འདི་ནི་ཁྲེན་ཐན་ཆིའུ་ཡི་འདྲ་པར་ཡིན་པ། (དཔྱད་གཞིའི་པར་རིས)

ཧུའུ་པེ་ཞིང་ཆེན་ཧོང་ཀང་གྲོང་ཁྱེར་ཧོང་ཀྲོའུ་ཆུས་ཁྲེན་ཚེ་ལུའོ་གྲོང་རྡལ་ཁྲེན་ཚེ་ལུའོ་གྲོང་ཚོར་ཐང་ཤིང་དང་ཤུག་སྡོང་སྔོན་པོའི་ཁྲོད་འགྱིང་ངེར་གནས་པའི་ཁྲེན་ཐན་ཆིའུ་ཡི་ཟངས་སྐུ་ནས་གསར་བརྗེ་མཁས་ཅན་གྱི་ཉམས་འགྱུར་ཞིག་མངོན་ཞིང་། ཟངས་སྐུའི་མདུན་གྱི་མེ་ཏོག་སོས་པ་རེ་རེ་ལས་མི་རྣམས་ཀྱིས་ཀྲུང་གོ་གུང་ཁྲན་ཏང་རྒྱལ་ཡོངས་མི་དམངས་འཐུས་མི་ཚོགས་ཆེན་ཐེངས་དང་པོའི་འཐུས་མི་དང་། ཏང་གི་སྲོལ་གཏོད་པའི་གྲས་ཤིག ཀྲུང་གོ་གུང་ཁྲན་ཏང་རྒྱལ་ཡོངས་མི་དམངས་འཐུས་མི་ཚོགས་ཆེན་ཐེངས་བདུན་པའི“དམིགས་བསལ”གྱི་ཀྲུང་དབྱང་ཨུ་ཡོན་བཅས་ཡིན་པའི་ཁྲེན་ཐན་ཆིའུ་ལ་ཡིད་སྨོན་དང་གུས་བཀུར་ཞུ་ལུགས་མཚོན་པར་བྱས་ཡོད།

ཁྲེན་ཐན་ཆིའུ། 1896ལོར་འཁྲུངས། ཏ་པེ་རི་འདབས་ཀྱི་གྲོང་ཚོ་ཆུང་ངུ་དེར་བྱིས་དུས་ཀྱི་འཚོ་བ་བསྐྱལ། གཞོན་ནུའི་དུས་སུ་ཕ་ཡུལ་ནས་བྲལ་ཏེ་ཝུའུ་ཧན་དུ་སློབ་གཉེར་ལ་བསྐྱོད། 1916ལོར་རྒྱལ་བཙུགས་ཝུའུ་ཁྲང་མཐོ་རིམ་དགེ་འོས་སློབ་གྲྭའི་དབྱིན་ཡིག་པུའུ་རུ་སློབ་སྦྱོང་བྱས་པ་དང་། རྗེས་སུ་ཏུང་པི་ཝུའུ་སོགས་དང་མཉམ་དུ་ཝུའུ་ཧན་སློབ་འབྲིང་གྲབས་འཛུགས་བྱས་ཏེ་དབྱིན་ཡིག་དགེ་རྒན་བྱས། ཁོང་གི་འབད་བརྩོན་འོག་སློབ་གྲྭ་དེས་ཡར་ཐོན་གྱི་དགེ་རྒན་ཁག་གཅིག་དང་མཐུན་སྒྲིལ་བྱས་ནས་གསར་བརྗེའི་གཞོན་ནུ་འབོར་ཆེན་ཞིག་གསོ་སྐྱོང་བྱས་ཡོད།

1920ལོའི་སྟོན་དུས་སུ། ཁྲེན་ཐན་ཆིའུ་དང་ཏུང་པི་ཝུའུ་སོགས་ཀྱིས་ཝུའུ་ཧན་དུ་གུང་ཁྲན་ཏང་གི་དུས་འགོའི་རྩ་འཛུགས་བཙུགས་པ་དང་། 1921ལོའི་ཟླ་7པར། ཏང་གི་རྒྱལ་ཡོངས་མི་དམངས་འཐུས་མི་ཚོགས་ཆེན་ཐེངས་དང་པོར་ཞུགས་པ་རེད།

དམར་དམག་རྒྱང་སྐྱོད་བྱས་རྗེས། ཁྲེན་ཐན་ཆིའུ་ཀྲུང་དབྱང་སུའུ་ཝུའེ་ཨེ་ས་ཁུལ་དུ་བསྡད་ནས་ངེས་མེད་རྒོལ་རྡུང་དམག་འཐབ་མཐའ་འཁྱོངས་བྱས་པ་དང་། ཀྲུང་གུང་ཅང་ཤིས་ཡན་ལག་ཅུས་རྩ་འཛུགས་པུའི་པུའུ་ཀྲང་གི་འགན་འཁུར་ཡོད། 1935ལོའི་ཟླ་8པར། མོ་སི་ཁོར་བསྐྱོད་དེ་གུང་ཁྲན་རྒྱལ་སྤྱིའི་འཐུས་མི་ཚོགས་ཆེན་ཐེངས་བདུན་པར་ཞུགས་པ་དང་། དེ་རྗེས་གུང་ཁྲན་རྒྱལ་སྤྱིའི་འཐུས་མི་ཚོགས་པར་བཅའ་སྡོད་ཀྲུང་གོ་གུང་ཁྲན་ཏང་གི་ལས་ཀར་ཞུགས་ཡོད།

1939ལོའི་ཟླ་9པར་ཁྲེན་ཐན་ཆིའུ་ཡིས་བཀའ་ལྟར་རྒྱལ་ནང་དུ་ལོག་ནས། ཤིན་ཅང་དུ་བཅའ་སྡོད་ཀྲུང་གུང་ཀྲུང་དབྱང་གི་འཐུས་མི་དང་ཤིན་ཅང་དུ་བཅའ་སྡོད་དམག་སྡེ་བཅོ་བརྒྱད་པའི་དོན་གཅོད་ཁྲུའུ་ཡི་འགན་འཁུར། ཁོང་གིས་ཤིན་ཅང་གི་དམག་ཤེད་ཅན་ཧྲེང་ཧྲི་ཚའེ་དང་སྟབས་བསྟུན་ཐབས་མཁས་ངང་འཐབ་རྩོད་བྱས་ཡོད། ཧྲེང་ཧྲི་ཚའེ་སུའུ་ལན་དང་གུང་ཁྲན་ཏང་ལ་ངོ་རྒོལ་བྱེད་པའི་ལམ་བུར་བསྐྱོད་རྗེས། 1942ལོའི་དབྱར་དུས་སུ་ཏང་ཀྲུང་དབྱང་གིས་ཤིན་ཅང་དུ་ལས་ཀ་བྱེད་མཁན་གུང་ཁྲན་ཏང་ཡོན་ཚང་མ་ཕྱིར་འཐེན་བྱ་རྒྱུའི་མོས་མཐུན་བྱས་ཡོད། ཁྲེན་ཐན་ཆིའུ་ཡིས་རང་ཉིད་ཁག་མཇུག་ཤོས་ཀྱི་ཕྱིར་འཐེན་གྲས་སུ་བཅུག་པ་མ་ཟད། ད་དུང“བློ་མཐུན་གཅིག་ཡོད་ཚེ་ང་དེ་ག་ནས་ཁ་འབྲལ་གྱི་མིན”ཞེས་བརྗོད།

1942ལོའི་ཟླ་9ཚེས་17ཉིན་ཁྲེན་ཐན་ཆིའུ་འཛིན་བཟུང་བྱས། དགྲ་བོས་ཁོང་ལ་མནར་གཅོད་ཚད་མེད་བཏང་ནས་ཁོང“ཏང་ནས་ཁ་འབྲལ”དུ་བཅུག འོན་ཀྱང་ཁོང་གིས་བཙན་ཤེད་ཀྱི་བྱེད་སྟངས་དེར་ཁས་གཏན་ནས་བླངས་མེད། 1943ལོའི་ཟླ་9ཚེས་27ཉིན་ཁྲེན་ཐན་ཆིའུ་བཙོན་ཁང་དུ་ལྐོག་གསོད་བྱས་པ་དང་སྐུ་གཤེགས་སྐབས་དགུང་ལོ་47ཡིན་པ་རེད།

བློ་མཐུན་ཁྲེན་ཐན་ཆིའུ་རང་སྲོག་བློས་བཏང་བའི་གནས་ཚུལ་སུས་ཀྱང་ཤེས་མཁན་བྱུང་མེད། 1945ལོའི་ཟླ་4པར་ཏང་གི་རྒྱལ་ཡོངས་འཐུས་མི་ཚོགས་ཆེན་ཐེངས་བདུན་པའི་ཐོག་ཁྲེན་ཐན་ཆིའུ་ཀྲུང་གུང་ཨུ་ཡོན་ལ་མིང་བཏོན་འདེམས་བསྐོ་བྱས། འོན་ཀྱང་འཐུས་མི་ཚོས་ཁོང་གསར་བརྗེའི་བྱ་གཞག་ཆེད་རང་སྲོག་ཤོར་བ་ག་ལ་ཤེས།

ཏང་གི་རྒྱལ་ཡོངས་འཐུས་མི་ཚོགས་ཆེན་ཐེངས་བདུན་པའི“དམིགས་བསལ”གྱི་ཀྲུང་དབྱང་ཨུ་ཡོན་ཡིན་པའི་ཁྲེན་ཐན་ཆིའུ་ཡིས་ཀྲུང་གུང་རྒྱལ་ཡོངས་འཐུས་མི་ཚོགས་ཆེན་ཐེངས་བདུན་པ་གཟབ་རྒྱས་ངང་འཚོགས་པའི་རྣམ་པ་དང་རྒྱལ་ཁའི་འོད་སྟོང་མཐོང་མེད་རུང་། ཁོང་གི་གསར་བརྗེའི་སྙིང་སྟོབས་མི་རབས་ནས་མི་རབས་བར་གནས་ངེས་རེད།