ཤིན་ཧྭ་གསར་འགྱུར་ཁང་རྒྱལ་ཁབ་ཀྱི་རྩེ་རིམ་ཇུས་འདོན་ཚོགས་པས་ཉེ་ཆར་གོ་ལ་ཧྲིལ་པོར《ཀྲུང་གོའི་དབུལ་པོ་ཉུང་གཏོང་རིག་པའི》ཇུས་འདོན་ཚོགས་པའི་སྙན་ཞུ་ཡོངས་བསྒྲགས་བྱས་ཏེ་ཆབ་སྲིད་དང་དཔལ་འབྱོར་རིག་པའི་མིག་རྒྱང་གི་ཐོག་ནས་ཀྲུང་གོའི་དབུལ་པོ་ཉུང་གཏོང་གི་རླབས་ཆེན་གྱི་ལག་ལེན་དང་ཀྲུང་གོའི་ཁྱད་ཆོས་ལྡན་པའི་དབུལ་ཟློག་གི་རིགས་པའི་གཞུང་ལུགས་དང་དེའི་འཛམ་གླིང་གི་དོན་སྙིང་གསལ་འགྲེལ་བྱས་ཡོད།

ཀྲུང་གོའི་ཉམས་མྱོང་དང་འཛམ་གླིང་གི་བློ་གྲོས། དབུལ་སྒྲོལ་བྱ་རྒྱུ་ནི་ཐོག་མཐའ་བར་གསུམ་དུ་གོ་ལ་ཧྲིལ་པོའི་འཕེལ་རྒྱས་དང་བཅོས་སྐྱོང་ལ་འགལ་རྐྱེན་བཟོ་བའི་མངོན་གསལ་དོད་པའི་དཀའ་གནད་ཅིག་རེད། 2020ལོར་ཏོག་གསར་གློ་ཚད་རིམས་ནད་དང་གནམ་གཤིས་ཀྱི་གནོད་འཚེ་ཐོན་ནས་གོ་ལ་ཧྲིལ་པོའི་ཤིན་ཏུ་དབུལ་བའི་མི་འབོར་ལོ་20ལྷག་ཙམ་རིང་ཐེངས་དང་པོ་བསྐྱར་དུ་ཐོན་ཡོད། དེའི་རྒྱབ་ལྗོངས་འོག་ཀྲུང་གོས་དབུལ་པོ་དབུལ་རྐྱང་སེལ་བའི་དཀའ་ཚེགས་ཆེ་བའི་ལས་འགན་ལེགས་སྒྲུབ་བྱས་ནས་ལོ་10སྔ་སྣུར་དུ་མཉམ་འབྲེལ་རྒྱལ་ཚོགས་ཀྱི་2030ལོའི་རྒྱུན་མཐུད་ཆོག་པའི་འཕེལ་རྒྱས་གྲོས་རིམ་གྱི་དབུལ་པོ་ཉུང་གཏོང་གི་དམིགས་ཚད་མངོན་འགྱུར་བྱས་ཏེ་འཛམ་གླིང་ཐོག་དབུལ་པོ་ཉུང་གཏོང་གི་མྱུར་ཚད་མགྱོགས་ཤོས་དང་དབུལ་པོ་ཉུང་གཏོང་གི་གྲངས་འབོར་མང་ཤོས་ཀྱི་ཐོག་ནས་མི་ཡུལ་གྱི་བྱས་རྗེས་ངོ་མཚར་ཅན་གཞན་ཞིག་བཏོད་ཡོད།

ཀྲུང་གོའི་དབུལ་པོ་ཉུང་གཏོང་གི“གསང་ཨང”ལ་ཀྲུང་གོའི་ཁྱད་ཆོས་ལྡན་ལ་འཛམ་གླིང་གི་དོན་སྙིང་དེ་བས་ལྡན་ཡོད། མིག་སྔར་འཛམ་གླིང་གི་རྒྱལ་ཁབ་ཁག་ཚང་མས་དོན་དངོས་ལ་གཞི་ཚུགས་ཏེ་རྒྱལ་ཁབ་དེ་གའི་རྒྱལ་བབ་དང་འཚམ་པའི་དབུལ་པོ་ཉུང་གཏོང་གི་ལམ་བུ་འཚོལ་ཞིབ་བྱེད་བཞིན་ཡོད། ཀྲུང་གོས་རང་རྒྱལ་ཁབ་ཀྱི་རྒྱལ་བབ་ལ་གཞིགས་ནས་སྤེལ་བའི་གཞི་ཁྱོན་ཆེ་བའི་དབུལ་པོ་ཉུང་གཏོང་གི་ལག་ལེན་དང་དབུལ་པོ་ཉུང་གཏོང་གི་ཆོས་ཉིད་ཀྱི་རིགས་པའི་གཞུང་ལུགས་ཀྱི་འཚོལ་ཞིབ་ཀྱིས་རྒྱལ་ཁབ་དང་ས་ཁུལ་གཞན་དག་ལ་རང་ཉིད་ཀྱི་དབུལ་པོ་ཉུང་གཏོང་གི་ལམ་བུ་འཚོལ་ཞིབ་བྱ་རྒྱུར་མཐོང་ཚོར་གསར་པ་དང་ཕན་ཡོད་ཀྱི་དཔྱད་གཞི་མཁོ་འདོན་བྱེད་ཐུབ་རྒྱུ་རེད། དབྱིན་ཇིའི་གོང་མ་ཚང་གི་རྒྱལ་སྤྱིའི་གནད་དོན་ཞིབ་འཇུག་སུའོ་ཡི་ཀྲུའུ་ཞི་གྲགས་ཅན་གྱི་དཔལ་འབྱོར་རིག་པ་མཁས་ཅན་ཅི་མུའུ·ཨའོ་ཉིར་གྱིས་ཀྲུང་གོའི་དབུལ་པོ་ཉུང་གཏོང་གི་ཉམས་མྱོང་ལ་དམིགས་བསལ་རང་བཞིན་ཆེན་པོ་ལྡན་པས་རྒྱལ་ཁབ་གཞན་དག་གིས་དཔྱད་གཞིའི་མེ་ལོང་དུ་འཛིན་རིན་ཡོད་ཅེས་བརྗོད་པ་རེད།

གནད་སྨིན་དབུལ་སྐྱོར་ནི་ཀྲུང་གོའི་དབུལ་པོ་ཉུང་གཏོང“གསང་ཨང”གི་རྒྱལ་ཁ་ཐོབ་པའི་ཐབས་མཆོག་ཅིག་རེད། དབུལ་པོ་དབུལ་རྐྱང་གི“མཐའ་མའི་འགག་གནད”ཐག་གཅོད་བྱ་ཆེད་ཀྲུང་གོས་གསར་གཏོད་རང་བཞིན་ལྡན་པའི་སྒོ་ནས་གནད་སྨིན་དབུལ་སྐྱོར་གྱི་མཛད་ཇུས་བཏོན་པ་དང་འབྲེལ་ལག་ལེན་བསྟར་བ་དང་འཕེལ་རྒྱས་ཀྱི་བྱེད་ཐབས་ལ་བརྟེན་ནས་དབུལ་པོའི་རྩ་བ་དྲུངས་ནས་འབྱིན་ཡོད། 《ཀྲུང་གོའི་དབུལ་པོ་ཉུང་གཏོང་རིག་པའི》ཇུས་འདོན་ཚོགས་པས་སྙན་ཞུ་ཕུལ་ནས་ཀྲུང་གོས་གསར་གཏོད་རང་བཞིན་གྱི་སྒོ་ནས“དབུལ་པོར་ཕན་པའི་ཁྲོམ་རའི”ལམ་སྲོལ་རྒྱ་སྐྱེད་བཏང་ཡོད་ཅེས་བཏོན་པ་རེད། གནད་སྨིན་གྱི་དབུལ་པོ་ཉུང་གཏོང་ཁྱབ་ཁོངས་སུ“འཇོན་ཐང་ལྡན་པའི་སྲིད་གཞུང”གི“མིག་གིས་མཐོང་བའི་ལག་པ”དེ་མེད་ཐབས་མེད་པའི“ནུས་སྦྱིན་ལག་པ”ཞིག་རེད། ཀྲུང་གོས་བཏོན་པའི“གནད་སྨིན་དྲུག”དང“ཁག་གཅིག་རེ་ལྔ”ཡིས་དབུལ་སྐྱོར་ཁྲོད་ཀྱི“སུར་རོགས་སྐྱོར་བྱེད་པ་དང་། སུས་རོགས་སྐྱོར་བྱེད་པ། གང་འདྲ་བྱས་ཏེ་རོགས་སྐྱོར་བྱེད་པ། ཇི་ལྟར་ཕྱིར་འཐེན་བྱེད་པ”སོགས་ཀྱི་གནད་དོན་བརྒྱུད་རིམ་ལྡན་པའི་སྒོ་ནས་ཐག་གཅོད་བྱས་ཡོད། ལོ་སིའི་འགོ་ཁྲིད་པ་པེན་དབྱང་གིས“གནད་སྨིན་དབུལ་སྐྱོར”གྱི་དཔེ་མཚོན་ཡིན་པའི་ཧུའུ་ནན་ཞིང་ཆེན་ཧྲི་པཱ་ཏུང་གྲོང་ཚོར་འཚམས་འདྲི་བྱེད་སྐབས་ཀྲུང་གོའི་དབུལ་པོ་ཉུང་གཏོང་གི་ཉམས་མྱོང་བཙལ་འཚོལ་བྱས་པ་རེད། མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཀུ་ཐེ་ལེ་སིས་གནད་སྨིན་དབུལ་སྐྱོར་གྱི་མཛད་ཇུས་ནི“མི་འབོར་དབུལ་ཤོས་ལ་རོགས་རམ་བྱས་ཏེ་2030ལོར་སླེབས་སྐབས་རྒྱུན་མཐུད་འཕེལ་རྒྱས་ཀྱི་གྲོས་རིམ་དམིགས་ཚད་མངོན་འགྱུར་བྱེད་པའི་ཐབས་ལམ་འབའ་ཞིག”དེ་རེད་ཅེས་ཚད་མཐོའི་གདེང་འཇོག་བྱས་པ་རེད།

འཕེལ་རྒྱས་མཉམ་སྤྱོད་ནི་ཀྲུང་གོའི་དབུལ་པོ་ཉུང་གཏོང་གི“གསང་ཨང”གི་རིན་ཐང་འདུ་ཤེས་ཤིག་རེད། མི་འབོར་དབུལ་པོས་འཕེལ་རྒྱས་ཀྱི་གྲུབ་འབྲས་མཉམ་སྤྱོད་ཐུབ་པ་བྱ་རྒྱུ་ནི་རྒྱལ་སྤྱིའི་སྤྱི་ཚོགས་ཀྱི་ཡོངས་ཁྱབ་གྲོས་དོན་ཞིག་ཡིན་པ་དང་མཐའ་དག་མི་དམངས་ཀྱི་ཆེད་དུ་དང་མཐའ་དག་མི་དམངས་ལ་བརྟེན་དགོས་ཞེས་པ་དེ་ནི་ཀྲུང་གོ་གུང་ཁྲན་ཏང་གིས་ལོ་བརྒྱ་ཡི་རིང་འབད་འཐབ་བྱས་པའི་རྒྱང་སྐྱོད་ལམ་བུའི་ཁྲོད་མི་དམངས་ཀྱི་སྣེ་ཁྲིད་དེ་འགག་སྒྲོལ་དཀའ་སེལ་དང་ཟམ་མི་ཆད་པར་མདུན་སྐྱོད་བྱེད་པའི་སྟོབས་ཤུགས་ཀྱི་འབྱུང་ཁུངས་རེད། ཏང་གི་ཚོགས་ཆེན་བཅུ་དགུ་པའི་སྙན་སྒྲོན་ནང“མི་འབོར་དབུལ་པོ་དང་ས་ཁུལ་དབུལ་པོ་རྣམས་རྒྱལ་ཡོངས་དང་མཉམ་དུ་ཕྱོགས་ཡོངས་ནས་འབྱོར་འབྲིང་སྤྱི་ཚོགས་སུ་སླེབས་པ་བྱ་རྒྱུ་ནི་རང་རེའི་ཏང་གི་རྔམ་བརྗིད་ལྡན་པའི་དམ་བཅའ་ཞིག་ཡིན”ཞེས་གསལ་པོར་བསྟན་ཡོད། ཕ་ཁི་སི་ཐན་གྱི་དྲང་བདེན་ལས་འགུལ་ཏང་གི་མཐོ་རིམ་འགོ་ཁྲིད་པ་ཁ་ཤིས་མུའུ·སུའུ་ལི་ཡིས་ཚོགས་པའི་སྣེ་ཁྲིད་དེ་ཅང་ཤིས་ཞིང་ཆེན་གྱི་དབུལ་སྐྱོར་ཉམས་མྱོང་ལ་རྟོག་ཞིབ་བྱས་རྗེས་ཀྲུང་གོའི་མཉམ་སྤྱོད་འདུ་ཤེས་དེ་འཛམ་གླིང་ཡོངས་ཀྱིས་དཔྱད་གཞིར་འཛིན་རིན་འདུག་ཅེས་མྱོང་ཚོར་ཆེན་པོས་བརྗོད།

ད་ཆའི་ཀྲུང་གོ་འདི་ཉིད་དབུལ་པོ་དབུལ་རྐྱང་བསལ་ནས་གྲོང་གསེབ་དར་རྒྱས་ཕྱོགས་སུ་འགྱུར་ལྡོག་འགྲོ་བཞིན་ཡོད། ཀྲུང་གོས་གོ་ལ་ཧྲིལ་པོར་དབུལ་པོ་ཉུང་གཏོང་གི་རིགས་པའི་གཞུང་ལུགས་དང་ལག་ལེན་མཉམ་སྤྱོད་བྱེད་འདོད་ཡོད་ལ་འཛམ་གླིང་རྒྱལ་ཁབ་ཁག་དང་མཉམ་དུ་གོ་ལ་ཧྲིལ་པོའི་དབུལ་པོ་བཅོས་སྐྱོང་གི་འགྲན་སློང་གསར་རྐྱང་བསུས་ཏེ་དབུལ་པོ་སེལ་བ་དང་ཐུན་མོང་ཐོག་འཕེལ་རྒྱས་ཡོང་བའི་མིའི་རིགས་ཀྱི་ལས་དབང་གཅིག་མཐུན་འདུས་གྲུབ་མཉམ་དུ་སྐྲུན་འདོད་ཡོད་པ་རེད།