ཉིན་ཤས་བསྟུད་མར་རང་ལྗོངས་ཀྱི་ས་གནས་ཁག་དང་སྡེ་ཚན་ཁག་གིས་ཆབ་སྲིད་ཀྱི་ཚུགས་གནས་མཐོ་རུ་བཏང་ནས། སྒྲིག་འཛུགས་དང་བཀོད་སྒྲིག་ཞིབ་ཚགས་བྱས་ཏེ་ཏང་གི་ལོ་རྒྱུས་སློབ་སྦྱོང་སློབ་གསོ་གཏིང་ཟབ་དང་ཏན་ཏིག་སྤེལ་བར་སྐུལ་འདེད་བཏང་བར་ཕན་འབྲས་དངོས་ཐོན་ཡོད།
ཏང་གི་ལོ་རྒྱུས་སློབ་སྦྱོང་སློབ་གསོ་གཏིང་ཟབ་སྤེལ་ཆེད། རང་ལྗོངས་ཀྱི་དམངས་སྲིད་སྡེ་ཚན་གྱིས་སྒྲིག་འཛུགས་ཧུར་ཐག་དང་འཆར་འགོད་ཞིབ་ཚགས་བྱས་ཏེ། “ངས་མང་ཚོགས་ལ་བྱ་བ་དངོས་སྒྲུབ་པའི”ལག་ལེན་བྱེད་སྒོ་ཏན་ཏིག་སྤེལ་བ་རེད། ལྷ་ས་གྲོང་ཁྱེར་དམངས་སྲིད་ཅུས་ཀྱིས་རིམ་དབྱེ་རིགས་དབྱེའི་སྤྱི་ཚོགས་རོགས་སྐྱོབ་མ་ལག་འཚོལ་ཞིབ་དང་འཐུས་སྒོ་ཚང་དུ་བཏང་ནས། གྲོང་ཁྱེར་གྱི་ཡོང་འབབ་དམའ་བའི་མི་འབོར་ལ་བབ་བསྟུན་ལྟ་ཞིབ་ཚད་ལེན་དང་ཡོང་འབབ་དམའ་བའི་མི་འབོར་ལ་གནད་སྨིན་རོགས་སྐྱོར་བྱས་པ་རེད། རྫ་ཡུལ་རྫོང་དམངས་སྲིད་ཅུས་ཀྱིས་གྲོང་ཚོ་དང་དུད་ཚང་དུ་བསྐྱོད་དེ་ནད་ལྕིའི་ནད་པ་དང་དབང་པོ་སྐྱོན་ཅན་ཚབས་ཆེན་སོགས་གཙོ་གནད་མི་ཚོགས་ཀྱི་སྒོ་རྩར་བསྐྱོད་ནས་ཞབས་འདེགས་ཞུས་པ་དང་། དབང་པོ་སྐྱོན་ཅན་ལ་དབང་སྐྱོན་ལག་ཁྱེར་གཉེར་བ་དང་རམ་འདེགས་ཡོ་བྱད་སྤྲད་པ་མ་ཟད། དམངས་སྲིད་ཀྱི་དམངས་ཕན་སྲིད་ཇུས་དྲིལ་བསྒྲགས་དང་། དྲིལ་བསྒྲགས་ལག་དེབ་སྤྲོད་པ། “12349”ཡི་སྤྱི་ཚོགས་རོགས་སྐྱོབ་ཞབས་ཞུའི་ཐད་སྦྲེལ་ཁ་པར་གྱི་དྲིལ་བསྒྲགས་རི་མོ་སྦྱོར་བ་བཅས་བྱས་ཡོད། བཞད་མཐོང་སྨོན་རྫོང་དམངས་སྲིད་ཅུས་ཀྱི་ཏང་ཡོན་ལས་བྱེད་པས་དུས་བཀག་ནང་མཉམ་དུ་བཅར་འདྲི་དང་ཁ་པར་ནས་བསྐྱར་འདྲི་སོགས་ཀྱི་བྱེད་ཐབས་བརྒྱུད་ཁ་ཐོར་དུ་གནས་པའི་དྭ་ཕྲུག་ལ་རང་འགུལ་ངང་སློབ་ཚན་ཟུར་ཁྲིད་དང་། སློབ་གྲྭར་ལོག་པའི་ཁ་ཏ་བསླབ་བྱ་བྱེད་པ། ཐེམ་ཐོ་བཟོ་བ་སོགས་ཀྱི་གཅེས་སྐྱོང་ཞབས་འདེགས་ཞུས་ཡོད།
ཉེ་ཆར། མངའ་རིས་ས་ཁུལ་གྱིས་ཏང་གི་ལོ་རྒྱུས་སློབ་སྦྱོང་སློབ་གསོ་དང“དེ་བས་གསུམ”གྱི་ཆེད་དོན་སློབ་གསོའི་ཤེས་དགོས་ངེས་ཀྱི་ཤེས་བྱའི་ཚོད་རྒྱུགས་བྱེད་སྒོ་སྒྲིག་འཛུགས་བྱས་ནས་སྤེལ་བས། ས་ཁུལ་ཡོངས་ཀྱི་ས་ཁུལ་རིམ་པའི་འགོ་ཁྲིད་ལས་བྱེད་པ་དང་། རྫོང་དང་ཁྲུའུ་རིམ་པའི་འགོ་ཁྲིད་ལས་བྱེད་པ། ཤང་དང་གྲོང་རྡལ་གྱི་ཏང་སྲིད་འགོ་ཁྲིད་རྒན་པ་བཅས་ཚོད་རྒྱུགས་ལ་ཞུགས་ཡོད། ཚོད་རྒྱུགས་བཏང་བ་བརྒྱུད་ལས་བྱེད་པ་དང་ལས་བཟོས་ཏང་གི་ལོ་རྒྱུས་སློབ་སྦྱོང་སློབ་གསོ་དང“དེ་བས་གསུམ”གྱི་ཆེད་དོན་སློབ་གསོའི་དོན་སྙིང་གལ་ཆེན་ལ་ངོས་འཛིན་ཟབ་ཏུ་ཕྱིན་པ་དང་། ལས་བྱེད་པ་དང་ལས་བཟོའི་སློབ་སྦྱོང་གི་རང་རྟོགས་རང་བཞིན་དང་རང་འགུལ་རང་བཞིན་སྔར་བས་འཕེལ་བ། ཏང་གི་ལོ་རྒྱུས་སློབ་སྦྱོང་སློབ་གསོ་དང“དེ་བས་གསུམ”གྱི་ཆེད་དོན་སློབ་གསོ་མི་སེམས་སུ་ཟུག་པར་སྐུལ་མ་ཐེབས་ནས་ལག་ལེན་ལ་འཁྱོལ་བ་དང་ཕན་འབྲས་ཐོན་ཡོད།
ཉིན་ཤས་གོང་། རང་སྐྱོང་ལྗོངས་སྐྱེ་ཁམས་ཁོར་ཡུག་ཐིང་གིས་ཏང་གི་ལོ་རྒྱུས་སློབ་སྦྱོང་སློབ་གསོ་དང་ཟུང་འབྲེལ་བྱས་ཏེ། “ངའི་སེམས་པ་ཏང་ལ་ཕྱོགས། ཏང་ངའི་སེམས་ལ་གནས”ཞེས་པའི་གྱེར་འདོན་བྱེད་སྒོ་སྤེལ་བ་རེད། གྱེར་འདོན་བྱེད་སྒོ་སྤེལ་རིང་། འགྲན་ཞུགས་བདམས་ཐོན་པས་གསར་བརྗེ་པ་རྒན་རབས་དང་རྒྱལ་ཁབ་ཀྱི་འགོ་ཁྲིད་པའི་སྙན་རྩོམ་དང་དེ་བཞིན་མེས་རྒྱལ་དང་། བོད་ཀྱི་ལོ་རྒྱུས། རིག་གནས་བཅས་བྲིས་པའི་ཕུལ་བྱུང་གི་དཔེ་དེབ་བམ་ཡང་ན་ལེ་ཚན་བཀླགས་པས་ཐིང་ཡོངས་ཀྱི་ཏང་ཡོན་ལས་བྱེད་པས་ཏང་གི་ལོ་རྒྱུས་སློབ་སྦྱོང་བྱེད་རིང་མཐོང་རྒྱ་དང་ཤེས་རྒྱ་ཆེ་རུ་ཕྱིན་པ་དང་། མདུན་སྐྱོད་ཀྱི་སྟོབས་ཤུགས་བསྡུ་ཐུབ་ཡོད། བྱེད་སྒོ་སྤེལ་རིང་། ད་དུང“ཏང་གི་ལོ་རྒྱུས་ཤེས་བྱའི”སྐོར་གྱི་དྲི་བར་མྱུར་ལན་འདེབས་པའི་ལྷུ་ཚིགས་ཀྱང་བཀོད་སྒྲིག་བྱས་ཡོད།
དྲ་རྒྱའི་བརྒྱུད་སྤེལ་གྱི་ལེགས་ཆ་གང་ལེགས་འདོན་པ་དང་། བསམ་བློའི་ནང་དོན་མངོན་གསལ་དོད་པོ་ཡོང་བ། ཀྲུང་གོ་གུང་ཁྲན་ཏང་གི་གཏམ་རྒྱུད་གསོན་ཉམས་དོད་པོས་ཡག་པོ་ཤོད་པ་བཅས་བྱ་ཆེད། གཞིས་རྩེ་གྲོང་ཨུད་དྲ་འཕྲིན་གཞུང་ལས་ཁང་གིས་ཏང་གི་ལོ་རྒྱུས་སློབ་སྦྱོང་སློབ་གསོའི་དྲ་རྒྱའི་དྲིལ་བསྒྲགས་འཆར་གཞི་བཟོས་ནས“གཞིས་རྩེའི་ཡོངས་བསྒྲགས”དང“དྲ་འཕྲིན་གཞིས་རྩེ”སོགས་སྐད་འཕྲིན་སྤྱི་རྟགས་ཀྱི་ལས་སྟེགས་སུ“ཞི་ཅིན་ཕིང་གིས་ཏང་གི་ལོ་རྒྱུས་གླེང་བའི”ཆེད་སྒྲིག་ལེ་ཚན་བཟོས་ཏེ། དུས་བཀག་ནང་ཀྲུང་གོ་གུང་ཁྲན་ཏང་གི་ལོ་རྒྱུས་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་བཏོན་ཡོད། དེ་སྔའི“ཇོ་མོ་གླང་མའི་དྲ་ཐོག་དཔྱད་འདེམས”ཀྱི་སྤུས་རྟགས་ཆེད་བསྒྲིགས་ལེ་ཚན་གྱི་རྨང་གཞིའི་ཐོག“ཏང་གི་ལོ་རྒྱུས་སྐོར་གྱི་རྩོམ་ཡིག་རབ་དང་རིམ་པའི”ཆེད་དོན་ལེ་ཚན་བཟོས་ནས། ཏང་གི་ལོ་རྒྱུས་སློབ་སྦྱོང་སློབ་གསོའི་སྐོར་གྱི་དྲ་ཐོག་དཔྱད་འདེམས་ཀྱི་རྩོམ་ཡིག་སྤེལ་བ་རེད། རིམ་པ་ཁག་དང་རིགས་ཁག་གི་སྨྱན་སྦྱོར་གསར་པའི་ལས་སྟེགས་སྐུལ་སློང་བྱས་ཏེ། འབྲེལ་ཡོད་ཀྱི་ཕུལ་བྱུང་གསར་འགྱུར་རྩོམ་ཡིག་དུས་ཐོག་ཏུ་སྤེལ་ནས་ཏང་གི་ལོ་རྒྱུས་སློབ་སྦྱོང་སློབ་གསོ་སྤེལ་བའི་དོན་སྙིང་གལ་ཆེན་དང་། དམིགས་ཚད་ལས་འགན། ཉམས་མྱོང་དང་བྱེད་ཐབས་བཅས་གཅིག་སྡུད་དྲིལ་བསྒྲགས་བྱས་ཡོད།
ཏང་གི་ལོ་རྒྱུས་སློབ་སྦྱོང་སློབ་གསོ་སྤེལ་ཚུན། ལྷ་ས་གྲོང་ཁྱེར་མལ་གྲོ་གུང་དཀར་རྫོང་གིས་ཐོག་མཐའ་བར་གསུམ་དུ་དམངས་ལ་བྱ་བ་དངོས་སྒྲུབ་པ་དང་མང་ཚོགས་ཀྱི་བདེ་སྡུག་ཉན་པ་གཙོ་གནད་ལས་དོན་ལ་བརྩིས་ནས་དམ་འཛིན་བྱས་ཤིང་། དམངས་ལ་བྱ་བ་དངོས་སྒྲུབ་པའི“མཐའ་མའི་འགག་གནད”ནུས་ཤུགས་ཡོད་རྒུས་བསལ་ཡོད། 《མལ་གྲོ་གུང་དཀར་རྫོང་གི་མང་ཚོགས་ཀྱིས“ཐག་གཅོད་བྱེད་རེ་ཆེ་ཤོས་བྱེད་པའི་གནད་དོན”དང་། “ཆེས་མཐོང་མི་འདོད་པའི་གནད་དོན” “ཐག་གཅོད་བྱེད་དཀའ་ཤོས་ཀྱི་གནད་དོན”བཅས་ཀྱི་ལོ་གསུམ་གྱི(2021-2023)བྱ་སྤྱོད་འཆར་གཞི》བཟོས་པ་དང་། མ་དངུལ་སྒོར་དུང་ཕྱུར་1.5སྤྱི་འདོམས་བཀོད་སྒྲིག་བྱས་ནས་དམངས་འཚོའི་འདུ་འགོད་216ལག་བསྟར་བྱས་པ་དང་འབྲེལ། བོད་སྐྱོར་མ་དངུལ་སྒོར་ཁྲི་3845བསྡུ་སྒྲིལ་བྱས་ནས་དམངས་འཚོའི་དོན་དངོས་ཙག་ཙིག་105བསྒྲུབས་པ་རེད།
མི་དམངས་དངུལ་ཁང་ནག་ཆུ་ལྟེ་བའི་ཉིང་ལག་དངུལ་ཁང་གིས《མི་དམངས་དངུལ་ཁང་ནག་ཆུ་ལྟེ་བའི་ཉིང་ལག་དངུལ་ཁང་གིས་ཏང་གི་ལོ་རྒྱུས་སློབ་སྦྱོང་སློབ་གསོ་སྤེལ་བའི་ལག་བསྟར་ཇུས་གཞི》མཛུབ་ཁྲིད་དུ་བྱས་ཏེ། ཏང་གི་ལོ་རྒྱུས་སློབ་སྦྱོང་སློབ་གསོའི་ནང་དོན་གལ་ཆེན་ལ་དམིགས་ནས“ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བར་རྟེན་འབྲེལ་ཞུ་བའི་ཡིག་རིས་འགྲེམས་སྟོན”དང་། དཔེ་ཀློག་མཉམ་སྤྱོད། གསར་བརྗེའི་གློག་བརྙན་ལྟ་བ། དངུལ་རྩའི་ཤེས་བྱ་གཤམ་སྤེལ་སོགས་ཀྱི་བྱེད་སྒོ་རབ་དང་རིམ་པ་སྤེལ་ཏེ་ཏང་གི་ལོ་རྒྱུས་སློབ་སྦྱོང་སློབ་གསོ་སེམས་སུ་ཟུག་པ་དང་། གཏིང་ཟབ་ཏུ་གཏོང་བ། དོན་དམིགས་སར་འབྱོར་བ་བཅས་ཡོང་བར་སྐུལ་འདེད་བཏང་བ་རེད།