ཏང་གི་ལོ་རྒྱུས་སློབ་སྦྱོང་སློབ་གསོ་སྤེལ་ཚུན། རང་ལྗོངས་ཀྱི་རིམ་པ་ཁག་དང་སྡེ་ཚན་ཁག་གིས་དོན་དངོས་དང་ཟུང་འབྲེལ་གྱིས་སློབ་སྦྱོང་གི་ལས་སྟེགས་རྒྱ་ཆེ་རུ་དང་སློབ་སྦྱོང་བྱེད་སྟངས་ཕུན་སུམ་ཚོགས་སུ་བཏང་ནས་། “ངས་མང་ཚོགས་ལ་བྱ་བ་དངོས་སྒྲུབ་པའི”ལག་ལེན་བྱེད་སྒོ་ཏན་ཏིག་ངང་སྤེལ་ཏེ། ཏང་གི་ལོ་རྒྱུས་སློབ་སྦྱོང་སློབ་གསོའི་ཕན་འབྲས་དེ་མང་ཚོགས་ལ་ཞབས་འདེགས་ཞུ་བའི་བསམ་བློའི་རང་རྟོགས་དང་བྱ་སྤྱོད་ཀྱི་རང་རྟོགས་ཤིག་ཏུ་བསྒྱུར་ནས་དམངས་ལ་བྱ་བ་དངོས་སྒྲུབ་པའི་ལག་ལེན་ཞིབ་ཕྲའི་ཁྲོད་དོན་འཁྱོལ་ཐུབ་པ་བྱུང་ཡོད།
ཏང་གི་ལོ་རྒྱུས་སློབ་སྦྱོང་སློབ་གསོ་དང“ངས་མང་ཚོགས་ལ་བྱ་བ་དངོས་སྒྲུབ་པའི”ལག་ལེན་བྱེད་སྒོར་སྐུལ་འདེད་གཏིང་ཟབ་གཏོང་ཆེད། མངའ་རིས་ས་ཁུལ་མེ་ཟོན་རོགས་སྐྱོབ་ཉིང་ལག་རུ་ཁག་གིས་ས་ཁོངས་ཀྱི་ཁྱད་ཆོས་དང་ཡུལ་སྐོར་བ་ཡོང་མཁན་ཇེ་མང་དུ་གྱུར་པའི་དོན་དངོས་ལ་གཞིས་ཚུགས་ཏེ། རིམ་ཁག་མེ་ཟོན་རོགས་སྐྱོབ་ཉིང་ལག་རུ་ཁག་གིས་རིམ་པ་འདི་གའི“ཏང་ཡོན་ས་ཚུགས”སྔ་རྗེས་སུ་བཙུགས་ནས་ཕྱི་ཕྱོགས་ལ“ཏང་ཡོན་ས་ཚུགས”ལ་འབྲེལ་བ་བྱེད་སྟངས་དང་ས་ཚིགས་གནས་ཡུལ་ཁྱབ་བསྒྲགས་བྱས་པ་མ་ཟད། ཕན་བདེ་ཁང་དང་། དམག་ཞབས་ཐིམས་པའི་དམག་མིའི་ལས་དོན་ཅུས། སྤྱི་བདེ་ལས་ཁུངས་སོགས་འབྲེལ་ཡོད་སྡེ་ཚན་དབར་ཆ་སྒྲིག་རོགས་རེས་བྱས་ནས་ཕྱོགས་མིའི་ཏང་ཡོན་གྱི་དགོས་མཁོའི་གསལ་ཐོ་དུས་ཐོག་ལེན་དུ་བཅུག་སྟེ་དང་བླངས་ཞབས་ཞུ་བསྒྲུབས་ཤིང་། ཕྱོགས་མིའི་ཏང་ཡོན་གདན་དྲངས་ནས“ཏང་ཡོན་ས་ཚུགས”ལ་བསྐྱོད་དེ་བཀོད་འཐབ་པ་དང་མཉམ་དུ་བརྗོད་དོན་གཙོ་བོའི་ཏང་གི་ཉིན་མོའི་བྱེད་སྒོའི་ནང་ཞུགས་ཏེ། ཏང་གི་ལོ་རྒྱུས་སློབ་སྦྱོང་བྱེད་པའི་དཔེ་དེབ་རིན་མེད་ངང་སྤྲད་པ་དང་བརྗེ་རེས་བྱས་པ་མ་ཟད། ཏང་གི་ལོ་རྒྱུས་སློབ་སྦྱོང་བྱས་པའི་མྱོང་ཚོར་གླེང་བ་སོགས་ཀྱི་བྱེད་ཐབས་ལ་བརྟེན་ནས་ལས་རིགས་ཁག་གི་ཏང་རྩ་འཛུགས་དབར་སློབ་སྦྱོང་སྤེལ་རེས་བྱེད་ཤུགས་ཆེ་རུ་བཏང་ནས་ཕྱོགས་མིའི་ཏང་ཡོན་ལ་སློབ་སྦྱོང་དང་ལེན་བྱ་ཡུལ་མེད་པའི་གནད་དོན་ཐག་གཅོད་ནུས་ལྡན་བྱས་པ་རེད།
ཏང་གི་ལོ་རྒྱུས་སློབ་སྦྱོང་སློབ་གསོ་སྤེལ་ཚུན། རང་སྐྱོང་ལྗོངས་ཚོང་དོན་ཐིང་ཏང་ཙུའུ་ཡིས་ཚོང་དོན་ལས་དོན་གྱི་དོན་དངོས་དང་ཟུང་འབྲེལ་བྱས་ཏེ“ལོ་རྒྱུས་སྦྱངས་ནས་ཏང་ལ་དགའ་ཞེན་དང་། ལོ་རྒྱུས་སྦྱངས་ནས་མེས་རྒྱལ་ལ་དགའ་ཞེན”བརྗོད་དོན་གཙོ་བོར་བྱས་ནས་ཏང་ཙུའུ་ཡི་རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང་དང་། ཏང་ཀྲི་པུའི་ཚོགས་འདུ། ཏང་ཚོགས་ཆུང་གི་ཚོགས་འདུ་སོགས་འཚོགས་ནས་བརྗོད་གཞི་སོ་སོར་སྤེལ་རེས་གྲོས་བསྡུར་བྱས་ཏེ་ཏང་ཡོན་ལས་བྱེད་པས་དུས་ཚིགས་རེར་དཔེ་དེབ་རེ་ཞིབ་ལྟ་དང་། སློབ་སྦྱོང་གི་མྱོང་ཚོར་འབྲི་རྒྱུར་ལྕག་སྐུལ་བཏང་བ་དང་། དུས་ཚིགས་རེར་ཏང་ཀྲི་པུའུ་ཚན་པར་བྱས་ནས་དཔེ་ཀློག་མྱོང་ཚོར་གླེང་བའི་འདུ་ཚོགས་འཚོགས་པ། “བརྗོད་དོན་གཙོ་བོའི་ཏང་གི་ཉིན་མོར་དམངས་སེམས་གཅིག་ཏུ་སྒྲིལ། དུད་ཚང་ལ་འཚམས་འདྲིར་བསྐྱོད་དེ་དམངས་སེམས་དྲོ་བར་བྱེད”ཅེས་པ་བརྗོད་དོན་གཙོ་བོར་བྱས་ནས“ངས་མང་ཚོགས་ལ་བྱ་བ་དངོས་སྒྲུབ་པའི”ལག་ལེན་བྱེད་སྒོ་སྤེལ་ནས་བཅའ་སྡོད་བྱ་ཡུལ་གྲོང་ཚོར“མི་སྣ་རྒན་གྲས་གསུམ”དང་། འཚོ་བར་དཀའ་ངལ་ཡོད་པའི་ཏང་ཡོན་ལ་འཚམས་འདྲི་བྱེད་པ་སོགས་ཀྱི་བྱེད་སྒོ་སྤེལ་ནས་མང་ཚོགས་ཀྱིས་ཏང་རྩ་འཛུགས་ཀྱི་དོ་ཁུར་དང་དྲོ་སྐྱིད་ཚོར་བར་བྱས་པ་རེད།
ཏང་གི་ལོ་རྒྱུས་སློབ་སྦྱོང་སློབ་གསོ་སྤེལ་རིང་བོད་ལྗོངས་མི་རིགས་སློབ་ཆེན་གྱིས་སློབ་མར་ཏང་དང་། མེས་རྒྱལ། སློབ་གྲྭ་བཅས་ལ་དགའ་ཞེན་བྱ་རྒྱུར་སློབ་གསོ་ཁྲིད་སྟོན་བྱ་རྒྱུ་དེ་ལས་དོན་གྱི་གཙོ་རྐང་དུ་བརྩིས་ནས་ཏང་གི་ལོ་རྒྱུས་སློབ་སྦྱོང་སློབ་གསོ་དང་སློབ་གསོ་སློབ་ཁྲིད་ཕན་ཚུན་མཉམ་འདྲེས་ཡོང་བར་སྐུལ་འདེད་བཏང་ཡོད།
ཏང་གི་ལོ་རྒྱུས་སློབ་སྦྱོང་སློབ་གསོའི་གཞི་རྟེན་སྔར་བས་ཕུན་སུམ་ཚོགས་སུ་བཏང་ནས་ཁ་གཏད་བོད་སྐྱོར་ཚན་པའི་སློབ་གསོའི་ཐོན་ཁུངས་ཀྱི་ལེགས་ཆ་བེད་སྤྱོད་ཡག་པོ་བྱ་ཆེད། ཉེ་ཆར་ཉིང་ཁྲི་གྲོང་ཁྱེར་མཐོ་རིམ་སློབ་འབྲིང་གཉིས་པས་ཀོང་ཏུང་ཀྲུང་ཧྲན་གྲོང་ཁྱེར་སློབ་འབྲིང་གཉིས་པ་དང་མཉམ་དུ་དྲ་ཐོག་ནས་ཏང་གི་ལོ་རྒྱུས་སློབ་སྦྱོང་སློབ་གསོའི་བྱེད་སྒོ་སྤེལ་ཏེ་དགེ་སློབ་300ལྷག་ཙམ་གྱིས་ཀྲུང་ཧྲན་གྲོང་ཁྱེར་སློབ་འབྲིང་གཉིས་པའི་དགེ་སློབ་1100ལྷག་ཙམ་དང་མཉམ་དུ་བརྙན་ལམ་དྲ་སྦྲེལ་བརྒྱུད་ཏང་གི་ལོ་རྒྱུས་སློབ་སྦྱོང་སློབ་གསོ་སྤེལ་བ་རེད།
ཏང་གི་ལོ་རྒྱུས་སློབ་སྦྱོང་སློབ་གསོའི་བྱེད་སྒོར་སྐུལ་འདེད་གཏིང་ཟབ་གཏོང་ཆེད། ཉེ་ཆར་གྲོང་ཚོར་བཅའ་སྡོད་ལྗོངས་སྤྱི་ཁྱབ་བཟོ་ཚོགས་ཀྱི་ལས་དོན་རུ་ཁག་གིས་ཉི་མ་རྫོང་འོམ་བུ་ཤང་ལྷོ་ཕྱོགས་སྡེ་ཁུལ་གྲོང་ལྷན་གྱི་མང་ཚོགས་སྒྲིག་འཛུགས་བྱས་ནས་ཏང་གི་ལོ་རྒྱུས་སློབ་སྦྱོང་སློབ་གསོའི་སྒྲོག་འགྲེལ་ཚོགས་འདུ་འཚོགས་ཤིང་། ཉེ་བའི་ལོ་ཤས་རིང་སྡེ་ཁུལ་ལ་འགྲིམ་འགྲུལ་དང་། ཆ་འཕྲིན། ཆུ་གློག ཡུལ་སྐོར། དབུལ་སྒྲོལ་སོགས་ཐད་འགྱུར་ལྡོག་བྱུང་ཚུལ་སྒྲོག་འགྲེལ་བྱས་པས་ཏང་གི་བཀའ་དྲིན་དྲན་པ་དང་། ཏང་གི་བཀའ་ལ་ཉན་པ། ཏང་གི་རྗེས་སུ་འབྲང་བ་བཅས་ཀྱི་མང་ཚོགས་ཀྱི་ཡིད་ཆེས་དང་ཆོད་སེམས་བརྟན་དུ་ཕྱིན་ཡོད།
ལྷ་རྩེ་རྫོང་སླེའུ་ཤང་ཤེལ་དཀར་གྲོང་ཚོར་བཅའ་སྡོད་རྒྱལ་ཁབ་བསྡོམས་རྩིས་ཅུས་བརྟག་ཞིབ་སྤྱི་ཁྱབ་རུ་ཁག་གི་ལས་དོན་རུ་ཁག་གྲོང་ཚོ་དང་དུད་ཚང་ལ་བསྐྱོད་དེ་མང་ཚོགས་ཀྱི་དཀའ་ངལ་ཤེས་རྟོགས་བྱས་ནས“ངས་མང་ཚོགས་ལ་བྱ་བ་དངོས་སྒྲུབ་པའི”ལག་ལེན་བྱེད་སྒོ་ཏན་ཏིག་ངང་སྤེལ་ཞིང་། འཚམས་འདྲི་བྱས་པ་བརྒྱུད་གྲོང་སྡོད་ལས་དོན་རུ་ཁག་གིས་གྲོང་ཚོའི་ནོར་ལུག་མཉམ་ལས་ཁང་ལ་མ་དངུལ་འཁོར་རྒྱུག་མི་ཐུབ་པའི་དཀའ་ངལ་དང་། གཟན་རྩྭ་མི་འདང་བའི་རྐྱེན་གྱིས་ཕྱུགས་རིགས་ལག་ཡོད་མགོ་གྲངས་ཉུང་དུ་སོང་བ་ཤེས་རྟོགས་བྱུང་འཕྲལ་འབྲེལ་ཡོད་སྡེ་ཚན་ལ་ནོར་ལུག་གི་གཟན་རྩྭ་ཏུན་10འདུན་ཞུ་བྱས་ནས་ཤེལ་དཀར་གྲོང་ཚོའི་ནོར་ལུག་མཉམ་ལས་ཁང་ལ་གཟན་རྩྭའི་དཀའ་ངལ་ཐག་གཅོད་བྱས་པ་རེད།