འདི་ནི་ཚའེ་ཧོ་སེན་གྱི་འདྲ་པར་ཡིན་པ། (དཔྱད་གཞིའི་འདྲ་པར)
བློ་མཐུན་ཚའེ་ཧོ་སེན་ནི་1895ལོའི་ཟླ་3པར་ཧྲང་ཧའེ་རུ་འཁྲུངས་ཤིང་། ལོ་4ལ་སླེབས་དུས་ཨ་མ་དང་མཉམ་དུ་ཕ་ཡུལ་ཧུའུ་ནན་ཤང་ཤང་རྫོང(ད་ཆའི་ཧྲོང་ཧྥེང་རྫོང)དུ་ལོག བློ་མཐུན་ཚའེ་ཧོ་སེན་གྱིས་གཞོན་ནུ་ལོ་ཆུང་གི་སྐབས་ནས“དཀའ་ཚེགས་ལས་སྒྲོལ་ནས་མི་དམངས་སྐྱོབ་པའི”ཕུགས་བསམ་ཆེ་མོ་བཅངས་ནས་ཀྲུང་གོར་བཅོས་སྒྱུར་བྱེད་པའི་བློ་ཐག་བཅད་པ་རེད། ཧུའུ་ནན་ཞིང་ཆེན་གྱིས་བཙུགས་པའི་དགེ་འོས་སློབ་གྲྭ་དང་པོ་འགྲིམ་སྐབས་ཁོང་དང་མའོ་ཙེ་ཏུང་བློ་སེམས་གཅིག་མཐུན་གྱི་གྲོགས་པོར་གྱུར་ནས་ཧུའུ་ནན་གྱི་སྔོན་ཐོན་གཞོན་ནུའི་མིག་དཔེར་གྱུར།
1918ལོར་ཚའེ་ཧོ་སེན་དང་མའོ་ཙེ་ཏུང་སོགས་བློ་མཐུན་གྱིས་ཁྲང་ཧྲ་རུ་དམངས་གསར་སློབ་ཚོགས་ཐུན་མོང་ཐོག་སྒྲིག་འཛུགས་གནང་ནས་རིག་གཞུང་གསར་སྒྱུར་དང་། སྤྱོད་ཚུལ་ཞུན་བརྡར། མི་སེམས་དང་གོམས་སྲོལ་ལེགས་སྒྱུར་བཅས་དམིགས་ཡུལ་དུ་བྱས། 1919ལོར་པེ་ཅིང་དུ་ལྔ་བཞིའི་རྒྱལ་གཅེས་ལས་འགུལ་ལངས་པས་ཧྥ་རན་སེར་ལས་སློབ་གཉིས་བརྩོན་དུ་འགྲོ་རྒྱུར་གྲ་སྒྲིག་བྱེད་བཞིན་པའི་བློ་མཐུན་ཚའེ་ཧོ་སེན་གྱིས་པེ་ཅིང་དུ་ཡོད་པའི་ཧུའུ་ནན་གྱི་སློབ་མ་སྒྲིག་འཛུགས་བྱས་ཏེ་བཙན་རྒྱལ་རིང་ལུགས་དང་བཀས་བཀོད་རྒྱུད་འཛིན་ལ་ངོ་རྒོལ་བྱེད་པའི་ལས་འགུལ་ནང་ཞུགས་པ་རེད།
ཨུ་རུ་སུའི་ཟླ་བཅུ་པའི་གསར་བརྗེའི་ཤུགས་རྐྱེན་དང་ལྔ་བཞིའི་ལས་འགུལ་གྱི་སྐུལ་སྤེལ་འོག་ཧྥ་རན་སེར་ལས་སློབ་གཉིས་བརྩོན་དུ་འགྲོ་མཁན་ཇེ་མང་དུ་གྱུར། 1919ལོའི་ལོ་མཇུག་ཏུ་བློ་མཐུན་ཚའེ་ཧོ་སེན་གྱིས་གསར་བརྗེའི་ཕུགས་བསམ་དོན་གཉེར་བྱེད་པའི་སྤྲོ་སེམས་ཆེན་པོ་བཅངས་ནས་ཧྥ་རན་སེར་ལས་སློབ་གཉིས་བརྩོན་བྱེད་པར་བསྐྱོད། ཁོང་གིས་ཧྥ་རན་སེ་ནས་རྒྱལ་ཁབ་གཞན་གྱི་ཤེས་དཔལ་གྱི་རྡབ་རྡེག་དང་བསམ་བློའི་དུས་རླབས་མྱོང་བཞིན་མར་ཁེ་སི་རིང་ལུགས་ཀྱི་གསུང་རྩོམ་མང་པོ་གཟིགས་པ་དང་ཡིག་སྒྱུར་གནང་ཞིང་། 《གུང་ཁྲན་ཏང་གི་བསྒྲགས་གཏམ》དང《སྟོང་བསམ་ནས་ཚན་རིག་དང་མཐུན་པའི་བར་གྱི་སྤྱི་ཚོགས་རིང་ལུགས་ཀྱི་འཕེལ་རྒྱས》སོགས་བརྩམས་ཆོས་ཀྱི་གལ་ཆེའི་ནང་དོན་བསྒྱུར་ཏེ་ཨུ་རུ་སུའི་ཟླ་བཅུ་པའི་གསར་བརྗེ་དང་དེ་བཞིན་རྒྱལ་ཁབ་ཁག་གི་བཟོ་པའི་ལས་འགུལ་དྲིལ་བསྒྲགས་བྱས་ནས་མར་ཁེ་སི་རིང་ལུགས་པ་བློ་རྩ་བརྟན་པོ་ཞིག་ཏུ་གྱུར། ཁོང་གིས་བློ་མཐུན་ཁྲེན་ཏུའུ་ཤིའུ་དང་མའོ་ཙེ་ཏུང་ལ་འཕྲིན་ཡིག་སྤྲིངས་ནས་གུང་ཁྲན་ཏང་འཛུགས་རྒྱུའི་སྐོར་ལ་གྲོས་བསྡུར་གནང་སྟེ་ཏང་གི་ངོ་བོ་དང་མཛུབ་ཁྲིད་དགོངས་པ་སོགས་ཀྱི་ཐད་ཡང་དག་པའི་བཞེད་པ་བཏོན་ནས“ཀྲུང་གོ་གུང་ཁྲན་ཏང”ཞེས་པའི་མིང་འདོན་མཁན་དང་པོར་གྱུར། 1921ལོའི་ཟླ་7པར། ཀྲུང་གོ་གུང་ཁྲན་ཏང་གི་རྒྱལ་ཡོངས་འཐུས་མི་ཚོགས་ཆེན་ཐེངས་དང་པོའི་ཐོག་ཏང་དངོས་སུ་དབུ་བརྙེས་རྒྱུ་ཁྱབ་བསྒྲགས་བྱས་པ་དང་། བློ་མཐུན་ཚའེ་ཧོ་སེན་ཚོགས་ཆེན་ལ་ཞུགས་ཐུབ་མེད་མོད། འོན་ཀྱང་ཁོང་གིས་ཏང་འཛུགས་གཏོད་བྱ་ཆེད་བསམ་བློ་དང་རྩ་འཛུགས་དང་། ལྷག་པར་དུ་ཏང་འཛུགས་པའི་རིགས་པའི་གཞུང་ལུགས་ཐད་ལེགས་སྐྱེས་གལ་ཆེན་ཕུལ་ཡོད།
1921ལོའི་ཟླ་12པར། རྒྱལ་ནང་དུ་ལོག་ནས་ཡུན་རིང་པོ་མ་སོང་བའི་ཚའེ་ཧོ་སེན་ཀྲུང་གོ་གུང་ཁྲན་ཏང་ནང་ཞུགས་པ་མ་ཟད། ཀྲུང་དབྱང་ལས་ཁུངས་སུ་རིགས་པའི་གཞུང་ལུགས་དྲིལ་བསྒྲགས་ཀྱི་ལས་དོན་བསྒྲུབས།
1925ལོར་ལྔ་པའི་སུམ་ཅུའི་ལས་འགུལ་ལངས་པ་དང་། ཚའེ་ཧོ་སེན་གྱིས་མང་ཚོགས་ལ་སྣེ་ཁྲིད་བྱེད་པའི་ཁྱད་འཕགས་འཇོན་ཐང་ངོམ་ནས་འཐབ་རྩོད་ཁྲོད་མང་ཚོགས་ཀྱི་ཕུལ་བྱུང་གཙོ་འཛིན་དུ་གྱུར་པ་རེད།
1931ལོར་བློ་མཐུན་ཚའེ་ཧོ་སེན་ཤང་ཀང་དུ་ཕེབས་ནས་ཀོང་ཏུང་གསར་བརྗེའི་ལས་དོན་ལ་མཛུབ་ཁྲིད་གནང་སྐབས་སྟབས་མ་ལེགས་པར་འཛིན་བཟུང་བྱས། བཙོན་ཁང་དུ་ཁོང་གིས་བློ་རྩ་བརྟན་ཞིང་གཉའ་མི་སྒུར་བར་རང་སྲོག་མ་ཤོར་བར་དུ་དཔའ་ངར་ཞུམ་མེད་ཀྱིས་འཐབ་རྩོད་གནང་ཡོད། ཁོང་གིས་རང་ཉིད་ཀྱི་ལོ་ན་ཕྲ་བའི་ཚེ་སྲོག་ལ་བརྟེན་ནས་དེ་སྔ་བཞག་པའི་བརྗིད་ཆེའི་དམ་བཅའ་བསྒྲུབས་ཏེ་ཚེ་གང་རིང་བརྗིད་ཆགས་མཛེས་སྡུག་ལྡན་པའི་གུང་ཁྲན་རིང་ལུགས་ཀྱི་བྱ་གཞག་ཆེད་འཐབ་རྩོད་གནང་ཡོད།