འདི་ནི་ཁྲེན་ཡན་ཉན་ཡིན་པ། (དཔྱད་གཞིའི་པར་རིས)

ཁྲེན་ཏུའུ་ཞིའུ་ཡི་བུ་རྒན་པ་ཁྲེན་ཡན་ཉན་གྱི་མིང་གཞན་ལ་ཞ་ཡན་ཡང་ཟེར་ཞིང་། ཁོང་ནི་ཀྲུང་གོ་གུང་ཁྲན་ཏང་གི་སྔ་དུས་ཀྱི་དོན་གཉེར་བ་གྲགས་ཅན་དང་། ཁྱད་དུ་འཕགས་པའི་འགོ་ཁྲིད་པ། ཁྱད་དུ་འཕགས་པའི་འབྱོར་མེད་གྲལ་རིམ་གྱི་གསར་བརྗེ་བ་བཅས་རེད། 1898ལོར་ཨན་ཧུའེ་ཧོའེ་ཉིང་དུ་སྐྱེས་པ་དང་། 1915ལོར་ཧྲང་ཧའེ་ཧྥ་རན་སེའི་སྐད་ཡིག་སློབ་གྲྭར་རྒྱུགས་འཕྲོད་དེ་ཧྥ་རན་སེའི་སྐད་ཡིག་སྦྱངས། 1917ལོར་ཀྲེན་ཏན་སློབ་ཆེན་དུ་རྒྱུགས་འཕྲོད་དེ་བཅའ་ཁྲིམས་ཚན་ཁག་ཏུ་སློབ་སྦྱོང་བྱས།

1919ལོའི་ཟླ་12པར་ལོ་21ལ་སླེབས་པའི་ཁྲེན་ཡན་ཉན་ཧྥ་རན་སེར་ལས་སློབ་གཉིས་བརྩོན་བྱེད་པར་བསྐྱོད། ཁོང་དང་ཀྲའོ་ཧྲི་ཡན། ཀྲོའུ་ཨེན་ལའེ་བཅས་ཀྱིས་མཉམ་དུ་ཡོ་རོབ་ཏུ་བྱེས་འགྲོན་གྱི་གུང་ཁྲན་རིང་ལུགས་རྩ་འཛུགས་ཏེ། ཀྲུང་གོ་ན་ཆུང་གུང་ཁྲན་ཏང་གསར་འཛུགས་བྱས་པ་དང་། ཁོང་གིས་ཀྲུང་དབྱང་ལག་བསྟར་ཨུ་ཡོན་ལྷན་ཁང་གི་ཨུ་ཡོན་དང་། 《ན་ཆུང》ཟླ་རེའི་དུས་དེབ་ཀྱི་རྩོམ་སྒྲིག་ལས་ཀའི་འགན་འཁུར། 1922ལོའི་སྟོན་ཁར། ཁོང་ཧྥ་རན་སེའི་གུང་ཁྲན་ཏང་ནང་ཞུགས་པ་དང་། ཡུན་རིང་མ་སོང་བར་ཀྲུང་གོ་གུང་ཁྲན་ཏང་གི་ཏང་ཡོན་ལ་གྱུར།

1924ལོའི་དབྱར་ཁར། ཁྲེན་ཡན་ཉན་རྒྱལ་ནང་དུ་ལོག་པ་དང་། ལོ་དེའི་སྟོན་ཁར་ཀོང་ཀྲོའུ་རུ་ལས་ཀ་བྱེད་པར་མངགས། སྔ་རྗེས་སུ་ཀོང་ཏུང་དུ་བཅའ་སྡོད་སྤྱི་ཚོགས་རིང་ལུགས་གཞོན་ནུ་ཚོགས་པའི་ཀྲུང་དབྱང་གི་ཆེད་མངག་པ་དང་། ཀྲུང་གུང་ཀོང་ཏུང་ཆུས་ཨུད་ཀྱི་དྲུང་ཡིག་དང་རྩ་འཛུགས་པུའི་པུའུ་ཀྲང་གི་འགན་གཅིག་ལྕོགས་འཁུར། དེ་ནས་ཡུན་རིང་མ་སོང་བར་ཁོང་སླར་ཡང་ཀྲུང་གུང་ཀོང་ཏུང་ཆུས་ཨུད་ཀྱི་ཧྲུའུ་ཅིར་བསྐོ་གཞག་བྱས། ཁོང་གིས་ཏང་འཛུགས་སྐྱོང་ལ་ཤུགས་སྣོན་རྒྱག་པ་དང་། ཆུས་ཨུད་ཀྱི་འགོ་ཁྲིད་ལས་ཁུངས་འཐུས་ཚང་དུ་གཏོང་བ། ཏང་གི་སློབ་ཁྲིད་ལམ་ལུགས་འཛུགས་པ་བཅས་ལ་ཧ་ཅང་མཐོང་ཆེན་བྱས་ཏེ། ནུས་ཤུགས་ཡོད་རྒུས་ཏང་ཡོན་གསོ་སྦྱོང་བྱེད་པ་དང་ཏང་ཡོན་ལ་སློབ་གསོ་བཏང་ནས་ཏང་གི་མཐུན་སྒྲིལ་ལ་ཤུགས་སྣོན་བརྒྱབ་ཡོད།

1925ལོའི་ཟླ་6པར། ཁྲེན་ཡན་ཉན་དང་། ཏེང་ཀྲུང་ཞ། སུའུ་ཀྲའོ་ཀྲེན་སོགས་ཀྱིས་ཀྲུང་གོ་དང་ཕྱི་རྒྱལ་དུ་སྐད་གྲགས་ཆོད་པའི་ཀོང་ཀྲོའུ་དང་ཤང་ཀང་གི་ལས་མཚམས་འཇོག་ལས་འགུལ་ལ་འགོ་ཁྲིད་བྱས།

1927ལོའི་དཔྱིད་ཀར། ཁྲེན་ཡན་ཉན་ཝུའུ་ཧན་དུ་བསྐྱོད་ནས་ཀྲུང་གོ་གུང་ཁྲན་ཏང་རྒྱལ་ཡོངས་འཐུས་མི་ཚོགས་ཆེན་ཐེངས་ལྔ་པར་ཞུགས་སྐབས། ཀྲུང་གུང་ཅང་ཀྲེ་ཆུས་ཨུད་ཀྱི་ཧྲུའུ་ཅིར་བསྐོ་གཞག་བྱས། ཁོང་གིས་དེ་མ་ཐག་ཧྲང་ཧའེ་ལ་་བསྐྱོད། ལམ་བར་དུ་ཧྲང་ཧའེ་རུ་བཞི་གཅིག་གཉིས་གསར་བརྗེར་ངོ་རྒོལ་གྱི་སྲིད་འགྱུར་བྱུང་།

1927ལོའི་ཟླ་6པར། ཀྲུང་གུང་ཀྲུང་དབྱང་གིས་ཅང་ཀྲེ་ཆུས་ཨུད་མེད་པར་བཟོས་ཏེ་ཅང་སུའུ་ཞིང་ཨུད་དང་ཀྲེ་ཅང་ཞིང་ཨུད་ཁག་སོ་སོར་བཙུགས། ཁྲེན་ཡན་ཉན་གྱིས་ཀྲུང་གུང་ཅང་སུའུ་ཞིང་ཨུད་ཀྱི་ཧྲུའུ་ཅིའི་འགན་འཁུར། དཀར་པོའི་འཇིགས་སྐུལ་གྱིས་ཁྱབ་པའི་ཧྲང་ཧའེ་རུ་ཁྲེན་ཡན་ཉན་དང་ཀྲའོ་ཧྲི་ཡན་སོགས་ཀྱིས་ཉེན་ཁར་མ་འཛེམ་པར་ཁ་ཐོར་དུ་སོང་བའི་བློ་མཐུན་བཙལ་འཚོལ་བྱས་ནས་ཏང་རྩ་འཛུགས་སླར་གསོ་དང་བསྐྱར་འཛུགས་བྱས་ཏེ་འཐབ་རྩོད་ཧུར་ཐག་སྤེལ། ཟླ་6ཚེས་26ཉིན་ཁྲེན་ཡན་ཉན་གོ་མིན་ཏང་གི་དམག་མིས་བཟུང་པ་དང་། དགྲ་བོས་ཧྲང་ཧའེ་ཀྲུང་གུང་ཏང་རྩ་འཛུགས་ཀྱི་གསང་བ་རག་ཆེད། ཁྲེན་ཡན་ཉན་ལ་ཁྲིམས་ཆད་ཡོད་ཚད་བཅད་དེ་སྡུག་པོ་ཚད་མེད་བཏང་། འོན་ཀྱང་ཁྲེན་ཡན་ཉན་གྱིས་ངར་ལྕགས་ལྟ་བུའི་བློ་སྟོབས་ལ་བརྟེན་ནས་ཏང་གི་གསང་བ་དམ་པོས་བསྲུངས་ཏེ་འཆི་རྒྱུར་ཐུབ་ཀྱང་མགོ་བོ་གཏན་ནས་སྒུར་མེད།

1927ལོའི་ཟླ་7ཚེས་4ཉིན་གྱི་དགོང་མོར། གོ་མིན་ཏང་ལོག་སྤྱོད་ཤོག་ཁག་གིས་ཁྲེན་ཡན་ཉན་གསོད་རར་ཁྲིད། ལག་དམར་བས་ཁོང་པུས་མོ་ས་ལ་འཛུགས་སུ་བཅུག འོན་ཀྱང་ཁོང་གིས་སྐད་ཤུགས་ཆེན་པོས་གསར་བརྗེ་བ་ནི་གཞུང་དྲང་གནོང་མེད་ཅིག་ཡིན་པས་འཆི་རྒྱུར་སྐྲག་མི་སྲིད། འཆི་སྲོག་ལ་ཐུག་ཀྱང་པུས་མོ་ས་ལ་གཏན་ནས་འཛུགས་ཀྱི་མིན་ཞེས་བརྗོད། མཐར་ཁོང་ལག་དམར་བ་ཚོས་ཡ་ང་སྙིང་རྗེ་མེད་པར་བཀྲོངས།

“གསར་བརྗེའི་སྔོན་གཤེགས་དཔའ་བོར་གུས་འདུད་ཡག་ཤོས་ནི་ཁོང་ཚོའི་སྙིང་སྟོབས་རྒྱུན་འཛིན་བྱ་རྒྱུ་དེ་རེད། རྒྱང་སྐྱོད་ཀྱི་ལམ་བུ་གསར་པའི་ཐོག་འབད་འབུངས་མདུན་སྐྱོད་བྱས་ཚེ་གཞི་ནས་སྔོན་གཤེགས་དཔའ་བོར་ངོ་གནོང་མི་དགོས་པའི་དུས་རབས་ཀྱི་རླབས་ཆེན་བྱ་གཞག་གཏོད་ཐུབ”ཅེས་ཨན་ཆིང་གྲོང་ཨུད་ཀྱི་ཏང་གི་ལོ་རྒྱུས་དང་ས་གནས་ལོ་རྒྱུས་ཞིབ་འཇུག་ཁང་གི་རིགས་གཅིག་མཁས་ཅན་ཧྥང་ཆིང་ཀྲའེ་ཡིས་བརྗོད།