1928ལོའི་ཟླ་6ཚེས་18ཉིན་ནས་ཟླ་7ཚེས་11ཉིན་བར་ཀྲུང་གོ་གུང་ཁྲན་ཏང་རྒྱལ་ཡོངས་འཐུས་མི་ཚོགས་ཆེན་ཐེངས་དྲུག་པ་མོ་སི་ཁོ་ཉེ་འདབས་ཀྱི་ཚེ་ཝེ་ཉི་ཀོ་ལོ་ཏེ་གྲོང་རྡལ་གྱི“དངུལ་མདོག་སྤྲོ་ཁང”དུ་གསང་བའི་སྒོ་ནས་འཚོགས་པ་རེད། ཚོགས་ཆེན་ལ་ཞུགས་མཁན་འཐུས་མི་142ཡོད་པའི་ནང་བརྡས་ཐག་གཅོད་དབང་ཡོད་པའི་འཐུས་མི་ངོ་མ་84ཡོད་པ་རེད།

ཏང་གི་ཚོགས་ཆེན་ཐེངས་དྲུག་པ་ནི་དམིགས་བསལ་གྱི་ལོ་རྒྱུས་དུས་སྐབས་དང་ལོ་རྒྱུས་ཀྱི་ཆ་རྐྱེན་འོག་འཚོགས་པའི་ལོ་རྒྱུས་ཀྱི་དོན་སྙིང་གལ་ཆེན་ལྡན་པའི་ཚོགས་འདུ་ཞིག་རེད། ཚོགས་ཆེན་ཐེངས་དྲུག་པར། གསར་བརྗེ་ཆེན་པོ་ཕམ་ཚུན་གྱི་ཉམས་མྱོང་དང་བསླབ་བྱར་ཕྱོགས་སྡོམ་ནན་ཏན་བྱས་པ་དང་། ཀྲུང་གོའི་གསར་བརྗེའི་སྐོར་ལ་རྩོད་གླེང་ཧ་ཅང་ཆེན་པོ་ཡོད་པའི་རྩ་བའི་གནད་དོན་རབ་དང་རིམ་པར་གཞི་རྩའི་ཆ་ནས་ལན་ཡང་དག་བཏབ་ཡོད། དེས་སྐབས་དེར་ཏང་ལ་དཀའ་ངལ་བཟོ་བའི་གནད་དོན་ཆེན་པོ་གཉིས་གཅིག་སྡུད་ཀྱིས་ཐག་གཅོད་བྱས་པ་སྟེ། གཅིག་ནི་ཀྲུང་གོའི་སྤྱི་ཚོགས་ཀྱི་ངོ་བོ་དང་གསར་བརྗེའི་ངོ་བོའི་གནད་དོན་ཐད། ད་ལྟའི་དུས་མཚམས་ཀྱི་ཀྲུང་གོ་ནི་སྔར་བཞིན་ཕྱེད་མི་སེར་སྤེལ་ཡུལ་དང་ཕྱེད་བཀས་བཀོད་རྒྱུད་འཛིན་གྱི་སྤྱི་ཚོགས་ཡིན་པས། ཀྲུང་གོའི་གསར་བརྗེའི་གཞི་རྩའི་འགལ་བ་གཅིག་ཀྱང་ཐག་གཅོད་བྱས་མེད་པ་དང་། ད་ལྟའི་དུས་མཚམས་ཀྱི་ཀྲུང་གོའི་གསར་བརྗེ་ནི་སྔར་བཞིན་འབྱོར་ལྡན་གྲལ་རིམ་གྱི་ངོ་བོ་ལྡན་པའི་དམངས་གཙོའི་རིང་ལུགས་ཀྱི་གསར་བརྗེ་རེད། གཉིས་ནི་གསར་བརྗེའི་དུས་བབ་དང་ཏང་གི་ལས་འགན་གྱི་གནད་དོན་ཐད། གསར་བརྗེ་དར་ཙམ་གྱི་དུས་སུ་གནས་པ་དང་། ཏང་གི་སྤྱིའི་ལམ་ཕྱོགས་ནི་མང་ཚོགས་འགུགས་ཐབས་བྱེད་དགོས་པ་དང་། ཏང་གི་ལས་དོན་གཙོ་བོ་ནི་ཐབས་བརྒྱ་ཇུས་སྟོང་གིས་དྲག་པོའི་གྱེན་ལོག་སྒྲིག་འཛུགས་བྱེད་པ་མིན་པར་དཀའ་ཚེགས་ཆེ་བའི་མང་ཚོགས་ཀྱི་ལས་དོན་སྒྲུབ་པ་དང་སྟོབས་ཤུགས་གསོག་འཇོག་བྱེད་དགོས་པ་ཁ་གསལ་བསྟན་ཡོད། གནད་དོན་གལ་ཆེན་འདི་གཉིས་ཐག་གཅོད་བྱས་པས། ཏང་ཡོངས་ཀྱི་བསམ་བློ་གཞི་རྩའི་ཆ་ནས་གཅིག་གྱུར་བྱུང་བ་དང་། ཏང་ནང་ཁུལ་དུ་གནས་པའི“གཡོན”ལྷུང་གི་བསམ་ཚུལ་བསལ་བ་དང་ལས་དོན་གྱི་འགྱུར་ལྡོག་ལ་དགེ་མཚན་ལྡན་པའི་ནུས་པ་ཐོན་ཡོད།