ཞོགས་པའི་ཉི་གཞོན་ས་གཞིར་འཕྲོས། སྐྱེ་དངོས་ཐམས་ཅད་དཔལ་དང་ལྡན། ཚེས་16ཉིན་གྱི་ཐོ་རེངས་སུ། བོད་ལྗོངས་ལྷོ་ཁ་གྲོང་ཁྱེར་སྣེ་གདོང་ཆུས་ཁེ་གསུམ་སྡེ་ཁུལ་གྱི་ཞིང་ནང་དུ་མི་ཚོགས་ཀྱིས་ཁེངས་ཤིང་། ཁེ་གསུམ་སྡེ་ཁུལ་གྱི་གྲོང་མི་200ལྷག་གིས་ལུས་ལ་གཟབ་མཆོར་ལེགས་པར་སྤྲས་ནས་རྒན་སྐྱོར་གཞོན་ཁྲིད་ཀྱིས་སྔ་རྗེས་སུ་ཞིང་ནང་དུ་ཡོང་སྟེ་ལོ་གཅིག་དུས་གཅིག་གི་རྨོན་གཉའ་གཅོག་པའི་མཛད་སྒོར་ཞུགས།

འབྲེལ་ཡོད་ཀྱི་དཔྱད་གཞིར་གཞིགས་ན། རྨོན་གཉའ་གཅོག་སྲོལ་ལ་ལོ་ངོ་1600ཙམ་གྱི་ལོ་རྒྱུས་ལྡན། རྨོན་གཉའ་གཅོག་པའི་ཉིན་མོར། ས་རྒྱུ་མཐུག་ཅིང་ནག་པའི་ཞིང་ནང་དུ་མི་ཚོས་ལོ་ལེགས་དང་དཀར་ཆུ་མཚོན་པའི“གྲོ་སོ་ཕྱེ་མར”སྒྲིག་གཤོམ་བྱས་པ་དང་། དར་ཚོན་སྣ་ལྔའི་རླུང་རྟ་བསྒྲོགས་ནས་ས་རྒྱུ་གཤིན་པོར་མཛེས་རྒྱན་སྤྲས། ལོ་73ལ་སླེབས་པའི་རྒད་པོ་རྡོ་རྗེས་མགོ་བོར་ཚེ་རིང་སྐྱིན་ཁེབས་ཤིག་གྱོན་པ་དང་། ལུས་ལ་གཟབ་མཆོར་རྒྱས་པར་སྤྲས་ཏེ་གྲུང་ཤ་དོད་པའི་ངང་ཡུལ་མི་ཚོ་དང་མཉམ་དུ་ཆང་བཀྱགས་རེས་བྱས་ནས་ཆར་ཆུ་དུས་ལ་འབབ་པ་དང་ལོ་ཕྱུགས་རྟག་ཏུ་ལེགས་པའི་སྨོན་ལམ་བཏབ།

“ང་ཚོ་ནང་མི་ཚང་མ་རྨོན་གཉའ་གཅོག་པའི་མཛད་སྒོར་ཞུགས་པ་ཡིན། མག་པས་ཐོ་ཕྲུག་གཏོང་གི་ཡོད”ཅེས་རྡོ་རྗེས་བཤད་པ་དང་། ཁོང་གིས་བོད་ཀྱི་ཞིང་པས་དཔྱིད་རྨོད་ནི་ལོ་གཅིག་རིང་ཞིང་ལས་ཀྱི་བྱེད་སྒོ་གྲ་རྒྱས་ཤོས་སུ་བརྩི་གི་ཡོད་པས་མང་ཚོགས་ཚོས་རྨོན་གཉའ་གཅོག་པའི་མཛད་སྒོ་གཟབ་རྒྱས་གཉེར་ནས་ལོ་ལེགས་ཡོང་བའི་སྨོན་འདུན་ཞུ་ཡི་ཡོད་ཅེས་བཤད།

“སྔོན་ཆད་ཞིང་པ་ཚོས་རྨོན་མཛོར་བརྟེན་ནས་ས་ཞིང་རྨོ་གི་ཡོད། ད་ཆ་འཕྲུལ་ཆས་ཅན་དུ་གྱུར་པས་རྨོན་མཛོར་བརྟེན་དགོས་ཀྱི་མེད་ཀྱང་སྲོལ་རྒྱུན་གྱི་ཞིང་འདེབས་ཚུལ་དྲན་གསོ་བྱ་ཆེད་ང་ཚོས་ལྕགས་གླང་བེད་སྤྱོད་བྱེད་ཀྱི་ཡོད”ཅེས་ཁེ་གསུམ་སྡེ་ཁུལ་ཏང་ཨུད་ཀྱི་ཧྲུའུ་ཅི་རྐང་བཙུགས་ཀྱིས་བཤད།

ཆུ་ཚོད་10དང་སྐར་མ་30ཙམ་ལ། རྐང་བཙུགས་ཀྱིས་ས་སྟེང་ནས་རྡོ་གཅིག་བསྒྲུགས་ཏེ་དྲོད་ཅུང་ཟད་ཡོད་པ་ཤེས་འཕྲལ་ལམ་སེང་ལག་པ་གཡུག་ཙམ་བྱས་ནས་ཚང་མར“ད་འགོ་བཙུགས་ན་འགྲིག་གི་འདུག”ཅེས་སྐད་ཤུགས་ཆེན་པོས་བཤད།

ཞིང་འཕྲུལ་16གིས་དུས་གཅིག་ལ་གློག་སྤར་བའི་སྒྲ་འུར་འུར་དུ་གྲགས་པ་དང་ཆབས་ཅིག རིམ་པ་བཞིན་ཁོད་སྙོམས་པའི་ཞིང་ཐང་དུ་བསྐྱོད་དེ་རོལ་བ་རིང་པོ་ཞིག་འཐེན། དེའི་ཚེ་མང་ཚོགས་མི་ཉུང་བས་ལག་ཐོགས་ཁ་པར་བཏོན་ཏེ་ཐོ་ཕྲུག་གིས་ཞིང་རྨོ་བའི་རྣམ་པ་པར་ལེན་བྱེད་པ་དང་། སྐབས་རེ་མི་གཉིས་གསུམ་ཙམ་གྱིས་མཉམ་པར་ལེན་པ་སོགས་རྣམ་པ་ཧ་ཅང་འཁྲུག་ཆ་དོད། ད་དུང་བུད་མེད་འགས་སྒོར་གཞས་འཁྲབ་ནས་ངོ་གདོང་ལས་དགའ་བའི་འཛུམ་མདངས་འཕྱུར།

“ཞིང་ལས་འཕྲུལ་ཆས་ཅན་དུ་ཁྱབ་གདལ་བཏང་བ་དེས་དུས་རྒྱུན་སྤྱོད་པའི་ཐོང་གཤོལ་ཡང་རྨོན་གཉའ་གཅོག་པའི་མཛད་སྒོའི་ཉིན་མོར་མ་གཏོགས་སྤྱོད་ཀྱི་མེད”ཅེས་རྐང་བཙུགས་ཀྱིས་གསར་འགོད་པར་བཤད།

ཤེས་རྟོགས་བྱུང་བར་གཞིགས་ན། ན་ནིང་ཁེ་གསུམ་སྡེ་ཁུལ་གྱིས་བོད་རང་སྐྱོང་ལྗོངས་མཁོ་ཚོང་མཉམ་ལས་ཁང་གི་རོགས་རམ་ལ་བརྟེན་ནས་ས་ཞིང་མུའུ་83.5ཞིང་ལས་ཀུང་སི་ཞིག་ལ་བརྒྱུད་བཤུག་བཏང་ནས་སྔོ་ཚལ་སོགས་འདེབས་ཀྱི་ཡོད།

“ལོ་ལྔ་ཚན་བཅུ་གསུམ་པའི”རིང་། བོད་ཀྱིས་ཁྱོན་མ་དངུལ་སྒོར་དུང་ཕྱུར་45བཏང་སྟེ་ཚད་གཞི་མཐོ་བའི་ཞིང་ཁ་མུའུ་ཁྲི་225བསྐྲུན་པར་མུའུ་རེ་ནས་འབྲུ་རིགས་ཐོན་འབབ་2015ལོའི་སྤྱི་རྒྱ་374.94ནས་2020ལོའི་སྤྱི་རྒྱ་387.33བར་འཕར་ཡོད། 2020ལོར་ལྗོངས་ཡོངས་ཀྱི་འབྲུ་རིགས་ཐོན་འབབ་ཏུན་ཁྲི་103ཟིན་ཏེ་ལོ་6བསྟུད་མར་ཏུན་ཁྲི་100ཡན་རྒྱུན་འཁྱོངས་ཐུབ་སྟེ་བོད་ཀྱི་འབྲུ་རིགས་གཙོ་བོའི་མཁོ་སྤྲོད་སྤྱིར་ན་རང་ཁ་རང་གསོ་ཐུབ་ཀྱི་ཡོད།