གསར་འགོད་པར་ལྗོངས་ཏང་ཨུད་ཏང་གི་ལོ་རྒྱུས་སློབ་སྦྱོང་སློབ་གསོ་འགོ་ཁྲིད་ཚོགས་ཆུང་གཞུང་ལས་ཁང་ནས་ཤེས་རྟོགས་བྱུང་བར། ཏང་གི་ལོ་རྒྱུས་སློབ་སྦྱོང་སློབ་གསོ་སྤེལ་ཚུན་རང་ལྗོངས་ཀྱིས་གསར་བརྗེའི་ས་བོན་མཛོད་གང་ལེགས་སྤྱོད་པ་དང་། གསར་བརྗེའི་གཏམ་རྒྱུད་ཡག་པོ་ཤོད་པ། གསར་བརྗེའི་འགྲེམས་སྟོན་གཉེར་བ། གསར་བརྗེའི་གློག་བརྙན་ལྟ་བ། རིག་རྩལ་གསར་རྩོམ་ལ་ཤུགས་སྣོན་རྒྱག་པ་བཅས་བྱས་ཏེ་ཏང་གི་ལོ་རྒྱུས་སློབ་སྦྱོང་སློབ་གསོ་ཡོངས་ཁྱབ་བྱ་རྒྱུར་སྐུལ་འདེད་བཏང་ཐོག ཏང་ཡོན་ལས་བྱེད་པའི“འདུ་ཤེས་བཞི”ཟབ་ཏུ་གཏོང་བ་དང་། “གདེང་ཚོད་བཞི”བརྟན་དུ་གཏོང་བ། “སྲུང་སྐྱོང་གཉིས”ཐུབ་པ་བྱེད་པ་བཅས་ལ་སློབ་གསོ་དང་ཁྲིད་སྟོན་བྱས་ནས། ཕུགས་བསམ་དང་དད་སེམས་བརྟན་པོ་འཛུགས་པ་དང་ཆབ་སྲིད་ཀྱི་ངེས་ཤུགས་ཆེ་རུ་བཏང་བ་རེད།

ཏང་གི་ལོ་རྒྱུས་སློབ་སྦྱོང་སློབ་གསོ་སྤེལ་ཚུན་རང་ལྗོངས་ཀྱིས“ངས་མང་ཚོགས་ལ་བྱ་བ་དངོས་སྒྲུབ་པའི”ལག་ལེན་བྱེད་སྒོ་རྒྱུན་མཐུད་ངང་སྤེལ་ཏེ། དམངས་ཀྱི་གནས་ཚུལ་རྟོག་ཞིབ་བྱེད་པའི་ཐད་ཤུགས་ཏན་ཏིག་བརྒྱབ་ཐོག་གཞི་རིམ་དང་མང་ཚོགས་ཁྲོད་བསྐྱོད་དེ་དམངས་ཀྱི་བསམ་འཆར་ཉན་པ་དང་དམངས་ཀྱི་འདོད་ཚུལ་གཅིག་སྡུད་ཀྱིས་གནད་དོན་གྱི་སྟོན་ཕྱོགས་དང་། ལག་ལེན་གྱི་སྟོན་ཕྱོགས། དགོས་མཁོའི་སྟོན་ཕྱོགས་བཅས་ཁ་གསལ་བཟོས་ཡོད། ཏང་གི་ལོ་རྒྱུས་སློབ་སྦྱོང་སློབ་གསོའི“ལོ་རྒྱུས་སྦྱངས་ནས་གནས་ལུགས་གསལ་རྟོགས་དང་། ལོ་རྒྱུས་སྦྱངས་ནས་དད་སེམས་འཕེལ་བ། ལོ་རྒྱུས་སྦྱངས་ནས་སྤྱོད་བཟང་གོང་བཀུར། ལོ་རྒྱུས་སྦྱངས་ནས་ལག་ལེན་ནན་བསྟར”གྱི་དམིགས་ཚད་ལ་དམིགས་ཏེ། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ་དེ་གྲོང་གསེབ་དར་རྒྱས་གཏོང་བ་དང་འབྲེལ་མཐུད་ནུས་ལྡན་བྱ་རྒྱུ་མཐའ་འཁྱོངས་ཀྱིས་བརྟན་ལྷིང་དང་། འཕེལ་རྒྱས། སྐྱེ་ཁམས། མཐའ་སྟོབས་བཅས་ཀྱི་དོན་ཆེན་བཞིར་དམ་པོར་དམིགས་ནས། ཏང་གི་ལོ་རྒྱུས་སློབ་སྦྱོང་སློབ་གསོ་དེ་རྒྱུན་གཏན་ནས་སྤེལ་བ་དང་དུས་རྒྱུན་དུ་དམ་འཛིན་བྱས་ཐོག་ཕུགས་ཕན་ལམ་སྲོལ་ཆགས་པར་བྱས་ཏེ་མི་དམངས་མང་ཚོགས་ཀྱི་བདེ་སྐྱིད་སྟོན་གྲངས་མཐོ་རུ་བཏང་ཡོད།

འཛམ་གླིང་དཔེ་ཀློག་ཉིན་མོ་ཐེངས་26པའི་སྐབས་རང་ལྗོངས་ཀྱིས“དཔེ་ཀློག་ཉིན་མོར་ཏང་གི་ལོ་རྒྱུས་ཀློག་པའི”རིམ་སྤེལ་བྱེད་སྒོ་སྤེལ་ནས་དཔེ་ཀློག་དང་ཏང་གི་ལོ་རྒྱུས་སློབ་སྦྱོང་བྱ་རྒྱུ་གཉིས་ཟུང་འབྲེལ་དམ་ཟབ་བྱས་ཏེ་ལོ་བརྒྱའི་བརྗིད་ཆེའི་ཏང་གི་ལོ་རྒྱུས་ཁྲོད་བློ་སྦྱོང་ཐུབ་པ་དང་། རྨང་གཞི་བརྟན་གཏོང་། འཇོན་ཐང་འཕེལ་བ། དད་སེམས་སྲུང་བ་བཅས་ལྗོངས་ཡོངས་ཀྱི་ལས་བྱེད་པ་དང་མང་ཚོགས་ཀྱི་ལོ་རྒྱུས་ཤེས་ནས་ཏང་ལ་དགའ་ཞེན་དང་། ལོ་རྒྱུས་ཤེས་ནས་རྒྱལ་ཁབ་ལ་དགའ་ཞེན་གྱི་བསམ་པའི་དད་སེམས་གཅིག་ཏུ་སྒྲིལ་ཡོད། ལྗོངས་ཏང་ཨུད་དྲིལ་བསྒྲགས་པུས་གཙོ་གཉེར་དང་ཤིན་ཧྭ་དཔེ་ཚོང་ཁང་གིས་གཉེར་འགན་འཁུར་བའི་2021ལོའི“དཔེ་ཀློག་བོད་ལྗོངས”ཀྱི་དམངས་ཡོངས་ཀྱི་དཔེ་ཀློག་བྱེད་སྒོའི་འགོ་ཚུགས་མཛད་སྒོ་ལྷ་ས་གྲོང་ཁྱེར་ཤིན་ཧྭ་དཔེ་ཚོང་ཁང་དུ་གཉེར་བ་རེད།

 འགོ་ཚུགས་མཛད་སྒོར“ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་བརྟན་དུ་གཏོང་བའི”ཕུལ་བྱུང་དཔེ་སྐྲུན་ཡིག་རིགས་ཀྱི་རྩོམ་པ་པོར་གཟི་བརྗིད་ལག་ཁྱེར་སྤྲད་པ་དང《2021ལོའི“དཔེ་ཀློག་བོད་ལྗོངས”དམངས་ཡོངས་དཔེ་ཀློག་གི་གྲོས་འགོའི་ཡི་གེ》སོགས་སྒྲོག་སྦྱངས་བྱས་པ་རེད། བོད་ལྗོངས་བོད་ལུགས་གསོ་རིག་སློབ་ཆེན་དང་། ཉིང་ཁྲི་མཐའ་མཚམས་དོ་དམ་ཉིང་ལག་རུ་ཁག ལྷོ་ཁ་གྲོང་ཁྱེར་ཏུང་ཧུའེ་སློབ་འབྲིང་བཅས་ཀྱིས“དཔེ་ཀློག་ཉིན་མོར་ཏང་གི་ལོ་རྒྱུས་ཀློག་པ”དང་དཔེ་ཀློག་མཉམ་རོལ་འདུ་ཚོགས་སོགས་ཀྱི་བྱེད་སྒོ་སྤེལ་བས། རྒྱ་ཆེའི་ཏང་ཡོན་ལས་བྱེད་པ་དང་སློབ་མ་ཚོས་ཏང་གི་འོད་སྟོང་འཕྲོ་བའི་ལོ་རྒྱུས་ལ་ངོས་འཛིན་སྔར་བས་ཟབ་མོ་ཐུབ་ནས་སློབ་སྦྱོང་གི་སྤྲོ་སེམས་འཕེལ་བ་རེད།

ཉིན་ཤས་བསྟུད་མར་རང་སྐྱོང་ལྗོངས་ཀྱི་སྒྲོག་འགྲེལ་ཚོགས་པས་སྒྲོག་འགྲེལ་ཡན་ལག་རུ་ཁག་9ལ་བགོས་ནས་ལྗོངས་ཡོངས་ཀྱི་གྲོང་ཁྱེར(ས་ཁུལ)བདུན་དང་། རྫོང(ཆུས)ཁག་གཅིག ལྗོངས(ཀྲུང་དབྱང)ཐད་གཏོགས་ཚན་པ། རང་སྐྱོང་ལྗོངས་ཁོངས་གཏོགས་ཀྱི་མཐོ་རིམ་སློབ་གླིང་བཅས་སུ་གཅིག་སྡུད་སྒྲོག་འགྲེལ་བྱེད་སྒོ་སྤེལ་བ་རེད། དེ་དང་དུས་མཚུངས་རང་ལྗོངས་ཀྱི་རྫོང(ཆུས)དང་ཤང(གྲོང་རྡལ)ཁག་གིས་དུས་རབས་གསར་པའི་ཤེས་དཔལ་ལག་ལེན་ལྟེ་གནས(སུའོ་དང་ས་ཚིགས)བེད་སྤྱོད་གང་ལེགས་བྱས་ཏེ། “སྣང་ཆེན་བཞི་དང་དགའ་ཞེན་བཞིའི”མང་ཚོགས་ཀྱི་སློབ་གསོ་ལག་ལེན་བྱེད་སྒོའི་ད་ཡོད་གཞི་རྟེན་ལ་བརྟེན་ནས“རིམ་ལྔའི་སྒྲོག་འགྲེལ་པའི”དཔུང་ཁག་མ་ལག་གི་ནུས་པ་བཏོན་པ་དང་། ལྷག་པར་དུ་ལྗོངས་ཡོངས་ཀྱི་གཞི་རིམ་གྱི་སྒྲོག་འགྲེལ་པ་རྒྱ་ཁྱབ་ངང་སྐུལ་སློང་བྱས་ཏེ། ལས་བྱེད་པ་རྒན་གྲས་དང་། འཐབ་འཛིང་བ་རྒན་གྲས། ཏང་ཡོན་རྒན་གྲས་བཅས་གདན་ཞུས་ཀྱིས་གོ་བདེ་ཤེས་སླའི་སྒོ་ནས་རླབས་ཆེན་གྱི་འཕོ་འགྱུར་གླེང་བ་དང་། ཉེ་འགྲམ་གྱི་མི་དང་ཉེ་འགྲམ་གྱི་གནས་ཚུལ་ལ་བརྟེན་ནས་འགྱུར་ལྡོག་དང་། མྱོང་ཚོར། འཕེལ་རྒྱས་བཅས་གླེང་བ། མང་ཚོགས་དང་ཉེ་བཅར་གྱི་གཏམ་རྒྱུད་བཤད་ནས་དུད་ཚང་དང་། རྩྭ་ར། མུ་ཁ་བཅས་སུ་སྒྲོག་འགྲེལ་བྱས་ཏེ་ལྗོངས་ཡོངས་ཀྱི་ཞིང་འབྲོག་པ་ཏང་ཡོན་དང་མང་ཚོགས་ཀྱིས་ཉན་འདོད་པ་དང་། གོ་བ་ལེན་ཐུབ་པ། བློ་སྒོ་འབྱེད་ཐུབ་པ། ཕན་པ་ཐོབ་པ་བཅས་ཀྱི་འགན་ལེན་བྱས་པ་རེད།

ཉིན་ཤས་གོང་རང་ལྗོངས་ཀྱིས《ལྗོངས་ཡོངས་ཀྱི་རྩ་འཛུགས་གསར་པ་གཉིས་སུ་ཏང་གི་ལོ་རྒྱུས་སློབ་སྦྱོང་སློབ་གསོ་སྤེལ་རྒྱུའི་སྐོར་གྱི་བརྡ་ཐོ》བཀྲམ་ནས་ལྗོངས་ཡོངས་ཀྱི་རྩ་འཛུགས་གསར་པ་གཉིས་ཀྱིས་ཏང་གི་ལོ་རྒྱུས་སློབ་སྦྱོང་སློབ་གསོ་སྤེལ་བར་བཀོད་སྒྲིག་བྱས་པ་རེད། ཏང་གི་ལོ་རྒྱུས་སློབ་སྦྱོང་སློབ་གསོ་ཆབ་སྲིད་ཀྱི་ལས་འགན་གལ་ཆེན་ཞིག་ཏུ་བརྩིས་ནས་ཁྱོན་ཡོངས་ལ་ཁྱབ་པ་དང་། གསར་གཏོད་ལ་མཐོང་ཆེན། ཕན་འབྲས་དངོས་ཐོན་པ་བཅས་མཐའ་འཁྱོངས་ཀྱིས་རྩ་འཛུགས་གསར་པ་གཉིས་ཀྱི་ཏང་ཡོན་གྱི“བློ་དཀར་སེམས་དཀར་ངང་ཏང་གི་རྗེས་སུ་འབྲང་བའི”ཆབ་སྲིད་ཀྱི་རང་རྟོགས་དང“འབད་འབུངས་སྟོབས་བརྩོན་དང་བློ་སྟོབས་མི་འགྱུར་བའི”འགན་འཁྲི་སྒྲུབ་སེམས་སྔར་བས་ཆེ་རུ་བཏང་ནས་ལོ་རྒྱུས་སྦྱངས་ནས་གནས་ལུགས་གསལ་རྟོགས་དང་། ལོ་རྒྱུས་སྦྱངས་ནས་གདེང་ཚོད་འཕེལ་བ། ལོ་རྒྱུས་སྦྱངས་ནས་སྤྱོད་བཟང་གོང་བཀུར། ལོ་རྒྱུས་སྦྱངས་ནས་ལག་ལེན་ཧུར་ཐག་བཅས་བྱེད་དགོས་པའི་བླང་བྱ་བཏོན་པ་རེད།

ཉིང་ཁྲི་གྲོང་ཁྱེར་གྱི་དང་བླངས་པའི་མཉམ་འབྲེལ་ལྷན་ཚོགས་ཀྱིས་དང་བླངས་པ་སྒྲིག་འཛུགས་བྱས་ནས་ཚད་ལྡན་ཡིག་ཆའི་དངོས་མཚོན་གློག་བརྙན་ཆེ་གྲས《དར་ཆ》བལྟས་ནས་ཏང་གི་ལོ་རྒྱུས་ལ་ཁྱོན་ཡོངས་ནས་ཤེས་རྟོགས་བྱས་པ་དང་། ཏང་གི་ལོ་བརྒྱའི་རླབས་ཆེན་འབད་འཐབ་ལོ་རྒྱུས་ཁྲོད་འདུས་པའི་མི་རབས་ནས་མི་རབས་བར་མི་ཉམས་གོང་འཕེལ་གྱི་བསམ་བློའི་སྟོབས་ཤུགས་ཆེན་པོ་ཚོར་བར་བྱས་ཡོད། རང་སྐྱོང་ལྗོངས་ཁྲིམས་རྩོད་པའི་ལས་རིགས་ཏང་ཨུད་ཀྱིས“བོད་ལྗོངས་ཁྲིམས་རྩོད་པའི་མཐུན་ཚོགས”སྤྱི་རྟགས་སུ་ཉིན་ལྟར་དུས་བཀག་ལྟར“ལོ་བརྒྱའི་ཏང་གི་ལོ་རྒྱུས་གླེང་བའི”སློབ་སྦྱོང་སློབ་ཚན་བཏོན་པ་དང་མིག་སྔར་སློབ་ཚན་69བཏོན་པ་མ་ཟད། ད་དུང“ཏང་གི་ལོ་རྒྱུས་སྦྱོང་བ་དང་། ཏང་གི་གནས་ཚུལ་ཤེས་རྟོགས། ཏང་གི་རྗེས་སུ་འབྲང་བའི”དྲ་ཐོག་ལན་འདེབས་ཀྱང་བྱས་པར་ཏང་ཡོན་ཁྲིམས་རྩོད་པ་300ལྷག་ཙམ་ལན་འདེབས་སློབ་སྦྱོང་ལ་ཞུགས་ཡོད། ནག་ཆུ་གྲོང་ཁྱེར་གྱི་སྤྱི་དབང་མིན་པའི་ལམ་ལུགས་དཔལ་འབྱོར་རྩ་འཛུགས་ཀྱི་ལས་རིགས་ཏང་ཨུད་རྩ་འཛུགས་ཀྱིས་རྒྱ་ཆེའི་གྲོང་མི་ཚོར་རིན་མི་དགོས་པར་སྨན་རྫས་སྒམ་600ལྷག་ཙམ་དང་། སྤྱོད་གཅིག་མའི་སྨན་སྤྱོད་ཁ་རས་500ལྷག་ཙམ། 84དུག་སེལ་གཤེར་ཁུ་དང་ཨ་རག་ཉིང་ཁུ་ཤེལ་དམ་300ལྷག་ཙམ་སྤྲད་པར་རིན་ཐང་སྒོར་ཁྲི་1.3ལྷག་ཙམ་ཟིན་ཡོད་པ་རེད།