རྒྱང་རིང་ནས་ལྟ་དུས་རི་རྩེ་ཁ་བས་བརྒྱན་པ་དང་། རི་གཤམ་ནགས་ཚལ་སྟུག་པོས་བཀླུབས་པ། ཤིང་ཁང་དང་། ཤིང་ར། ཤིང་ཟམ་བཅས་དང་གྲོང་མིའི་སྡོད་ཁང་ནམ་མཁའི་སྐར་ཚོགས་ལྟར་གཅིག་ལ་གཅིག་འགྲན་དུ་ཆཌ་པ་འདི་ནི་ཀླུ་ནང་གི་མཛེས་ལྗོངས་རེད།
མཛེས་ཤིང་ལྟ་ན་སྡུག་པའི་གནས་དེར་དེ་ཙམ་མཐོང་སྣང་དོད་པོ་མེད་པའི་ཞིང་པའི་སྤྲོ་ཁང་ཞིག་ཡོད་པ་དེར་ཕྱོགས་བཞི་མཚམས་བརྒྱད་ཀྱི་ཡུལ་སྐོར་བ་རྫོགས་རྒྱུ་མེད། སྤྲོ་ཁང་གི་མདུན་དུ“ཀླུ་ནང་གི་གཞོན་ནུ་ཤེས་ཡོན་ཅན་གྱི་ལྟེ་གནས”ཞེས་པའི་ཡི་གེ་ཆེན་པོ་ཞིག་བྲིས་ཡོད།
གཞོན་ནུ་ཤེས་ཡོན་ཅན་གྱི་ལྟེ་གནས་ཀྱི་སྒོ་ར་ནི་ཤིང་དང་རྡོ་ལས་གྲུབ་པ་དང་སྒོ་ར་དེ་ཙམ་རྒྱ་ཆེན་པོ་མེད། འོན་ཀྱང་བཟོ་བཀོད་ལུགས་དང་མཐུན་པ་ཞིག་འདུག སྒོ་རའི་ནང་ཐབ་ཚང་དང་། སློབ་སྦྱོང་བྱེད་ས། ཉལ་ཁང་། ཕྱི་ཕྱོགས་འགྲེམས་སྟོན་ཁུལ་བཅས་སུ་དབྱེ་ཡོད། སློབ་སྦྱོང་བྱེད་སའི་ནང་དེབ་སྣ་ཚོགས་དང་འབྲི་དེབ་གྲལ་འགྲིག་པོས་བཞག་ཡོད་པ་དང་། ཐབ་ཚང་ནང་སྟབས་བདེའི་ཐབ་ཆས་ཁ་ཤས་ལས་མེད། ཉལ་ཁང་ནང་སྒྲོག་ཙེ་གཅིག་དང་དེ་བཞིན་ཤིང་གི་ཉལ་ཁྲི་ཞིག་ལས་མེད་པས་དེ་ལས་ང་ཚོས་སྐབས་དེ་དུས་ཀྱི་གཞོན་ནུ་ཤེས་ཡོན་ཅན་གྱི་དཀའ་ཚེགས་མཐོང་ཐུབ།
སྐབས་དེའི་འཚོ་བའི་ཁྲོད་གཞོན་ནུ་ཤེས་ཡོན་ཅན་གྱིས་ལུད་བསྐྱལ་བ་དང་། ཆུ་ཡུར་བཟོ་བ། འབྲུ་རིགས་སྐྱེལ་བ། ཕྱུགས་འཚོ་བ། ཁྲོན་པ་འདྲུ་བ། ཁང་པ་རྒྱག་པ་སོགས་བྱེད་མྱོང་ལ་ས་ཕག་འཁུར་བ་དང་སློབ་ཚན་ཡང་ཁྲིད་མྱོང་ཡོད་པའི་ལོ་རྒྱུས་དེ་དག་གཞོན་ནུ་ཤེས་ཡོན་ཅན་གྱི་མི་ཚེའི་ནང་གི་རྩ་ཆེ་ཤོས་ཀྱི་རྒྱུ་ནོར་དུ་གྱུར་ཡོད།
སྐབས་དེ་དུས་དང་བསྡུར་ན་ད་ཆའི་ཀླུ་ནང་ལ་གནམ་ས་བླ་འོག་ཏུ་འགྱུར་བ་ལྟ་བའི་འགྱུར་ལྡོག་བྱུང་ཡོད། 2017ལོར་ཀོང་ཏུང་ཞིང་ཆེན་གྱི་ཁ་གཏད་རོགས་སྐྱོར་འོག བསྡོམས་མ་དངུལ་སྒོར་དུང་ཕྱུར་38བཏང་བའི་ཀླུ་ནང་རྒྱལ་སྤྱིའི་ཡུལ་སྐོར་གྲོང་རྡལ་ཆུང་ངུ་བསྐྲུན་རྗེས་ཕྱོགས་བཞི་མཚམས་བརྒྱད་ཀྱི་མགྲོན་པོ་སླེབས་ཡོད།
དུས་བཟང་དེ་དང་བསྟུན་ནས་དུས་ཡུན་རིང་པོ་ཟ་ཁང་དང་མགྲོན་ཁང་གི་ཚོང་རྒྱག་མཁན་ཀླུ་ནང་གྲོང་རྡལ་བཀྲ་ཤིས་སྒང་གྲོང་ཚོའི་གྲོང་མི་ཚེ་རིང་ནོར་བུས་གསར་དུ་སྐྲུན་པའི་ཀླུ་ནང་རྒྱལ་སྤྱིའི་ཡུལ་སྐོར་གྲོང་རྡལ་གྱི་ཚོང་ལས་ཁྲོམ་གཞུང་དུ་རྡོ་ཁོག་བྱ་ཤའི་ཟ་ཁང་ཞིག་བཙུགས་ཡོད། ཁོང་གིས“ཀླུ་ནང་གྲོང་རྡལ་བསྐྲུན་རྗེས་ཡུལ་སྐོར་བ་དེ་བས་མང་དུ་ཕྱིན་ནས་ཟ་ཁང་གི་ཚོང་ཡང་ཧ་ཅང་ཡག་པོ་འདུག”ཅེས་བཤད། ཚེ་རིང་ནོར་བུ་དང་འདྲ་བ་ཀླུ་ནང་རྒྱལ་སྤྱིའི་ཡུལ་སྐོར་གྲོང་རྡལ་འཛུགས་སྐྲུན་རྣམ་གྲངས་ཀྱི་ཕན་པ་ཐོབ་མཁན་ས་གནས་དེ་གའི་མང་ཚོགས་མང་པོ་ཡོད།
ཡུལ་སྐོར་བ་མང་དུ་འགྲོ་བ་དང་བསྟུན་ནས་ནགས་ཁྲོད་ཐོན་རྫས་སྣ་ཚོགས་ཀྱི་དགོས་མཁོ་ཆེ་རུ་སོང་བས་ཞིང་འབྲོག་པའི་ཡོང་འབབ་ཀྱང་ཇེ་མང་དུ་སོང་ཡོད།
“མིག་སྔར་ཀླུ་ནང་གྲོང་རྡལ་གྱི་ཁོར་ཡུག་སྔར་བས་དྭངས་ཤིང་གཙང་བ་དང་ཆ་ལག་ཚང་བའི་སྒྲིག་བཀོད་ཀྱང་དེ་བས་འཐུས་སྒོ་ཚང་པོ་ཡོད་པ་མ་ཟད། ས་ཁོངས་ཀྱི་ལས་རྣམ་ཉིན་བཞིན་ཕུན་སུམ་ཚོགས་སུ་ཕྱིན་ནས་ས་གནས་དེ་གའི་མི་སེར་གྱི་ཁྲོམ་རའི་འདུ་ཤེས་ཟབ་ཏུ་སོང་ཡོད”ཅེས་ཀླུ་ནང་གྲོང་རྡལ་འཛུགས་སྐྲུན་ལས་ས་གནས་དེ་གར་བྱུང་བའི་འགྱུར་ལྡོག་སྐོར་གླེང་སྐབས་ཀླུ་ནང་དུ་བཅའ་སྡོད་ལས་དོན་རུ་ཁག་གི་རུ་དཔོན་ཝུའུ་ཤིན་གྱིས་མྱོང་ཚོར་ཟབ་མོས་བརྗོད། ཀླུ་ནང་གྲོང་རྡལ་འཛུགས་སྐྲུན་དང་གཉེར་སྐྱོང་བྱས་པ་ལས་ས་གནས་དེ་གའི་ཞིང་འབྲོག་པར་ལས་ཞུགས་ལས་གནས་ཆིག་སྟོང་ཙམ་བཏོད་དེ་ཁོང་ཚོ་ཁྱིམ་གྱི་སྒོ་རྩར་ལས་ཞུགས་ཐུབ་ནས་ཀླུ་ནང་མི་སེར་ཚོའི་འབབ་འཕར་གྱི་ཐབས་ལམ་གསར་པ་ཞིག་ཏུ་གྱུར་ཡོད།
“ང་ཚོས་ཀླུ་ནང་གི་གཞོན་ནུ་ཤེས་ཡོན་ཅན་གྱི་ལྟེ་གནས་འདི་གསར་བརྗེའི་སློབ་གསོའི་རྟེན་གཞི་དང་རྒྱལ་གཅེས་རིང་ལུགས་ཀྱི་སློབ་གསོའི་རྟེན་གཞིར་བཏོད་དེ་དུས་རབས་གསར་པར་འབད་འབུངས་མདུན་སྐྱོད་བྱེད་པའི་ཚང་མའི་སྟོབས་ཤུགས་འཕེལ་བར་བྱ་རྩིས་ཡོད”ཅེས་ཉིང་ཁྲི་གྲོང་ཨུད་དྲིལ་བསྒྲགས་པུའུ་གསར་འགྱུར་ཁོའོ་ཡི་འགན་འཁུར་བ་ལུའི་ཅིན་ཀྲའོ་ཡིས་བརྗོད།