དགུན་དུས་བོད་ལྗོངས་ཉིང་ཁྲི་གྲོང་ཁྱེར་བྲག་ཡིབ་ཆུས་བྲག་ཡིབ་གྲོང་རྡལ་བྲག་ཕྱི་གྲོང་ཚོའི་ཡངས་ཤིང་རྒྱ་ཆེ་བའི་གྲོང་ཚོའི་ལམ་དུ་སྐྱོད་སྐབས། བོད་ཁྱིམ་ཚང་མའི་ཐོག་ཁར་སྐར་ལྔའི་དར་དམར་ལྷབ་ལྷོབ་ཏུ་གཡོ་བཞིན་མཆིས། “ད་ཆ་གྲོང་ཚོའི་ཁྱིམ་ཚང་ཚང་མ་ཁང་པ་གསར་པར་བསྡད་ཡོད་པས། འཚོ་བ་ཡང་ཧ་ཅང་སྐྱིད་པོ་ཡོད”ཅེས་བྲག་ཕྱི་གྲོང་ཚོའི་ཏང་ཀྲི་པུའི་ཧྲུའུ་ཅི་མིག་དམར་གྱིས་དགའ་ཚོར་ཆེན་པོས་གསར་འགོད་པར་བརྗོད།

ཉེ་བའི་ལོ་ཤས་རིང་བྲག་ཕྱི་གྲོང་ཚོས་ཏང་དང་རྒྱལ་ཁབ་ཀྱི་སྲིད་ཇུས་བཟང་པོར་བརྟེན་ནས། ཏང་ཡོན་དང་། མང་ཚོགས། ལས་བྱེད་པ་བཅས་མཐུན་སྒྲིལ་རྡོག་རྩ་གཅིག་ཏུ་བསྒྲིལ་ནས་འབད་བརྩོན་ལྷོད་མེད་ཀྱིས་གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་ཤུགས་ཆེན་བཏང་བས། ཉེ་རིང་གང་སར་སྐད་གྲགས་ཆོད་པའི་འབྱོར་འཕྱུག་གྲོང་ཚོ་དང་འབྱོར་འབྲིང་གྲོང་ཚོར་གྱུར་ཡོད།

གྲོང་ཚོའི་མཉམ་སྡེབ་དཔལ་འབྱོར་ཉིན་བཞིན་སྟོབས་ཆེར་སོང་བ།

གངས་ལྗོངས་ཅང་ནན་ཧུང་ཤིན་ཨར་པོའི་རྒྱུ་ཆ་ཁྲོམ་ར་ནི་ཉིང་ཁྲིའི་མིག་སྔའི་གཞི་ཁྱོན་ཆེ་ཤོས་དང་སྣ་ཁ་འཛོམས་ཤོས་ཀྱི་ཨར་པོའི་རྒྱུ་ཆའི་ཁྲོམ་ར་ཞིག་རེད། དཔྱིད་གསར་དུས་ཆེན་འཆར་ལ་ཉེ་བའི་མཚམས་སུ་ཁྱིམ་ཚང་ལ་མཛེས་བཟོ་བྱེད་མཁན་མང་པོ་ཞིག་དེ་གར་ཁང་པ་མཛེས་བཟོའི་མཁོ་ཆས་དང་རྒྱུ་ཆ་སོགས་ཉོ་བར་ཡོང་གི་ཡོད། འདི་ནི་བྲག་ཕྱི་གྲོང་ཚོས་ས་ཞིང་མ་རྐང་ལ་འཇོག་པའི་ཐབས་ལམ་ལ་བརྟེན་ནས་གཉེར་སྐྱོང་བྱས་པའི་ཨར་པོའི་རྒྱུ་ཆའི་ཁྲོམ་ར་ཡིན་པ་དང་ལོ་ལྟར་བྲག་ཕྱི་གྲོང་ཚོར་ཡོང་འབབ་སྒོར་ཁྲི་450ཡོང་གི་ཡོད་པ་རེད།

“ང་ཚོས་ཡུལ་བབ་དང་བསྟུན་ནས་ཐོན་ལས་འཕེལ་རྒྱས་བཏང་བར་ཏང་ཨུད་དང་སྲིད་གཞུང་གིས་རྒྱབ་སྐྱོར་ཤུགས་ཆེན་གནང་ནས་ཨར་པོའི་རྒྱུ་ཆའི་ཁྲོམ་ར་བྲག་ཕྱི་གྲོང་ཚོའི་མཉམ་སྡེབ་ས་ཞིང་དུ་བརྒྱབ་ཡོད། གྲོང་ཚོས་གསར་སྤེལ་ཁེ་ལས་དང་གྲོས་མཐུན་བཞག་ནས་ཡོང་འབབ་ལོ་5རེར་སྒོར་ཁྲི་50རེ་མང་དུ་གཏོང་རྒྱུ་མ་ཟད། ལོ་25ཡི་རྗེས་སུ་ཨར་པོའི་རྒྱུ་ཆའི་ཁྲོམ་རའི་ས་ངོས་མ་རྩ་ཚང་མ་བྲག་ཕྱི་གྲོང་ཚོར་སྤྲད་ནས་གྲོང་ཚོ་རང་གིས་གཉེར་སྐྱོང་བྱེད་རྒྱུ་བཟོས་ཡོད”ཅེས་མིག་དམར་གྱིས་བཤད།

2019ལོར་བྲག་ཕྱི་གྲོང་ཚོའི་མཉམ་སྡེབ་དཔལ་འབྱོར་ལ་ཡོང་འབབ་སྒོར་ཁྲི་1200བྱུང་ནས་གྲོང་ཚོའི་མཉམ་སྡེབ་རྒྱུ་ནོར་གྱི་ཚོད་དཔག་རིན་ཐང་སྒོར་དུང་ཕྱུར་10ཙམ་ཟིན་ཡོད། མཉམ་སྡེབ་དཔལ་འབྱོར་འཕེལ་རྒྱས་བཏང་བ་ལས་གྲོང་མིའི་འཚོ་བ་ཇེ་ལེགས་སུ་ཕྱིན་ཡོད།

དབུལ་སྒྲོལ་ཕྱུག་འགྱུར་གྱི་མདུན་ལམ་ཡངས།

གྲོང་མི་པ་སངས་རྒྱལ་པོའི་ཁྱིམ་ནི་རི་འདེབས་སུ་བསྐྲུན་པའི་ཐོག་སོ་གཉིས་ལྡན་གྱི་བོད་ཁང་ཞིག་ཡིན་ཞིང་། སྒོ་རའི་ནང་དུ་ལོ་80སླེབས་པའི་རྒད་པོ་པ་སངས་རྒྱལ་པོ་ཉི་མ་སྲོ་བཞིན་ཡོད་པ་དང་ཁོང་གི་འགྲམ་དུ་ཚ་བོ་གཉིས་བློ་རྩེ་གཅིག་སྒྲིམ་ངང་སྦྱོང་ཚན་འབྲི་བཞིན་འདུག

བུ་ཚེ་ལས་འདས་རྗེས་རྒད་པོ་པ་སངས་རྒྱལ་པོ་དང་ཁོང་གི་བཟའ་ཟླས་ཚ་བོ་གཉིས་གསོ་སྐྱོང་བྱས། དབུལ་སྒྲོལ་འགག་སྒྲོལ་གྱི་དམག་འཐབ་རྒྱག་འགོ་ཚུགས་ཚུན། ཁོང་གི་ཁྱིམ་ཚང་ཡིག་ཚགས་དང་གཱ་བཟོས་པའི་དུད་ཚང་དབུལ་པོར་གཏན་ཁེལ་བྱས། པ་སངས་རྒྱལ་པོ་དང་ཁོང་གི་བཟའ་ཟླར་དམིགས་བསལ་དཀའ་ངལ་གྱི་བསྙེན་བཀུར་དངུལ་དང་། རྒན་གསོ་འགན་བཅོལ་གྱི་དངུལ། རྩྭ་རའི་ཁ་གསབ་དངུལ་སོགས་ཡོད་པ་དང་ཚ་བོ་ཚོས་ཀྱང་འགན་ལེན་གསུམ་གྱི་སློབ་གསོའི་སྲིད་ཇུས་ལོངས་སུ་སྤྱོད་ཀྱི་ཡོད།

པ་སངས་རྒྱལ་པོའི་ཁྱིམ་ལ་ད་དུང་བྲག་ཕྱི་གྲོང་ཚོའི་ཉིན་བཞིན་སྟོབས་ཆེར་འགྲོ་བའི་གྲོང་ཚོའི་མཉམ་སྡེབ་དཔལ་འབྱོར་ཐོན་ལས་ནས་བགོས་པའི་ཁེ་གཙང་ཡོད་པས་ཡོང་འབབ་ལོ་ལྟར་མང་དུ་འགྲོ་བཞིན་ཡོད། ཁོང་ཁྱིམ་གྱི་ཡོང་འབབ་2016ལོའི་སྒོར་ཁྲི་2ལྷག་ཙམ་ནས་2020ལོའི་སྒོར་ཁྲི་9ཙམ་བར་མང་དུ་ཕྱིན་པ་དང་། དེའི་ནང་མང་ཆེ་བ་བགྲོ་འགྲེམས་ཀྱི་དངུལ་རེད། “ཕྲུ་གུ་ཚོས་སློབ་སྦྱོང་ཧུར་ཐག་བྱས་ནས་ཕྱིས་སུ་སྤྱི་ཚོགས་ལ་དྲིན་ལན་འཇལ་བའི་རེ་བ་ཡོད”ཅེས་པ་སངས་རྒྱལ་པོས་ཚ་བོའི་མགོ་བོར་བྱིལ་བྱིལ་བྱེད་བཞིན་རེ་བ་ཆེན་པོས་བཤད།

དབུལ་སྒྲོལ་འགག་སྒྲོལ་ལག་བསྟར་བྱས་ཚུན། བྲག་ཕྱི་གྲོང་ཚོའི་ཏང་ཡོན་ཚོགས་ཆུང་བཞི་ལ་བགོས་པ་དང་། ཚོགས་ཆུང་རེ་རེས་པ་སངས་རྒྱལ་པོ་དང་འདྲ་བའི་དུད་ཚང་དབུལ་པོ་གཅིག་ལ་ཁ་གཏད་རོགས་སྐྱོར་བྱེད་ཀྱི་ཡོད། ད་ཆ་དབུལ་སྒྲོལ་ཐུབ་པའི་བྲག་ཕྱི་གྲོང་ཚོའི་དུད་ཚང་ཚང་མས་འབྱུང་འགྱུར་ལ་རེ་བས་ཁེངས་བཞིན་ནུས་ཤུགས་ཡོད་རྒུས་འབད་འཐབ་ཀྱི་ལམ་དུ་སྐྱོད་བཞིན་ཡོད།

འཕེལ་རྒྱས་ཀྱི་གོམ་སྟབས་མགྱོཌ་སུ་ཕྱིན་པ།

2020ལོར་ལྷག་པའི་ཁྱིམ་སྨི་ངོས་གྲུ་400ཡོད་པའི་ཐོག་སོ་གཉིས་ལྡན་གྱི་ཁང་པ་གསར་པར་སྤོས། ལྷག་པའི་ཁང་པ་གསར་པར་མཛེས་ལ་སྤྱོད་གོ་ཆོད་པའི་ཁྱིམ་ཆས་སྣ་ཚོགས་འདུག “ད་ཆ་དངུལ་ཡོད་པས་ཁང་པ་ཡག་ཙམ་ནང་བསྡད་པ་ཡིན། མཛེས་བཟོའི་ཇུས་འགོད་ཀྱང་ང་རང་གིས་བྱས་པ་ཡིན”ཞེས་ལྷག་པས་ཁང་པའི་སྐོར་རྗོད་སྐབས་སྤོབས་པ་ཆེན་པོ་བྱེད་ཀྱི་འདུག

2011ལོར་བྲག་ཕྱི་གྲོང་ཚོའི་མི་རེའི་ལོའི་ཆ་སྙོམས་ཡོང་འབབ་སྒོར་6000ལྷག་ཙམ་ལས་མེད། 2020ལོར་བྲག་ཕྱི་གྲོང་ཚོའི་གྲོང་མིའི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་ཁྲི་4ལས་བརྒལ་ཅིང་། དངུལ་ཁུག་ལྗིད་ཏིག་ཏིག་ཏུ་གྱུར་པའི་གྲོང་མི་ཚོས་རླངས་འཁོར་ཉོས་པ་དང་ཁང་པ་གསར་པ་བརྒྱབ་སྟེ་དེ་བས་སྐྱིད་སྣང་དོད་པའི་འཚོ་བ་སྐྱེལ་གྱི་ཡོད།

ཕྱི་དྲོའི་ཆུ་ཚོད་5པ་ཙམ་ལ་གསར་འགོད་པ་བྲག་ཕྱི་གྲོང་ཚོའི་ལམ་དུ་སྐྱོད་སྐབས། ཕར་འགྲོ་ཚུར་འོང་བྱེད་མཁན་མི་མང་པོ་མི་འདུག “ན་གཞོན་མང་ཆེ་བ་གྲོང་ཚོའི་མཉམ་སྡེབ་ཐོན་ལས་རྣམ་གྲངས་ཀྱི་ལས་ཀ་བྱེད་ཀྱི་ཡོད། ད་ཆ་གྲོང་ཚོའི་མཉམ་སྡེབ་དཔལ་འབྱོར་གྱི་ཡོང་འབབ་རག་པའི་བྲག་ཕྱི་གྲོང་ཚོས་ཐོན་ལས་གསར་པ་འཆར་འགོད་བྱས་ནས་ཆུ་དང་ལུད་གཞི་གཅིག་ཅན་གྱི་ཞིང་ལས་ལྟ་སྐོར་སྤྲོ་གསེང་གི་རྣམ་གྲངས་ཞིག་སྐྲུན་རྩིས་ཡོད”ཅེས་མིག་དམར་གྱིས་བཤད།