ཉེ་ཆར། རང་སྐྱོང་ལྗོངས་སྲིད་གྲོས་ཀྱིས་ཏང་གི་ལོ་རྒྱུས་སློབ་སྦྱོང་སློབ་གསོའི་སྐུལ་འདེད་ཚོགས་འདུ་འཚོགས་ཤིང་། ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ལྗོངས་སྲིད་གྲོས་ཀྱི་ཏང་ཙུའི་ཧྲུའུ་ཅི་ཀྲོང་ཡན་ཚོགས་འདུར་ཕེབས་པ་དང་འབྲེལ་གསུང་བཤད་ཀྱང་གནང་ནས། ལྗོངས་ཡོངས་ཀྱི་སྲིད་གྲོས་ཁོངས་གཏོགས་ཀྱི་ཏང་གི་ལོ་རྒྱུས་སློབ་སྦྱོང་སློབ་གསོའི་ལས་དོན་ལ་སླར་ཡང་སྐུལ་སློང་དང་སླར་ཡང་བཀོད་སྒྲིག་གནང་བ་རེད།
ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་དྲུང་ཆེ་ལེ་ཀུའེ་ལུང་གིས་ཚོགས་འདུ་གཙོ་སྐྱོང་གནང་བ་དང་། ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་རྒྱ་མཚོ་ལྷ་མོ་ཚོགས་འདུར་ཕེབས་ཡོད་པ་རེད།
ཚོགས་འདུའི་ཐོག ཀྲོང་ཡན་གྱིས་རང་ཉིད་ཀྱི་འཚོ་བ་དང་ལས་ཀའི་མྱོང་བ་དང་དེ་བཞིན་བསམ་ཕྱོགས་དང་ཤེས་ཚོར་བཅས་དང་ཟུང་འབྲེལ་བྱས་ཐོག་ཏང་གི་སློབ་ཚན་ཁྲིད་པའི་རྣམ་པའི་ཐོག་ནས་སྲིད་གྲོས་ལས་ཁུངས་ཀྱི་ལས་བྱེད་པ་དང་ལས་བཟོ་ཡོངས་ལ་ཏང་གི་ལོ་རྒྱུས་སློབ་སྦྱོང་སློབ་གསོའི་དོན་སྙིང་གལ་ཆེན་དང་། དམིགས་ཚད་ལས་འགན། གཞི་རྩའི་བླང་བྱ་བཅས་འགྲེལ་བཤད་ཡག་པོ་བརྒྱབ་གནང་བ་དང་། སློབ་སྦྱོང་གི་གཙོ་གནད་དང་། ལས་ཀ་བྱེད་སྟངས། ལག་བསྟར་གོ་རིམ་བཅས་ཁ་གསལ་བཟོས་པ་དང་ཆབས་ཅིག ཚང་མར་ཏང་གི་ལོ་རྒྱུས་སློབ་སྦྱོང་སློབ་གསོའི་ལས་དོན་སྤེལ་བའི་ལོ་རྒྱུས་ཀྱི་གཏན་ཚིགས་དང་། གཞུང་ལུགས་ཀྱི་གཏན་ཚིགས། ལག་ལེན་གྱི་གཏན་ཚིགས་བཅས་ཁོང་དུ་གཏིང་ཟབ་ཆུད་པ་དང་། ཏང་གི་ལོ་རྒྱུས་སློབ་སྦྱོང་སློབ་གསོའི་ལས་དོན་སྤེལ་བའི་དོན་སྙིང་གལ་ཆེན་ལ་ངོས་འཛིན་གང་ལེགས་བྱས་ཏེ། ཏང་གི་ལོ་རྒྱུས་སློབ་སྦྱོང་སློབ་གསོའི་ལས་དོན་སྤེལ་བའི་བསམ་བློའི་རང་རྟོགས་དང་། ཆབ་སྲིད་ཀྱི་རང་རྟོགས། བྱ་སྤྱོད་ཀྱི་རང་རྟོགས་བཅས་ཆེ་རུ་ཏན་ཏིག་གཏོང་རྒྱུའི་ལྕག་སྐུལ་ཡང་གནང་བ་རེད།
ཀྲོང་ཡན་གྱིས་ནན་བཤད་གནང་དོན། ལྗོངས་ཡོངས་ཀྱི་རིམ་ཁག་སྲིད་གྲོས་ཏང་རྩ་འཛུགས་ཀྱིས་ལས་ཀའི་འགན་འཁྲི་ཆེ་རུ་བཏང་ནས་གོང་འོག་མིག་མངས་འགྲིག་སྐོར་གཅིག་དང་རྡོག་རྩ་གཅིག་སྒྲིལ་བྱས་ནས་ཏང་གི་ལོ་རྒྱུས་སློབ་སྦྱོང་སློབ་གསོའི་ལས་དོན་ལ་ཐུན་མོང་ཐོག་དམ་འཛིན་བྱེད་པའི་རྣམ་པ་ཡག་པོ་ཞིག་ཆགས་པར་བྱེད་དགོས། བྱེད་ཐབས་དང་གཞི་རྟེན་གསར་གཏོད་ཀྱིས་སྲིད་གྲོས་ཀྱི“རིམ་གཉིས”ཏང་ཙུའི་རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང་གིས་སློབ་སྦྱོང་ཐད་དཔེ་སྟོན་སྣེ་ཁྲིད་ནུས་པ་འདོན་སྤེལ་བྱས་ནས། གཞི་རིམ་དུ་སྒྲོག་འགྲེལ་བྱས་ཏེ་སེམས་ནུས་གཅིག་སྒྲིལ་ཡོང་བར་བྱེད་དགོས། ཏང་གི་ལོ་རྒྱུས་སློབ་སྦྱོང་སློབ་གསོའི་ལས་དོན་སྤེལ་རྒྱུ་དེ་སྲིད་གྲོས་ཀྱིས་འགན་འཁྲི་སྒྲུབ་པར་ཞབས་ཞུ་དང་མང་ཚོགས་ལ་བྱ་བ་དངོས་བསྒྲུབ་རྒྱུ་དང་ཟུང་འབྲེལ་དང་། སྐོར་གཟིགས་དག་ཐེར་ལ་སྐུལ་སྤེལ་གཏོང་རྒྱུ་དང་ཟུང་འབྲེལ། “ཆབ་སྲིད་ཀྱི་ཚད་གཞི་དེ་བས་མཐོ་བ་དང་། ཏང་གཤིས་ཀྱི་བླང་བྱ་དེ་བས་ནན་པ། རྩ་འཛུགས་ཀྱི་སྒྲིག་ཁྲིམས་དེ་བས་དམ་པ་བཅས”ཀྱི་ཆེད་དོན་སློབ་གསོ་དང་སྲིད་གྲོས་ཀྱི་དཔེ་བཟང་ལས་ཁུངས་འཛུགས་གཏོད་བྱ་རྒྱུ་དང་ཟུང་འབྲེལ་བཅས་བྱས་ནས། ཏང་གི་ལོ་རྒྱུས་སློབ་སྦྱོང་སློབ་གསོའི་ལས་དོན་སྤེལ་བར་གཞི་རྟེན་ཡོད་པ་དང་། དམ་འཛིན་བྱ་གཞི་ཡོད་པ། སྤུས་ཚད་ལེགས་པ། ཕན་འབྲས་ལྡན་པ་བཅས་ཡོང་བར་བྱེད་དགོས།