མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། ཏང་གི་ལོ་རྒྱུས་སློབ་སྦྱོང་སློབ་གསོའི་ལས་དོན་སྤེལ་ཚུན་དུ། མཚོ་སྔོན་ཞིང་ཆེན་སྤྱི་བདེ་ལས་ཁུངས་ཀྱིས་ལོ་བརྒྱའི་ཏང་གི་ལོ་རྒྱུས་ཀྱི་འགོ་མཇུག་བར་གསུམ་དུ་ཁྱབ་པའི“ཐོག་མའི་བསམ་འདུན་དང་འགན་འཁྲི”ཞེས་པའི་འགག་རྩའི་ཚིག་འདི་གཙོ་བོར་བཟུང་བ་དང་། “ཏང་གི་སྒྲིག་ཡིག་སློབ་སྦྱོང་བྱས་ནས་དམིགས་ཡུལ་ཤུགས་ཆེར་བཏང་སྟེ་མང་ཚོགས་ལམ་ཕྱོགས་ལ་ཡག་པོར་སྐྱོད་པའི”ཆེད་དོན་ལག་ལེན་སྣེ་ཁྲིད་དུ་བྱས་ཐོག་སྤྱི་བདེའི“གློད་སྡོམ་ཞབས་གསུམ”གྱི་ཐབས་ལམ་གསར་པ་མུ་མཐུད་རྒྱ་སྐྱེད་བྱས་ནས། “ངས་མང་ཚོགས་ལ་བྱ་བ་དངོས་སྒྲུབ་པའི”ལག་ལེན་བྱེད་སྒོ་ཏན་ཏིག་སྤེལ་བ་རེད།

ཞིང་ཆེན་སྤྱི་བདེ་ཐིང་བདེ་སྲུང་སྤྱི་ཁྱབ་རུ་ཁག་གིས་རང་དགར་གསོ་ཉར་བྱས་པ་དང་། 《གསོ་ཉར་ཐོ་འགོད་ལག་ཁྱེར》དང་དོན་དངོས་གསོ་ཉར་གཞུང་དཔང་གཉེར་ཐབས་བྲལ་བའི་བྱིས་པའི་ཐེམ་ཐོ་འགོད་པའི་གནད་དོན་ཐག་གཅོད་ཡག་པོ་བྱ་ཆེད། བསམ་འཆར་བསྡུ་ལེན་རྒྱ་ཁྱབ་དང་བརྟག་ཞིབ་གཏིང་ཟབ་བྱས་པའི་རྨང་གཞིའི་ཐོག་གསོ་ཉར་ཆ་རྐྱེན་མི་འཛོམས་པའི་བྱིས་པའི་ཐེམ་ཐོ་འགོད་པའི་ཐད་བྱེད་ཐབས་གསར་པ་བཏོན་པ་སྟེ། ཧྲིལ་ལོ་14མན་གྱི་བྱིས་པ་གསོ་ཉར་ཐོ་འགོད་ཆ་རྐྱེན་དང་མི་འཚམ་པ་དང་། ཁྲིམས་ལྟར་གསོ་ཉར་ཐོ་འགོད་དམ་ཡང་ན་གཞུང་དཔང་གཉེར་མི་ཐུབ་པའི་ཐེམ་ཐོ་མེད་པའི་བྱིས་པ་ཡིན་ན། དོན་དངོས་གསོ་ཉར་བྱེད་མཁན་གྱིས་རེ་ཞུ་བྱས་པ་བརྒྱུད་སྤྱི་བདེ་ལས་ཁུངས་ཀྱིས་བརྟག་དཔྱད་ཞིབ་བསྡུར་བྱས་རྗེས། དོན་དངོས་གསོ་ཉར་བྱེད་མཁན་གཏན་སྡོད་བྱ་ཡུལ་དུ་གཏན་སྡོད་ཐེམ་ཐོ་འགོད་ཆོག་པ་དང་། ཟི་ལིང་གྲོང་ཁྱེར་སྤྱི་བདེ་ཅུས་གྲོང་དབུས་ཡན་ལག་ཅུས་ཀྱིས་རྒན་རྒོན་གྱི་ལས་སྒྲུབ་ལས་གཉེར་ཁོར་ཡུག་ཁྱོན་ཡོངས་ནས་ལེགས་སུ་བཏང་བ་སྟེ། ཐེམ་ཐོའི་ཞབས་ཞུའི་སྐར་ཁུང་དང་རྒྱལ་མཚམས་འཛུལ་གྲོལ་ཚོམས་ཆེན་སོགས་སུ“རྒན་རྒོན་སྔོན་འཇོག”གི་ཞབས་ཞུའི་སྐར་ཁུང་བཙུགས་ཡོད་པ་དང་། ལོ་60ཡན་གྱི་རྒན་རྒོན་དང་དེ་བཞིན་དབང་པོ་སྐྱོན་ཅན་གྱིས་ཨང་ཀི་ལེན་མི་དགོས་པར་ཐད་ཀར་ཁྱིམ་ལས་ལས་སྒོ་གཉེར་ཆོག དེས་མ་ཟད་ད་དུང་ཆེད་མི་བཀོད་སྒྲིག་བྱས་ནས་རིག་ནུས་ཁ་པར་དང་རང་སྒྲུབ་འཕྲུལ་ཆས་སོགས་འགན་ནུས་སྒྲིག་ཆས་སྤྱད་དེ་ལས་སྒོ་གཉེར་མི་ཤེས་པའི་རྒན་རྒོན་ཚོར་རང་འགུལ་ངང་རོགས་རམ་བྱས་པ་དང་། ལོ་60ཡན་གྱི་རྒན་རྒོན་ལ་རང་སྒྲུབ་འཚོལ་སྡུད་དང་རང་སྒྲུབ་པར་ལེན་སྒྲིག་ཆས་སྤྱད་དེ་ལག་ཁྱེར་གཉེར་རོགས་བྱས་པ་དང་ཆབས་ཅིག དངུལ་སྨར་དང་གཱ་དྲད་པ་སོགས་སྲོལ་རྒྱུན་གྱི་དངུལ་སྤྲོད་ཞབས་ཞུ་ཡང་མུ་མཐུད་གཉེར་ནས། ལག་ཐོགས་ཁ་པར་ནས་གྲོན་དངུལ་སྤྲོད་མི་ཤེས་པའི་རྒན་རྒོན་ཚོར་སྟབས་བདེ་བསྐྲུན་པ་རེད། གྲོང་ནུབ་ཡན་ལག་ཅུས་ཀྱི“དྲ་སྦྲེལ+ཁྱིམ་ལས་ཞབས་ཞུའི”བྱེད་སྟངས་སྐུལ་སྤེལ་ཤུགས་ཆེན་བྱས་ཤིང་། ཐེམ་ཐོའི་གསལ་བཤད་ཀྱི“རྩ་གཉིས་ཨང་རྟགས”ཀྱི་རྨང་གཞིའི་ཐོག་རིག་ལྡན་ཞབས་ཞུའི་ལྟེ་གནས་ཀྱི“རྩ་གསུམ་ཨང་རྟགས”ལས་སྒོ་ཡང་ཞིབ་སྤེལ་བྱས་པས། མང་ཚོགས་ཀྱིས་ལག་ཐོགས་ཁ་པར་ནས་ཐད་ཀར་ཨང་རྟགས་བཤེར་ཏེ་ཐེམ་ཐོ་གཉེར་བའི་ལས་སྒོའི་བརྒྱུད་རིམ་གསལ་པོར་ཤེས་ཐུབ་ལ། འབྲེལ་ཡོད་ཆ་འཕྲིན་དང་དེ་བཞིན་དེར་མཁོ་བའི་ལག་ཁྱེར་སོགས་པར་རིས་བླུགས་ཏེ་སྔ་ས་ནས་ཞིབ་བཤེར་ཡང་བྱེད་ཐུབ། དེས་མ་ཟད་ད་དུང་རང་ཉིད་ཀྱི་ཐོབ་ཐང་ལག་ཁྱེར་གྱི་ཨང་ཀི་བླུགས་ནས་ཞིབ་བཤེར་འཕེལ་རིམ་ལ་ཡང་ལྟ་ཐུབ་པས། “མང་ཤོས་ཐེངས་གཅིག་ལ་མ་གཏོགས་འགྲོ་མི་དགོས་པའི”ཞབས་ཞུའི་ཁས་ལེན་མངོན་འགྱུར་བྱུང་ནས། མང་ཚོགས་ཀྱིས་ཐེམ་ཐོ་གཉེར་བར་སྟབས་བདེ་ཆེན་པོ་བསྐྲུན་ཡོད། “ཁྱིམ་ལས་ལས་སྒོ་གཉེར་མཁན་གྱི་དྲ་ཐོག་སྔོན་མངག་མ་ལག”ཀྱང་བཏོན་པས་གཏོགས་ཁོངས་མང་ཚོགས་ཀྱིས་རྩ་གཉིས་ཨང་རྟགས་དང་། ཁ་པར་114 “མཚོ་སྔོན་ཉི་འོད་ཉེན་དོན” “གྲོང་ནུབ་སྦར་མཐིལ་ཁྱིམ་ལས”སོགས་སྔོན་མངགས་ཐབས་ལམ་མང་པོ་བརྒྱུད་ཁྱིམ་ནས་ཕྱིར་མ་ཐོན་པར་ཐེམ་ཐོ་དང་གྲོང་མིའི་ཐོབ་ཐང་ལག་ཁྱེར་སོགས་ཀྱི་ལས་སྒོ་མངགས་ཐུབ་ཀྱི་ཡོད་པ་རེད།

གོམ་སྟབས་རྗེས་མར། ཞིང་ཆེན་དེ་ཡོངས་ཀྱི་སྤྱི་བདེ་ལས་ཁུངས་ཁག་གིས་མི་དམངས་ལྟེ་བར་བྱེད་པའི་འཕེལ་རྒྱས་ཀྱི་བསམ་བློ་མཐའ་འཁྱོངས་བྱས་ཐོག་སྤྱི་བདེ་ལས་ཁུངས་ཀྱི་གཙོ་འགན་གཙོ་ལས་ལ་གཞི་ཚུགས་ཤིང་མང་ཚོགས་ཀྱི“འཕྲལ་མཁོ་དང་། དཀའ་ངལ། སེམས་ཁྲལ། རེ་སྒུག”བཅས་ཀྱི་གནད་དོན་ལ་དམིགས་ནས། “ངས་མང་ཚོགས་ལ་བྱ་བ་དངོས་སྒྲུབ”ཅེས་པའི་ལག་ལེན་བྱེད་སྒོ་སྔར་བས་གཏིང་ཟབ་སྤེལ་ཏེ། མང་ཚོགས་ཀྱིས་སེམས་ཁུར་བྱེད་པའི་བྱ་བ་ཐག་གཅོད་ཏན་ཏིག་བྱ་རྒྱུ་ཡིན་པ་རེད།