ངའི་མིང་ལ་དབང་ཙི་ཐུང་ཟེར། བོད་ལྗོངས་སློབ་ཆེན་རང་བྱུང་རིག་པ་སློབ་གླིང་གི་སློབ་ཆེན་ལོ་རིམ་གསུམ་པའི་སློབ་མ་ཞིག་ཡིན། དེ་རིང་འདི་གར་རང་ཉིད་ཀྱིས་གངས་ལྗོངས་ས་མཐོར་བཅངས་པའི་ལྷད་མེད་ཀྱི་དགའ་ཞེན་མཚོན་རྒྱུ་བྱུང་བ་དང་། བོད་ཀྱི་མི་དམངས་ལ་ལྷག་བསམ་རྣམ་དག་གི་སྨོན་འདུན་འབུལ་རྒྱུ་བྱུང་བར་གཟི་བརྗིད་ཆེན་པོ་ཡིན་སྙམ་གྱི་འདུག

འདི་ལོ་ནི་བོད་ལ་དམངས་གཙོའི་བཅོས་སྒྱུར་བྱས་ནས་ལོ་62འཁོར་བའི་ལོ་ཞིག་རེད་ལ། ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་100འཁོར་བའི་ལོ་ཞིག བོད་ཞི་བའི་བཅིངས་འགྲོལ་ཐོབ་ནས་ལོ་ངོ་70འཁོར་བའི་དགའ་སྟོན་གྱི་ལོ་ཞིག་བཅས་རེད། སློབ་གྲྭར་ཡོད་མུས་ཀྱི་སློབ་ཆེན་སློབ་མ་ཞིག་གི་ངོས་ནས་ངས་འདི་གར་དུས་དང་རྣམ་པ་ཀུན་ཏུ་དགའ་སྤྲོའི་གླུ་དབྱངས་ཐོས་ཀྱི་འདུག་ལ། བདེ་སྐྱིད་ལྡན་པའི་འཛུམ་མདངས་ཀྱང་མཐོང་གི་འདུག བོད་ཀྱི་དམངས་གཙོའི་བཅོས་སྒྱུར་གྱི་གྲོང་ཚོ་དང་པོ་ཁེ་གསུམ་གྲོང་ཚོར་པར་རིས་རེ་རེ་དང་འགྲེམས་རྫས་རེ་རེ་ལས་བོད་རྙིང་པའི་ཞིང་བྲན་གྱི་བསམ་ཚོད་ལས་འདས་པའི་དཀའ་སྡུག་ཐེར་འདོན་བྱས་པ་དང་། དེ་དག་ལས་ང་ཚོར་ཞིང་བྲན་གྱི་བློ་ཕམ་ཡིད་ཆད་དང་སྐྱོ་སྡུག་ཚད་མེད་མཚོན་བཞིན་ཡོད། ལྟ་སྐོར་བྱས་པ་བརྒྱུད་ད་ཆའི་བདེ་སྐྱིད་ལྡན་པའི་འཚོ་བ་ནི་ཧ་ཅང་ཐོབ་དཀའ་བ་ཞིག་ཡིན་པ་དངོས་སུ་ཚོར་བྱུང་། ད་ཆའི་ཁེ་གསུམ་གྲོང་ཚོའི་མི་རེའི་ཆ་སྙོམས་ལོའི་ཡོང་འབབ་སྒོར་ཁྲི་གཉིས་ལྷག་ཙམ་ཟིན་ནས་འཕར་ཚད་ལྡབ་བརྒྱ་ལྷག་ཙམ་ཟིན་ཡོད། དེ་ནི་ཀྲུང་གོ་གུང་ཁྲན་ཏང་གིས་ལོ་62གོང་དུ་རྙིང་རུལ་དང་གདུག་རྩུབ་ཀྱི་ཞིང་བྲན་ལམ་ལུགས་རྩ་མེད་བཏང་བ་ལས་བྱུང་བ་རེད། འོན་ཀྱང་དེ་ནི་བསྡུས་རིས་ཕྲན་བུ་ཙམ་ཞིག་ཡིན་པ་འདི་ལས་དུས་ཐུང་ལོ་62རིང་བོད་ཡོངས་སུ་འཕོ་འགྱུར་ཧ་ཅང་ཆེན་པོ་བྱུང་བ་མཚོན་གྱི་ཡོད། བོད་རྙིང་པའི་མི་རེའི་ཆ་སྙོམས་ཚེ་ཚད་ལོ་35.5ནས་ད་ཆའི་ལོ་71.1བར་རིང་དུ་ཕྱིན་པ་དང་། དབུལ་ཕོངས་གདུག་རྩུབ་ཆེ་བའི་ཁོར་ཡུག་ནས་ད་ཆའི་ཧྲེན་ལི་དུས་རབས་ཐང་ཆེན་དང་དབན་ཏ་སོགས་ཚོང་ར་གང་སར་ཁེངས་པའི་བར། གུ་དོག་པའི་ས་རྡོའི་ལམ་ནས་ད་ལོའི་ཟླ་7ཚེས་1ཉིན་ལྷ་སར་གཏོང་རྒྱུ་ཡིན་པའི་བསྐྱར་དར་རྟགས་ཅན་བར་ལ་སོགས་མི་དཀྱུས་མའི་བསམ་ཚོད་ལས་བྲལ་བའི་ངོ་མཚར་ཞིག་རེད། ངོ་མཚར་དེ་ལྟ་བུ་ས་གཞི་དེའི་སྟེང་མངོན་འགྱུར་བྱུང་བ་ནི་ཏང་ཀྲུང་དབྱང་གི་ཡང་དག་པའི་འགོ་ཁྲིད་དང་ནང་སའི་སྤུན་ཟླའི་ཞིང་ཆེན་དང་གྲོང་ཁྱེར་གྱིས་སྔར་རྒྱུན་བཞིན་རྒྱབ་སྐྱོར་ཤུགས་ཆེན་དང་སྒེར་སེམས་མེད་པའི་རོགས་སྐྱོར་བྱས་པ་དང་ཁ་འབྲལ་ཐབས་མེད། 

“མི་རིགས་ཁག་གི་ཞི་མཐུན་མཉམ་གནས་མེད་ཚེ་སྤྱི་ཚོགས་བརྟན་ལྷིང་དང་མཐུན་སྒྲིལ་མེད་པ་དང་། མི་རིགས་ཁག་གི་ཕྱར་བ་གྲུ་འདེགས་མེད་ཚེ་ཀྲུང་ཧྭ་མི་རིགས་ཀྱི་དར་རྒྱས་སྟོབས་འབྱོར་ཡོང་མི་སྲིད” མི་རིགས་མཐུན་སྒྲིལ་གྱི་རླབས་ཆེའི་ཟིལ་ཤུགས་ལས་སེམས་ཤུགས་ལྡན་པའི་ནང་སའི་གཞོན་ནུ་ཁག་དང་ཁག་བྱས་ནས་བོད་ཀྱི་འཛུགས་སྐྲུན་ནང་ཞུགས་ཡོད་པ་རེད། དགེ་འོས་སློབ་མ་ཞིག་ཡིན་པའི་ངས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་རང་རེའི་སློབ་གྲྭའི་གསོ་རིག་སློབ་གླིང་གི་སློབ་མར་སྤྲིངས་གནང་བའི་འཕྲིན་ལན་ཁྲོད་ཀྱི་མངགས་བཅོལ་ཟབ་མོ་སྟེ“མི་དམངས་ལ་དགོས་མཁོ་ཆེ་ཤོས་ཀྱི་སར་ཕྱིན་ཏེ་ལྷག་བསམ་དང་ལག་རྩལ་ལ་བརྟེན་ནས་མི་དམངས་དང་ལྷག་པར་དུ་གཞི་རིམ་མང་ཚོགས་ལ་ཕན་བདེ་སྐྲུན་དགོས”ཞེས་པ་ཐོག་མཐའ་བར་གསུམ་དུ་བརྟན་པོར་ངེས་ཡོད་ལ། རང་ཉིད་ཀྱིས་ཀྱང་ས་ཆ་འདིར་གཞི་ཚུགས་ཏེ་སེམས་ནུས་ཡོད་རྒུས་རང་ཉིད་ཀྱི་ལང་ཚོ་ཕུགས་རེ་ཆེན་པོ་ཡོད་པའི་ས་མཐོ་འདིར་སྐྱེས་སུ་འབུལ་རྒྱུ་ཡིན།

ས་མཐོར་མ་གཞི་གསོ་རླུང་དཀོན་མོད། འོན་ཀྱང་ཡངས་ཤིང་རྒྱ་ཆེ་བའི་ས་མཐོར་ལང་ཚོའི་གཟི་བྱིན་སྐྱེས་སུ་འབུལ་མཁན་སེམས་ཤུགས་ལྡན་པའི་སྐྱེ་བོ་གྲངས་ལས་འདས་པ་ཡོད། དུས་རབས་གསར་པའི་གཞོན་ནུ་ཡིན་པའི་ང་ཚོས“བློས་འཁེལ་བ་དང་། སྤྱོད་གོ་ཆོད་པ། གནས་ཐུབ་པ”བཅས་ཀྱི་བྱང་ཚད་མཐོ་བའི་མཁོ་ཆོད་པའི་ཤེས་ལྡན་པ་ཞིག་ཧུར་ཐག་བྱེད་དགོས། ང་ཚོས་དུས་དང་རྣམ་པ་ཀུན་ཏུ་མཐུན་སྒྲིལ་དང་། འབྱོར་ཕྱུག ཤེས་དཔལ། ཞི་མཐུན། མཛེས་སྡུག་བཅས་ལྡན་པའི་སྤྱི་ཚོགས་རིང་ལུགས་དེང་རབས་ཅན་གྱི་བོད་གསར་འཛུགས་སྐྲུན་བྱ་རྒྱུ་དེ་འབད་འཐབ་དམིགས་ཚད་ལ་བཟུང་ནས་སེམས་ཤུགས་ལྡབ་བརྒྱ་འཕེལ་བཞིན་ས་མཐོར་གཞི་ཚུགས་ཏེ་དོ་དོ་ནན་ནན་ངང་རང་ཉིད་ཀྱི་མི་ཚེའི་ཕུགས་འདུན་དོན་གཉེར་བྱེད་དགོས།