འདི་ནི་ཏེང་ཨེན་མིང་ཡིན་པ། (དཔྱད་གཞིའི་པར་རིས)

1931ལོའི་ཟླ་4ཚེས་5ཉིན། ཧྲན་ཏུང་ཞིང་ཆེན་ཅིས་ནན་གྲོང་ཁྱེར་ཝེ་པཱ་ལམ་ཧོའུ་ཚང་སྒོ་ར་ཆེན་པོའི་ཁྲིམས་སར་ཀུའེ་ཀྲོའུ་ནས་ཡིན་པའི་ཧྲུའེ་རིགས་ཀྱི་ན་གཞོན་ཞིག་གིས་རྐང་ལྕགས་ལག་ལྕགས་བརྒྱབ་ཡོད་ནའང་གུང་ཁྲན་ཏང་ཡོན་གཞན་དག་20ལྷག་ཙམ་དང་མཉམ་དུ《རྒྱལ་སྤྱིའི་གླུ་དབྱངས》མཐོན་པོར་བླངས་ནས་བདེན་པའི་དོན་དུ་གཤེགས།

ན་གཞོན་ཁོང་ལ་ཏེང་ཨེན་མིང་ཟེར། 1921ལོའི་ཟླ་7པར་ཏེང་ཨེན་མིང་ཧྲང་ཧའེ་རུ་ཀྲུང་གོ་གུང་ཁྲན་ཏང་གི་རྒྱལ་ཡོངས་འཐུས་མི་ཚོགས་ཆེན་ཐེངས་དང་པོར་ཞུགས་ནས་ཀྲུང་གོ་གུང་ཁྲན་ཏང་འཛུགས་པའི་ལས་དོན་ལ་ཞུགས། ཚོགས་ཆེན་དེར་ལོ་20ལས་མ་སོན་པའི་ཁོང་ནི་གྲངས་ཉུང་མི་རིགས་ཀྱི་འཐུས་མི་འབའ་ཞིག་དེ་རེད།

ཏེང་ཨེན་མིང་ནི་1901ལོར་ཀུའེ་ཀྲོའུ་ཞིང་ཆེན་ལི་པོ་རྫོང་ཡུས་ཕིང་གྲོང་རྡལ་ཧྲུའེ་ཕུའུ་གྲོང་ཚོའི་ཧྲུའེ་རིགས་ཁྱིམ་ཚང་ཞིག་ཏུ་འཁྲུངས་པ་དང་། 1918ལོར་ཧྲན་ཏུང་གི་སྤུན་མཆེད་ཀྱི་རོགས་སྐྱོར་འོག་ཅིས་ནན་ཞིང་ཆེན་གྱིས་བཙུགས་པའི་སློབ་འབྲིང་དང་པོར་རྒྱུགས་འཕྲོད་དེ་ཡར་ཐོན་དུས་དེབ་བཀླགས་ནས་མར་ཁེ་སི་རིང་ལུགས་ཀྱི་དགོངས་པ་དང་འབྲེལ་འདྲིས་སུ་གྱུར།

ལྔ་བཞི་ལས་འགུལ་ལངས་རྗེས། ཏེང་ཨེན་མིང་སློབ་མའི་རང་སྐྱོང་ལྷན་ཚོགས་ཀྱི་འགོ་ཁྲིད་དང་དཔེ་སྐྲུན་པུའི་པུའུ་ཀྲང་གཅིག་ལྕོགས་ལ་བདམས་ཏེ་སློབ་གྲྭའི་ཚགས་པར་གཙོ་སྒྲིག་གནང་བ་མ་ཟད། སློབ་མ་སྒྲིག་འཛུགས་ཀྱིས་སློབ་མཚམས་འཇོག་པའི་ལས་འགུལ་ལ་ཞུཌ།

1925ལོའི་ཟླ་2པར། ཏེང་ཨེན་མིང་དང་ཝང་ཅིན་མེ་ཡིས་ཅའོ་ཅིས་ལྕགས་ལམ་ཅུས་ཀྱི་གོང་རིམ་དབར་ནང་འཁྲུག་ལངས་པའི་སྐབས་དང་བསྟུན་ནས་ཅའོ་ཅིས་ལྕགས་ལམ་དང་ཕྱོགས་བཞི་འཕྲུལ་འཁོར་བཟོ་གྲྭའི་བཟོ་པས་བཟོ་གྲྭ་ཡོངས་སུ་ལས་མཚམས་འཇོག་རྒྱུའི་སྐུལ་སློང་བྱས། ལྔ་པའི་སུམ་ཅུའི་ལས་འགུལ་གྱི་སྔ་རྗེས་སུ། ཁོང་གིས་སླར་ཡང་ཆིང་ཏའོ་རི་པིན་ཚོང་པའི་སང་རས་བཟོ་གྲྭའི་བཟོ་པ་མནའ་མཐུན་གྱིས་ལས་མཚམས་འཇོག་པ་གཙོས་བཟོ་པའི་ལས་འགུལ་གྱི་འགོ་ཁྲིད་པ་དང་། ཟླ་བ་གསུམ་ལྷག་ཙམ་སོང་རྗེས་ལྔ་པའི་སུམ་ཅུའི་ལས་འགུལ་གྱི་སྣེ་འཁྲིད་མཁན་ལ་གྱུར།

1925ལོའི་ཟླ་11པར། ཧྲན་ཏུང་ས་གནས་ཨུ་ཡོན་ལྷན་ཁང་ལས་ཁུངས་དགྲ་བོས་གཏོར་ཏེ་ཁོང་བཙོན་དུ་ཚུད་པ་དང་ཡ་ང་སྙིང་རྗེ་མེད་པའི་མནར་གཅོད་ཕོག་ཡོད། ཕྱིས་སུ་བཙོན་ཁང་དུ་འདུས་འདྲིལ་གཅོང་ནད་ཕོག་པ་དང་ཏང་རྩ་འཛུགས་ཕྱོགས་མང་པོས་སྐྱོབ་ཐབས་བྱས་པར་བརྟེན་ཕྱིར་སྨན་བཅོས་བྱེད་པར་འགྲོ་བའི་གོ་སྐབས་ཐོབ།

གསར་བརྗེ་ཆེན་པོ་ཕམ་རྗེས། ཏེང་ཨེན་མིང་སྔ་རྗེས་སུ་ཧྲན་ཏུང་གི་ས་ཆ་ཁག་ཏུ་བསྐྱོད་དེ་ཏང་རྩ་འཛུགས་ཀྱིས་འཐབ་རྩོད་སྤེལ་བར་མུ་མཐུད་འགོ་ཁྲིད་གནང་། 1929ལོའི་ཟླ་1ཚེས་19ཉིན། ཁོང་ཙེ་པོ་གཏེར་ཁུལ་ནས་ཅིས་ནན་དུ་ལོག་པ་དང་། ངོ་ལོག་པས་རྒྱབ་གཏོད་བྱས་པར་བརྟེན་སླར་ཡང་བཙོན་དུ་ཚུད། མནར་གཅོད་དྲག་པོའི་མདུན་དུ་ཁོང་ལ་གཡོ་འགུལ་སྤུ་ཙམ་ཡང་མ་ཐེབས་པ་དང་། ད་དུང་བཙོན་ཁང་དུ་སྨྱུང་བའི་འཐབ་རྩོད་ཐེངས་གཉིས་ལ་འགོ་ཁྲིད་གནང་བ་དང་བཙོན་ཁང་ནས་བྲོས་རྒྱུའི་འཐབ་རྩོད་ཐེངས་གཉིས་སྒྲིག་འཛུགས་བྱས་པར་བློ་མཐུན་ཁག་གཅིག་ཉེན་ཁ་ལས་ཐར་ཡོད། 1930ལོར། ཏེང་ཨེན་མིང་གིས་བཙོན་ཁང་དུ་ཁ་ཆེམས་རྩོམ་ཡིག《ཞལ་གྱེས》བྲིས་པ་རེད།

ལི་པོ་རྫོང་གྲོང་གི་བྱང་ཕྱོགས་སུ་གནས་པའི་ཏེང་ཨེན་མིང་གི་བཞུགས་གནས་རྙིང་པའི་བཤམས་སྟོན་ཁང་དུ། པར་རིས་དང་དཔྱད་གཞིའི་ཡིག་རིགས་600ལྷག་ཙམ་དང་། རིག་དངོས་170ལྷག་ཙམ། སྣང་བརྙན་ཡུལ་ལྗོངས་11བཅས་འགྲེམས་སྟོན་བྱས་ནས་ཏེང་ཨེན་མིང་གི་ཚེ་གང་མཛད་རྗེས་ཆ་ཚང་མངོན་པར་བྱས་ཡོད། ལྟ་སྐོར་བས་འགྲེམས་ཁང་གསུམ་པར་ཁོང་གི《ཞལ་གྱེས》སྙན་ངག་མཐོང་རིམ་བཞིན་གོམ་པ་སྤོ་མཚམས་བཞག་ནས་ལྟ་བ་དང་ཁ་ཤས་ཀྱིས་ད་དུང་འགྲེལ་བཤད་ཉན་རྗེས་མིག་ཆུ་གཏོང་གི་ཡོད།

ད་ཆ། ཏེང་ཨེན་མིང་གི་ཕ་ཡུལ་ཧྲུའུ་ཕུའུ་གྲོང་ཚོ་ནི་དབུལ་པོའི་གནས་ལས་བསྒྲལ་ཏེ་ལི་པོ་རྫོང་གི་གསར་བརྗེའི་ཡུལ་སྐོར་དང་འཛམ་གླིང་གི་རང་བྱུང་ཤུལ་བཞག་ལེགས་ཆར་བརྟེན་ནས་སྡོད་མལ་དང་། ལས་གཉེར། ཡུལ་སྐོར་བཅས་ལ་འཚམ་པའི་གྲོང་གསེབ་ཡུལ་སྐོར་འཕེལ་རྒྱས་ཀྱི་ལམ་དུ་སྐྱོད་བཞིན་ཡོད།

ཏེང་ཨེན་མིང་གི་དབོན་པོའི་ཚ་མོ་ལི་པོ་རྫོང་ལི་མིང་ཀོན་ཧྲུའེ་རིགས་ཤང་གི་ཤང་ཀྲང་ཏེང་ཆིང་མེ་ཡིས། ལས་ཀ་བྱེད་མྱོང་བའི་ལས་གནས་ཚང་མར་ངས་ཐོག་མཐའ་བར་གསུམ་དུ“མི་བདེན་པ་བདེན་ཐུབ་ཅིག་དང་ལས་དྲང་པོ་དྲང་གཞག་སྒྲུབ་དགོས་པའི”ཁྱིམ་ཚང་གི་བསླབ་བྱ་བརྟན་པོར་ངེས་ཏེ“གསར་བརྗེའི་ས་བོན་རྒྱུན་འཛིན་དང་འབྱུང་འཕྲོད་ཁྱིམ་གཞིས་འཛུགས་སྐྲུན”ལ་རང་ཉིད་ཀྱི་སྟོབས་ཤུགས་སྐྱེས་སུ་འབུལ་གྱི་ཡོད་ཅེས་བཤད་བྱུང་།