འདི་ནི་དམག་དཔོན་ཝང་ཆི་མའེ་ཡི་སྔོན་མ་ལྟར་ཉམས་གསོ་བྱས་པའི་བཞུགས་གནས་རྙིང་པ་ཡིན་པ།

ལོ་ངོ་60ལྷག་ཙམ་གྱི་གོང་དུ་ཆབ་མདོའི་ཐོག་ཁང་ཁག་དང་པོ་གནས་དེར་འགྱིང་ངེར་གནས་ཤིང་། ད་ཆ་གནས་འདིར་ཐོག་ཁང་སྣ་ཚོཌ་ཀྱིས་ཁེངས་ནས་ཧ་ཅང་འཁྲུག་ཆ་དོད་པའི་རྣམ་པ་ཞིག་མངོན་ཡོད། ཆབ་མདོ་གྲོང་ཁྱེར་གྱི་ལྟེ་བའི་ཁུལ་གྱི་དབེན་གནས་ཞིག་ཏུ་སུའུ་ལན་ལུཌ་ཀྱི་བཟོ་བཀོད་ལྟར་བསྐྲུན་པའི་ཐུན་མོང་མ་ཡིན་པའི་སྐྲུན་དངོས་ཁ་ཤས་ཐོག་ཁང་མང་པོའི་ཁྲོད་འགྱིང་ངེར་གནས་ཡོད་པ་དེ་དག་གིས་ཆབ་མདོའི་ལོ་རྒྱུས་ཀྱི་བདེན་དཔང་བྱེད་ཐུབ་ལ་ཆབ་མདོའི་བུ་ཕྲུག་ཚོའི་དཀའ་སྤྱད་འབད་འབུངས་ཀྱི་འབད་འཐབ་ལམ་བུའང་བདེན་དཔང་བྱེད་ཐུབ།

སོ་ཕག་དང་རྫ་གཡམ་ལས་གྲུབ་པ་དང་སུའུ་ལན་ལུཌ་ཀྱི་བཟོ་བཀོད་ལྟར་བསྐྲུན་པའི་གྲལ་སྟར་སྒྲིག་ལ་ཐུན་མོང་མ་ཡིན་པའི་སྐྲུན་དངོས་དེ་དག་ནི་ཆབ་མདོ་གྲོང་ཁྱེར་གྱི་གསར་བརྗེའི་ལོ་རྒྱུས་རྟེན་རྫས་བཤམས་མཛོད་ཁང་ཡིན་པ་རེད།

བོད་དུ་སྐར་ལྔའི་དར་དམར་ཐོག་མར་བསྒྲེངས་སའི་གནས་ཤིག་ཡིན་པའི་ངོས་ནས་བཅིངས་འགྲོལ་དང་གསར་བརྗེའི་འཛུགས་སྐྲུན་དུས་སྐབས་སུ་ཀྲུང་གོ་གུང་ཁྲན་ཏང་གིས་ཆབ་མདོར་གསར་བརྗེའི་འཐབ་རྩོད་གལ་ཆེན་རབ་དང་རིམ་པར་སྐུལ་སློང་དང་འགོ་ཁྲིད་བྱས་ཏེ་གསར་བརྗེ་མཁན་དང་འཛུགས་སྐྲུན་མཁན་མང་པོས་བྱས་རྗེས་བཞག་ཡོད་པས་དེ་ནི་བོད་ཀྱི“གསར་བརྗེའི་འབྱུང་ཁུངས”དང“གསར་བརྗེའི་ཁུལ་རྙིང”དངོས་གནས་དེ་རེད།

གསར་བརྗེའི་ཐོན་ཁུངས་ཡག་པོ་སྤྱད་དེ་གསར་བརྗེའི་སྲོལ་བཟང་དར་སྤེལ་ཡག་པོ་དང་གསར་བརྗེའི་གཞི་རྒྱུ་རྒྱུན་འཛིན་ཡག་པོ་བྱ་ཆེད། ཆབ་མདོ་གྲོང་ཁྱེར་གྱིས་2016ལོའི་ཟླ་8པར་ས་བཟུང་རྒྱ་ཁྱོན་སྨི་ངོས་གྲུ་11000ཟིན་པའི་ཆབ་མདོ་གྲོང་ཁྱེར་གྱི་གསར་བརྗེའི་ལོ་རྒྱུས་རྟེན་རྫས་བཤམས་མཛོད་ཁང་དེ་བསྐྲུན་པ་རེད།

 རྟེན་རྫས་བཤམས་མཛོད་ཁང་དུ་མི་རིང་བའི་ས་ནས་སྤོས་པའི་ཆབ་མདོའི་བཅིངས་འགྲོལ་ཨུ་ལྷན་གཞུང་ལས་ཁང་གི་ཤུལ་རྙིང་དང་ཚོགས་ཁང་ཆུང་ཆུང་ཕུད། ད་དུང་སྒོར་མོ་དབྱིབས་ཀྱི་ཁང་པ་སྟེ་དམག་དཔོན་ཀྲང་གོ་ཧྭ་ཡི་དྲན་གསོ་ཁང་དང་། དམག་དཔོན་ཝང་ཆི་མའེ་ཡི་དྲན་གསོ་ཁང་། དམག་དཔོན་ཀྲང་གོ་ཧྭ་ཡི་བཞུགས་གནས་རྙིང་པ། དམག་དཔོན་ཝང་ཆི་མའེ་ཡི་བཞུགས་གནས་རྙིང་པ་བཅས་ཀྱང་རང་སོར་བཞག་ཡོད།

ང་ཚོ་ཆབ་མདོ་གྲོང་ཁྱེར་གྱི་གསར་བརྗེའི་ལོ་རྒྱུས་རྟེན་རྫས་བཤམས་མཛོད་ཁང་དུ་སྐྱོད་སྐབས་མདའ་ལྟར་འདྲོང་བའི་ཨར་འདམ་ལམ་བུའི་གཡས་གཡོན་དུ་དམག་དཔོན་ཐོག་ཁང་དང་བཅིངས་འགྲོལ་ཨུ་ལྷན་གྱི་ཤུལ་རྙིང་གནས་ཤིང་། དམག་དཔོན་ཐོག་ཁང་ནི་གཡོན་ངོས་སུ་གྲལ་འགྲིག་པོར་གནས་ཡོད་ལ་མཐོ་ཤིང་ཆེ་བའི་རྒྱ་ལྕང་བཅུ་ཕྲག་ཡོལ་བ་བཞིན་དཔྱངས་ཡོད།

“གསར་བརྗེའི་ལོ་རྒྱུས་རྟེན་རྫས་བཤམས་མཛོད་ཁང་གིས་ཉར་ཚགས་བྱས་པའི་དམག་དཔོན་ཐོག་ཁང་ཚང་མ་ནི་ས་ཕག་ལས་གྲུབ་པའི་སུའུ་ལུགས་ཀྱི་བཀོད་པ་ལྟར་བསྐྲུན་པའི་སྐྲུན་དངོས་ཤ་སྟག་རེད”ཆབ་མདོ་གྲོང་ཁྱེར་རིག་གནས་ཅུས(རིག་དངོས་ཅུས)ཀྱི་ཅུས་ཀྲང་གཞོན་པ་བློ་བཟང་ཆོས་གྲགས་ཀྱིས་དམག་དཔོན་ཐོག་ཁང་འདི་ཉིད་སྐབས་དེ་དུས་ཀྱི་ཏང་སྲིད་མི་སྣ་གལ་ཆེན་དང་། ཆབ་མདོ་ས་ཁུལ་ས་ཨུད་སྲིད་འཛིན་ཀུང་ཧྲུའུ། དེ་བཞིན་དེ་རྗེས་ཀྱི་ཆབ་མདོ་གྲོང་ཨུད་དང་གྲོང་ཁྱེར་སྲིད་གཞུང་གི་འགོ་ཁྲིད་པ་གཙོ་བོའི་འཚོ་གནས་ཁུལ་དང་ལས་དོན་སྒྲུབ་ས་ཞིག་ཡིན་པའི་ངོས་ནས་སྔ་བར་ཕྱི་གསུམ་དུ་ཆ་ཚང་བར་ཉར་ཚགས་བྱས་ཡོད། ད་ཆ་སྐྲུན་དངོས་བཞིའི་ནང་ནས་གཉིས་དམག་དཔོན་ཀྲང་གོ་ཧྭ་དང་ཝང་ཆི་མའེ་ཡི་མི་སྒེར་གྱི་དྲན་གསོ་ཁང་ཡིན་པའི་ངོས་ནས་ཆ་ཚང་བར་ཉར་ཚགས་བྱས་པ་དང་ལྷག་མ་གཉིས་པོ་དེ་དམག་དཔོན་ཁོང་གཉིས་ཀྱི་བཞུགས་གནས་རྙིང་པ་ཡིན་པའི་ངོས་ནས་ཉམས་གསོ་བྱས་ཡོད་ཅེས་ངོ་སྤྲོད་བྱས།

ལམ་སྟོན་མཚོན་རྟགས་ལྟར་ང་ཚོས་དམག་དཔོན་ཝང་ཆི་མའེ་ཡི་དྲན་གསོ་ཁང་གི་མདུན་དུ་སྐྱོད་སྐབས་རྒྱལ་སྒོའི་སྟེང་སྒོ་རྟགས་དམར་སྨུག་ཞིག་བཀལ་བ་དང་དེའི་ཐོག་བོད་རྒྱ་ཡིག་རིགས་གཉིས་ཀྱི་ཐོག་ནས“དམག་དཔོན་ཝང་ཆི་མའེ་ཡི་དྲན་གསོ་ཁང”ཞེས་པ་ཚོས་གཞི་སེར་པོས་བརྐོས་འདུག རྒྱལ་སྒོའི་མདུན་གྱི་གཡོན་ངོས་སུ་རླངས་འཁོར་རྙིང་པ་དཀར་པོ་ཞིག་བཞག་པ་ནི་དམག་དཔོན་ཝང་ཆི་མའེ་ཡི་ཆེད་སྤྱོད་རླངས་འཁོར་རེད།

དྲན་གསོ་ཁང་ནང་སྐྱོད་སྐབས་གཡོན་ངོས་ཀྱི་གྱང་སྟེང་དུ་དམག་དཔོན་ཝང་ཆི་མའེ་ཡི་ངོ་སྤྲོད་མདོར་བསྡུས་བཀལ་ཡོད་ཅིང་། “ཝང་ཆི་མའེ(1913-1967)ཧུའུ་ནན་ཐའོ་ཡོན་བ། 1932ལོར་བཙན་རྒོལ་མནའ་མཐུན་ནང་ཞུགས། 1933ལོར་ཀྲུང་གོ་གུང་ཁྲན་རིང་ལུགས་ཀྱི་གཞོན་ནུ་ཚོགས་པའི་ནང་ཞུགས་པ་དང་ལོ་དེ་རང་དུ་ཀྲུང་གོ་གུང་ཁྲན་ཏང་ལ་ཞུགས”

དམག་དཔོན་ཝང་ཆི་མའེ་ཡི་དྲན་གསོ་ཁང་གི་གཡས་ངོས་ཀྱི་མི་རིང་བའི་སར་དམག་དཔོན་ཀྲང་གོ་ཧྭ་ཡི་དྲན་གསོ་ཁང་ཡོད། དྲན་གསོ་ཁང་ནང་སྐྱོད་སྐབས་དམག་དཔོན་ཀྲང་གོ་ཧྭ་ཡི་ཕྱེད་པར་ཆེན་པོ་ཞིག་མཐོང་རྒྱུ་ཡོད།

“ཀྲང་གོ་ཧྭ(1914.10.22-1972.2.21)དེ་སྔོན་ཀྲང་ཧྥུའུ་ཀུའེ་དང་ལི་ཡཱ་ལིན་ཟེར། ཅང་ཤིས་ཞིང་ཆེན་ཡུང་ཤིན་རྫོང་གི་མི་ཡིན་པ། ཀྲུང་གུང་ཏང་ཡོན། ཀྲུང་གོ་མི་དམངས་བཅིངས་འགྲོལ་དམག་གི་མཐོ་རིམ་དམག་དཔོན་དང་རྒྱལ་འཛུགས་དམག་དཔོན”

དྲན་གསོ་ཁང་ནང་ཁོང་གི་ཚེ་གང་གི་བྱས་རྗེས་གཙོ་ བོར་བྱས་ཏེ་གསར་བརྗེའི་ནང་ཞུགས་པ་ནས་རི་འགོག་དམག་འཁྲུག་དང་བཅིངས་འགྲོལ་དམག་འཁྲུག་རིང་ཐོབ་པའི་འོད་སྟོང་འཕྲོ་བའི་གྲུབ་འབྲས་དང་ཏང་གཤིས་ལ་བློ་དཀར་སེམས་དཀར་གྱིས་ས་མཐོར་བྱས་རྗེས་འཇོག་པའི་རླབས་ཆེན་ལོ་རྒྱུས་གསལ་འགྲེལ་བྱས་ཡོད།

རྩ་ཆེའི་འགྲེམས་རྫས་རེ་རེ་དང་། དཔྱད་གཞིའི་པར་གཞི་རེ་རེ། རྣམ་པ་བསྐྱར་མངོན་རེ་རེ་བཅས་ལས་མི་རྣམས་ལ་སྐབས་དེའི་དཀའ་ཚེགས་ཆེ་བའི་ལོ་ཟླར་སླར་ཡང་སླེབས་པ་ལྟ་བུའི་ཚོར་སྣང་ཞིག་སྦྱིན།

དྲན་གསོ་ཁང་གི་འགྲམ་དུ་དམག་དཔོན་ཀྲང་གོ་ཧྭ་དང་ཝང་ཆི་མའེ་ཡི་ཉམས་གསོ་བྱས་པའི་བཞུགས་གནས་རྙིང་པ་གནས་ཡོད། དེ་གར་གསར་བརྗེའི་འཛུགས་སྐྲུན་ཁྲོད་ཁོང་ཚོས་སྤྱོད་མྱོང་བའི་འཚོ་བ་དང་ཐོན་སྐྱེད་ཀྱི་ཡོ་ཆས་མང་པོ་ཞིག་འགྲིག་ཡོད། སྲིང་བལ་གྱི་གོས་ཧྲུལ་སྣ་ཚོགས་ནས་འཕྲལ་མཁོའི་སྒྲིག་ཆས་བར་དང་། དམག་འཐབ་བཀོད་འདོམས་ཀྱི་ལམ་མཚོན་དཔེ་རིས་ནས་ཡིག་ཆ་སློབ་སྦྱོང་གི་ཟིན་དེབ་བར། སྟབས་བདེའི་ཉལ་ཁང་ནས་འོད་ཐིང་ངེར་ཕྱིས་པའི་གཞུང་ལས་སྒྲོག་ཙེའི་བར། སྔོན་གཤེགས་དཔའ་བོ་ཚོའི་ཤུལ་བཞག་དངོས་པོ་དེ་དག་དུས་ཚོད་ཀྱིས་རྐྱེན་པས་རྙིང་པར་འགྱུར་ཡོད་རུང་དེ་དག་ནི་སྐབས་དེའི་གསར་བརྗེའི་ལོ་ཟླའི་དཔང་པོ་དངོས་ཤ་སྟག་རེད།