ཏང་གི་ལོ་རྒྱུས་སློབ་སྦྱོང་སློབ་གསོའི་བྱེད་སྒོ་སྤེལ་ཚུན། ཆབ་མདོ་གྲོང་ཁྱེར་གྱི་རིམ་པ་ཁག་དང་སྡེ་ཚན་ཁག་གིས་དོན་དངོས་ལ་གཞི་ཚུགས་པ་དང་། གཙོ་གནད་མངོན་གསལ་དོད་པ། ཇུས་འགོད་ཞིབ་ཚགས་བཅས་བྱས་ནས། རྩ་འཛུགས་ཀྱི་འགོ་ཁྲིད་ལ་ཤུགས་སྣོན་རྒྱག་རྒྱུ་ནས་འགོ་བཙུགས་ཏེ་འགན་འཁྲི་ཕྱོགས་ཡོངས་ནས་ནན་དུ་གཏོང་བ་དང་། གསར་གཏོད་དངོས་སྒྲུབ་ལ་སྣང་ཆེན་བྱེད་པ། དྲིལ་བསྒྲགས་ཁྲིད་སྟོན་ཤུགས་ཆེན་བྱེད་པ་བཅས་བྱས་ཏེ་རྒྱ་ཆེའི་ཏང་ཡོན་ལས་བྱེད་པས་ལོ་ངོ་བརྒྱའི་ཏང་གི་ལོ་རྒྱུས་ཁྲོད་ནས་མདུན་སྐྱོད་ཀྱི་སྟོབས་ཤུགས་བསྡུ་ལེན་བྱས་ཏེ་མང་ཚོགས་ལ་བྱ་བ་དངོས་སྒྲུབ་པ་དང་དཀའ་གནད་སེལ་བའི་ཕན་འབྲས་ཆེ་རུ་ཧུར་ཐག་བཏང་ཡོད།

ཚུགས་གནས་མཐོ་པོས་ཇུས་འགོད་བྱས་ཏེ་འགོ་འཛུགས་ས་མཐོ་པོའི་ཐོག་ནས་སློབ་སྦྱོང་བྱེད་འགོ་ཚུགས་པ།

ཆབ་མདོ་གྲོང་ཁྱེར་གྱིས་འཕྲལ་དུ་གྲོང་ཨུད་ཀྱི་ཧྲུའུ་ཅིས་ཙུའུ་ཀྲང་གནང་བའི་ཏང་གི་ལོ་རྒྱུས་སློབ་སྦྱོང་སློབ་གསོའི་འགོ་ཁྲིད་སྒྲིག་གཞི་དང་ལས་དོན་གྱི་ཆེད་དོན་ཚན་ཁག་བཙུགས་ཏེ། ཡུལ་བབ་དང་བསྟུན་པ་དང་། རིགས་དབྱེའི་མཛུབ་ཁྲིད། རིམ་པ་བཞིན་སྐུལ་འདེད་བཅས་བཏང་ནས་གྲོང་ཁྱེར་ཡོངས་ཀྱི་ཏང་གི་ལོ་རྒྱུས་སློབ་སྦྱོང་སློབ་གསོར་སྲ་ཞིང་བརྟན་པའི་རྩ་འཛུགས་འགོ་ཁྲིད་ཀྱི་འགན་ལེན་བྱས་ཡོད།

དེ་རྗེས། གོང་དཔེ་འོག་སྟོན་གྱི་ཏང་གི་ལོ་རྒྱུས་སློབ་སྦྱོང་སློབ་གསོ་འཕྲལ་དུ་སྤེལ་འགོ་ཚུགས་ཤིང་། ཆབ་མདོ་གྲོང་ཨུད་ཀྱིས་རྒྱུན་ལས་ཨུ་ལྷན་གྱི་ཚོགས་འདུ་འཚོགས་ནས། གཞན་གྱི་སྔོན་ལ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཏང་གི་ལོ་རྒྱུས་སློབ་སྦྱོང་སློབ་གསོའི་སྐུལ་སློང་ཚོགས་ཆེན་ཐོག་གནང་བའི་གསུང་བཤད་གལ་ཆེན་གྱི་དགོངས་དོན་དང་། ཧྲང་ཧའེ་གྲོང་ཁྱེར་གྱི་དམག་དཔུང་ཤིན་སི་ཅུན་གྱི་ལོ་རྒྱུས་ཞིབ་འཇུག་ལྷན་ཚོགས་ཀྱི་ལོ་བརྒྱར་སླེབས་པའི་འཐབ་འཛིང་པ་རྒན་གྲས་ཚོར་སྤྲིངས་པའི་འཕྲིན་ལན་གལ་ཆེན་གྱི་དགོངས་དོན། ཧྲུའུ་ཅི་ཝུའུ་དབྱིང་ཅེས་ལྗོངས་ཡོངས་ཀྱི་ཏང་གི་ལོ་རྒྱུས་སློབ་སྦྱོང་སློབ་གསོའི་སྐུལ་སློང་ཚོགས་ཆེན་ཐོག་གནང་བའི་གསུང་བཤད་ཀྱི་དགོངས་དོན་བཅས་གཅིག་སྡུད་ཐོག་སློབ་སྦྱོང་བྱས་པ་རེད།

ཟླ་3ཚེས་1ཉིན། ཆབ་མདོ་གྲོང་ཁྱེར་གྱིས་ཏང་གི་ལོ་རྒྱུས་སློབ་སྦྱོང་སློབ་གསོའི་སྐུལ་སྤེལ་ཚོགས་འདུ་འཚོགས་ནས། རང་འགན་གཙང་སྒྲུབ་དང་། ཆེད་དོན་སློབ་སྦྱོང་། དྲིལ་བསྒྲགས་གསལ་འགྲེལ། རིག་རྩལ་བྱེད་སྒོ། ཆེད་དོན་གསོ་སྦྱོང་། ལག་ལེན་དངོས་ཀྱི་བྱེད་སྒོ། གསར་འགྱུར་དྲིལ་བསྒྲགས་བཅས་ཕྱོགས་7ཐད་བཀོད་སྒྲིག་ཞིབ་ཚགས་བྱས་པ་དང་། ཆབ་མདོ་གྲོང་ཨུད་ཀྱི་ཏང་གི་ལོ་རྒྱུས་སློབ་སྦྱོང་སློབ་གསོའི་འགོ་ཁྲིད་ཚོགས་ཆུང་གཞུང་དོན་ཁང་དང་དེའི་འགན་ནུས་ཚོགས་ཆུང་ལ་བརྡ་ཁྱབ་བཏང་བ་མ་ཟད། འགན་འཁུར་བ་དང་འགན་འཁྲིའི་ལས་བགོས་ཁ་གསལ་ཡང་བཟོས་ནས། རྩ་འཛུགས་ཀྱི་འགོ་ཁྲིད་དམིགས་སར་འབྱོར་བ་དང་འགན་འཁྲི་དོན་ཐོག་ཏུ་འཁྱོལ་བའི་འགན་ལེན་བྱས་ཡོད།

སློབ་སྦྱོང་བྱེད་སྟངས་གསར་གཏོད་བྱས་ཏེ་ཕུགས་བསམ་དང་དད་སེམས་བརྟན་དུ་བཏང་བ།

མིག་སྔར། ཆབ་མདོ་གྲོང་ཁྱེར་ལ་ཁྱོན་བསྡོམས་གསར་བརྗེའི་རིག་དངོས་ས་ཚིགས་49ཡོད་མོད། འོན་ཀྱང་གཞི་ཁྱོན་ཆེ་ཤོས་ཀྱི་གསར་བརྗེའི་རྗེས་ཤུལ་གཅིག་སྡུད་སྲུང་སྐྱོང་འགྲེམས་ཁུལ་ཆབ་མདོ་གྲོང་ཁྱེར་གྱི་གསར་བརྗེའི་ལོ་རྒྱུས་རྟེན་རྫས་བཤམས་མཛོད་ཁང་གི་ཁོངས་སུ་གཏོགས་ཀྱི་ཡོད། ཉིན་ཤས་བསྟུད་མར་ཆབ་མདོ་གྲོང་ཁྱེར་གྱི་གསར་བརྗེའི་རྗེས་ཤུལ་ཁྲོད་ཀྱི་གཙོ་གནད་སྲུང་སྐྱོང་བྱ་ཡུལ་གྱིས་ལྟ་སྐོར་བ་ཁག་དང་ཁག་བསུས་ནས་གཟི་བརྗིད་ལྡན་པའི་གསར་བརྗེའི་ལོ་རྒྱུས་ལ་རྗེས་དྲན་བྱས་ཡོད།

ཟླ་3ཚེས་22ཉིན། ཆབ་མདོ་གྲོང་ཨུད་ལས་བྱེད་པ་རྒན་གྲས་ཅུས་ཀྱིས་ཆབ་མདོ་གྲོང་ཁུལ་དུ་བཀོད་སྒྲིག་བྱས་པའི་ལས་བྲལ་དང་ལས་འཁྱུར་ངལ་གསོ་རྒྱག་མཁན་ལས་བྱེད་པའི་ཏང་ཀྲི་པུའི་ཚན་ཁག་གི་ཁོངས་མི་ཁག་དང་པོ་སྒྲིག་འཛུགས་བྱས་ཏེ་ཆབ་མདོའི་གསར་བརྗེའི་ལོ་རྒྱུས་རྟེན་རྫས་བཤམས་མཛོད་ཁང་དུ་ལྟ་སྐོར་བྱས་པ་རེད། འགྲེལ་བཤད་རྒྱག་མཁན་གྱིས་བརྒྱུད་རིམ་ལྡན་ཞིང་ཕྱོགས་ཡོངས་ནས་འགྲེལ་བཤད་བརྒྱབ་པ་བརྒྱུད། བློ་མཐུན་རྒན་གྲས་ཚོས་ཆབ་མདོར་བཅིངས་འགྲོལ་བཏང་བའི་ལོ་རྒྱུས་ཀྱི་བརྒྱུད་རིམ་དང་། གསར་བརྗེའི་ལོ་རྒྱུས། དེ་བཞིན་དཔའ་བོ་ཚོའི་འོད་སྟོང་འབར་བའི་བྱས་རྗེས་བཅས་ལ་སྔར་བས་རྒྱུས་མངའ་གཏིང་ཟབ་ལོན་ཞིང་། ཁོང་ཚོས་རང་ངོས་ཀྱི་ལེགས་ཆ་འདོན་སྤེལ་གང་ལེགས་བྱས་ནས། ཆབ་མདོའི་ཏང་གི་ལོ་རྒྱུས་དང་། གསར་བརྗེའི་གཏམ་རྒྱུད། དཔའ་བོའི་གཏམ་རྒྱུད་བཅས་ཡག་པོ་བཤད་དེ་ཆབ་མདོའི་དཔལ་འབྱོར་དང་སྤྱི་ཚོགས་འཕེལ་རྒྱས་ཆེད་ཐབས་འདོན་ཇུས་འབུལ་ཧུར་ཐག་བྱ་རྒྱུ་ཡིན་ཞེས་གཅིག་རྗེས་གཉིས་མཐུད་ངང་བརྗོད།

དཔའ་ཤོད་རྫོང་གིས“སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་དགོངས་དོན་སློབ་སྦྱོང་ལག་བསྟར་གཏིང་ཟབ་བྱེད་པ་དང་། ཕྱོགས་ཡོངས་ནས་ཏང་ནན་པོས་སྐྱོང་བའི་བྱེད་པོའི་འགན་འཁྲི་ཏན་ཏིག་ངང་ཡག་པོ་བསྒྲུབ་དགོས་པ”བརྗོད་དོན་གཙོ་བོའི་ཆེད་དོན་ཏང་གི་སློབ་ཚན་འཚོགས་ནས། རྒྱ་ཆེའི་ཏང་ཡོན་དང་ལས་བྱེད་པ་ཚོའི་ཕུགས་བསམ་དང་དད་སེམས་སྔར་བས་བརྟན་དུ་བཏང་ཡོད། མིག་སྔའི་བར་གྲོང་ཁྱེར་ཡོངས་ཀྱིས་ཏང་གི་ལོ་རྒྱུས་དང་ཏང་གི་སློབ་ཚན་ཐེངས་70ལྷག་ཙམ་འཚོགས་པའི་ནང་སློབ་གསོ་ཐེབས་པའི་ཏང་ཡོན་དང་ལས་བྱེད་པ་མི་ཐེངས་5000ལྷག་ཙམ་ཟིན་གྱི་ཡོད་པ་རེད།

སློབ་སྦྱོང་བྱ་སྤྱོད་ཐོག་འཁྱོལ་བར་བྱས་ཏེ་དམངས་ཀྱི་སེམས་ཁྲལ་དང་དཀའ་ངལ་བསལ་བ།

ཟླ་3ཚེས་25ཉིན་གྱི་ཞོགས་པ། ཆབ་མདོ་གྲོང་ཁྱེར་ཁ་རུབ་ཆུས་རི་དུང་ཤང་སྲིད་གཞུང་གི་ཐང་ཆེན་དུ་ཧ་ཅང་འཁྲུག་ཆ་དོད་པ་དང་ཉེ་འཁོར་གྱི་ཞིང་འབྲོག་པ་མང་ཚོགས་དེ་གར་འཛོམས་ནས“རིག་གནས་ཀྱི་སྟོན་མོ་གཟབ་རྒྱས”ཤིག་ལོངས་སུ་སྤྱད་ཡོད། སེམས་རྩ་འཁོལ་བའི་སྨན་བཅོས་ཞབས་ཞུ་དང་། དངོས་སྤྱོད་ཀྱི་ཚན་རིག་དང་བཅའ་ཁྲིམས་ཀྱི་ཤེས་བྱ་སྒྲོག་འགྲེལ། དཔེ་དེབ་རིན་མེད་ངང་སྤྲོད་པ་སོགས་ཀྱི་བྱེད་སྒོར་གདེང་འཇོག་བཟང་པོ་མགྲིན་གཅིག་ཏུ་ཐོབ་ཡོད།

དེ་ནི་ཆབ་མདོ་གྲོང་ཨུད་དྲིལ་བསྒྲགས་པུས་འཐབ་ཕྱོགས་གཅིག་གྱུར་དང་། ཚན་རྩལ། རིག་གནས་སོགས་ཀྱི་ཚན་པ་སྒྲིག་འཛུགས་བྱས་ནས། ཁ་རུབ་ཆུས་རི་དུང་ཤང་དུ་བསྐྱོད་དེ་རིག་གནས་དང་། ཚན་རྩལ། འཕྲོད་བསྟེན། བཅའ་ཁྲིམས། རྒྱལ་གཅེས་ཆོས་གཅེས་བཅས་ཀྱི“གཤམ་སྤེལ་ལྔའི”དྲིལ་བསྒྲགས་གཅིག་སྡུད་དཔེ་སྟོན་ཞབས་ཞུའི་བྱེད་སྒོ་སྤེལ་བའི་རྣམ་པ་ཡིན་པ་རེད།

ཉིན་ཤས་བསྟུད་མར། ཆབ་མདོ་གྲོང་ཁྱེར་གྱི་ཚན་པ་ཁག་གིས་ཏང་གི་ལོ་རྒྱུས་སློབ་སྦྱོང་སློབ་གསོ་དེ་ཏང་ཡོན་དང་ལས་བྱེད་པས་མི་དམངས་ལ་ཞབས་འདེགས་ཞུ་བའི་གསོན་ཉམས་དོད་པའི་ལག་ལེན་དུ་བསྒྱུར་བ་བྱས་ཡོད།

ལོ་བརྒྱའི་རྒྱང་སྐྱོང་ལམ་བུ་བརྗིད་ཆགས་ཉམས་དང་ལྡན། ལོ་བརྒྱའི་ཐོག་མའི་བསམ་འདུན་ནམ་ཡང་འགྱུར་བ་མེད། “ལོ་བརྒྱའི་ཏང་གི་ལོ་རྒྱུས་སྦྱངས། བརྗིད་ཆེའི་སྟོབས་ཤུགས་གཅིག་ཏུ་འདུས། དངོས་སྒྲུབ་ཀྱིས་རྣམ་པ་གསར་པ་གཏོད”ཅེས་པའི་ཏང་གི་ལོ་རྒྱུས་སློབ་སྦྱོང་སློབ་གསོ་བོད་ཤར་ས་གཞི་ཆེ་མོར་སྤེལ་བཞིན་མཆིས།