འགོ་འཛུགས་གཏམ།
འབྱོར་འབྲིང་ནི་འབད་འཐབ་ལས་བྱུང་བ་དང་འབྱོར་འབྲིང་གིས་འཚོ་བར་བཀྲག་མདངས་སྦྱིན། ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བ་དང་བོད་ཞི་བས་བཅིངས་འགྲོལ་བཏང་ནས་ལོ་ངོ་70འཁོར་བར་རྟེན་འབྲེལ་ཞུ་བ་དང་། རང་ལྗོངས་ཀྱི་དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་དང་ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པའི་རླབས་ཆེན་ལག་ལེན་གང་ལེགས་མངོན་པར་བྱེད་པ། ས་མཐོའི་བུ་ཕྲུག་ཚོས་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པའི་བརྗིད་ཆེའི་ལེའུ་ནུས་ཤུགས་ཡོད་རྒུས་རྩོམ་རྒྱུར་སྐུལ་ལྕག་བྱེད་པ་བཅས་ཀྱི་ཆེད། དེ་རིང་ནས་བཟུང་། འདི་ག་ཚགས་པར་གྱིས《ལོ་བརྒྱའི་འབད་འཐབ་ལམ། རྒྱང་སྐྱོད་གསར་པ་ཚུཌ། མཉམ་དུ་འབྱོར་འབྲིང་ཕྱོཌ་སུ་སྐྱོད》ཅེས་པའི་ལེ་ཚན་གཏོང་སྤེལ་བྱ་རྒྱུ་ཡིན་པས་དོ་སྣང་ཡོད་པར་ཞུ།
འདི་ནི་ལྷ་ས་གྲོང་ཁྱེར་ཚལ་གུང་ཐང་ཁྲོམ་གཞུང་གི་ཚལ་གྲོང་ཚོའི་རྣམ་པ་ཡིན་པ།
དེང་རབས་ཅན་གྱི་གྲོང་མིའི་ཁུལ་ཆུང་དང་སློབ་ཁྲིད་ཐོག་ཁང་སྟར་ཆགས་སུ་གནས་པ་དང་། ཁྲོམ་གཞུང་ཐོག་རླངས་འཁོར་མང་ལ་གང་སར་ཚོང་ཁང་གིས་ཁེངས་པ། མི་རིང་བའི་སར་སློབ་གྲྭ་དང་། སྨན་ཁང་། ཕན་བདེ་ཁང་བཅས་ཡོད་པ་དེ་ནི་ལྷ་ས་གྲོང་ཁུལ་དང་བར་ཐག་སྤྱི་ལེ་ཁ་ཤས་ལས་མེད་པའི་ལྷ་ས་གྲོང་ཁྱེར་ཁྲེང་ཀོན་ཆུས་ཚལ་གུང་ཐང་ཁྲོམ་གཞུང་གི་ཚལ་གྲོང་ཚོ་རེད།
ལོ་བཅུའི་གོང་ཚལ་གྲོང་ཚོ་ནི་གྲོང་གསེབ་ཡིན་ཞིང་། གྲོང་མི་ཚོས་ནས་འདེབས་པའམ་ཡང་ན་ཕྱུགས་འཚོས་ནས་འཚོ་ཐབས་བྱེད་ཀྱི་ཡོད། “སྔོན་ཆད་མི་རྣམས་ཀྱི་བག་ཆགས་ཁྲོད་ཀྱི་ཚལ་གྲོང་ཚོ་ནི་ཟང་ཟིང་ཆེ་བའི་གྲོང་འདབས་ཀྱི་དཔེ་མཚོན་ཅན་གྱི་གྲོང་གསེབ་ཅིག་རེད”ཅེས་ཚལ་གྲོང་ཚོའི་ཏང་ཀྲི་པུའི་ཧྲུའུ་ཅི་དང་པོ་ཐུབ་བསྟན་བློ་བཟང་གིས་གསར་འགོད་པར་བཤད་བྱུང་།
2011ལོར་ལྷ་ས་གྲོང་ཁྱེར་གྱི་གྲོང་ཁྱེར་འཆར་འགོད་གཞིར་བཟུང་། ཚལ་གྲོང་ཚོའི་ས་ཞིང་མུའུ་3900བསྡུ་སྤྱོད་བྱས་ནས་ལྷ་ས་གྲོང་ཁྱེར་གྱི་དུས་ཐེངས་དང་པོའི་སློབ་གསོའི་གྲོང་བསྐྲུན་པ་དང་། 2012ལོར་དུས་ཐེངས་དང་པོའི་ས་ཆ་བསྡུ་བའི་ལས་དོན་ཚང་མ་ལེགས་གྲུབ་ཟིན་ནས། ལོ་དེར་ཞིང་ལས་གཙོ་བོར་བྱེད་པའི་སྲོལ་རྒྱུན་གྲོང་ཚོ་དེར་འགྱུར་ལྡོག་ཆེན་པོ་བྱུང་བ་རེད།
འདི་ལོ་ལོ་30ལ་སླེབས་པའི་བསོད་རྡོར་ནི་ཚལ་གྲོང་ཚོར་སྐད་གྲགས་ཆོད་པའི་ཕྱུག་འགྱུར་སྣེ་ཁྲིད་པ་ཞིག་རེད། ལོ་9ཡི་གོང་ཟོག་འདྲེན་རླངས་འཁོར་གྱི་ཁ་ལོ་བ་ཁོང་ལ་ཚོང་ལས་ཀྱི་གོ་སྐབས་ཤིག་རག་སྟེ། ཚོགས་ཆུང་5པའི་གྲོང་མི་རྣམས་སྒྲིག་འཛུགས་བྱས་ཏེ་ཤན་ཁ་འཕྲུལ་ཆས་རུ་ཁག་བཙུགས་པས་ཉེ་འགྲམ་གྱི་ལས་ཡུལ་ནས་ལས་ཀ་མི་ཉུང་བ་ཞིག་རག
“སྐབས་དེ་དུས་ལས་ཀ་མང་ལ་གོ་སྐབས་ཀྱང་མང་བ་མ་ཟད། ང་ཚོས་དཀའ་ཚེགས་ལ་མི་འཛེམས་པས་འཕྲུལ་ཆས་རུ་ཁག་གི་ཡོང་འབབ་ལོ་རེ་ལས་མ་འདས་པར་མང་དུ་ཕྱིན་སོང་། དེ་ནས་ང་ཚོས་བསོད་བསྟན་ལགས་འཛུགས་སྐྲུན་ལས་གྲྭའི་ཞིང་འབྲོག་པའི་ཆེད་ལས་མཉམ་ལས་ཁང་བཙུགས་པར། གྲོང་ཚོའི་རླངས་འཁོར་30ལྷག་ཙམ་མཉམ་ལས་ཁང་ནང་ཞུགས་པ་དང་། རླངས་འཁོར་རེ་རེ་ལས་གྲོང་མི་ཚོར་ལོ་ལྟར་ཡོང་འབབ་ཁེ་གཙང་སྒོར་ཁྲི་8ལྷག་ཙམ་ཡོང་གི་ཡོད། གྲོང་མི་ཚོའི་ཡོང་འབབ་མང་དུ་གཏོང་ཆེད། འདི་ལོ་མཉམ་ལས་ཁང་གིས་སོ་ཕག་བཟོ་གྲྭ་ཞིག་བཙུགས་ནས་གྲོང་མི་20ལྷག་ཙམ་གྱི་ལས་ཞུགས་གནད་དོན་ཐག་གཅོད་བྱས་ཡོད། ད་ཆ་གྲོང་ཚོ་ནས་ལྷ་ས་གྲོང་ཁུལ་བར་གྱི་ལམ་ཡང་ཇེ་ལེགས་སུ་འགྲོ་བཞིན་ཡོད་པས་ང་ཚོས་སྤྲོ་གསེང་གྲོང་ཚོ་ཞིག་གཉེར་ནས་གྲོང་མི་དེ་བས་མང་བ་ཐག་ཉེ་ས་དང་སྟབས་བདེ་སར་ལས་ཞུགས་ཐུབ་པ་བྱ་རྩིས་ཡོད”ཅེས་བསོད་རྡོར་གྱིས་འབྱུང་འགྱུར་ལ་ཡིད་ཆེས་ཀྱིས་ཁེངས་བཞིན་དེ་ལྟར་ངོ་སྤྲོད་བྱས།
“མཉམ་སྡེབ་དཔལ་འབྱོར་སྟོབས་ཆེར་ཕྱིན་པ་ལས་ཕན་པ་མང་ཤོས་ཐོབ་མཁན་ནི་མི་སེར་རེད། 2020ལོར་གྲོང་ཚོའི་མཉམ་སྡེབ་དཔལ་འབྱོར་གྱི་སྤྱིའི་ཡོང་འབབ་སྒོར་ཁྲི་1500ཟིན་པ་དང་། གྲོང་མི་མི་རེར་བགོ་འགྲེམས་སྒོར་4000ནས་སྒོར་ཁྲི་1.5བར་རག་པའི་ཁར་ཁེར་རྐྱང་དཔལ་འབྱོར་དང་ཕྱིར་གླ་པར་སྐྱོད་པ་སོགས་ཀྱི་ཡོང་འབབ་བསྡོམས་ན་ཚལ་གྲོང་ཚོའི་གྲོང་མི་མི་རེར་ཆ་སྙོམས་ཡོང་འབབ་ཁེ་གཙང་སྒོར་23664.9ཟིན་གྱི་ཡོད”ཅེས་དཔལ་འབྱོར་ཡོང་འབབ་མཛུབ་རྩིས་རྒྱག་བཞིན་པའི་ཐུབ་བསྟན་བློ་བཟང་གིས་དགའ་ཚོར་ཆེན་པོས་བརྗོད། “ལོ་དེ་དག་ནང་འཕེལ་རྒྱས་ཕྱིན་པ་བརྒྱུད་གྲོང་མི་ཚོ་མཛེས་ཤིང་གཙང་སྦྲ་དོད་པའི་ཁང་པར་སྡོད་རྒྱུ་བྱུང་བ་མ་ཟད། ཡོང་འབབ་ཀྱང་ལོ་རེ་ལས་མ་འདས་པར་མང་དུ་ཕྱིན་པ་དང་། རྒན་རྒོན་ནད་བསྟེན་པ་དང་ཕྲུ་གུ་སློབ་གྲྭར་གཏོང་བ་སོགས་དེ་བས་སྟབས་བདེ་རུ་ཕྱིན་ཡོད། ད་ཆ་ཚལ་གྲོང་ཚོར་གྲོང་ཁྱེར་དང་འདྲ་བར་རང་བྱུང་སོལ་རླངས་དུད་ཚང་དུ་ཁྲིད་པ་དང་གློག་ལམ་སྒྱུར་བཀོད་ལས་གྲྭ་ལག་བསྟར་བྱེད་བཞིན་ཡོད། དེ་ནི་ངའི་སེམས་ནང་གི་འབྱོར་འབྲིང་འཚོ་བ་དེ་རེད”ཅེས་ཐུབ་བསྟན་བློ་བཟང་གིས་དགའ་ཚོར་ཆེན་པོས་བཤད།