ཉིན་ཤས་གོང་། གསར་འགོད་པར་ལྷ་ས་གྲོང་ཁྱེར་སྐྱེ་ཁམས་ཁོར་ཡུག་ཅུས་ནས་ཤེས་རྟོགས་བྱུང་བར། 2020ལོར་ལྷ་ས་གྲོང་ཁྱེར་གྱི་གཙང་པོ་དང་མཚེའུ་དང་། རྒྱལ་ཁབ་ཀྱི་ཚོད་འཛིན་བྱེད་པའི་བཤགས་ངོས། ཆུ་འགོ་བཅས་ཀྱི་ཆུའི་སྤུས་ཚད་100%ཟིན་ནས་གྲོང་ཁྱེར་གྱི་ཆུ་རྒྱུད་དང་ཆུའི་སྤུས་ཚད་རྒྱུན་མཐུད་ལེགས་སུ་ཕྱིན་ཡོད་པ་རེད།

ངོ་སྤྲོད་བྱས་པར་གཞིགས་ན། ཉེ་བའི་ལོ་ཤས་རིང་། ལྷ་ས་གྲོང་ཁྱེར་སྐྱེ་ཁམས་ཁོར་ཡུག་ཅུས་ཀྱིས་འཐུང་ཆུའི་ཆུ་འགོ་སྲུང་སྐྱོང་ཁུལ་ལེགས་སུ་ཧུར་ཐག་བཏང་བས། སྐྱེ་ཁམས་ཁོར་ཡུག་གི་སྤུས་ཚད་རྒྱུན་མཐུད་ལེགས་སུ་ཕྱིན་པ་དང་སྦགས་བཙོག་འགོག་བཅོས་ལ་གྲུབ་འབྲས་མངོན་གསལ་དོད་པོ་ཐོབ་ཡོད། གྲོང་ཁྱེར་དང་གྲོང་རྡལ་21གི་གཅིག་སྡུད་རྣམ་པའི་འཐུང་ཆུའི་ཆུ་འགོ་སྲུང་སྐྱོང་ཁུལ་ལེགས་སུ་གཏོང་བར་རང་སྐྱོང་ལྗོངས་སྲིད་གཞུང་གི་མཆན་བཀོད་བཀའ་ལན་ཐོབ་ཡོད། བཙོག་ཆུ་ཐད་འབུད་གནད་དོན་ལ་ལྟ་སྐུལ་ཞིབ་བཤེར་བྱེད་ཤུགས་ཆེ་རུ་གཏོང་བ་དང་། བཟོ་ལས་ཁེ་ལས་ཀྱི་བཙོག་ཆུ་འགོག་བཅོས་བྱེད་ཤུགས་ཆེ་རུ་གཏོང་བ། གཏེར་ལས་ཁེ་ལས་ཀྱི་བཙོག་ཆུ་ཕྱིར་འབུད་ལ་རྒྱུན་མཐུད་ལྟ་སྐུལ་བཅས་བྱས་ཡོད། སྨན་བཅོས་སྒྲིག་གཞིའི་ལྟ་སྐུལ་དོ་དམ་ལ་ཤུགས་སྣོན་བརྒྱབ་སྟེ། སྨན་བཅོས་ཀྱི་བཙོག་ཆུ་གཙང་གསིང་ལྷུ་ཚིགས་སྔར་བས་ཚད་ལྡན་དུ་བཏང་ཡོད། ལྷ་ས་སྐྱིད་ཆུའི་ཆུ་ཤུར་རྫོང་ཆུ་ཕུ་གྲོང་ཚོའི་ཆུ་རྒྱུད་ཀྱི་ཆུ་འགོ་སྲུང་སྐྱོང་ལས་གྲྭ་དང་ལྷ་ས་སྐྱིད་ཆུ་མལ་གྲོ་གུང་དཀར་རྫོང་ནས་གྲོང་ཁུལ་དུམ་བུ་བར་གྱི་ཆུའི་སྐྱེ་ཁམས་ཕྱོགས་བསྡུས་སླར་གསོའི་བཅོས་སྐྱོང་ལས་གྲྭ(དུས་ཐེངས་དང་པོ)སོགས་ཀྱི་ལས་གྲྭའི་རྣམ་གྲངས་ལ་སྐུལ་འདེད་ཤུགས་ཆེན་བཏང་ཡོད། གྲོང་གསེབ་ཀྱི་འཚོ་བའི་བཙོག་ཆུ་གཙང་གསིང་ལ་འཚོལ་ཞིབ་བྱས་ནས་རང་སྐྱོང་ལྗོངས་ཀྱི་ཆེད་དོན་མ་དངུལ་སྒོར་ཁྲི་550བཏང་སྟེ་སྟོད་ལུང་བདེ་ཆེན་ཆུས་དང་ལྷུན་གྲུབ་རྫོང་དུ་གྲོང་གསེབ་ཀྱི་འཚོ་བའི་བཙོག་ཆུ་གཙང་གསིང་གི་ཚོད་ལྟའི་དཔེ་སྟོན་ལས་གྲྭ་བསྐྲུན་ཡོད།