ད་ལོ་ལོ་25ལ་སླེབས་པའི་གདུགས་དཀར་སྐྱིད་ཀྱིས་སུར་པན་དམར་པོ་སླ་ངའི་ནང་བརྔོས་ནས་སྐར་མ་བཅུ་ཙམ་སོང་རྗེས།　སྣུམ་སྲེག་སུར་པན་དམར་པོ་རྡོ་གཞོང་ནང་བླུགས་ནས་ཚྭ་རྒྱབ་སྟེ་ཞིབ་པར་བརྡུངས།

སུར་པན་དམར་འདུར་དེ་དག་མི་རིང་བར་ཉེ་འཁོར་གྱི་ཞིང་ཆེན་ལ་བཙོང་རྒྱུ་ཡིན་པ་རེད།　ལོ་དུ་མའི་གོང་གདུགས་དཀར་སྐྱིད་དང་ཡུལ་མི་ཚོས་སུར་པན་ལ་བརྟེན་ནས་དབུལ་སྒྲོལ་ཕྱུག་འགྱུར་ཐུབ་པ་ཡིད་ལའང་འཁོར་མྱོང་མེད།

གདུགས་དཀར་སྐྱིད་ཀྱི་ཁྱིམ་ནི་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོང་ཀྲོའུ་བསང་ཆུ་རྫོང་དུ་ཡོད་ཅིང་།　ནང་མི་མང་བར་བརྟེན་མི་རེའི་ཆ་སྙོམས་རྩྭ་སའི་རྒྱ་ཁྱོན་ཆུང་ལ་ཡོང་ཁུངས་ཀྱང་དཀོན་པས་གདུགས་དཀར་སྐྱིད་ཀྱི་ཁྱིམ་ཚང་སྐབས་ཤིག་རིང་དཀའ་ངལ་གྱི་གནས་སུ་གྱར།

2016ལོར་གཅོད་པ་སློབ་ཆེན་ཐོན་པ་དང་གཞུང་ལས་པར་རྒྱུགས་མ་བཏང་ཞིང་ཕྱིར་ལས་ཀ་འཚོལ་བར་མ་ཕྱིན་པར་ཕ་ཡུལ་དུ་ལོག་ནས་ལས་གཏོད་བྱས།　སྤྱིར་བཏང་གི་སུར་པན་དེ་ལས་གཅོད་པར་ཚོང་རྒྱག་པའི་གོ་སྐབས་རྙེད།

ཉེ་བའི་ལོ་ཤས་རིང་།　ཡུལ་དེ་གའི་དཔལ་འབྱོར་གོང་འཕེལ་ཕྱིན་པ་དང་བསྟུན་ནས་གྲོང་ཁྱེར་དང་གྲོང་རྡལ་ཅན་འགྱུར་ཚད་ཟམ་མི་ཆད་པར་ཆེ་རུ་སོང་བ་དང་།　གྲོང་ཁྱེར་དུ་ཡོང་ནས་གཞིས་ཆགས་མཁན་ཁྱིམ་ཚང་མི་ཉུང་བས་ཀྱང་ད་ཆ་སུར་པན་བཟོ་ཡི་མེད།　ཡིན་ནའང་མི་རྣམས་ཀྱིས་བྱིས་པའི་དུས་རྒྱུས་མངའ་ཡོད་པའི་བྲོ་བ་དེ་བརྗེད་ཐབས་བྲལ།　གཅོད་པའང་དེ་འདྲ་ཡིན།

སྲོལ་རྒྱུན་གྱི་བྲོ་བ་དེ་མི་རྣམས་ཀྱི་ཞིམ་མངར་ཟས་ཀྱི་ལོངས་སྤྱོད་ཁྲོད་མི་ཉར་བ་གང་ཡིན་ནམ།　དེ་ལྟར་བསམ་བཞིན་གཅོད་པས་གྲོགས་པོ་ཁ་ཤས་དང་གྲོས་བསྡུར་བྱས་ཏེ་མཉམ་དུ་སུར་པན་ཐོན་རྫས་ཀྱི་བཟོ་གྲྭ་ཞིག་བཙུགས་པ་རེད།

འོན་ཀྱང་ཐོག་མའི་དུས་སུ་གཞོན་ནུ་ཚོར་ལས་གཏོད་ཀྱི་དཀའ་ངལ་འཕྲད་ཅིང་།　“ཚོང་ཁང་མང་པོར་སོང་ཡང་ང་ཚོའི་སུར་པན་ཐོན་རྫས་འཚོང་རོགས་བྱེད་མཁན་མི་འདུག”མཐར་ཡིད་མུག་པའི་གཅོད་པས་སུར་པན་དག་རིན་མི་དགོས་པར་ཚོང་ཁང་དག་ལ་བྲོ་བ་བལྟ་རྒྱུར་སྤྲད།

ཁྲོམ་རའི་ཚོང་ལམ་བཏོད་མ་ཐུབ་པ་དང་ཁེ་ལས་ཀྱི་འཚོ་གནས་ལ་དཀའ་ངལ་འཕྲད་པས་མཉམ་དུ་ལས་གཏོད་བྱེད་མཁན་གྲོགས་པོ་4པོ་ཡང་སྔ་ཕྱིར་ཕྱིར་འཐེན་བྱས།　གཅོད་པ་མཛོད་ཁང་དུ་བརྩིགས་པའི་སུར་པན་ཐོན་རྫས་ལ་ལྟ་བཞིན་སེམས་ཁྲལ་གྱིས་མནར།

ཡུལ་དེ་གའི་སྲིད་གཞུང་གིས་གཅོད་པའི་ལས་གཏོད་ཀྱི་དཀའ་ངལ་རྟོགས་རྗེས་རྟོག་ཞིབ་བྱས་ནས་གཅོད་པའི་ཁེ་ལས་གྲོང་རྡལ་གྱི་དབུལ་སྐྱོར་འཁོར་ཁང་གྲས་སུ་འཇོག་རྒྱུའི་ཐག་བཅད་དེ་མ་དངུལ་སྒོར་ཁྲི་20བཏང་བ་རེད།

དེ་དང་ཆབས་ཅིག　ཡུལ་དེ་གས་གཅོད་པ་སོགས་ན་གཞོན་ལས་གཏོད་པ་ཡུལ་གཞན་དུ་སོང་ནས་ཐོན་རྫས་འགྲེམ་འཚོང་གི་དངོས་མང་སྟོན་ཚོགས་སོགས་ཀྱི་བྱེད་སྒོའི་ནང་ཞུགས་རྒྱུར་མུ་མཐུད་ལྕག་སྐུལ་བྱས་པས་སུར་པན་གྱི་ཐོན་རྫས་དེར་ཚོང་ལམ་གཏོད་ཐུབ་པ་རེད།　གཅོད་པ་ཡང་སྔ་རྗེས་སུ་ཀན་ལྷོ་ཀྲོའུ་རུ་གཉེར་བའི་དཔལ་འབྱོར་འཕེལ་རྒྱས་གླེང་སྟེགས་སོགས་བྱེད་སྒོ་རབ་དང་རིམ་པར་ཞུགས།　ཚོགས་འདུའི་ཐོག་ཏུ་ན་གཞོན་འཐུས་མི་ཡིན་པའི་ཁོང་གིས་གཏམ་བཤད་ཀྱང་སྤེལ་བ་རེད།

ས་གནས་སྲིད་གཞུང་དང་གཅོད་པ་སོགས་ཀྱི་འབད་བརྩོན་ལྷོད་མེད་ལ་བརྟེན་ནས་སུར་པན་དམར་འདུར་ཤེལ་དམ་ཆུང་ཆུང་དེ་ཚང་མའི་ཆ་ཡོད་རྒྱུས་ཡོད་དུ་གྱུར་པ་དང་།　གཅོད་པའི་མངགས་ཐོ་ཡང་རྒྱུན་ཆད་མེད་པར་མང་དུ་སོང་ཡོད།

2019ལོར་གདུགས་དཀར་སྐྱིད་གཅོད་པའི་སུར་པན་བཟོ་གྲྭའི་ནང་བསྡུས་པ་དང་།　ཁོང་གིས་ཐོན་སྐྱེད་འཁོར་ཁང་གི་ཚོང་རྟགས་སྦྱོར་བྱེད་འཕྲུལ་འཁོར་གྱི་འགན་འཁུར་གྱི་ཡོད་ཅིང་།　ཟླ་རེའི་ཡོང་འབབ་མཐོ་ཤོས་སྐབས་སུ་སྒོར་3000ཡན་རག་གི་ཡོད།

གདུགས་དཀར་སྐྱིད་དང་ཁྱོ་གས་གླ་པ་རྒྱུག་ཞོར་དུ་ཕྱུགས་འཚོ་བ་དང་ཞིང་ཁ་བཏབ་པས་ཁྱིམ་ཚང་གི་ཡོང་འབབ་ཀྱང་ལམ་སེང་མང་དུ་སོང་ཡོད།　སྲིད་གཞུང་གི་སྲིད་ཇུས་རོགས་སྐྱོར་གཞན་དག་ཀྱང་ཡོད་པས་གདུགས་དཀར་སྐྱིད་ཀྱི་ཁྱིམ་དབུལ་པོ་ལས་བསྒྲལ་ནས་འཚོ་བ་སྔར་བས་ཡག་ཏུ་ཕྱིན།

མིག་སྔར་ཨ་མཆོག་གྲོང་རྡལ་དུ་དབུལ་སྐྱོར་འཁོར་ཁང་མང་པོ་གཉེར་བའི་ཁྲོད་བོད་བཟོའི་ཁྱིམ་ཆས་བཟོ་མཁན་དང་།　ནས་འཐག་ས།　མར་དང་རྩམ་པ་འཚོང་ས་ཡོད་པ་མ་ཟད།　སྐེ་དཀྲིས་དང་སྦྲ་གུར་བཟོ་སའང་ཡོད་པ་རེད།

ཡུལ་དེ་གའི་ལས་བྱེད་པས་ངོ་སྤྲོད་བྱས་པ་ལྟར་ན།　དབུལ་སྒྲོལ་འགག་སྒྲོལ་ལ་བརྟེན་ནས་ས་གནས་དེ་གའི་རྨང་གཞིའི་སྒྲིག་བཀོད་དང་དཔལ་འབྱོར་འཕེལ་རྒྱས་ལ་གནམ་ས་བླ་འོག་ཏུ་འགྱུར་བ་ལྟ་བུའི་འཕོ་འགྱུར་བྱུང་ཡོད།　ཉེ་བའི་ལོ་ཤས་རིང་།　གཅོད་པ་དང་འདྲ་བའི་གཞོན་ནུ་ཤེས་ཡོན་ཅན་མང་པོས་ཕ་ཡུལ་དུ་ལོག་ནས་ལས་གཏོད་བྱེད་ཀྱི་ཡོད་པ་དང་།　ཁོ་ཚོས་སྲོལ་རྒྱུན་གྱི་བྱ་དངོས་ཁག་གཅིག་ཚོང་གི་གོ་སྐབས་སུ་བསྒྱུར་ནས་ཁྱིམ་ཚང་དབུལ་པོ་འབོར་ཆེན་ལ་དབུལ་སྒྲོལ་འབབ་འཕར་ཡོང་བ་བྱས་པ་རེད།

བྲིན་ཁ་རྒྱུག་པའི་སུར་པན་དེས་མི་རྣམས་ཀྱི་འཚོ་བ་ཇེ་ལེགས་ནས་ཇེ་ལེགས་སུ་སོང་ཡོད།