ལྟ་ཞིབ་ཚད་ལེན་ཚོགས་ཆུང་གི་མི་སྣས་ཁྲོན་བོད་ལྕགས་ལམ་ཉེ་འགྲམ་གྱི་ཆུ་བོ་གལ་ཆེན་དུ་ལྟ་ཞིབ་ཚད་ལེན་བྱེད་བཞིན་པ།

ལྟ་ཞིབ་ཚད་ལེན་ཚོགས་ཆུང་གི་མི་སྣས་ཁྲོན་བོད་ལྕགས་ལམ་ཉེ་འགྲམ་དུ་ཁོར་ཡུག་དང་མཁའ་རླུང་ལ་ལྟ་ཞིབ་ཚད་ལེན་བྱེད་བཞིན་པ།

ཁྲོན་བོད་ལྕགས་ལམ་ནི་རྒྱལ་ཁབ་ཀྱི་ཕྱོགས་བསྡུས་འགྲིམ་འགྲུལ་དྲ་བའི་ཡུན་རིང་འཆར་འགོད་དང་དུས་ཡུན་རིང་འབྲིང་གི་ལྕགས་ལམ་དྲ་བ་འཆར་འགོད་ཀྱི་གྲུབ་ཆ་གལ་ཆེན་ཞིག་རེད་ལ། དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དང་དོན་འཁྱོལ་བྱེད་པའི་བྱེད་ཐབས་གལ་ཆེན་ཤིག་ཡིན་པས། མེས་རྒྱལ་གོང་བུ་གཅིག་གྱུར་སྲུང་སྐྱོང་དང་། མི་རིགས་མཐུན་སྒྲིལ་ལ་སྐུལ་འདེད། མཐའ་མཚམས་བརྟན་ལྷིང་བརྟན་དུ་གཏོང་བ་དང་། དེ་བཞིན་རང་ལྗོངས་ཀྱི་དཔལ་འབྱོར་དང་སྤྱི་ཚོགས་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བར་དོན་སྙིང་ཧ་ཅང་གལ་ཆེན་ལྡན་ཡོད།

ཁྲོན་བོད་ལྕགས་ལམ་རྒྱུད་ཀྱི་ས་བབ་ས་གཤིས་དང་གནམ་གཤིས་ཀྱི་ཆ་རྐྱེན་ཞན་པ་དང་སྐྱེ་ཁམས་ཁོར་ཡུག་ཉམས་ཞན་ཡིན་ཞིང་། འཆར་འགོད་བྱས་པའི་ལྕགས་ལམ་གྱི་ལམ་ཐིག་མང་པོ་ཞིག་རང་བྱུང་སྲུང་སྐྱོང་ཁུལ་ནས་བརྒྱུད་དགོས་པས་ལྕགས་ལམ་འཛུགས་སྐྲུན་བྱེད་རིང་སྐྱེ་ཁམས་ཁོར་ཡུག་གི་སྤུས་ཚད་འགན་ལེན་བྱེད་རྒྱུ་གལ་འགངས་ཧ་ཅང་ཆེ། གསར་དུ་བསྐྲུན་པའི་ཁྲོན་བོད་ལྕགས་ལམ་རྒྱུད་ཀྱི་སྐྱེ་ཁམས་ཁོར་ཡུག་སྤུས་ཚད་ཀྱི་གྲངས་གཞི་སྔར་བས་ཁོང་དུ་ཆུད་པ་དང་རྣམ་གྲངས་འཛུགས་སྐྲུན་གོང་གི་ཁོར་ཡུག་གི་ཆ་རྐྱེན་དང་ཨར་པོ་རྒྱག་རིང་གི་སྐྱེ་ཁམས་སྤུས་ཚད་ཀྱི་གནས་ཚུལ་མཐིལ་རྟོགས་བྱ་ཆེད། རང་སྐྱོང་ལྗོངས་སྐྱེ་ཁམས་ཁོར་ཡུག་ལྟ་ཞིབ་ཚད་ལེན་ལྟེ་གནས་ཀྱིས་ཏང་གི་ལོ་རྒྱུས་སློབ་སྦྱོང་སློབ་གསོ་དང“དེ་བས་གསུམ”གྱི་ཆེད་དོན་སློབ་གསོ་སློབ་སྦྱོང་གོ་སྐབས་སུ་བརྩིས་ནས་རང་འགུལ་ངང་བྱ་བ་སྒྲུབ་པ་དང་། ཕྱོགས་ཡོངས་ནས་འགན་འཁྲི་ལག་བསྟར། འགན་འཁྲི་འཁུར་ཕོད་པ་བཅས་བྱས་ཏེ་རྒྱལ་ཁབ་དང་རང་སྐྱོང་ལྗོངས་ཀྱི་རྣམ་གྲངས་གལ་ཆེན་འཛུགས་སྐྲུན་གྱི་ཁོར་ཡུག་གྲངས་གཞི་ལྟ་ཞིབ་ཚད་ལེན་དང་འགན་སྲུང་ལས་དོན་ཧུར་ཐག་བསྒྲུབས་ཤིང། ཟླ་3ཚེས་25ཉིན་ནས་ཟླ་4ཚེས་12ཉིན་བར་རང་སྐྱོང་ལྗོངས་སྐྱེ་ཁམས་ཁོར་ཡུག་ལྟ་ཞིབ་ཚད་ལེན་ལྟེ་གནས་ཀྱིས་གསར་དུ་བསྐྲུན་པའི་ཁྲོན་བོད་ལྕགས་ལམ་བོད་ལྗོངས་དུམ་བུའི་སྐྱེ་ཁམས་ཁོར་ཡུག་སྤུས་ཚད་ལ་ལྟ་ཞིབ་ཚད་ལེན་བྱེད་པའི་ལས་དོན་སྤེལ་བ་རེད།

ལས་དོན་དེ་ཡག་པོ་སྒྲུབ་ཆེད། རང་སྐྱོང་ལྗོངས་སྐྱེ་ཁམས་ཁོར་ཡུག་ལྟ་ཞིབ་ཚད་ལེན་ལྟེ་གནས་ཀྱིས་རང་ལྗོངས་ཀྱི་ལས་རིགས་དེའི་རིགས་གཅིག་མཁས་ཅན་བསྟོངས་ཏེ་ཆེད་དོན་ཚོགས་འདུ་ཐེངས་མང་འཚོགས་ནས་ལྕགས་ལམ་རྒྱུད་ཀྱི་སྐྱེ་ཁམས་ཁོར་ཡུག་ལ་ལྟ་ཞིབ་ཚད་ལེན་བྱེད་པའི་ལས་དོན་སྤེལ་རྒྱུར་ཞིབ་འཇུག་གྲོས་བསྡུར་ཡང་སེ་བྱས་ཏེ《གསར་དུ་བསྐྲུན་པའི་ཁྲོན་བོད་ལྕགས་ལམ་བོད་ལྗོངས་དུམ་བུའི་སྐྱེ་ཁམས་ཁོར་ཡུག་ལྟ་ཞིབ་ཚད་ལེན་གྱི་ཇུས་གཞི》བཟོས་པ་དང་འབྲེལ། ཧྲང་ཧའེ་གྲོང་ཁྱེར་དང་ཅང་སུའུ་ཞིང་ཆེན་སྐྱེ་ཁམས་ཁོར་ཡུག་ལྟ་ཞིབ་ཚད་ལེན་གྱི་རིགས་གཅིག་མཁས་ཅན་བོད་དུ་མཛུབ་ཁྲིད་བྱེད་པར་གདན་དྲངས་པ་རེད།

“གནས་གཏན་འཁེལ་དང་། ས་གནས་ས་ཐོག་ཏུ་རྩད་ཞིབ། མ་དཔེ་འཚོལ་བསྡུ་བཅས་བྱེད་སྐབས་ཁུལ་ཁོངས་ལ་ལར་རྐང་ཐང་དུ་འགྲོ་བའམ་ཡང་ན་ས་གནས་དེ་གའི་གྲོང་མིའི་སྦག་སྦག་གཡར་ནས་འགྲོ་དགོས། སྐབས་རེར་ལག་ཏུ་བརྟག་དཔྱད་ཡོ་བྱད་བཟུང་ནས་ཞེང་ཚད་ལ་ལི་སྨི་བཅུ་གྲངས་ལས་མེད་པའི་གཡང་གཟར་དུ་ཡང་འགྲོ་དགོས་ཀྱི་ཡོད། རིགས་གཅིག་མཁས་ཅན་གྱི་ཁོངས་མི་ཚོས་ཉིན་རེར་ལས་ཀ་དུས་ཚོད་12ཡན་བྱེད་ཀྱི་ཡོད་ལ། གངས་རི་འཛེག་པ་དང་། གཙང་འགྲམ་དུ་འབབ་པ། མི་མེད་ཁུལ་དུ་སྐྱོད་པ་བཅས་བྱས་ནས་ལ་དུག་ཁྱད་གསོད་དང་ཆབས་ཅིག་ལྟ་ཞིབ་ཚད་ལེན་གྱི་ལས་དོན་སྤུས་ཚད་མཐོ་པོས་ལེགས་གྲུབ་ཡོང་བར་འགན་ལེན་བྱེད་ཀྱི་ཡོད”ཅེས་ཧྲང་ཧའེ་གྲོང་ཁྱེར་གྱི་རིགས་གཅིག་མཁས་ཅན་ཚོགས་ཆུང་གི་ཁོངས་མིས་བཤད།

དཀའ་ཚེགས་མང་པོ་ཁྱད་བསད་བྱས་ཏེ་ལྟ་ཞིབ་ཚད་ལེན་ཚོགས་ཆུང་གསུམ་གྱིས་མ་དཔེ་འཚོལ་བསྡུ་ལས་དོན་ཕུན་སུམ་ཚོགས་པོའི་ངང་ལེགས་སྒྲུབ་བྱས་པ་རེད། མ་དཔེ་འཚོལ་བསྡུ་ཡུལ་དངོས་སུ་ལས་དོན་པས་བརྙན་ལམ་དང་འདྲ་པར་གྱི་ལམ་ནས་མ་དཔེ་འཚོལ་བསྡུའི་ས་ཚིགས་ཀྱི་ངོགས་གཉིས་དང་། སྟོད་སྨད། དཀྱིལ་གྱི་གཏིང་ཟབ་ཤོས་སོགས་ཀྱི་གནས་ཚུལ་ཟིན་ཐོར་འགོད་པ་དང་། མ་དཔེ་འཚོལ་བསྡུ་བྱེད་རིང་ནན་ཏན་ངང་མ་དཔེ་ཟིན་ཐོར་འགོད་པ་དང་གྲངས་གཞིའི་སྤུས་ཚད་ཀྱི་བླང་བྱ་ལྟར་ལྟ་ཞིབ་ཚད་ལེན་གྱི་རྣམ་གྲངས་ཚང་མར་ས་ཡུལ་དངོས་ནས་རགས་དཔེ་འཚོལ་བསྡུ་བྱས་ཏེ་མ་དཔེ་ཁག་རེར་འདྲ་མཚུངས་མ་དཔེ་10%འཚོལ་བསྡུའི་བླང་བྱ་ལྟར་བཀོལ་སྤྱོད་བྱས་པ། མ་དཔེ་འཚོལ་བསྡུ་བྱས་རྗེས་གཏན་འབེབས་ལྟར་ཉར་ཚགས་དང་སྐྱེལ་འདྲེན་བྱས་ཏེ་མ་དཔེ་ཚོད་ལྟ་ཁང་དུ་སྐྱེལ་གྱི་ཡོད་པ་མ་ཟད། ཚོད་ལྟ་ཁང་དུ་སྤུས་ཚད་ཚོད་འཛིན་མ་དཔེ་དང་། རགས་དཔེ། འདྲ་མཚུངས་མ་དཔེ་བཅས་ཚད་འཇལ་གཏན་འཁེལ་བྱས་ཏེ་ལྟ་ཞིབ་ཚད་ལེན་བྱས་པའི་གྲངས་གཞི་ལུགས་དང་མཐུན་པ་དང་། དོན་དངོས་ཡིན་པ། ཡང་དག་ཡིན་པ་བཅས་འགན་ལེན་གྱིས་རྒྱལ་ཁབ་དང་རང་སྐྱོང་ལྗོངས་ཀྱི་འཛུགས་སྐྲུན་རྣམ་གྲངས་གལ་ཆེན་བདེ་བླག་ངང་ལག་ལེན་བསྟར་རྒྱུར་སྐྱེ་ཁམས་ཁོར་ཡུག་ལྟ་ཞིབ་ཚད་ལེན་གྱི་གྲངས་གཞིའི་འགན་ལེན་བརྟན་པོ་མཁོ་འདོན་བྱས་ཡོད། ད་རེས་ལྟ་ཞིབ་ཚད་ལེན་གྱི་གྲངས་གཞི་ལས་ཁྲོན་བོད་ལྕགས་ལམ་བོད་ལྗོངས་དུམ་བུའི་སྐྱེ་ཁམས་ཁོར་ཡུག་གི་སྤུས་ཚད་ཡག་པོ་ཡོད་པ་མངོན་ཡོད།

“སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སྐྱེ་ཁམས་ཁོར་ཡུག་ལ་སྲུང་སྐྱོང་བྱེད་པར་སྔོན་ལ་ཁོར་ཡུག་གི་གནས་ཚུལ་གསལ་རྟོགས་དང་ཁོང་དུ་ཆུད་དགོས་ཞེས་བཏོན་གནང་ཡོད། ཁྲོན་བོད་ལྕགས་ལམ་གྱི་སྐྱེ་ཁམས་ཁོར་ཡུག་གི་སྤུས་ཚད་ལྟ་ཞིབ་ཚད་ལེན་ལས་དོན་ད་དུང་མུ་མཐུད་སྤེལ་དགོས་པས། ལྟ་ཞིབ་ཚད་ལེན་མི་སྣས་རང་འགུལ་ངང་ཞབས་འདེགས་ཞུ་བ་དང་འབྱུང་འཕྲོད་ལས་གྲྭ་འཛུགས་སྐྲུན་འགན་ལེན་གྱི་ལས་ཀའི་བླང་བྱ་ལྟར‘བོད་སྐྱོད་པ་རྒན་གྲས་ཀྱི་སྙིང་སྟོབས’དང‘ལམ་གཉིས་ཀྱི་སྙིང་སྟོབས’མུ་མཐུད་དར་སྤེལ་བཏང་ནས་འབྱུང་འཕྲོད་ཁྲོན་བོད་ལྕགས་ལམ་དང་དེའི་ལམ་རྒྱུད་ཁུལ་ཁོངས་ཀྱི་བཀྲག་མདངས་འཚེར་བའི་གཞི་གདན་དུ་འགྱུར་བར་བྱེད་དགོས”ཞེས་ལྗོངས་སྐྱེ་ཁམས་ཁོར་ཡུག་ལྟ་ཞིབ་ཚད་ལེན་ལྟེ་གནས་ཀྱི་འབྲེལ་ཡོད་འགན་འཁུར་བས་བཤད།