ཚེས་2ཉིན། རྒྱལ་ཁབ་ཀྱི་དབུལ་སྒྲོལ་འགག་སྒྲོལ་ཡོངས་ཁྱབ་ཞིབ་བཤེར་འགོ་ཁྲིད་ཚོགས་ཆུང་གི་ཚང་འཛོམས་གྲོས་ཚོགས་ཐེངས་གཉིས་པ་པེ་ཅིང་དུ་འཚོགས་ཤིང་། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་འགོ་ཁྲིད་ཚོགས་ཆུང་གི་ཙུའུ་ཀྲང་ཧུའུ་ཁྲུན་ཧྭ་ཡིས་ཚོགས་འདུ་གཙོ་སྐྱོང་གནང་བ་དང་འབྲེལ་གསུང་བཤད་ཀྱང་གནང་ཞིང་། ཁོང་གིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་གཞིར་བཟུང་། དབུལ་སྒྲོལ་འགག་སྒྲོལ་གྱི་ཡོངས་ཁྱབ་ཞིབ་བཤེར་གྱི་རྗེས་མཐུད་ལས་དོན་ཡག་པོ་བསྒྲུབས་ནས་ཡོངས་ཁྱབ་ཞིབ་བཤེར་གྱི་ལས་དོན་ཁག་དུས་བཀག་ལྟར་སྤུས་ཚད་མཐོ་པོས་ལེགས་འགྲུབ་ཡོང་བ་བྱེད་དགོས་པའི་ནན་བཤད་གནང་བ་རེད།
ཧུའུ་ཁྲུན་ཧྭ་ཡིས་དབུལ་སྒྲོལ་འགག་སྒྲོལ་གྱི་ཡོངས་ཁྱབ་ཞིབ་བཤེར་ལས་དོན་སྤེལ་འགོ་བཙུགས་ཚུན། རིམ་ཁག་ཡོངས་ཁྱབ་ཞིབ་བཤེར་སྒྲིག་གཞིའི་སྒྲིག་འཛུགས་ཞིབ་ཚགས་འོག་རྒྱ་ཆེའི་ཡོངས་ཁྱབ་ཞིབ་བཤེར་ལས་དོན་པས་གཏིང་ཟབ་ལ་ཞིབ་ཚགས་པ་དང་གྲུབ་འབྲས་གཟེངས་སུ་ཐོན་པའི་ལས་དོན་འབོར་ཆེན་སྒྲུབ་པ་དང་། ཡོངས་ཁྱབ་ཞིབ་བཤེར་གྱི་ས་གནས་ས་ཐོག་གི་ཐོ་འགོད་དང་། ལས་དོན་སྤེལ་རྗེས་ཀྱི་སྤུས་ཚད་འཐེན་བཤེར། གྲངས་གཞི་ཞིབ་བཤེར་ཐག་གཅོད་སོགས་ལས་འགན་གཙོ་བོ་དག་བདེ་བླག་ངང་ལེགས་སྒྲུབ་ཟིན་ཡོད། ཐོག་མཐའ་བར་གསུམ་དུ་རྗེས་མཐུད་ལས་དོན་ཡག་པོ་བསྒྲུབས་ཏེ་རྒྱལ་ཁབ་ཀྱི་དབུལ་སྒྲོལ་འགག་སྒྲོལ་གྱི་དོན་དངོས་དང་ཕྱོགས་ཡོངས་ཀྱི་གྲངས་གཞིའི་ཡིག་ཚགས་ཤིག་གྲུབ་པར་བྱས་ནས་ཡོངས་ཁྱབ་ཞིབ་བཤེར་གྱི་གྲུབ་འབྲས་ལ་ལོ་རྒྱུས་དང་ལག་ལེན་གྱི་ཚོད་བགམ་ཐེག་ཐུབ་པ་བྱེད་དགོས་ཞེས་བསྟན་གནང་བ་རེད།
ཧུའུ་ཁྲུན་ཧྭ་ཡིས་དབུལ་སྒྲོལ་འགག་སྒྲོལ་གྱི་ཡོངས་ཁྱབ་ཞིབ་བཤེར་གྱི་གྲུབ་འབྲས་ནི་ལས་སླ་པོར་ཐོབ་པ་ཞིག་མིན་པས་ངེས་པར་དུ་ཡག་པོ་སྤྱོད་དགོས་ཤིང་། ཡོངས་ཁྱབ་ཞིབ་བཤེར་གྱི་གྲུབ་འབྲས་དུས་ཐོག་ཏུ་བཀྲམ་སྟེ་ཚན་རིག་དང་མཐུན་ལ་དབང་གྲགས་ལྡན་པའི་ཡོངས་ཁྱབ་ཞིབ་བཤེར་གྱི་བྱེད་ཐབས་ལ་བརྟེན་ནས་དབུལ་སྒྲོལ་འགག་སྒྲོལ་གྱི་ཕན་འབྲས་ཕྱོགས་ཡོངས་ནས་མཚོན་པ་དང་། དབུལ་སྒྲོལ་ས་ཁུལ་དང་དབུལ་སྒྲོལ་མང་ཚོགས་ཀྱི་ཐོན་སྐྱེད་དང་འཚོ་བར་བྱུང་བའི་མངོན་གསལ་དོད་པའི་འགྱུར་ལྡོག་གསལ་བཤད་དངོས་འབྲེལ་བྱས་ནས་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ལེན་པའི་གོ་སྐོན་སློབ་གསོ་གཏོང་ཤུགས་ཆེ་རུ་གཏོང་དགོས་པ་དང་། ཡོངས་ཁྱབ་ཞིབ་བཤེར་གྱི་གྲངས་གཞི་གང་ལེགས་སྤྱད་དེ་དབུལ་པོ་རང་ལོག་སྔོན་འགོག་གི་སྟབས་བསྟུན་ལྟ་ཞིབ་ཚད་ལེན་དང་རོགས་སྐྱོར་ལམ་སྲོལ་འཐུས་སྒོ་ཚང་དུ་བཏང་སྟེ་དབུལ་སྒྲོལ་འགག་སྒྲོལ་གྱི་གྲུབ་འབྲས་དེ་བས་སྲ་བརྟན་དང་རྒྱ་སྐྱེད་གཏོང་དགོས་པ། ཡོངས་ཁྱབ་ཞིབ་བཤེར་བྱས་འབྲས་དེ་དབུལ་སྒྲོལ་ས་ཁུལ་གྱི་གྲོང་གསེབ་དར་རྒྱས་ལ་ཕྱོགས་ཡོངས་ནས་སྐུལ་འདེད་གཏོང་རྒྱུར་ཞིབ་འཇུག་འཆར་འགོད་དང་རྒྱུན་མཐུད་རྒྱབ་སྐྱོར་བྱེད་པའི་གཞི་འཛིན་ས་གལ་ཆེན་ཞིག་ལ་བརྩིས་ཏེ་རོགས་སྐྱོར་སྲིད་ཇུས་དང་། མ་དངུལ། རྣམ་གྲངས་སོགས་གྲོང་གསེབ་དར་རྒྱས་དང་འབྲེལ་མཐུད་ནུས་ལྡན་བྱ་རྒྱུར་སྐུལ་འདེད་གཏོང་དགོས་པའི་ནན་བཤད་གནང་བ་རེད།
ཚོགས་འདུའི་ཐོག་ཡོངས་ཁྱབ་ཞིབ་བཤེར་ལས་དོན་སྤེལ་ཚུལ་དང་གྲུབ་འབྲས་སྙན་སེང་གཙོ་བོར་གྲོས་ཞིབ་བྱས་པ་མ་ཟད་གོམ་སྟབས་རྗེས་མའི་ལས་དོན་ལ་ཞིབ་འཇུག་བཀོད་སྒྲིག་ཀྱང་བྱས་པ་རེད།