དེ་གལ་འགངས་ཆེན་པོ་ཞིག་ཡིན་པ་རྟོགས་ནས་ཚང་མས་རང་འགུལ་ངང་ལྗང་མདོག་ལ་དགའ་ཞེན་དང་ལྗང་མདོག་ལ་སྲུང་སྐྱོང་བྱེད་ཀྱི་འདུག་ཅེས་མངའ་རིས་ས་ཁུལ་རྩྭ་མདའ་རྫོང་རྫ་རོང་གྲོང་ཚོའི་གྲོང་མི་བཅིངས་འགྲོལ་བདེ་སྐྱིད་ཀྱིས་བཤད།

“མེད་པར་བཟོ་བ་ལྔའི”བྱ་སྤྱོད་སྤེལ་རིང་། བོད་ཀྱི་གྲོང་ཁྱེར་དང་ས་ཁུལ་ཁག་གིས་ཞིང་འབྲོག་མང་ཚོགས་ལ་ནགས་བཟོ་སྔོ་འགྱུར་དང་བྱེ་འགོག་བྱེ་བཅོས་སོགས་སྐྱེ་ཁམས་ལས་གྲྭ་འཛུགས་སྐྲུན་ནང་ཞུགས་རྒྱུའི་ལྕག་སྐུལ་དང་ཁྲིད་སྟོན་བྱས་པས། ལོ་རེར་ཞིང་འབྲོག་པ་ཁྲི་10ཡན་གྱིས་རྒྱལ་ཁབ་ས་ཆ་སྔོ་འགྱུར་ནང་ཐད་ཀར་ཞུགས་ནས་མི་རེར་ཆ་སྙོམས་འབབ་འཕར་སྒོར་3000ཡས་མས་བྱུང་ཡོད་པ་རེད།

ས་ཁོངས་ཀྱི་ཁྱད་ཆོས་དང་ཟུང་འབྲེལ་བྱས་ཐོག ལྷོ་ཁ་གྲོང་ཁྱེར་དང་གཞིས་རྩེ་གྲོང་ཁྱེར་གྱིས་ས་བབ་མཐོ་ཚད་སྨི་4300ཡན་ཟིན་པའི་ས་ཁུལ་དུ་ཡུལ་ཤིང་བཙུགས་ནས་ཚོད་ལྟ་བྱས་པ་དང་། ལྷོ་ཁ་གྲོང་ཁྱེར་གྲ་ནང་རྫོང་གིས་སྡོང་ཕྲུག་འདེབས་འཛུགས་མཁས་ཅན་དང་ཁ་གཏད་སྦྲེལ་མཐུད་བྱས་ནས“ཞིང་ནགས་མཉམ་འདུས་དང་། ཕྲ་ལེབ་འདྲེས་མ། ཚོས་གཞི་སྣ་མང་། དུས་བཞིའི་ཁྱད་པར་མངོན་གསལ་དོད་པ”བཅས་ཀྱི་མཛེས་སྡུག་ལྡན་པའི་གྲོང་གསེབ་འཛུགས་སྐྲུན་ལ་སྐུལ་འདེད་བཏང་བ་རེད། གཞིས་རྩེ་གྲོང་ཁྱེར་ས་སྐྱ་རྫོང་གིས“ཀུང་སི་+ཞིང་དུད”ཀྱི་བྱེད་སྟངས་སྤྱད་དེ་ཞིང་དུད་ཀྱིས་སྐྱེད་སྲིང་བྱས་པའི་ཡུལ་ཤིང་ལྗང་མྱུག་བཙུགས་པས་ལྗང་མྱུག་སྐྱེ་ཚད་མང་དུ་ཕྱིན་པ་མ་ཟད། ད་དུང“སྔོ་འགྱུར་ལས་གནས་ལས་ཞུགས”དང“སྔོ་འགྱུར་དམངས་ཕྱུག”ལ་ཡང་སྐུལ་ཁྲིད་བྱས་ཡོད་པ་རེད།

2021ལོ་ནི་ཉིང་ཁྲི་གྲོང་ཁྱེར་གྱིས་ཁམ་བུའི་མེ་ཏོག་དུས་ཆེན་གཉེར་བའི་ལོ་ཉི་ཤུ་པ་ཡིན་ཞིང་། ཁམ་བུའི་མེ་ཏོག་གི་མིང་བྱང་ལ་བརྟེན་ནས། ཉིང་ཁྲི་གྲོང་ཁྱེར་གྱིས་གྲོང་གསེབ་ཀྱི་ཡུལ་སྐོར་འཕེལ་རྒྱས་ལ་རྒྱུན་ཆད་མེད་པར་སྐུལ་འདེད་བཏང་བས། ཡུལ་སྐོར་བ་ཚོས་མཛེས་སྡུག་ལྡན་པའི་ཁམ་བུའི་མེ་ཏོག་ལྟ་ཐུབ་པ་མ་ཟད་ད་དུང་གྲོང་གསེབ་ཀྱི་འཚོ་བར་མྱོང་རོལ་དང་། བོད་ཁྱིམ་གྱི་ཁ་ལག་ཟ་བ། བོད་ཁྱིམ་སྤྲོ་ཁང་དུ་ཞག་སྡོད་བཅས་ཀྱང་བྱེད་ཐུབ་ཡོད་ལ། ས་གནས་དེ་གའི་མང་ཚོགས་ལའང་ཕན་འབྲས་དངོས་ཐོབ་ཡོད་པ་རེད།

ལོ་26ལ་སླེབས་པའི་ཚེ་རིང་གཡང་འཛོམས་ནི་ཀོང་པོ་རྒྱ་མདའ་རྫོང་མཚོ་མཇུག་གྲོང་ཚོའི་ཡུལ་མི་ཞིག་ཡིན། བྲག་གསུམ་མཚོའི་མཛེས་ལྗོངས་ཁུལ་སྐད་གྲགས་ཇེ་ཆེར་སོང་བ་དང་བསྟུན་ནས། ཁོང་ཡང་མཛེས་ལྗོངས་ཁུལ་དེའི་འགྲེལ་བཤད་པ་ཞིག་ཏུ་གྱུར་པ་རེད། “སྔོན་ཆད་ཡུལ་སྐོར་བ་ཡོང་གི་ཡོད་མོད། ཡིན་ནའང་གྲོང་ཚོའི་ནང་དུ་རླངས་འཁོར་འཇོག་ས་དང་ཟ་ཁང་སོགས་རྨང་གཞིའི་སྣེ་ལེན་སྒྲིག་བཀོད་ཆ་ཚང་པོ་མེད། ད་ཆ་རྨང་གཞིའི་སྒྲིག་བཀོད་འཐུས་སྒོ་ཚང་དུ་སོང་བས་ཡུལ་སྐོར་བར་སྣེ་ལེན་ཞུ་ཚད་མང་དུ་ཕྱིན་ནས། ཡུལ་སྐོར་བ་མང་ཤོས་ཀྱི་སྐབས་སུ་ཟླ་རེར་སྒོར་8000ལྷག་ཙམ་རག་གི་འདུག”ཅེས་ཁོང་གིས་བཤད།

བོད་རང་སྐྱོང་ལྗོངས་ནགས་ལས་རྩྭ་ཐང་ཅུས་ཀྱི་འབྲེལ་ཡོད་སྡེ་ཚན་གྱིས་ངོ་སྤྲོད་བྱས་པར་གཞིགས་ན། འདི་ལོའི་བོད་ཀྱི་ཤིང་འཛུགས་ནགས་བཟོའི་ལས་དོན་སྤེལ་བར་ལྷ་ས་དང་། གཞིས་རྩེ། ལྷོ་ཁ་བཅས་གྲོང་ཁྱེར་གསུམ་གཙོ་གནད་དུ་བཟུང་ནས་གཅིག་སྡུད་ཡུག་འབྲེལ་གྱི་གཞི་ཁྱོན་ལྡན་པའི་ཤིང་འཛུགས་ནགས་བཟོའི་ཕན་འབྲས་ཐོན་ཅི་ཐུབ་བྱས་པ་དང་། གྲོང་ཚོ་དང་དུད་ཚང་ཚང་མར་སྐྱེ་ཤིང་ཡོད་པ་དང་གྲོང་གསེབ་ཀྱི“གཞོགས་བཞིར”ཤིང་འཛུགས་བྱ་སྤྱོད་སྤེལ་བའི་ཕན་འབྲས་སྲ་བརྟན་དང་ཆེ་རུ་གཏོང་བ། སྐྱེ་ཁམས་སྡོད་མལ་གྱི་མཛེས་སྡུག་ལྡན་པའི་གྲོང་གསེབ་གཏོད་པ་བཅས་བྱས་ནས། མཛེས་ཤིང་གཙང་བའི་གྲོང་གསེབ་ཀྱི་སྡོད་མལ་ཁོར་ཡུག་གཏོད་རྒྱུ་ཡིན་པ་རེད།