འདི་ནི་སྒེར་རྩེ་རྫོང་གི“ཕུགས་འདུན་ཁང་གསར”བཀོད་སྒྲིག་ས་ཚིགས་ཀྱི་རྣམ་པ་ཡིན་པ།

འདི་ནི“ཕུགས་འདུན་ཁང་གསར”གྱི་བུད་མེད་ཚོས་ཀམ་པཱ་ལི་འཐག་སྟངས་སྦྱོང་བཞིན་པ།

གསར་འགོད་པ་སྒེར་རྩེ་རྫོང་གི་ཡུལ་གཞན་དུ་གནས་སྤོས་དབུལ་སྐྱོར་བཀོད་སྒྲིག་ས་ཚིགས“ཕུགས་འདུན་ཁང་གསར”དུ་སླེབས་སྐབས་གྲལ་སྟར་འགྲིག་པའི་ཐོག་ཁང་གསར་པ་གནམ་སྔོན་སྤྲིན་དཀར་འོག་ཏུ་དེ་བས་མཛེས་སྡུག་ལྡན་པ་ཞིག་ཏུ་སྣང་།

དེ་གར་གནས་སྤོས་དུད་ཚང་44ཡི་མི་199བཀོད་སྒྲིག་བྱས་ཡོད།　དེ་གར་སྡོད་པའི་གྲོང་མིས་ཡུལ་གཞན་དུ་གནས་སྤོས་དབུལ་སྐྱོར་ལ་བརྟེན་ནས་ལས་དབང་ལ་འགྱུར་ལྡོག་བཏང་བས་མང་ཚོགས“གནས་སྤོ་ཐུབ་པ་དང་།　གཞིས་ཆགས་ཐུབ་པ།　ལས་ཞུགས་ཐུབ་པ།　ཕྱུག་པོ་ཆགས་ཐུབ་པ”བཅས་ཀྱི་དམིགས་ཚད་དངོས་འབྲེལ་མངོན་འགྱུར་ཐུབ་ཡོད།

རྡོ་ཆུང་ནི་2016ལོར་བྲག་པོ་ཤང་བྲག་པོ་གྲོང་ཚོའི་ས་རྡོའི་ཁང་པ་ཞིག་ནས་སྒེར་རྩེ་རྫོང་གྲོང་གི“ཕུགས་འདུན་ཁང་གསར”གྱི་རྒྱ་ཆེ་ཞིང་དཀར་ཆ་དོད་པའི་སྡོད་ཁང་གསར་པར་སྤོས་པ་ཞིག་རེད།　དེ་སྔོན་འབྲོག་ཁུལ་དུ་རྩྭ་ཆུ་གང་བཟང་དུ་སྐྱས་སྤོས་ནས་འཚོ་བ་སྐྱེལ་བ་དང་གནམ་ཆུ་སྒུག་ནས་ཕྱུགས་འཚོ་བས་ཁྱིམ་ཚང་གི་ལོའི་ཡོང་འབབ་སྒོར་2000ཡང་ཟིན་གྱི་མེད།　ད་ཆ་རྡོ་ཆུང་བཟའ་ཚོ་གཉིས་པོར་ལས་ཀ་བརྟན་པོ་ཞིག་རག་པ་མ་ཟད།　ཁྱིམ་ཚང་གི་ཡོང་འབབ་སྒོར་ཁྲི་ཁ་ཤས་བར་མཐོ་རུ་ཕྱིན་པ་དང་།　བུ་ཕྲུག་གསུམ་པོ་རང་ཉིད་འགྲོ་བསམ་པའི་སློབ་ཆེན་དུ་རྒྱུགས་འཕྲོད་དེ་ཁྱིམ་ཚང་འཚོ་བ་ཏང་གི་འགོ་ཁྲིད་འོག་དེ་བས་བདེ་སྐྱིད་ལྡན་པར་གྱུར་ཡོད་པ་རེད།

“ཏང་གི་སྲིད་ཇུས་བཟང་པོ་ལས་ང་ཚོར་སྡོད་ཁང་གསར་པ་བགོས་པ་མ་ཟད།　ད་དུང་ཐོན་ལས་ཀྱང་གསར་གཏོད་བྱས་ཏེ་ང་ཚོ་ཐག་རིང་དུ་གླ་པར་སྐྱོད་མི་དགོས་པར་ཁྱིམ་གྱི་སྒོ་རྩར་ལས་ཞུགས་ཐུབ་ནས་ལྟོ་གོས་ཐད་སེམས་ཁྲལ་བྱེད་དགོས་མེད”ཅེས་རྡོ་ཆུང་གིས་བློ་ཡིད་ཚིམ་པོའི་ངང་བཤད།

ཉེ་བའི་ལོ་ཤས་རིང“ཕུགས་འདུན་ཁང་གསར”གྲོང་ཚོ་ཨུ་ཡོན་ལྷན་ཁང་གིས་ཡུལ་བབ་དང་བསྟུན་པ་དང་དུད་ཚང་ལ་གཞིགས་ནས་ཇུས་བསྟར་གྱིས་ཐོན་ལས་ཆུང་གྲས་3དང་།　ལེ་ལག་ཚང་བའི་ཐོན་ལས་2　འབྲི་གཡག་གསོ་ཚགས་རྟེན་གཞི་1སོགས་གྲོང་ཚོ་ཨུ་ལྷན་ལ་འཚམ་པའི་རང་བརྟེན་གྱི་ཐོན་ལས་འཕེལ་རྒྱས་གཏོང་སྟངས་འཕེལ་རྒྱས་བཏང་ནས་གནས་སྤོས་དུད་ཚང་ལ“ལས་ཀ་བྱ་རྒྱུ་ཡོད་པའི”འགན་ལེན་བྱས་ནས་ཁོང་ཚོའི་ཡོང་འབབ་འཕར་ཐུབ་པ་བྱས་ཡོད།　མིག་སྔའི་བར་གྲོང་མི་30ལྷག་ཙམ་ལས་ཞུགས་བརྟན་པོ་བྱུང་ནས་མི་རེར་ཆ་སྙོམས་འབབ་འཕར་སྒོར་ཁྲི་1ལྷག་ཙམ་བྱུང་ཡོད་པ་རེད།

རྡོ་ཆུང་དང་འདྲ་བར“ཕུགས་འདུན་ཁང་གསར”ནང་སྡོད་མཁན་གྱི་གྲོང་མི་རྣམས་སྡོད་ཁང་གསར་པར་སྤོས་ནས་བདེ་སྡོད་ཀྱི་ཕུགས་འདུན་གྲུབ་པ་ཙམ་མ་ཟད།　ད་དུང་ཁྱིམ་གྱི་སྒོ་འགྲམ་དུ་ཡོང་འབབ་གསོག་པའི་ལས་ཀ་ཞིག་རག་པས་དགའ་ཚོར་ཆེན་པོ་བྱུང་ཡོད།

“ཕུགས་འདུན་ཁང་གསར”གྲོང་མི་ཨུ་ལྷན་གྱིས་བརྟག་དཔྱད་བྱས་རྗེས་བུད་མེད་འགའ་ཤས་ཁྱིམ་དུ་ཕྲུ་གུར་ལྟ་སྐྱོང་བྱེད་དགོས་པས་ཡོང་འབབ་ཡོང་ཁུངས་མེད་པ་ཤེས་རྟོགས་བྱུང་བ་རེད།　གྲོང་མི་ཨུ་ལྷན་གྱི་ཧྲུའུ་ཅི་དང་པོ་དང་གྲོང་གསེབ་དར་རྒྱས་ཀྱི་ཆེད་བསྐོས་ལས་བྱེད་པས་གྲོས་བསྡུར་བྱས་རྗེས་དྲ་ཐོག་གི་སློབ་ཁྲིད་བརྙན་ལམ་བརྒྱུད་འཁེལ་འཐག་གི་ལག་རྩལ་སྦྱངས་པ་མ་ཟད།　བུད་མེད་ཚོར་ཀམ་པ་ལི་དང་འབོལ་ཁྲིའི་ཁ་གདན་འཐག་སྟངས་སྟབས་བདེ་ཞིག་བསླབས་པ་རེད།　མིག་སྔར“ཕུགས་འདུན་ཁང་གསར”གྱི་བུད་མེད་བཅུ་ལྷག་ཙམ་གྱིས་ཀམ་པཱ་ལི་འཐག་སྟངས་སོགས་ཤེས་པ་དང་ཁོང་ཚོས་བཏགས་པའི་ཀམ་པཱ་ལི་སོགས་གྲོང་མི་ཨུ་ལྷན་གྱིས་བཙུགས་པའི་མཉམ་ལས་ཁང་གི་ཚོང་ཁང་ངམ་ཡང་ན་གྲོང་མི་ཨུ་ལྷན་གྱི་ལས་དོན་པས་ཁེར་ཚོང་རྒྱག་པ་སོགས་ཀྱི་བྱེད་སྟངས་ལ་བརྟེན་ནས་ཕྱིར་ཚོང་བྱས་ཏེ་ངལ་རྩོལ་ནུས་ཤུགས་ལྡན་པའི་གནས་སྤོས་དུད་ཚང་ཁྱིམ་གྱི་སྒོ་འགྲམ་དུ་འབབ་འཕར་ཕྱུག་འགྱུར་ཧུར་ཐག་ཐུབ་པ་བྱས་ཡོད།

“ཡུལ་གཞན་དུ་གནས་སྤོས་དབུལ་སྐྱོར་ནི་གནས་སྤོས་པ་ཙམ་གྱིས་འགྲིག་པ་ཞིག་མིན་པར།　རིམ་བཞིན་ཕྱུག་པོ་ཆགས་ཐུབ་པ་ནི་གནས་སྤོ་ཐུབ་པའི་སྒུལ་ཤུགས་ཡིན་ལ་གཞིས་ཆགས་ཐུབ་པའི་བརྟེན་ས་ཡང་ཡིན”“ཕུགས་འདུན་ཁང་གསར”གྲོང་མི་ཨུ་ལྷན་གྱི་ཧྲུའུ་ཅི་དང་པོ་བདེ་སྐྱིད་མཁའ་འགྲོས་གསར་འགོད་པར་བཤད།

ད་ཆ་སྒེར་རྩེ་རྫོང་གིས་ཏང་གི་དབུལ་སྒྲོལ་འགག་སྒྲོལ་གྱི་སྲིད་ཇུས་བཟང་པོ་ལག་བསྟར་དོན་འཁྱོལ་བྱུང་བར་བརྟེན་ནས་མཛེས་སྡུག་ལྡན་པའི་འཚོ་བའི་དམིགས་ཚད་ལ་དམིགས་ཏེ་དངོས་འཛིན་དངོས་སྒྲུབ་ཀྱིས་དུས་རབས་གསར་པའི་མཛེས་སྡུག་ལྡན་པའི་འཚོ་བར་བཅངས་པའི་མང་ཚོགས་ཀྱི་རེ་སྨོན་ལ་གཞིཌ་ནས་མང་ཚོགས་ཀྱི་བདེ་སྡོད་ལས་བརྩོན་གྱི་བདེ་སྐྱིད་ལྡན་པའི་ཕུགས་འདུན་བསྒྲུབས་ཡོད།