ཉིན་ཤས་གོང་གསར་འགོད་པར་གུང་གཞོན་སྡེ་ཚོགས་ཀྲུང་དབྱང་ནས་ཤེས་རྟོགས་བྱུང་བར། འདི་ལོའི་ལྔ་བཞི་གཞོན་ནུའི་དུས་ཆེན་རིང་རིམ་ཁག་གུང་གཞོན་སྡེ་ཚོགས་རྩ་འཛུགས་ཀྱིས“ཏང་གི་ལོ་རྒྱུས་སྦྱོང་བ་དང་། དད་སེམས་བརྟན་དུ་གཏོང་བ། ཏང་གི་རྗེས་སུ་འབྲང་བ”བཅས་ཀྱི་བརྗོད་དོན་གཙོ་བོའི་སྡེ་ཚོགས་ཉིན་མོའི་བྱེད་སྒོ་རྒྱ་ཁྱབ་སྤེལ་བ་རེད།
སྡེ་ཚོགས་ཀྲུང་དབྱང་ཧྲུའུ་ཅི་ཁྲུའི་བློ་མཐུན་ཡོངས་ཀྱིས་སློབ་གྲྭ་དང་། གསར་བརྗེའི་སློབ་གསོའི་རྟེན་གཞི། ཁེ་ལས་སོགས་སོ་སོར་ཡོང་ནས་གཞི་རིམ་གྱི་སྡེ་ཚོགས་རྩ་འཛུགས་ཀྱི་བྱེད་སྒོར་ཞུགས་པ་རེད། སྡེ་ཚོགས་ཀྲུང་དབྱང་ཧྲུའུ་ཅི་ཁྲུའི་ཧྲུའུ་ཅི་དང་པོ་ཧོ་ཅུན་ཁོའོ་ཡིས་ཐེན་ཅིན་སློབ་ཆེན་གྱི་སྔོན་གཤེགས་དཔའ་བོ་ཀྲང་ཐའེ་ལེའི་དྲན་གསོ་ཁང་དུ་ལྟ་སྐོར་བྱས་པ་དང་། བདེན་འཚོལ་རིག་གནས་ཚན་ཁག་གི་2019ལོའི་རིག་ནུས་འཛིན་གྲྭ་གཉིས་པའི་སྡེ་ཚོགས་ཀྲི་པུའི“ཏང་གི་ལོ་རྒྱུས་སྦྱོང་བ་དང་། དད་སེམས་བརྟན་དུ་གཏོང་བ། ཏང་གི་རྗེས་སུ་འབྲང་བ”བཅས་ཀྱི་བརྗོད་དོན་གཙོ་བོའི་སྡེ་ཚོགས་ཉིན་མོའི་བྱེད་སྒོར་ཞུགས་པ་མ་ཟད། ད་དུང་གཞོན་ནུ་སྡེ་ཚོགས་ཀྱི་ཚོགས་མི་ཚོས་ཏང་གི་འོད་སྟོང་འཕྲོ་བའི་ལོ་རྒྱུས་སྦྱོང་བ་དང་། གུང་ཁྲན་ཏང་མི་མི་རབས་མང་པོའི་རྒྱལ་གཅེས་དམངས་གཅེས་ཀྱི་བླ་ན་མེད་པའི་ཕུགས་འདུན་དང་། སྒེར་སེམས་མེད་པར་ལེགས་སྐྱེས་འབུལ་བའི་བླ་ན་མེད་པའི་དགོངས་ཚུལ། ཞུམ་པ་མེད་པའི་སྙིང་སྟོབས་བཅས་ཚོར་ཤེས་བྱེད་པ། དུས་རབས་ཀྱི་འགན་འཁྲི་དཔའ་ངར་ཆེན་པོས་ཁུར་བ། གསར་གཏོད་བྱེད་ཕོད་པར་བྱེད་པ། སློབ་སྦྱོང་དང་ལས་ཀ་ཏན་ཏིག་བྱེད་པ་བཅས་བྱས་ནས་མི་རིགས་བསྐྱར་དར་གྱི་འགན་འཁྲི་ཆེན་པོ་ཕྲག་ཏུ་ཁུར་ཕོད་མཁན་གྱི་དུས་རབས་ཀྱི་མི་གསར་ཧུར་ཐག་བྱ་རྒྱུའི་རེ་བ་ཡོད་ཅེས་བཤད་པ་རེད།
ལྔ་བཞིའི་རིང་ས་གནས་ཁག་གི་སྡེ་ཚོགས་རྩ་འཛུགས་ཀྱིས“ཏང་གི་ལོ་རྒྱུས་སྦྱོང་བ་དང་། དད་སེམས་བརྟན་དུ་གཏོང་བ། ཏང་གི་རྗེས་སུ་འབྲང་བ”བཅས་ཀྱི་བརྗོད་དོན་གཙོ་བོར་དམ་པོར་དམིགས་པའི་ཁར། སློབ་སྦྱོང་དང་བཞུགས་མོལ་དང་། སྒྲོག་འགྲེལ་དང་སྤེལ་རེས། མཛད་སྒོ་དང་སློབ་གསོ། ལྟ་སྐོར་དང་ཉམས་ལེན་སོགས་ཀྱི་རྣམ་པའི་ཐོག་ནས་ནང་དོན་ཕུན་སུམ་ཚོགས་པ་དང་རྣམ་པ་སྣ་ཚོགས་ཀྱི་བརྗོད་དོན་གཙོ་བོའི་བྱེད་སྒོ་རབ་དང་རིམ་པ་སྤེལ་ཏེ། སྡེ་ཚོགས་ཀྱི་ཚོགས་མི་དང་གཞོན་ནུ་མང་པོའི་ཡིད་དབང་རྒྱ་ཁྱབ་ཏུ་འཕྲོག་ཡོད། རྒྱལ་སའི་མཐོ་སློབ་ཀྱི་གུང་གཞོན་སྡེ་ཚོགས་ཀྱི་ཚོགས་མི་དང་གཞོན་ནུའི“སེམས་རྣལ་རྣམ་པའི”བརྗོད་དོན་གཙོ་བོའི་སྡེ་ཚོགས་ཉིན་མོའི་བྱེད་སྒོ་དེས། གུང་གཞོན་སྡེ་ཚོགས་ཀྱི་ལོ་རྒྱུས་དཔྱད་གཞིའི་ཡིག་རིགས་འགྲེམས་སྟོན་དང་རོལ་དབྱངས་ཟློས་གར་སོགས་ཀྱི་བྱེད་སྒོ་རབ་དང་རིམ་པ་བརྒྱུད། དགེ་སློབ་ཚོར་ལོ་བརྒྱའི་ཏང་གི་ལོ་རྒྱུས་ཐད་ཀར་མྱོང་ཚོར་ཟབ་མོ་ཐུབ་པ་བྱས་ཡོད། ཤིས་ཨན་འགྲིམ་འགྲུལ་སློབ་ཆེན་གྱི་སྡེ་ཚོགས་ཨུ་ལྷན་གྱིས་ཧྲའན་ཤིས་མཐོ་སློབ་ཀྱི“ལང་ཚོའི་འཕྲིན་ཕྲན”ཞེས་པའི་ཏང་གི་ལོ་རྒྱུས་སློབ་སྦྱོང་སློབ་གསོའི་སྒྲོག་འགྲེལ་འགྲན་བསྡུར་སྒྲིག་འཛུགས་བྱས་ཡོད། ཅང་ཤིས་ནན་ཁྲང་བཟོ་སྐྲུན་སློབ་གླིང་གི་སྡེ་ཚོགས་ཨུ་ལྷན་གྱིས་སྨི་བརྒྱ་ཡོད་པའི་ལོ་བརྒྱའི་རི་མོ་མི་བརྒྱ་ཡིས་མཉམ་དུ་འབྲི་བའི་རྣམ་པའི་ཐོག་ནས་དཔེ་སྟོན་རང་བཞིན་གྱི་བརྗོད་དོན་གཙོ་བོའི་སྡེ་ཚོགས་ཉིན་མོའི་བྱེད་སྒོ་སྤེལ་ཡོད།
དྲ་རྒྱའི་ཐོག་ནས་སྡེ་ཚོགས་ཡོངས་ཀྱིས་དྲ་ཐོག་གི་བརྗོད་དོན་གཙོ་བོའི་བྱེད་སྒོ་རྒྱ་ཁྱབ་སྤེལ་ཞིང་། ལྔ་བཞི་གཞོན་ནུའི་དུས་ཆེན་གྱི་ཉིན་དེར་གུང་གཞོན་སྡེ་ཚོགས་ཀྲུང་དབྱང་དང་རྒྱལ་ཡོངས་སློབ་གྲྭ་བའི་མཉམ་འབྲེལ་ལྷན་ཚོགས་ཀྱིས་དྲ་རྒྱའི་ཐད་གཏོང་རྣམ་པའི་ཐོག་ནས“ཏང་གི་ལོ་རྒྱུས་སྦྱོང་བ་དང་། དད་སེམས་བརྟན་དུ་གཏོང་བ། ཏང་གི་རྗེས་སུ་འབྲང་བ”བཅས་ཀྱི་བརྗོད་དོན་གཙོ་བོའི་སྤྲིན་ཚོམ་སྡེ་ཚོགས་སློབ་ཚན་འཚོགས་ཤིང་། ཀྲི་པུའི་སྡེ་ཚོགས་ཉིན་མོའི་བྱེད་སྒོ་དང་། དྲན་གསོ་བྱ་ཡུལ་དུ་བཅར་འདྲི། རིགས་གཅིག་མཁས་ཅན་གྱི་གསལ་འགྲེལ། རིག་གནས་ལེ་ཚན་སོགས་གསོན་ཉམས་དོད་པའི་རྣམ་པ་བརྒྱུད། ཏང་གི་ལོ་རྒྱུས་འཕེལ་རྒྱས་བྱུང་རིམ་འགྲེལ་བཤད་བརྒྱབ་པ་མ་ཟད། ས་གནས་ཁག་གི་གཞི་རིམ་སྡེ་ཚོགས་རྩ་འཛུགས་ཀྱི་ཏང་གི་ལོ་རྒྱུས་སློབ་སྦྱོང་སློབ་གསོའི་བརྗོད་དོན་གཙོ་བོའི་སྡེ་ཚོགས་ཉིན་མོའི་བྱེད་སྒོ་དང་དེ་བཞིན་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བར་རྟེན་འབྲེལ་ཞུ་བའི་ཕུལ་བྱུང་དྲིལ་བསྒྲགས་རིག་གནས་ཐོན་རྫས་རྒྱུན་མི་ཆད་པར་བསྟན་ཏེ། རྒྱ་ཆེའི་གུང་གཞོན་ཚོགས་མི་དང་གཞོན་ནུར་དམིགས་བསལ་གྱི་ལང་ཚོའི་གསོལ་སྟོན་རྒྱས་པོ་ཞིག་བཤམས་ཞིང་། ཤེས་རྟོགས་བྱུང་བར་གཞིགས་ན་ཉིན་དེར་གཞོན་ནུ་ལོ་ཆུང་མི་ཐེངས་ཁྲི་3600དྲ་ཐོག་ནས་ཞུགས་ཡོད། གཞན་ཡང་རིམ་ཁག་སྡེ་ཚོགས་རྩ་འཛུགས་ཀྱིས་སྨྱན་སྦྱོར་གསར་པའི་ལས་སྟེགས་སུ“ཏང་གི་ལོ་རྒྱུས་སྦྱོང་བ་དང་། དད་སེམས་བརྟན་དུ་གཏོང་བ། ཏང་གི་རྗེས་སུ་འབྲང་བ”བཅས་ཀྱི་ཆེད་སྒྲིག་ལེ་ཚན་བཀོད་སྒྲིག་བྱས་ཏེ། བརྗོད་དོན་གཙོ་བོའི་རྩོམ་ཡིག་དང་། བརྙན་ཐུང་། ཀོ་ཕིག་སོགས་ཀྱི་ཐོན་རྫས་ཡང་ཡང་བསྟན་པ་དང་དྲ་རྒྱའི་ཐད་གཏོང་བྱེད་སྒོ་སྤེལ་ནས་སྡེ་ཚོགས་ཀྱི་ཚོགས་མི་དང་གཞོན་ནུར་བསམ་པའི་འཚོ་བཅུད་ཕུན་སུམ་ཚོགས་པོ་སྦྱིན་ཡོད།