ལྷ་རྩེ་རྫོང་བཀྲ་ཤིས་འཛོམས་ཤང་གནས་གསར་གྲོང་ཚོའི་གྲོང་མི་ཀུན་དགས་ཉིན་ལྟར་སྦག་སྦག་བཞོན་ནས་ཡར་ཀླུང་གཙང་པོའི་རྒྱུད་ཀྱི་ཁྲུང་ཁྲུང་སྐེ་ནག་འཚོ་སྡོད་བྱ་ཡུལ་དུ་སྐོར་ཞིབ་ཐེངས་རེ་བྱེད་པར་སྐྱོད་ཀྱི་ཡོད།

ཀུན་དགའ་ནི་ཡུལ་དེ་གའི་ཁྲུང་ཁྲུང་སྐེ་ནག་འཚོ་སྡོད་བྱ་ཡུལ་གྱི་ཆེད་བསྐོས་སྲུང་སྐྱོང་བ་ཞིག་ཡིན་པ་དང་སྐོར་ཞིབ་དེ་འདྲ་བྱས་ཏེ་ལོ་ལྔ་ཙམ་སོང་ཡོད།

ལོ་ལྔ་ལྷག་ཙམ་རིང་ལྷ་རྩེ་རྫོང་གིས་སྐྱེ་ཁམས་ཁོར་ཡུག་སྲུང་སྐྱོང་ལས་དོན་ལ་མཐོང་ཆེན་བྱས་ཏེ་ཕྱོགས་ཡོངས་ནས“གྲོང་ཚོ་དང་དུད་ཚང་ཚང་མར་སྐྱེ་ཤིང་ཡོད་པ”བྱས་པ་དང་། རྫོང་ཁོངས་ཀྱི་ཆུ་བོའི་སྤུས་ཚད་IIIཡན་དུ་སླེབས་པར་བྱས་པས་ལྷ་རྩེར་མི་དང་རང་བྱུང་ཁམས་ཞི་མཐུན་མཉམ་གནས་ཀྱི་རྣམ་པའི་བཟང་པོ་ཞིག་ཆགས་ཡོད།

སྔོན་ལ་འཆར་འགོད་བྱས་པ ——

གནས་ཚད་མཐོ་བའི་ཐོག་ནས་སྐྱེ་ཁམས་སྲུང་སྐྱོང་གི་དམར་ཐིག་ལེགས་སྒྲིག་བྱས་པ།

ལྷ་རྩེ་རྫོང་ནི་ཡར་ཀླུང་གཙང་པོའི་དབུས་རྒྱུད་ཀྱི་ཁྲུང་ཁྲུང་སྐེ་ནག་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དུ་གནས་ཡོད། སྲུང་སྐྱོང་ཁུལ་དེ་རྫོང་ཡོངས་ཀྱི་ཤང(གྲོང་རྡལ)7གྱི་སྲིད་འཛིན་གྲོང་ཚོ་43དང་འབྲེལ་ཡོད།

སྐྱེ་ཁམས་སྲུང་སྐྱོང་ཁུལ་གྱི་རྒྱ་ཁྱོན་ཆེ་ཞིང་། གཏན་འཇགས་ཀྱི་གཞི་རྩའི་ཞིང་ཁ། གྲོང་ཁྱེར་དང་གྲོང་རྡལ་གསར་སྤེལ་གྱི་འདྲེས་མཚམས། གཞུང་ལམ་ཨ་མ། གྲོང་མི་གནས་ཡུལ་བཅས་དང་མཉམ་དུ་འདྲེས་ཡོད་པས། སྐྱེ་ཁམས་ཤེས་དཔལ་འཛུགས་སྐྱོང་དང་དོ་དམ་བྱེད་དཀའ་བའི་དོན་དངོས་ཀྱི་གནས་ཚུལ་ཐོན་ཡོད། 2018ལོ་ནས་བཟུང་། ལྷ་རྩེ་རྫོང་གིས《ལྷ་རྩེའི་སྐྱེ་ཁམས་ཁོར་ཡུག་སྲུང་སྐྱོང་འཆར་འགོད》དང《ལྷ་རྩེ་རྫོང་གི་སྐྱེ་ཁམས་ཁོར་ཡུག་སྲུང་སྐྱོང་གི་དམར་ཐིག་ཇུས་གཞི》བཟོས་རྗེས། རྫོང་ནོར་སྲིད་ནས་ཆེད་དོན་མ་དངུལ་སྒོར་ཁྲི་167བཏང་སྟེ་སྐྱེ་ཁམས་བདེ་འཇགས་སྲུང་ཡོལ་བརྟན་དུ་གཏོང་བར་ལམ་ལུགས་དང་མ་དངུལ་གྱི་འགན་ལེན་བྱས་ཡོད།

ཁྱབ་ཁོངས་ཀྱི་སྐྱེ་ཁམས་མ་ལག་འཐུས་ཚང་རང་བཞིན་དང་ཕན་ཚུན་འབྲེལ་མཐུད་རང་བཞིན་གྱི་སྲུང་སྐྱོང་གི་དགོས་མཁོར་གཞིགས་ནས། ལྷ་རྩེ་རྫོང་གིས་རྒྱལ་ཁབ་ས་ཆའི་བར་མཐོངས་འཆར་འགོད་ལས་དོན་ཧུར་ཐག་སྤེལ་ཏེ་ཁྱབ་ཁོངས་ཀྱི་ཆུ་འགོ་གསུམ་གྱི་སྲུང་སྐྱོང་ཁུལ་ལེགས་སྒྲིག་བྱས་པ་དང་ས་མཚམས་གསལ་པོ་དབྱེ་བས་ཆུ་འགོའི་སྐྱེ་ཁམས་ཁོར་ཡུག་བདེ་འཇགས་དང་ཆུ་འགོའི་བདེ་འཇགས་སྲུང་སྐྱོང་ནུས་ལྡན་ཐུབ་ཡོད།

དེ་དང་དུས་མཚུངས། ལྷ་རྩེ་རྫོང་གིས་སྡོང་ཕྲུག་ར་བ་བསྐྱར་སྐྲུན་རྒྱས་སྐྲུན་གྱི་རྣམ་གྲངས་སོགས་ཀྱི་རྨང་གཞིའི་སྒྲིག་བཀོད་འཛུགས་སྐྲུན་བརྒྱུད། འགོག་སྲུང་ཤིང་ནགས་ཀྱི་རྣམ་གྲངས་དང་། “གཙང་པོ་གཉིས་དང་ཆུ་བོ་བཞིའི”སྔོ་འགྱུར་རྣམ་གྲངས། ཤིང་འཛུགས་ནགས་གསོ་མང་དུ་གཏོང་བའི་རྣམ་གྲངས། ནགས་ཚལ་སྐྱོང་གསོའི་འཛུགས་སྐྲུན་རྣམ་གྲངས་སོགས་རིགས་ཁག་གི་བྱེ་འགོག་བྱེ་བཅོས་ཀྱི་རྣམ་གྲངས་ལག་ལེན་བསྟར་བར་བྱེ་འགོག་བྱེ་བཅོས་དང་རི་སྐྱ་བསྡམས་ནས་ནགས་གསོ་བསྡོམས་མུའུ་2ཙམ་དང་གཙོ་གནད་ཁྱབ་ཁོངས་སུ་ནགས་གསོ་མུའུ་2292ཙམ་ལེགས་སྒྲུབ་བྱས་པས། རྫོང་ཡོངས་ཀྱི་ས་ཆུ་ཤོར་བ་དང་བྱེ་འགྱུར་བཅོས་སྒྲིག་ལ་སྐུལ་འདེད་ཏན་ཏིག་བཏང་ཡོད།

ཞིང་ལས་ཐོན་སྐྱེད་བྱེད་རིང་། ལྷ་རྩེ་རྫོང་གིས་ཞིང་ལས་ཀྱི་སྦགས་བཙོག་ཉུང་དུ་གཏོང་བ་དང་། རྫས་ལུད་སྤྱོད་ཚད་ཉུང་དུ་གཏོང་བ། གནོད་མང་ཕན་ཉུང་གི་ཞིང་སྨན་སྤྱོད་ཚད་ཉུང་དུ་གཏོང་བ། ཞིང་སྨན་གྱི་ཤེལ་དམ་དང་། ཕྱུགས་སྨན་གྱི་ཤེལ་དམ། འགྱིག་ཤོག་སྲབ་མོ་སོགས་ཚུར་བསྡུ་བྱེད་ཤུགས་ཆེ་རུ་གཏོང་བ་བཅས་བྱས་ཏེ་ས་རྒྱུའི་སྦགས་བཙོག་གི་ཉེན་ཁ་ཆུང་དུ་ནུས་ལྡན་བཏང་བ་རེད།

བྱ་ཐབས་ནན་པོ་སྤྱད་པ——

བླང་བྱ་ནན་པོ་བཏོན་ནས་ཁོར་ཡུག་བཅོས་སྒྲིག་དང་སྣོད་བཅུད་ཉམས་གསོ་བྱས་པ།

ལྷ་རྩེ་རྫོང་ལྷ་རྩེ་གྲོང་རྡལ་དང་བར་ཐག་སྤྱི་ལེ་གཅིག་ཀྱང་མེད་པའི་རྒྱལ་ལམ་349ཡི་འགྲམ་དུ་གནས་པའི་རི་ལྡེབས་ཤིག་ཏུ་མཐོ་ཚད་སྨི་གཅིག་ལྷག་ཙམ་གྱི་ལྗོན་ཤིང་རྣམས་ཡལ་འདབ་གསར་པ་འབུད་ནས་སྐྱེ་སྟོབས་ཀྱི་ཉམས་སྣང་ཆེན་པོ་མངོན།

འོན་ཀྱང་དེ་སྔ་འདི་ག་ནི་སྒྲིག་འགལ་ངང་གསར་སྤེལ་བྱས་པའི་བྱེ་ར་ཡིན་པ་དང་། གང་བྱུང་དུ་སྔོག་འདོན་བྱེད་པའི་སྣང་ཚུལ་ཡང་སེ་ཐོན་གྱི་ཡོད། 2017ལོར་ལྷ་རྩེ་རྫོང་ཁོར་ཡུག་སྲུང་སྐྱོང་སྡེ་ཚན་ལ་མང་ཚོགས་ཀྱི་ཐེར་འདོན་འབྱོར་རྗེས་འཕྲལ་མར་བྱེ་ར་སྒོ་རྒྱག་དགོས་པའི་བཀའ་བཏང་།

“ང་ཚོས་ལོ་བཞི་ཙམ་སྤྱད་དེ་བྱེ་ར་ཁོད་སྙོམས་པ་དང་། གྲོང་ཚོ་ཡོངས་ཀྱི་མང་ཚོགས་སྐུལ་སློང་བྱས་ནས་ཤིང་འཛུགས་ནགས་གསོ་བྱས་པ་ཡིན། མིག་སྔར་ང་ཚོས་རྒྱ་ལྕང་དང་སྦྱར་པ་སོགས་ཤིང་སྣ་མུའུ་40ལྷག་ཙམ་བཏབ་པ་ལས་60%ལྷག་ཙམ་གསོན་ཡོད”ཅེས་ལྷ་རྩེ་གྲོང་རྡལ་ཏང་ཨུད་ཀྱི་ཧྲུའུ་ཅི་གཞོན་པ་ཀྲེན་ཀྲང་དབན་ཏ་ཤིང་གིས་བརྗོད།

ཉེ་བའི་ལོ་ཤས་རིང་། ལྷ་རྩེ་རྫོང་གིས་རྣམ་གྲངས་ལ་ཞིབ་མཆན་འགོད་པ་དེ་སྦགས་བཙོག་འབྱུང་ཁུངས་གསར་པ་ཚོད་འཛིན་བྱེད་པའི་གཙོ་གནད་དུ་བཞག་ནས་རྫོང་ཡོངས་ཀྱི་གསར་སྐྲུན་རྣམ་གྲངས་ཀྱིས་ཁོར་ཡུག་ལ་ཤུགས་རྐྱེན་ཇི་འདྲ་ཐེབས་ཀྱི་ཡོད་མེད་ཀྱི་གདེང་འཇོག་མཆན་འགོད་ལམ་སྲོལ་ལག་བསྟར་ནན་པོ་བྱས་ཏེ་སྦགས་བཙོག་ཆེ་བ་དང་འབུད་གཏོང་མང་བའི་ཁེ་ལས་ནང་འདྲེན་བྱ་མི་ཆོག་པ་བཟོས་ཡོད།

བསྡོམས་རྩིས་བྱས་པར་གཞིགས་ན། ལོ་ལྔའི་རིང་ལྷ་རྩེ་རྫོང་དུ་མཆན་འགོད་རྣམ་གྲངས་579ཡོད་པ་དེ་དག་ཁོར་ཡུག་གདེང་འཇོག་ལམ་སྲོལ་ལག་ལེན་བསྟར་ཚད་100%ཟིན་པ་དང་། ཁོར་ཡུག་སྲུང་སྐྱོང་གནད་དོན་དང་འབྲེལ་བ་ཡོད་པའི་ཁེ་ལས་དང་བྱ་གཞག་ཚན་པ་4ལ་སྲིད་འཛིན་གྱི་ཆད་པ་བཅད་པ་དང་དངུལ་ཆད་སྒོར་ཁྲི་147.425ཟིན་ཡོད། རྫོང་ཡོངས་སུ་ཁོར་ཡུག་སྦགས་བཙོག་གི་གྱོད་གཞི་གཅིག་ཀྱང་ཐོན་མེད་པ་དང་། བྱེ་རྡོའི་ཐོན་ཁུངས་གང་བྱུང་སྔོག་འདོན་དང་གཏོར་བཤིག་འཕྲོ་བརླག་གཏོང་བ་དང་། ཆོག་མཆན་མ་ཐོབ་པར་སྔོན་ལ་སྐྲུན་པ་སོགས་ཁོར་ཡུག་གི་ཁྲིམས་འགལ་བྱེད་སྤྱོད་བཀག་འགོག་ནུས་ལྡན་བྱས་ཡོད།

དཔེ་ལྟ་ས་བཏོད་པ།——

སྤུས་ཚད་ལེཌ་པའི་འཕེལ་རྒྱས་ཀྱི་མིག་དཔེ་སྟོན་པ།

ལོ་ལྟར་ཟླ་གསུམ་པ་དང་བཞི་པར་སླེབས་རིམ་བཞིན་ལྷ་རྩེ་རྫོང་སླེའུ་ཤང་གི་མང་ཚོགས་བཀྲ་ཤིས་ཚེ་རིང་གིས་རང་ཁྱིམ་སྒོ་རའི་ནང་དུ་ལྕང་མ་འདེབས་ཀྱི་ཡོད།

བཀྲ་ཤིས་ཚེ་རིང་གིས་གསར་འགོད་པར“དེ་སྔོན་དཔྱིད་ཀ་འཆར་ནས་ལྷགས་པ་རྒྱག་དུས་གྲོང་ཚོ་ཐལ་རྡུལ་གྱིས་ཁེངས་ཀྱི་ཡོད། ལོ་ལྔའི་གོང་ཤང་སྲིད་གཞུང་གིས་མི་རེས་ལོ་ལྟར་ཤིང་3འདེབས་དགོས་པའི་གྲོས་འགོ་བཏོན་རྗེས་ད་ཆ་ང་ཚོའི་གྲོང་ཚོས་ཤིང་འཛུགས་མུའུ་30ཙམ་བྱས་ཡོད། ཤིང་འཛུགས་ནགས་གསོ་བྱས་པ་བརྒྱུད་ལྷགས་པ་ཆུང་དུ་ཕྱིན་སོང་ལ་ཐལ་རྡུལ་ཡང་དེ་ཙམ་མི་འདུག་པས། ང་ཚོ་ཚང་མས་རང་འགུལ་ངང་ཤིང་འཛུགས་བྱེད་སྒོར་ཞུགས་ཀྱི་ཡོད”ཅེས་བརྗོད།

མིག་སྔར་ལྷ་རྩེ་རྫོང་སླེའུ་ཤང་དུ་སྲིད་འཛིན་གྲོང་ཚོ་5ཡིས་རང་སྐྱོང་ལྗོངས་རིམ་པའི་སྣོད་བཅུད་གྲོང་ཚོ་འཛུགས་གཏོད་ཀྱི་ལས་དོན་ལེགས་གྲུབ་ཟིན་པ་དང་། མིག་སྔར་ཤང་ཡོངས་ཀྱིས་རང་སྐྱོང་ལྗོངས་རིམ་པའི་སྣོད་བཅུད་ཤང་འཛུགས་གཏོད་ཀྱི་ལས་དོན་ལ་སྐུལ་འདེད་གཏོང་བཞིན་ཡོད།

2019ལོ་ཚུན་དུ། ལྷ་རྩེ་རྫོང་གིས་སྔ་རྗེས་སུ་སྒོར་ཁྲི་100.5བཏང་ནས་རྒྱལ་ལམ་318རྒྱུད་ཀྱི་ཤང་དང་གྲོང་རྡལ་ལ་གད་སྙིགས་གཙང་སེལ་རླངས་འཁོར་སྒྲིག་སྦྱོར་བྱས་པ་དང་། མ་དངུལ་སྒོར་ཁྲི་94.11བཏང་ནས་སྲིད་འཛིན་གྲོང་ཚོ་26ལ་གྲོང་གསེབ་ཀྱི་ཁོར་ཡུག་ཕྱོགས་བསྡུས་བཅོས་སྒྲིག་གི་རྣམ་གྲངས་ལག་ལེན་བསྟར་ཏེ་གྲོང་གསེབ་ཀྱི་ཁོར་ཡུག་བཅོས་སྒྲིག་ལས་དོན་རྒྱུན་རྣམ་ཅན་དང་ཚད་ལྡན་ལ་སྐུལ་འདེད་ནུས་ལྡན་བཏང་ཡོད། རྫོང་ཡོངས་ཀྱི་ཤང་དང་གྲོང་རྡལ་ཁག་ལ་གད་སྙིགས་རིགས་དབྱེའི་སྒྲིག་ཆས་སྒྲིག་སྦྱོར་བྱས་ཟིན་པ་དང་། གྲོང་ཚོ་རིམ་པའི་སྤྱི་པའི་ཁུལ་ཁོངས་སུ་གཤོང་ཚད་ཧྲེང་180ཟིན་པའི་སྙིགས་གཞོང་3ནས་5བར་སྒྲིག་སྦྱོར་བྱས་ཏེ་མང་ཚོགས་ལ་གད་སྙིགས་རིགས་དབྱེའི་འདུ་ཤེས་འཇགས་པར་སྐུལ་འདེད་ཤུགས་ཆེན་བཏང་ཡོད།

2021ལོའི་ལོ་འགོར《རྒྱལ་ཁབ་ཀྱི་སྣོད་བཅུད་ཤེས་དཔལ་འཛུགས་སྐྱོང་གི་དཔེ་སྟོན་རྫོང་འཛུགས་གཏོད་བྱས་ནས་མཛེས་སྡུག་ལྡན་པའི་ལྷ་རྩེ་མགྱོགས་མྱུར་སྐྲུན་རྒྱུའི་སྐོར་གྱི་ལག་བསྟར་ཇུས་གཞི》བཏོན་པ་རེད། ཇུས་གཞིའི་ནང་2021ལོར་སླེའུ་ཤང་རང་སྐྱོང་ལྗོངས་ཀྱི་སྣོད་བཅུད་ཤེས་དཔལ་འཛུགས་སྐྱོང་གི་དཔེ་སྟོན་ཤང་དང་གྲོང་རྡལ་དུ་བདེ་བླག་ངང་འཛུགས་གཏོད་བྱེད་རྒྱུ་དང་། 2024ལོར་རྫོང་ཡོངས་ཀྱི་ཤང་དང་གྲོང་རྡལ་ཚང་མ་རང་སྐྱོང་ལྗོངས་ཀྱི་སྣོད་བཅུད་ཤེས་དཔལ་འཛུགས་སྐྱོང་གི་དཔེ་སྟོན་ཤང་གི་ཚད་གཞིར་སླེབས་པ་བྱེད་རྒྱུ་མ་ཟད། ལྷ་རྩེ་རྫོང་རང་སྐྱོང་ལྗོངས་ཀྱི་སྣོད་བཅུད་ཤེས་དཔལ་འཛུགས་སྐྱོང་གི་དཔེ་སྟོན་རྫོང་ལ་རིམ་བཞིན་རེ་ཞུ་འབུལ་རྒྱུའི་དམིགས་ཚད་བཟོས་པ་རེད།