ཟླ་3ཚེས་21ཉིན། ལྷ་རྩེ་རྫོང་གིས་2021ལོའི་ངལ་ནུས་ཕྱིར་གཏོང་ཁག་དང་པོའི“གནད་གཏད་གནད”དང“བུ་རྫི་རྣམ་པའི”ལས་ཞུགས་ཞབས་ཞུའི་རྡོག་ཐོན་མཛད་སྒོ་འཚོགས་ཤིང་། ཞིང་འབྲོག་པ་41གིས་ལས་བརྩོན་ཕྱུག་འགྱུར་གྱི་འདུན་པ་བཅངས་ནས“ཞིང་འབྲོག་མང་ཚོགས་ཀྱི་ལས་ཞུགས་གཞན་སྒྱུར་གྱི་ཐད་གཏོང་རླངས་འཁོར”ལ་བསྡད་དེ་མངའ་རིས་ས་ཁུལ་དུ་གླ་པ་བྱེད་པར་བསྐྱོད། སྔོན་རྩིས་བྱས་ན་ཁོང་ཚོ་མི་རེར་ཟླ་རེར་གླ་ཆ་སྒོར་7500ཙམ་ཡོད་པ་དང་འཆར་གཞི་བྱས་ན་ངལ་ནུས་གན་རྒྱ་ཟླ་6ཡན་བཞག་ནས་ལོ་ཧྲིལ་པོར་འབབ་འཕར་སྒོར་ཁྲི་184.5ཙམ་ཟིན་རྒྱུ་རེད།

ལྗོངས་ཡོངས་སུ་ལས་འགོ་བསྐྱར་འཛུགས་དང་ཐོན་སྐྱེད་སླར་གསོའི་ལས་དོན་ལ་རིམ་བཞིན་སྐུལ་འདེད་བཏང་བ་དང་བསྟུན་ནས་ལྷ་རྩེ་རྫོང་གི་ཞིང་འབྲོག་པ་ཚོ་ཡང་གཅིག་རྗེས་གཉིས་མཐུད་ངང་ཕྱིར་གླ་པར་སྐྱོད་འགོ་ཚུགས་ཡོད།

སྲིད་ཇུས་སྔོན་ལ་ལག་བསྟར་བྱས་ནས་ལས་ཞུགས་ཀྱི་འགན་སྲུང་ལམ་ལུགས་འཐུས་སྒོ་ཚང་དུ་བཏང་བ།

ལྷ་རྩེ་རྫོང་དུ་ཁྱོན་མི་འབོར་65829(རྒྱུན་སྡོད་མི་འབོར)ཡོད་པས་བོད་ཀྱི་མི་འབོར་མང་བའི་རྫོང་ཆེ་གྲས་ཤིག་ཡིན་ལ་ནུབ་རྒྱུད་ཀྱི་གྲོང་རྡལ་གལ་ཆེན་ཞིག་ཀྱང་རེད།

ལས་ཞུགས་སྔོན་བསྟར་གྱི་འཐབ་ཇུས་དང་དགེ་མཚན་ལྡན་པའི་ལས་ཞུགས་སྲིད་ཇུས་དང་ལེན་ཞུ་ཆེད། ལྷ་རྩེ་རྫོང་ཨུད་དང་རྫོང་སྲིད་གཞུང་གིས་རྫོང་ཨུད་ཀྱི་ཧྲུའུ་ཅི་གཞོན་པ་དང་རྫོང་དཔོན་པ་སངས་དབང་འདུས་ཀྱིས་ཙུའུ་ཀྲང་བྱས་པའི་ཞིང་འབྲོག་པའི་ལས་ཞུགས་གཞན་སྒྱུར་གྱི་ལས་དོན་འགོ་ཁྲིད་ཚོགས་ཆུང་བཙུགས་ཏེ་རྫོང་དང་། ཤང་། གྲོང་ཚོ་བཅས་རིམ་གསུམ་གྱི་འགོ་ཁྲིད་གཙོ་བོས་འགན་གཙོ་བོ་ཁུར་བ་དང་། ལས་འགན་ཁག་བགོས་འགོ་ཁྲིད་ཀྱིས་ཆེད་འགན་ཁུར་བ། མི་སྤྱི་སྡེ་ཚན་གྱིས་སྒྲིག་འཛུགས་དང་ལག་བསྟར་བྱེད་པ་སོགས་གོང་འོག་མཉམ་འགུལ་དང་ཁུར་མཉམ་ལེན་དང་དོན་སྤྱི་སྒྲུབ་ཀྱི་ལས་ཀའི་ལམ་སྲོལ་བཙུགས་ཡོད།

ཞིང་འབྲོག་པའི་ལས་ཞུགས་གཞན་སྒྱུར་གྱི་ལས་ཀའི་ལག་བསྟར་ཇུས་གཞི་བཟོས་ནས་བྱེད་ཐབས་ལ་སྐུལ་འདེད་བཏང་བ་བརྒྱུད། ལས་ཞུགས་གཞན་སྒྱུར་སྲིད་ཇུས་ཀྱི་ཁ་གསབ་བླང་བྱ་དང་འཚམ་པའི་ངལ་ནུས་ཁྲོམ་རའི་རྩ་འཛུགས་དང་དེ་བཞིན་ཞིང་འབྲོག་པ་མི་སྒེར་ལ་བྱ་དགའ་སྤྲད་ནས་ལས་ཀའི་རྣམ་པ་བཟང་པོ་བཏོད་པ་རེད།

རྣམ་གྲངས་འཛུགས་སྐྲུན་གྱི“ལས་གནས་མང་དུ་གཏོང་བའི”བླང་བྱར་ནན་པོ་གཞིགས་ཏེ། འཛུགས་སྐྲུན་རྣམ་གྲངས་ཀྱི་ལས་མི་སྤྱོད་པའི་དགོས་མཁོར་བརྟེན་ནས་ཐོན་ལས་ལ་མ་དངུལ་གཏོང་ཤུགས་ཆེ་རུ་བཏང་བ་དང་ཞིང་འབྲོག་པ་ཇོ་མོ་གླང་མའི“འདེབས་གསོ་ལས་སྣོན”སོགས་ཀྱི་ཐོན་ལས་འཕེལ་རྒྱས་བརྟེན་རྒྱུར་སྐུལ་སློང་བྱས་པས། ས་གནས་དེ་གའི་ཞིང་འབྲོག་མང་ཚོགས་མི་ཐེངས་9640ཕ་ཡུལ་ནས་ཁ་མི་བྲལ་བ་དང་ཐག་ཉེ་ས་དང་སྟབས་བདེ་སར་ལས་ཞུགས་ཐུབ་ཡོད།

“ང་ཚོའི་རྫོང་གི་ལས་བྱེད་ལས་བཟོ་1226གིས་སྒོར་9000མན་གྱི་ཡོང་འབབ་ལས་དམའ་བའི་ཞིང་འབྲོག་མང་ཚོགས་དང་ཆ་བསྒྲིགས་ནས་ཡོང་འབབ་དམའ་བའི་མི་ཚོགས་ལ་ལས་ཞུགས་མཛུབ་ཁྲིད་བྱེད་ཀྱི་ཡོད” ཞིང་འབྲོག་པའི་ལས་ཞུགས་གཞན་སྒྱུར་གྱི་ལས་དོན་ཁྲོད། ལྷ་རྩེ་རྫོང་གིས“གནད་གཏད་གནད”དང“བུ་རྫི་རྣམ་པའི”ཞབས་ཞུའི་ཐོག་ནས་ཞིང་འབྲོག་པར་རྩ་འཛུགས་ཅན་གྱི་ལས་ཞུགས་གཞན་སྒྱུར་མངོན་འགྱུར་བྱེད་ཀྱི་ཡོད་ཅེས་ལྷ་རྩེ་རྫོང་མི་སྤྱི་ཅུས་ཀྱི་ཅུས་ཀྲང་ཚེ་རིང་གཡང་འཛོམས་ཀྱིས་བཤད།

སྲིད་གཞུང་གིས་ལས་སྟེགས་བཏོད་ནས་སྒྲིག་འཛུགས་ཅན་དང་ཚད་ལྡན་ཅན་གྱི་ཆུ་ཚད་མཐོ་རུ་བཏང་བ།

2019ལོའི་ཟླ་4པར་གཞིས་ཆེན་ཤང་སྐྱིད་སྦུག་གྲོང་ཚོའི་གྲོང་མི་ངག་དབང་བསྟན་འཛིན་གྱིས་སྣེ་ཁྲིད་དེ་གཞིས་ཆེན་ཤང་སྐྱིད་སྦུག་ངལ་ནུས་ཕྱིར་གཏོང་མཉམ་ལས་ཁང་བཙུགས་པ་དང་འབྲེལ་མཉམ་ལས་ཁང་གི་ལས་འཛིན་ལྷན་དཔོན་ཡང་བྱས་པ་དང་། གྲོང་ཚོ་ཡོངས་ཀྱི་དུད་ཚང་52ཀྱི་གྲོང་མི་ཚང་མ་མཉམ་ལས་ཁང་ལ་ཞུགས་པ་རེད།

“ན་ནིང་སྲིད་ཇུས་ཀྱི་སྐུལ་ཁྲིད་འོག་ང་དང་གྲོང་ཚོའི་ངལ་ནུས་བར་གཉེར་བ་5ཡིས་མི་123སྒྲིག་འཛུགས་བྱས་ཏེ་མངའ་རིས་དང་འབྲོང་པ་སོགས་སུ་ལས་ཞུགས་བྱེད་པར་ཕྱིན་པ་ཡིན། ཉེ་བའི་ལོ་གཉིས་ནང་ཏང་དང་སྲིད་གཞུང་གིས་ཞིང་འབྲོག་མང་ཚོགས་ལ་གཟིགས་སྐྱོང་སྲིད་ཇུས་མང་པོ་བཏོན་པས་ངས་རང་ཉིད་ཀྱི་ལེགས་ཆ་དེ་བས་ལེགས་པའི་ངང་འདོན་སྤེལ་བྱས་ཏེ་ཡུལ་མི་དེ་བས་མང་བ་ཕྱུག་པོ་ཆགས་པར་སྐུལ་ཁྲིད་བྱ་རྒྱུ་ཡིན”ཞེས་ངག་དབང་བསྟན་འཛིན་གྱིས་སྤོབས་པ་ཆེན་པོས་བཤད།

ཞིང་འབྲོག་པའི་ལས་ཞུགས་གཞན་སྒྱུར་དེ་ཐར་ཐོར་ཅན་དང་དུས་ཐུང་ཅན་ནས་གཞི་ཁྱོན་ཅན་དང་བརྟན་འཇགས་ཅན་ལ་འགྱུར་རྒྱུར་སྐུལ་འདེད་གཏོང་ཆེད། ལྷ་རྩེ་རྫོང་གིས་ཕྱོགས་གཅིག་ནས་རྫོང་དང་ཤང་སྲིད་གཞུང་དང་། ཨར་སྐྲུན་ཚན་པ། ངལ་ནུས་མངགས་གཏོང་ཀུང་སི། ངལ་ནུས་མཉམ་ལས་ཁང་། ངལ་ནུས་བར་གཉེར་བ། ངལ་ནུས་བཅས་དབར“ཕྱོགས་དྲུག་གཞི་གཅིག”གི་ངལ་ནུས་ཕྱིར་གཏོང་གི་བྱེད་སྟངས་སྤྱད་ནས་ཞིང་འབྲོག་པར་ལས་ཞུགས་འོས་སྦྱོར་དང་། ལག་ཁྱེར་གཉེར་བའི་ཞབས་ཞུ། ཕྱིར་སྐྱོད་འགན་སྲུང་། བཅའ་ཁྲིམས་རོགས་སྐྱོར་བཅས་ཀྱི“བུ་རྫི་རྣམ་པ”དང“འཁོར་སྦྲེལ་ཧྲིལ་པོའི”ཞབས་འདེགས་ཞུས་ཡོད། ཕྱོགས་གཞན་ཞིག་ནས་ཞིང་པ་ལས་མིའི་ཕྱིར་སྐྱོད་གསལ་ཐོ་དང་། ཁེ་ལས་ཀྱི་ལས་མིའི་དགོས་མཁོའི་གསལ་ཐོ། གྲོང་ཚོའི་ངལ་ནུས་མཁོ་སྤྲོད་གསལ་ཐོ་བཅས“གསལ་ཐོ་གསུམ”བཟོས་ནས་གཙོ་གནད་ཁེ་ལས་དང་དེ་བཞིན་རྣམ་གྲངས་ཀྱི་མི་སྤྱོད་དགོས་མཁོའི་གནས་ཚུལ་དང་ཞིང་འབྲོག་པའི་རྩལ་ནུས་གནས་ཚུལ། ལས་ཀ་འཚོལ་མཁན་གྱི་འདོད་བློ་སོགས་ལ་ཐོ་འགོད་ཞིབ་ཚགས་བྱས་ནས་ཡིག་ཚགས་བཟོས་ཏེ་གནད་སྨིན་འབྲེལ་མཐུད་དང་ཕྱིར་གཏོང་བྱ་རྒྱུར་ཤུགས་སྣོན་བརྒྱབ་པ་རེད།

ད་ཆ་ལྷ་རྩེ་རྫོང་གིས་ད་དུང་ངལ་ནུས་མངགས་གཏོང་ཀུང་སི་1དང་། ངལ་ནུས་མཉམ་ལས་ཁང་100 ཞིང་འབྲོག་པའི་ལས་ཞུགས་གཞན་སྒྱུར་རྟེན་གཞི་9(7ལ་ཆོག་མཆན་ཐོབ་པ་དང་གཉིས་གོང་ཞུ་བྱས་ནས་མཆན་བཀོད་བཀའ་ལན་སྒུག་བཞིན་ཡོད་པ)བཙུགས་ནས་ལས་ཞུགས་གཞན་སྒྱུར་བྱ་རྒྱུ་དེ“དངོས་ཚན་ཅན”གྱི་འཛུགས་སྐྱོང་དང“སྒྲིག་འཛུགས་ཅན”གྱི་འཛུགས་སྐྱོང་ཕྱོགས་སུ་གོམ་པ་བརྟན་པོ་སྤོས་ཡོད། 2020ལོར་ལྷ་རྩེ་རྫོང་དུ་མི་11671སྒྲིག་འཛུགས་ཅན་གྱི་ལས་ཞུགས་ཐུབ་པ་དེས་ལས་ཞུགས་གཞན་སྒྱུར་བྱེད་ཚད་སྤྱིའི་མི་འབོར་གྱི་64.17%བཟུང་ཡོད།

གནད་སྨིན་ཇུས་བསྟར་བྱས་པས“གཉིས་ཕན”གྱི་དམིགས་ཚད་མངོན་འགྱུར་བྱུང་བ།

ལྷ་རྩེ་རྫོང་བཀྲ་ཤིས་འཛོམས་ཤང་གི་དམངས་ཕན་མི་རིགས་ལག་ཤེས་མཉམ་ལས་ཁང་ནང་མིང་སྐྱིད་གྲོང་ཚོའི་གྲོང་མི་བསོད་ནམས་ཆོས་སྒྲོན་ཁ་གདན་འཐག་བཞིན་ཡོད། “ལས་ཀས་གསོ་སྦྱོང་གི་ཚབ་བྱེད་པའི”བྱེད་སྟངས་སྤྱད་ནས་བསོད་ནམས་ཆོས་སྒྲོན་ལ་དགེ་ཕྲུག་བྱེད་སྐབས་ཀྱི་གླ་ཆ་སྒོར་1500ནས་ད་ཆའི་ཟླ་ཆ་སྒོར་3000བར་འཕར་ཡོད།

བསོད་ནམས་ཆོས་སྒྲོན་གྱིས། དང་ཐོག་གང་ཡང་མི་ཤེས་པའི་སྐབས་ལའང་གླ་ཆ་ལེན་རྒྱུ་འདུག ལག་རྩལ་ཤེས་རྗེས་གླ་ཆ་ལྡབ་འཕར་སོང་། ཏང་གི་སྲིད་ཇུས་བཟང་པོར་ཐུགས་རྗེ་ཆེ་ཞུ་རྒྱུ་ཡིན་ཞེས་བཤད།

ཞིང་འབྲོག་པའི་གསོ་སྦྱོང་འདོད་འདུན་དེ་ཁྲོམ་རའི་དགོས་མཁོ་དང་ཐོན་ལས་འཕེལ་རྒྱས་སོགས་ཀྱི་རྒྱུ་རྐྱེན་དང་ཟུང་འབྲེལ་དམ་ཟབ་བྱས་པ་དང་ཁེ་ལས་དང་མཉམ་ལས་ཁང་སོགས་ཁྲོམ་རའི་བྱེད་པོར་བརྟེན་ནས“ལས་ཀས་གསོ་སྦྱོང་གི་ཚབ་བྱེད་པའི”རྩལ་ནུས་གསོ་སྦྱོང་བྱས་ཡོད། འདི་ནི་ལྷ་རྩེ་རྫོང་གིས་གསོ་སྦྱོང་བྱས་ནས་ལས་ཞུགས་འབབ་འཕར་དང་ཁེ་ལས་ཀྱི་མི་སྤྱོད“གཉིས་ཕན”གྱི་དམིགས་ཚད་མངོན་འགྱུར་བྱ་ཆེད་སྤྱད་པའི་བྱ་ཐབས་སྣ་མང་ཁྲོད་ཀྱི་གྲས་ཤིག་རེད།

“ཕྱིར་གཏོང”དང“ནང་འདྲེན”གྱི་བྱ་ཐབས་བརྒྱུད། ལྷ་རྩེ་རྫོང་གིས་ད་ཡོད་ཀྱི་གསོ་སྦྱོང་ཐོན་ཁུངས་བསྡུ་སྒྲིལ་བྱས་ཏེ་འདེབས་འཛུགས་གསོ་ཚགས་དང་། ཤིང་བཟོ། མ་བྱན་སོགས་སྤྱོད་གོ་ཆོད་པའི་རྩལ་ནུས་གསོ་སྦྱོང་བྱས་པས་མང་ཚོགས་རྣམས་སྦྱོང་ཐུབ་པ་དང་། སྤྱོད་ཐུབ་པ། ལས་ཞུགས་ཡག་པོ་ཐུབ་པ་བཅས་བྱུང་ཡོད། 2020ལོར་ལྷ་རྩེ་རྫོང་གིས་རྩལ་ནུས་གསོ་སྦྱོང་དུས་ཐེངས་43བྱས་ནས་མི་1998ལ་གསོ་སྦྱོང་བྱས་པའི་ནང་གསོ་སྦྱོང་ཚད་གཞི་ལོན་ཚད་95%ཡན་ཟིན་པ་དང་གསོ་སྦྱོང་བྱས་རྗེས་ལས་ཞུགས་ཐུབ་ཚད་85%ཡན་ཟིན་ཡོད།