ཉེ་ཆར་གསར་འགོད་པར་ཤེས་རྟོགས་བྱུང་བར། 2020ལོར་བོད་ཀྱི་ཞིང་འབྲོག་པ་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་14598ཟིན་པ་དང་འཕར་ཚད་12.7%ཟིན་ཏེ། ལོ་18བསྟུད་མར་གྲངས་གནས་གཉིས་འཕར་བ་དང་ལོ་6་བསྟུད་མར་འཕར་ཚད་རྒྱལ་ཡོངས་ཀྱི་ཨང་དང་པོ་རྒྱུན་འཁྱོངས་ཐུབ་ཡོད།

“གྲོང་ཚོའི་ཐོན་ལས་དར་རྒྱས་བྱུང་བས། འབབ་འཕར་ཐབས་ལམ་ཇེ་ཡངས་སུ་སོང་བ་དང་། སྐྱིད་སྣང་དང་ཐོབ་སྣང་ཡང་ཧ་ཅང་ཆེན་པོ་འདུག”ཅེས་ལྷ་ས་གྲོང་ཁྱེར་ཆུ་ཤུར་རྫོང་ཚལ་སྣ་ཤང་གི་དུས་བཞིའི་བདེ་སྐྱིད་གྲོང་ཚོའི་ཧྲུའུ་ཅི་ཨང་དང་པོ་བསོད་ནམས་གཡང་སྐྱིད་ཀྱིས་གསར་འགོད་པར་བཤད། ཁོང་གིས“གྲོང་ཚོ་ཧྲིལ་པོར་ད་ཆ་བོད་རུམ་དང་། ཁང་པ་མཛེས་བཟོ། ལག་འཚེམ་རྒྱག་པ་སོགས་ཀྱི་མཉམ་ལས་ཁང་མང་པོ་ཡོད། གྲོང་ཚོའི་མཉམ་སྡེབ་ཀྱིས་ན་ནིང་ཟླ་11པར་བཙུགས་པའི་སྐྱེད་ཚལ་སྔོ་འགྱུར་ཀུང་སིས་ལས་གཉེར་བྱས་ནས་ཟླ་བ་གཉིས་ཀྱང་མ་སོང་བར་ཁེ་བཟང་སྒོར་ཁྲི་11རག་ཡོད”ཅེས་བཤད།

2020ལོར་རིམས་ནད་སྔོན་འགོག་དང་ཚོད་འཛིན་གྱི་རྒྱབ་ལྗོངས་འོག་བོད་དུ་ལོ་ཧྲིལ་པོར་དཔལ་འབྱོར་འཕར་ཚད་7.8%ཟིན་པ་དང་ས་ཁུལ་གྱི་ཐོན་སྐྱེད་རིན་ཐང་བསྡོམས་སྒོར་དུང་ཕྱུར་1900ལས་བརྒལ་ནས། སྔོན་ལ་གཏན་འཁེལ་ནད་དཔེ་མེད་པ་བཟོ་བ་དང་། སྔོན་ལ་ལས་འགོ་བསྐྱར་འཛུགས་དང་ཐོན་སྐྱེད་སླར་གསོ་ཐུབ་པ། སྔོན་ལ་དཔལ་འབྱོར་འཕེལ་རྒྱས་བྱུང་བ་བཅས་ལོ་ཧྲིལ་པོའི་དམིགས་ཚད་ལས་འགན་བདེ་བླག་ངང་ལེགས་གྲུབ་ཐུབ་ནས་རིམས་འགོག་དང་འཕེལ་རྒྱས་གཉིས་ཀར་དམ་འཛིན་གྱིས་འཐུས་ཤོར་མི་ཡོང་བ་བྱས་པ་རེད།