ཏོག་གསར་རིམས་ནད་རྒྱ་ཁྱབ་ངང་མཆེད་པའི་རྒྱབ་ལྗོངས་འོག་2020ལོར་ཀྲུང་གོས་སྔར་བཞིན་དུས་བཀག་ནང་དུས་རབས་གསར་པའི་དབུལ་སྒྲོལ་འགག་སྒྲོལ་གྱི་དམིགས་ཚད་ལས་འགན་ལེགས་གྲུབ་བྱས་ཡོད། རྒྱབ་སྐྱོར་བྱེད་པའི་རྒྱལ་ཁབ་ནས་རྒྱབ་སྐྱོར་བྱེད་མཁན་རྒྱལ་ཁབ་བར་དང་དབུལ་ཕོངས་རྗེས་ལུས་ནས་དབུལ་པོ་ཉུང་གཏོང་གི་དཔེ་བཟང་བར་ཀྲུང་གོའི་དབུལ་པོ་ཉུང་གཏོང་གི་གྲུབ་འབྲས་འཛམ་གླིང་ཡོངས་ཀྱི་དོ་སྣང་བྱ་ཡུལ་ལ་གྱུར་ཡོད།

གོ་ལ་ཧྲིལ་པོར་མིག་དཔེ་བསྟན་པ།

ན་ནིང་ཟླ་12པར་ཀྲུང་གོས་ད་ལྟ་ལག་བསྟར་བྱེད་བཞིན་པའི་ཚད་གཞིའི་འོག་གྲོང་གསེབ་ཀྱི་མི་འབོར་དབུལ་པོ་ཚང་མ་དབུལ་སྒྲོལ་ཐུབ་པ་དང་། རྫོང་དབུལ་པོ་ཚང་མ་དབུལ་ཞྭ་ཕུད་པ། དབུལ་པོ་དབུལ་རྐྱང་དང་ས་ཁོངས་རང་བཞིན་གྱི་དབུལ་པོ་ཚང་མ་བསལ་བ། མི་འབོར་དབུལ་པོ་དུང་ཕྱུར་1ཙམ་དབུལ་སྒྲོལ་ཐུབ་པ་བཅས་དངོས་སུ་ཁྱབ་བསྒྲགས་བྱས་ཡོད།

ཐི་མོར་ཤར་མར་བཅའ་སྡོད་མཉམ་འབྲེལ་རྒྱལ་ཚོགས་ཀྱི་འཛམ་གླིང་འབྲུ་རིགས་འཆར་འགོད་ཧྲུའི་འཐུས་མི་ལིའུ་ཏ་ཀེང་གིས་ཤིན་ཧྭ་གསར་འགྱུར་ཁང་གི་གསར་འགོད་པའི་བཅར་འདྲི་དང་ལེན་བྱེད་སྐབས། ཀྲུང་གོ་ཕྱོགས་ཡོངས་ནས་དབུལ་སྒྲོལ་ཐུབ་པ་ནི་མིའི་རིགས་ཀྱི་ལོ་རྒྱུས་ཐོག་ད་བར་གཞི་ཁྱོན་ཆེ་ཤོས་དང་། སྟོབས་ཤུགས་ཆེ་ཤོས། ཕན་འབྲས་མངོན་གསལ་དོད་ཤོས་བཅས་ཀྱི་དབུལ་པོ་ཉུང་གཏོང་གི་གསར་གཏོད་ཅིག་རེད། དེས་འཛམ་གླིང་དང་ལྷག་པར་དུ་འཕེལ་རྒྱས་འགྲོ་བཞིན་པའི་རྒྱལ་ཁབ་གཞན་དག་གིས་མཉམ་འབྲེལ་རྒྱལ་ཚོགས་ཀྱི་2030ལོའི་རྒྱུན་མཐུད་ཆོག་པའི་འཕེལ་རྒྱས་ཀྱི་གྲོས་རིམ་དོན་འཁྱོལ་བྱེད་པར་ཚད་གཞི་གསར་པ་ཞིག་བཙུགས་ཡོད་ཅེས་བརྗོད།

པར་ཙིར་གྱི་ལི་གཡོད་རེ་ནེ་ལུའུ་ཡི་ཀྲོའུ་བཙུགས་སློབ་ཆེན་དཔལ་འབྱོར་རིག་པའི་དགེ་རྒན་ཆེ་མོ་བ་ཨའེ་ལི་ཡ་སི་·ཡ་པུར་གྱིས་ཀྲུང་གོའི་དབུལ་པོ་ཉུང་གཏོང་གི་བྱ་གཞག་ལ་གཟེངས་སུ་ཐོན་པའི་གྲུབ་འབྲས་ཐོབ་པ་ལས་ཀྲུང་གོ་སྲིད་གཞུང་གི་འཐབ་ཇུས་ཀྱི་མཐོ་ཚད་མངོན་ཡོད་པ་དང་ཀྲུང་གོ་སྲིད་གཞུང་གིས་སྤྱད་པའི་སྲིད་ཇུས་ནི་ཞིབ་འཇུག་དང་བརྡར་གཅོད་གཏིང་ཟབ་བྱས་པ་ཞིག་ཡིན་པས་རྒྱལ་ཁབ་དང་སྤྱི་ཚོགས་འཕེལ་རྒྱས་ལ་སྐུལ་འདེད་ནུས་ལྡན་ཐེབས་ཡོད་ཅེས་བརྗོད།

ཡ་པུར་གྱིས། ཀྲུང་གོས་དབུལ་ཕྱུག་གི་ཧེ་བག་ཆུང་དུ་གཏོང་བའི་བྱ་ཐབས་མང་པོ་ཞིག་ལ་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱིས་དཔྱད་གཞིར་འཛིན་པའི་དོན་སྙིང་ལྡན་ཡོད། ཀྲུང་གོས་དཔལ་འབྱོར་འཕེལ་རྒྱས་ཀྱི་ཁྱབ་ཁོངས་མང་པོར་ཚད་གཞི་བཙུགས་ཡོད་ཅེས་བརྗོད།

ཀྲུང་གོའི་བྱེད་སྟངས་ལ་དབྱེ་ཞིབ་བྱས་པ།

ཕྱི་རྒྱལ་གྱི་ལྟ་ཞིབ་མཁས་ཅན་གྱིས་རྒྱལ་ཁབ་གཅིག་གི་དཔལ་འབྱོར་འཕར་བ་ལས་རྒྱལ་ཁབ་དེའི་དབུལ་པོ་དབུལ་རྐྱང་རང་བཞིན་དུ་མེད་པར་འགྲོ་བ་མཚོན་གྱི་མེད་ཀྱང་། ཀྲུང་གོས་དཔལ་འབྱོར་འཕེལ་རྒྱས་མྱུར་པོ་བཏང་བ་དང་ཆབས་ཅིག་དབུལ་པོ་དབུལ་རྐྱང་བསལ་བས་ཀྲུང་གོའི་བྱེད་སྟངས་དཔྱད་གཞིར་འཛིན་པའི་རིན་ཐང་ཆེན་པོ་ལྡན་ཡོད། དེའི་ཐབས་ཤེས་ནི་ཀྲུང་གོས་རང་ངོས་ཀྱི་རྒྱལ་བབ་དང་འཚམ་པའི་དབུལ་པོ་ཉུང་གཏོང་གི་སྲིད་ཇུས་ལག་ལེན་བསྟར་བས་རེད་ཅེས་བརྗོད།

ཐེ་ལན་རྒྱལ་ཁབ་ཞིབ་འཇུག་ཁང་གི་ཐེ་ཀྲུང་འཐབ་ཇུས་ཞིབ་འཇུག་ལྟེ་གནས་ཀྱི་ཀྲུའུ་རེན་སུའུ་ལ་ཞི་·ཐ་ནཱ་ཐང་གིས། དབུལ་པོ་ནི་མིའི་རིགས་ཀྱི་སྤྱི་ཚོགས་ཀྱིས་ཐུན་མོང་ཐོག་ཁ་གཏད་གཅོག་དགོས་པའི་གནད་དོན་ཞིག་རེད། དབུལ་པོ་སེལ་རྒྱུ་དེའང་མིའི་རིགས་ཀྱི་ལས་དབང་གཅིག་མཐུན་འདུས་གྲུབ་གཏོད་སྐབས་ཐག་གཅོད་བྱེད་དགོས་པའི་དཀའ་གནད་ཅིག་རེད། ཀྲུང་གོའི་གྲུབ་འབྲས་ཐོབ་པའི་ཉམས་མྱོང་ལས་འཛམ་གླིང་གིས་གནད་སྨིན་དབུལ་སྐྱོར་གྱི་གལ་ཆེའི་རང་བཞིན་ལ་རྒྱུས་མངའ་བྱུང་བ་དང་དབུལ་པོ་ལས་སྒྲོལ་ཐུབ་པའི་རེ་བའང་མཐོང་བ་མ་ཟད། དབུལ་པོའི་གནད་དོན་ཐག་གཅོད་བྱེད་པའི་བློ་སྟོབས་དང་ཉམས་མྱོང་མཁོ་འདོན་ཡང་བྱས་ཡོད་ཅེས་བརྗོད།

དབུལ་པོ་ཉུང་གཏོང་ནི་རྒྱལ་སྤྱིའི་སྤྱི་ཚོགས་ལ་འཕྲད་པའི་ཐུན་མོང་གི་ཞིབ་འཇུག་བྱ་གཞི་ཞིག་རེད། རིམས་ནད་ཀྱི་ཤུགས་རྐྱེན་དབང་གིས་2020ལོར་གོ་ལ་ཧྲིལ་པོར་མི་འབོར་དབུལ་པོ་ལོ་མང་རིང་ཐེངས་དང་པོ་མང་དུ་སོང་ཡོད། དུས་བབ་གསར་པ་འདིའི་འོག་གོ་ལ་ཧྲིལ་པོའི་དབུལ་པོ་ཉུང་གཏོང་གི་བྱ་གཞག་ལ་འགྲན་སློང་ཆེན་པོ་ཕྲད་ཡོད། རྒྱལ་སྤྱིའི་ངལ་རྩོལ་བཟོ་པའི་རྩ་འཛུགས་ཀྱི་སྤྱི་ཁྱབ་ཀན་ཧྲེ་ཀའེ་དབྱི་·ལའེ་ཏེ་ཡིས། ཀྲུང་གོ་གོ་ལ་ཧྲིལ་པོའི་དབུལ་སྒྲོལ་གྱི་མིག་དཔེར་གྱུར་པའི་ཐབས་མཆོག་གལ་ཆེ་ཤོས་ཀྱི་གྲས་ཤིག་ནི་ཀྲུང་གོས་དབུལ་པོ་སེལ་རྒྱུ་དེ་རང་རྒྱལ་ཁབ་ཀྱི་སྲིད་ཇུས་དམིགས་ཚད་གལ་ཆེན་ཡིན་པ་ཁ་གསལ་བཏོན་པས་རེད། རྒྱལ་ཁབ་དེ་བས་མང་བས་ཀྲུང་གོར་སློབ་སྦྱོང་བྱེད་དགོས་ཞེས་བརྗོད།

ཤིན་ཧྭ་གསར་འགྱུར་ཁང་པེ་ཅིང་ནས་འབྱོར་བའི་གློག་འཕྲིན།