2021ལོ་ནི་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་100འཁོར་བ་དང“ལོ་ལྔ་ཚན་བཅུ་བཞི་པའི”འཆར་འགོད་ལག་བསྟར་བྱེད་འགོ་ཚུགས་པའི་ལོ་ཞིག་ཡིན་པ་དང་། སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཕྱོགས་ཡོངས་ནས་འཛུགས་སྐྲུན་བྱེད་པའི་རྒྱང་སྐྱོད་བགྲོད་ལམ་གསར་པར་སྐྱོད་འགོ་ཚུགས་པ་དང་ལོ་བརྒྱ་གཉིས་པའི་འབད་འཐབ་དམིགས་ཚད་སྒྲུབ་འགོ་ཚུགས་པའི་ལོ་ཞིག་ཡིན་ལ། བོད་ཞི་བས་བཅིངས་འགྲོལ་བཏང་ནས་ལོ་70འཁོར་བའི་ལོ་ཞིག་ཀྱང་ཡིན། ང་ཚོས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་མཛུབ་ཁྲིད་འོག གོང་འཕེལ་གྱི་དུས་མཚམས་གསར་པ་སྟངས་འཛིན་དང་། གོང་འཕེལ་གྱི་འདུ་ཤེས་གསར་པ་ལག་བསྟར། གོང་འཕེལ་གཏོང་ཕྱོགས་གསར་པ་འཛུགས་སྐྱོང་བཅས་བྱས་ཏེ་ཆབ་སྲིད་ལ་སྣང་ཆེན་བྱེད་པའི་མཐོ་ཚད་ནས་དཔལ་འབྱོར་ལས་དོན་བསྒྲུབས་ཏེ་གོམ་པ་དང་པོ་ཡག་པོ་སྤོ་བ་དང་རྣམ་པ་གསར་པ་ཞིག་གཏོད་ཐུབ་པ་བྱེད་དགོས།

འདི་ལོའི་ལས་དོན་གྱི་སྔོན་དཔག་དམིགས་ཚད་གཙོ་བོ་ནི་ས་གནས་ཀྱི་ཐོན་སྐྱེད་སྤྱིའི་རིན་ཐང་9%ཡན་འཕར་བ་བྱེད་རྒྱུ་དང་། གྲོང་ཁྱེར་དང་གྲོང་གསེབ་ཀྱི་ཡུལ་མི་མི་རེའི་ཆ་སྙོམས་ལག་ཐོག་ཡོང་འབབ་10%དང་13%ཡན་འཕར་བ་བྱེད་རྒྱུ། གྲོང་ཁྱེར་དང་གྲོང་རྡལ་གྱི་བརྟག་དཔྱད་ལས་ཤོར་བསྡུར་ཚད་5.5%ཡས་མས་དང་གྲོང་ཁྱེར་དང་གྲོང་རྡལ་གྱི་ལས་ཞུགས་གསར་འཕར་མི་ཁྲི་5ཟིན་པ་བྱེད་རྒྱུ། གྲོང་མིའི་འཛད་སྤྱོད་རིན་གོང་འཕར་ཚད་3%ཡས་མས་སུ་ཚོད་འཛིན་བྱེད་རྒྱུ། འབྲུ་རིགས་ཐོན་འབོར་ཀྲོན་ཁྲི་100ཡན་བརྟན་འཁྱོངས་ཐུབ་པ་བྱེད་རྒྱུ། ནུས་རྒྱུ་ཟད་གྲོན་དང་། ཐཱན་འབུད་བྱེད་ཤུགས། སྦགས་བཙོག་ཉུང་གཏོང་བཅས་ཀྱི་དམིགས་ཚད་དེ་རྒྱལ་ཁབ་ཀྱིས་ཞིབ་དཔྱད་གཏན་འཁེལ་བྱས་པའི་ཁྱབ་ཁོངས་ནང་ཚོད་འཛིན་ཐུབ་པ་བྱེད་རྒྱུ་བཅས་ཡིན།

སྟོབས་ཤུཌ་གཅིག་ཏུ་བསྒྲིལ་ནས་ཀྲུང་ཧྭ་མི་རིཌ་གཅིག་མཐུན་ཚོགས་པའི་འདུ་ཤེས་སྲ་བརྟན་དུ་གཏོང་རྒྱུ།

རིག་གནས་ལ་མོས་པ་བྱེད་རྒྱུར་སྐུལ་འདེད་གཏོང་རྒྱུ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་དུ་གཏོང་བའི་ལྟ་དེབ་དང་བསླབ་གཞི་ཁག་གཅིག་རྩོམ་འབྲི་བྱེད་རྒྱུ། “ཐང་བོད་གནའ་ལམ”དང“ཇ་རྟའི་གནའ་ལམ”དེ་གཉིས་མངོན་མིན་ཤུལ་བཞག་ཁོངས་སུ་འཇུག་རེ་ཞུ་བའི་ལས་དོན་སྤེལ་རྒྱུ། གཞི་རིམ་གྱི་རིག་གནས་སྒྲིག་བཀོད་ཀྱི་ཞབས་ཞུའི་ནུས་པ་ཆེ་རུ་གཏོང་རྒྱུ་དང་གྲོང་ཚོ་རིམ་པའི་མང་ཚོགས་རང་བཞིན་གྱི་རིག་གནས་དཔེ་སྟོན་འཐབ་ས་100སྟོབས་ཆེར་གཏོང་རྒྱུ། ཀྲུང་ཧྭ་མི་རིགས་ཀྱི་མཐོང་ཚོར་སྣང་བརྙན་གཏིང་ཟབ་བཟོ་རྒྱུ། ཀྲུང་ཧྭ་མི་རིགས་ཀྱི་ཐུན་མོང་བསམ་པའི་ཁྱིམ་གཞིས་ཡག་པོ་འཛུགས་པ་དང་མི་རིགས་ཁག་དབར་འགྲོ་འོང་དང་། སྤེལ་རེས། མཉམ་འདྲེས་བཅས་བྱེད་པའི་རིག་གནས་དར་སྤེལ་གཏོང་རྒྱུ། སྐྱིད་གྲོང་གི་ཆེན་པོ་ཐང་གི་ཕོ་ཉ་འཕགས་ཡུལ་དུ་མངགས་པའི་བརྐོས་ཡིག་སོགས་ཀྱི་ལོ་རྒྱུས་བཤམས་སྟོན་ཁང་10ཡན་འཛུགས་རྒྱུ་དང་། རྫ་ཡུལ་རི་ལྡེབས་དཔའ་བོའི་དྲན་གསོ་ཁང་སོགས་རྒྱལ་གཅེས་རིང་ལུགས་ཀྱི་སློབ་གསོའི་རྟེན་གཞི་10ཡན་རིམ་སྤོར་བཟོ་བཅོས་བྱེད་རྒྱུ།

མི་རིགས་མཐུན་སྒྲིལ་ལ་སྐུལ་འདེད་གཏོང་རྒྱུ། ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པར་མ་ལག་ལྡན་པའི་ཚོད་སྐོར་དང་ཕྱོགས་བསྡོམས་བྱས་ཏེ“དབུལ་གྲོལ་འགག་སྒྲོལ་བྱེད་པའི་ནང་གཅིག་ཀྱང་མི་ལུས་པ”དང་“ཕྱོགས་ཡོངས་ནས་འབྱོར་འབྲིང་སྐྲུན་པའི་ལམ་བུའི་ཐོག་མི་རིགས་གཅིག་ཀྱང་མཇུག་ཏུ་མི་ལུས་པའི”གསོན་ཉམས་ལྡན་པའི་དཔེ་མཚོན་ཐོག་ནས་ལྗོངས་ཡོངས་ཀྱི་མི་དམངས་ལ་ང་ཚོའི་མི་རིགས་འདྲ་མཉམ་ནི་གཞི་ནས་དངོས་འབྲེལ་གྱི་འདྲ་མཉམ་ཡིན་པའི་སློབ་གསོ་སྤེལ་རྒྱུ། མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་འཛུགས་གཏོད་བྱས་ཏེ“ལས་གཞི་ཆེན་པོ་ལྔ”སྤེལ་རྒྱུ། 《མི་རིགས་མཐུན་སྒྲིལ་ཡར་ཐོན་གྱི་ཤེས་བྱ་ཀུན་བཏུས་ཆེན་མོ(བོད་ལྗོངས་བམ་པོ)》རྩོམ་སྒྲིག་བྱེད་འགོ་འཛུགས་རྒྱུ། ལྗོངས་ཕྱིར་མི་གྲངས་7400ཡན་ལས་ཞུགས་ཐུབ་པ་བྱེད་རྒྱུ།

བོད་བརྒྱུད་ནང་བསྟན་ཀྲུང་གོ་ཅན་དུ་འགྱུར་བར་སྐུལ་འདེད་གཏོང་རྒྱུ། ཏང་གི་ཆོས་ལུགས་སྲིད་ཇུས་ཕྱོགས་ཡོངས་ནས་ལག་བསྟར་དོན་འཁྱོལ་བྱས་ཏེ“ཕན་འདོགས་པ་ལྔ”ལག་བསྟར་ནན་ཏན་བྱེད་པ་དང་། ཆོས་ལུགས་ལས་དོན་སྲོལ་ཡིག་དོན་འཁྱོལ་གཏིང་ཟབ་བྱས་ཏེ། “ཚད་གཞི་བཞི་བརྩི་སྲུང་ལག་བསྟར”བྱེད་པའི་སློབ་གསོ་ལག་ལེན་བྱེད་སྒོ་རྒྱུན་རྣམ་ཅན་དུ་གྱུར་བའི་ལམ་ལུགས་དང་ལམ་སྲོལ་འཛུགས་རྒྱུ། བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་དོ་དམ་བྱེད་པའི་སྒྲོག་འགྲེལ་དྲིལ་བསྒྲགས་བྱེད་པར་ཤུགས་སྣོན་བརྒྱབ་སྟེ་བླ་སྤྲུལ་ཆེ་རིགས་ཀྱི་ཡང་སྲིད་ངེས་པར་དུ“རྒྱལ་ནང་དུ་བཙལ་འཚོལ་དང་། གསེར་བུམ་དཀྲུག་འདོན། ཀྲུང་དབྱང་གི་ཆོག་མཆན་ཐོབ་པ”བཅས་བྱེད་པའི་གལ་ཆེའི་རྩ་དོན་མཐའ་འཁྱོངས་བྱེད་རྒྱུ་མི་སེམས་སུ་དེ་བས་གཏིང་ཟབ་ཟུག་པ་བྱེད་རྒྱུ། དགོན་སྡེར་མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་འཛུགས་གཏོད་བྱེད་པའི་བྱེད་སྒོ་སྤེལ་ནས“མོས་པ་ལྔ”ཆེ་རུ་ཏན་ཏིག་འགྲོ་བ་བྱེད་རྒྱུ། ཆོས་དད་མང་ཚོགས་ཀྱིས་ཆོས་ལུགས་ལ་དཔྱོད་ཤེས་ཀྱི་ལྟ་སྟངས་བཟུང་ནས་ཚེ་འདིའི་བདེ་སྐྱིད་འཚོ་བ་ཡག་པོ་སྐྱེལ་རྒྱུར་སློབ་གསོ་ཁྲིད་སྟོན་བྱེད་རྒྱུ།

སྟོབས་ཤུགས་གཅིག་ཏུ་བསྒྲིལ་ནས་གོང་འཕེལ་གཏོང་ཕྱོགས་གསར་པ་འཛུགས་སྐྱོང་བྱེད་རྒྱུ།

ཚན་རྩལ་གསར་གཏོད་བྱེད་པར་ཤུགས་སྣོན་རྒྱག་རྒྱུ། ཚན་རྩལ་གྱི་ཆེད་དམིགས་རྣམ་གྲངས་གལ་ཆེན་ལག་བསྟར་གཏིང་ཟབ་བྱེད་རྒྱུ། མཚོ་བོད་ས་མཐོའི་ཕྱོགས་བསྡུས་ཚན་རིག་རྟོག་ཞིབ་ཐེངས་གཉིས་པའི་ནང་ཟབ་ཞུགས་བྱེད་རྒྱུ། ནས་དང་ཁྱད་ལྡན་སྤུས་ལེགས་ཕྱུགས་བྱའི་རྒྱུད་བཟང་གསོ་སྤེལ་ཁྱབ་གདལ་གང་མགྱོགས་གཏོང་རྒྱུ། ཆེད་ལས་ལག་རྩལ་མི་སྣ་དང་རྩལ་ནུས་ཤེས་ལྡན་པའི་སྤྱི་འབོར་4500མང་དུ་འགྲོ་བ་བྱེད་རྒྱུ། རང་སྐྱོང་ལྗོངས་རིམ་པ་འདི་གའི་ནོར་སྲིད་དང་སྤྱི་ཚོགས་ནས་ཚན་རྩལ་ཐད་གཏོང་ཆ་གཉིས་ཀ་10%ཡན་འཕར་བ་བྱེད་རྒྱུ།

མཉམ་སྦྲེལ་མཉམ་མཐུད་བྱེད་ཤུགས་ཆེ་རུ་གཏོང་རྒྱུ། ལོ་ཧྲིལ་པོར་ཀྲུང་དབྱང་གི་མ་འཇོག་སྒོར་དུང་ཕྱུར་500ཡན་དོན་འཁྱོལ་ཐུབ་པ་དང་། སྤྱི་ཚོགས་ཡོངས་ཀྱི་གཏན་འཇགས་རྒྱུ་ནོར་གྱི་མ་འཇོག་5%ཡན་འཕར་བ་བྱེད་རྒྱུ། ནག་ཆུ་ནས་ལྷ་ས་བར་གྱི་རིམ་མཐོའི་གཞུང་ལམ་བསྐྲུན་ཟིན་པ་བྱེད་རྒྱུ་དང་། ལྷ་ས་ནས་གཞིས་རྩེ་གནམ་ཐང་བར་གྱི་རིམ་མཐོའི་གཞུང་ལམ་དང་S5ཡི་ལྷ་ས་ནས་ལྷོ་ཁའི་བར་གྱི་མྱུར་བགྲོད་གཞུང་ལམ་བསྐྲུན་མགྱོགས་སུ་གཏོང་རྒྱུ། ལྷ་ཉིང་ལྕགས་ལམ་བསྐྲུན་ནས་སྤྱོད་འགོ་འཛུགས་ཐུབ་པ་བྱས་ཏེ“བསྐྱར་དར་རྟགས་ཅན”གྱི་ཤུགས་འགྲེམས་མེ་འཁོར་ས་མཐོར་ཤར་གཏོང་ཐུབ་པ་བྱས་ཏེ་བོད་ལྗོངས་ཀྱི་མྱུར་བགྲོད་མེ་འཁོར་དུས་རབས་ཀྱི་སྒོ་མོ་འབྱེད་རྒྱུ།

འཛད་སྤྱོད་ཀྱིས་སྐུལ་ཁྲིད་བྱེད་པར་ཤུགས་སྣོན་རྒྱག་རྒྱུ། ཚོང་དོན་འཁོར་རྒྱུག་མ་ལག་དེ་ཐག་རིང་གྲོང་གསེབ་ཏུ་སྣུར་བསྲིང་བྱེད་པར་སྐུལ་འདེད་གཏོང་རྒྱུ་དང་། ཟོག་འགྲུལ་མ་ལག་འཛུགས་རྒྱུར་ཤུགས་སྣོན་བརྒྱབ་སྟེ“བོད་ཟོག་ཕྱིར་གཏོང་”བྱེད་པར་སྐུལ་འདེད་གཏོང་རྒྱུ། འདོན་སྤྲོད་འགན་ལེན་དང་། འགྲོ་རྒྱུག་ཤར་གཏོང་། ཟོག་གོང་བརྟན་པོ་བཅས་ཡོང་བ་བྱས་ཏེ་སྤྱི་ཚོགས་ཀྱི་འཛད་སྤྱོད་དངོས་ཟོག་སིལ་ཚོང་སྤྱི་འབོར་10%ཡས་མས་འཕར་ཐུབ་པ་བྱེད་རྒྱུ།

ཁུལ་ཁོངས་མཐུན་སྦྱོར་ཡོང་བར་ཤུགས་སྣོན་རྒྱག་རྒྱུ། ལྷ་སའི་སྣེ་འདྲེན་སྐུལ་ཁྲིད་ཀྱི་ནུས་པ་འདོན་སྤེལ་བྱས་ཏེ་གྲོང་ཁྱེར་ལྔ་ཡི་ཆུ་ཚོད་གསུམ་གྱི་དཔལ་འབྱོར་འཁོར་རྒྱ་བཟོ་རྒྱུ།

སྟོབས་ཤུགས་གཅིག་ཏུ་བསྒྲིལ་ནས་དབུལ་གྲོལ་འགག་སྒྲོལ་དང་གྲོང་གསེབ་དར་རྒྱས་གཏོང་རྒྱུ་ཕན་ཚུན་འབྲེལ་མཐུད་བྱེད་རྒྱུ།

དབུལ་གྲོལ་འགག་སྒྲོལ་ཕྱོགས་ཡོངས་ནས་སྲ་བརྟན་དང་རྒྱ་སྐྱེད་གཏོང་རྒྱུ། བར་བརྒལ་དུས་སྐབས་རིང་“མི་འདོར་བ་བཞི”དོན་འཁྱོལ་ནན་པོ་བྱས་ཏེ་རོགས་སྐྱོར་སྲིད་ཇུས་སྤྱིའི་ཆ་ནས་བརྟན་འཁྱོངས་བྱེད་པ་དང་། མ་དངུལ་སྒོར་དུང་ཕྱུར་160སྒྲིལ་སྤྱོད་བྱས་ཏེ་དབུལ་གྲོལ་འགག་སྒྲོལ་གྱི་གྲུབ་འབྲས་མུ་མཐུད་སྲ་བརྟན་དང་རྒྱ་སྐྱེད་གཏོང་རྒྱུ། དབུལ་སྐྱོར་ཐོན་ལས་རྣམ་གྲངས་ཀྱི་རྒྱུ་ནོར་དང་མ་དངུལ་གཙང་བཤེར་བྱས་ཏེ་ཕན་འབྲས་སྲ་བརྟན་གོང་མཐོར་གཏོང་རྒྱུ། ཡུལ་སྤོས་དབུལ་སྐྱོར་དང“ས་ངན”ཁུལ་གྱི་གནས་སྤོས་རྗེས་མཐུད་ཀྱི་རོགས་སྐྱོར་ལས་དོན་ཡག་པོ་བསྒྲུབ་རྒྱུ།

གྲོང་གསེབ་དར་རྒྱས་གཏོང་བར་ཕྱོགས་ཡོངས་ནས་སྐུལ་འདེད་གཏོང་རྒྱུ། “བླ་ན་མེད་པའི་རྒྱལ་ཁོངས་སྲུང་མཁན་ཞིག་དང་བདེ་སྐྱིད་ལྡན་པའི་ཁྱིམ་གཞིས་སྐྲུན་མཁན་ཞིག་བྱེད་རྒྱུ”བརྗོད་དོན་གཙོ་བོར་བྱས་པའི་གྲོང་གསེབ་དར་རྒྱས་གཏོང་བའི་འཐབ་ཇུས་ལག་བསྟར་གཏིང་ཟབ་བྱེད་རྒྱུ། ཞིང་ལས་ཀྱི་སྤུས་ཚད་དང་ཕན་འབྲས་ལེགས་སུ་འགྲོ་བར་སྐུལ་འདེད་གཏོང་རྒྱུ་དང་། རྨོ་ཞིང་གི་དམར་ཐིག་བརྟན་པོ་སྲུང་ནས་མུའུ་ཁྲི་20ཡན་གྱི་གཅིག་སྡུད་ཡུག་འབྲེལ་གྱི་གཞི་རྩའི་ས་ཞིང་གསར་སྤེལ་བྱེད་རྒྱུ། རྨོ་ཞིང་མུའུ་ཁྲི་200ཡི་སྤུས་ཚད་མཐོར་འདེགས་ལས་གཞི་སྤེལ་རྒྱུ། ཆུ་འདྲེན་རྒྱ་ཁྱོན་མུའུ་ཁྲི་120གསར་བཟོ་དང་ལེགས་བཅོས་བྱེད་རྒྱུ། ནས་ཐོན་འབོར་ཀྲོན་ཁྲི་80ཡན་བརྟན་གནས་ཐུབ་པ་བྱེད་རྒྱུ། ཕྱུགས་རིགས་མགོ་གྲངས་ཁྲི་30ཡི་རྒྱུད་བཟང་ལས་གཞི་སྤེལ་ཏེ་ཤ་རིགས་དང་དཀར་ཆུའི་ཐོན་འབོར་ཀྲོན་ཁྲི་100ཡན་བརྟན་གནས་ཐུབ་པ་བྱེད་རྒྱུ། མཛེས་སྡུག་འཚོ་སྡོད་ལ་འཕྲོད་པ་དང་། སྤྲོ་གསེང་ལས་གཉེར་ལ་འཚམ་པ། གཙང་ཞིང་གྲལ་འགྲིག་པ་བཅས་ཀྱི་གྲོང་སྡེ་100དཔེ་སྟོན་ཚོད་ལྟ་བྱེད་རྒྱུ། རྒྱུ་ནོར་ཁྲི་བརྒྱ་ལོན་པའི་མཉམ་ལས་ཁང་700ཡན་དང་ཁྲི་སྟོང་ལོན་པའི་མཉམ་ལས་ཁང་70ཡན་ཟིན་པ་བྱེད་རྒྱུ།

གྲོང་གསེབ་བསྒྱུར་བཅོས་ཕྱོགས་ཡོངས་ནས་གཏིང་ཟབ་ཏུ་གཏོང་རྒྱུ། འགན་གཙང་ལེན་པའི་ས་ཞིང་གཉེར་སྐྱོང་བྱེད་དབང་རིམ་ལྡན་བརྒྱུད་བཤུག་བྱེད་པར་སྐུལ་འདེད་བཏང་ནས་དོ་དམ་མངག་བཅོལ་གྱི་གཉེར་སྐྱོང་བྱེད་པར་སྐུལ་ལྕག་གཏོང་རྒྱུ། 50%ཡན་གྱི་མཁོ་འཚོང་མཉམ་ལས་ཁང“ཕྱོགས་བཞི་གཞི་གཅིག”གི་ཕྱོགས་བསྡུས་བསྒྱུར་བཅོས་ལེགས་འགྲུབ་ཐུབ་པ་བྱས་ཏེ་བཟོ་ལས་ཐོན་རྫས་གཤམ་གཏོང་དང་ཞིང་ལས་ཐོན་རྫས་གྲོང་ཁྱེར་དུ་གཏོང་བའི་ལེགས་ལམ་དེ་བས་ཤར་གཏོང་ཐུབ་པ་བྱེད་རྒྱུ།

སྟོབས་ཤུགས་གཅིག་ཏུ་བསྒྲིལ་ནས་ཁྱད་ལྡན་ལེགས་ཆ་ཆེ་བའི་ཐོན་ལས་གོང་འཕེལ་གཏོང་རྒྱུ།

ས་མཐོའི་སྐྱེ་དངོས་ཐོན་ལས་གོང་འཕེལ་ཤུགས་ཆེ་གཏོང་རྒྱུ། སྤྱི་གནོད་མེད་པའི་སྔོ་ཚལ་དང་ས་མཐོའི་ཤིང་འབྲས་སོགས་ཀྱི་རྟེན་གཞི་ཆེན་པོ་ལྔ་གང་མགྱོགས་འཛུགས་སྐྲུན་བྱེད་རྒྱུ། ནས་དང་། འབྲི་གཡག བོད་ཕག བོད་ལུག ཇ་ལོ་སོགས་ཀྱི་ཐོན་ལས་རྟེན་གཞི་ཚད་གཞི་མཐོན་པོའི་ངང་འཛུགས་སྐྲུན་བྱེད་རྒྱུ། རྒྱལ་རྩེ་སོགས་ཀྱི་སྤུས་ལེགས་ནས་སོན་རྟེན་གཞི་གལ་ཆེན་འཛུགས་སྐྲུན་ཡག་པོ་བྱེད་རྒྱུ། ཞིང་ཕྱུགས་ཐོན་རྫས་བཟོ་སྣོན་བྱས་ནས་ཕྱོགས་བསྡུས་དངོས་སྒྱུར་བྱེད་ཚད་20%ཡན་ཟིན་པ་དང་ཐོན་འབོར་རིན་ཐང་10%ཡན་འཕར་བ་བྱེད་རྒྱུ།

རིག་གནས་ཡུལ་སྐོར་ཐོན་ལས་གོང་འཕེལ་ཤུགས་ཆེ་གཏོང་རྒྱུ། རིག་གནས་ཡུལ་སྐོར་ཐོན་ལས་ལ་མ་འཇོག་སྒོར་དུང་ཕྱུར་100ཡན་ཟིན་པ་བྱེད་རྒྱུ། མཁའ་འགྲུལ་ལམ་ཐིག་20མང་དུ་བཏང་ནས་ལྗོངས་ནང་ཁོངས་ཀྱི་མཁའ་ལམ་སྤ་སེའི་རིན་གོང་ལོ་འདིའི་ནང་སླར་ཡང་20%ཆག་པ་བྱེད་རྒྱུ་དང་། དམངས་སྤྱོད་མཁའ་འགྲུལ་གྱི་འགྲུལ་པ་དབོར་འདྲེན་བྱེད་ཚད་མི་ཐེངས་ཁྲི་600ལས་བརྒལ་བ་བྱེད་རྒྱུ། ཡུལ་སྐོར་མི་ཐེངས་དང་ཡུལ་སྐོར་ཡོང་འབབ་གཉིས་ཀ་20%ཡན་འཕར་ཐུབ་པ་བྱ་རྒྱུ།

འབྱུང་འཕྲོད་བཟོ་ལས་དང་། དེང་རབས་ཞབས་ཞུའི་ལས་རིགས། མཐོ་གསར་གྲངས་འཛིན་ཐོན་ལས། མཐའ་མཚམས་ཚོང་དོན་ཟོག་འགྲུལ་ཐོན་ལས་བཅས་གོང་འཕེལ་ཤུགས་ཆེ་གཏོང་རྒྱུ། ཨར་སྐྲུན་རྒྱུ་ཆ་དང་། ཟངས་དང་ལི་གཏེར། རང་བྱུང་འཐུང་ཆུ། ཀོ་ལྤགས་འཁལ་འཐག་བཟོ་སྣོན་སོགས་ཀྱི་འབྱུང་འཕྲོད་བཟོ་ལས་གང་མགྱོགས་གོང་འཕེལ་བཏང་ནས་མ་འཇོག་སྒོར་དུང་ཕྱུར་100ཡན་ལེགས་འགྲུབ་བྱེད་རྒྱུ། ཚོང་དོན་འཁོར་རྒྱུག་གི་འགག་ས་བཤངས་བ་དང་མཐའ་མཚམས་ཟོག་འགྲུལ་ཐོན་ལས་གོང་འཕེལ་བཏང་སྟེ་འཕར་ཐང་20%ཡན་འཕར་ཐུབ་པ་བྱེད་རྒྱུ།

གྲགས་རྟགས་གཏོད་རྒྱུར་ཤུགས་སྣོན་གང་ཆེ་རྒྱག་རྒྱུ། “ས་གོ་ལའི་གླིང་སྣེ་གསུམ་པའི”ཁུལ་ཁོངས་ཀྱི་སྤྱི་པའི་གྲགས་རྟགས་ཁྱབ་གདལ་ཡག་པོ་བཏང་སྟེ་གྲགས་རྟགས་ལས་རིགས་ཀྱི་མནའ་འབྲེལ་ཡག་པོ་འཛུགས་པ་དང་། གྲགས་རྟགས་འགྲེམས་ཚོང་ལྟེ་གནས་གཉེར་སྐྱོང་ཡག་པོ་བྱས་ཏེ་གྲགས་རྟགས་ཧྲིལ་པོའི་མཚན་སྙན་ཆེ་རུ་གཏོང་རྒྱུ།

སྟོབས་ཤུཌ་གཅིག་ཏུ་བསྒྲིལ་ནས་བསྒྱུར་བཅོས་སྒོ་དབྱེ་གཏིང་ཟབ་ཏུ་གཏོང་རྒྱུ།

ཚོང་གཉེར་ཁོར་ཡུག་རྒྱུན་མཐུད་ངང་ལེགས་སུ་གཏོང་རྒྱུ། དམངས་ལ་སྟབས་བདེ་དང་ཁེ་ལས་ལ་ཕན་པ་སྐྲུན་པའི་བྱ་ཐབས་དོན་འཁྱོལ་གཏིང་ཟབ་བྱས་ཏེ་སྲིད་དོན་ཞབས་ཞུའི་ལས་སྟེགས་ཀྱི་འཁོར་སྐྱོད་ནུས་པ་ཆེ་རུ་གཏོང་རྒྱུ། སྲིད་དོན་ཞབས་ཞུའི་ལས་དོན“རིམ་པ་ལྔར་ཁེབས་པ”བྱེད་རྒྱུ་སྲ་བརྟན་དུ་གཏོང་བ་དང་། “མཉམ་སྦྲེལ་དྲ་རྒྱ+སྲིད་དོན་ཞབས་ཞུ”རྒྱ་སྐྱེད་གཏོང་རྒྱུ། རྣམ་གྲངས་100དེ“དོན་གཅིག་ཐེངས་གཅིག་ལ་འགྲུབ་པར”སྐུལ་འདེད་གཏོང་རྒྱུ་དང་དོན་དག་132ཞིང་ཆེན་ལས་བརྒལ་ནས་ཀུན་སྒྲུབ་ཐུབ་པ་བྱེད་རྒྱུ། ཚོང་འགུག་མ་འདྲེན་ཐད་མ་དངུལ་སྒོར་དུང་ཕྱུར་600ཡན་གནས་འཁྱོལ་ཐུབ་པ་བྱེད་རྒྱུ་དང་། དམངས་ཁྲོད་ཀྱི་མ་འཇོག་20%ཡན་འཕར་ཐུབ་པ་བྱེད་རྒྱུ།

གཞུང་ཁོངས་རྒྱུ་ནོར་དང་གཞུང་ཁོངས་ཁེ་ལས་བསྒྱུར་བཅོས་མུ་མཐུད་གཏིང་ཟབ་ཏུ་གཏོང་རྒྱུ། གཞུང་ཁོངས་དཔལ་འབྱོར་གྱི་གཙོ་ཁྲིད་ནུས་པ་འདོན་སྤེལ་བྱེད་རྒྱུ། གཞུང་ཁོངས་ཁེ་ལས་བསྒྱུར་བཅོས་བྱེད་པའི་ལོ་གསུམ་བྱ་སྤྱོད་ལ་སྐུལ་སྤེལ་གཏོང་རྒྱུ། ཀྲུང་དབྱང་ཁེ་ལས་དང་མ་རྩ་མཉམ་འཇོག་གིས་མཉམ་ལས་གཏིང་ཟབ་བྱས་ཏེ“གཅིག་བྱས་པ་ལྔའི་ལས་གྲྭ”ལག་བསྟར་བྱེད་རྒྱུ། གཉེར་སྐྱོང་རང་བཞིན་གྱི་གཞུང་ཁོངས་རྒྱུ་ནོར་ལ་གཅིག་གྱུར་ལྟ་སྡོམ་བྱེད་པར་སྐུལ་འདེད་བཏང་ནས་དོ་དམ་རིམ་གྲས་ཉུང་དུ་གཏོང་རྒྱུ་དང་། ཀུང་སིའི་བཅོས་སྐྱོང་འཐུས་ལེགས་སུ་གཏོང་རྒྱུ་དང་སྐོར་ཞིབ་རྩིས་བཤེར་གྱི་ལྟ་སྐུལ་བྱེད་ཤུགས་ཆེ་རུ་གཏོང་རྒྱུ།

དམངས་གཉེར་དཔལ་འབྱོར་གོང་འཕེལ་འགྲོ་བར་རྒྱུན་མཐུད་སྐུལ་འདེད་གཏོང་རྒྱུ། ཁྲོམ་རའི་བྱེད་པོ་གོང་འཕེལ་གཏོང་བར་རང་སྐྱོང་ལྗོངས་ཀྱིས་རྒྱབ་སྐྱོར་དང་སྲུང་སྐྱོབ་བྱེད་པའི་སྲིད་ཇུས་དོན་ཚན་སོ་དྲུག་ཕྱོགས་ཡོངས་ནས་དོན་འཁྱོལ་བྱས་ཏེ་དམངས་གཉེར་ཁེ་ལས་ཀྱི་བདག་དབང་དང་ཁེ་ལས་པའི་ཁེ་དབང་ཁྲིམས་ལྟར་འདྲ་མཉམ་སྲུང་སྐྱོབ་བྱེད་རྒྱུ། ཁེ་ལས་མཁས་པའི་སྙིང་སྟོབས་འཛུགས་སྐྱོང་བྱེད་རྒྱུ། ལས་རིགས་ཀྱི་སྣེ་འདྲེན་དང་ཚོང་ཚོགས་མཐུན་ཚོགས་ཀྱི་ནུས་པ་འདོན་སྤེལ་བྱས་ནས་ཁེ་ལས་ཆེ་འབྲིང་ཆུང་གསུམ་མཉམ་འདྲེས་ཐོག་འཁོར་རྒྱུག་གོང་འཕེལ་འགྲོ་བར་སྐུལ་འདེད་གཏོང་རྒྱུ། རང་སྐྱོང་ལྗོངས་རིམ་པའི་སྲིད་གཞུང་རང་བཞིན་གྱི་མ་དངུལ་བསྡུ་རྒྱུག་ཁག་ཐེག་ཀུང་སིའི་ནུས་པ་འདོན་སྤེལ་བྱས་ཏེ་ཁེ་ལས་འབྲིང་ཆུང་ཕྲན་གསུམ་གྱི་མ་དངུལ་བསྡུ་རྒྱུག་དཀའ་བའི་གནད་དོན་ཐག་གཅོད་བྱེད་རྒྱུ། “གཡོ་འགུལ་སྤུ་ཙམ་ཡང་མི་གཏོང་བ་གཉིས”མཐའ་འཁྱོངས་བྱས་ཏེ་དམངས་གཉེར་དཔལ་འབྱོར་ཕྱོགས་ཡོངས་ནས་གོང་འཕེལ་གཏོང་བར་རོགས་འདེགས་བྱས་ནས་རིགས་ཁག་གི་ཁྲོམ་རའི་བྱེད་པོ་ཐེམ་དུད་ཁྲི་40ཡན་ཟིན་པ་བྱེད་རྒྱུ།

རྒྱལ་ཁབ་ཀྱི་ཁུལ་ཁོངས་གོང་འཕེལ་འཐབ་ཇུས་དང་མུ་མཐུད་འབྲེལ་མཐུད་བྱེད་རྒྱུ། “རྒྱུད་གཅིག་ལམ་གཅིག”དང་རེས་སྐོར་གསར་པའི་ནུབ་རྒྱུད་ཐོན་འབྱེད་ཆེ་མོའི་ནང་མཉམ་འདྲེས་ཟབ་མོ་བྱས་ཐོག ལྷ་སའི་རྒྱལ་ཁབ་རིམ་པའི་དཔལ་འབྱོར་ལག་རྩལ་གསར་སྤེལ་ཁུལ་དང་། མཐོ་གསར་ལག་རྩལ་ཐོན་ལས་གསར་སྤེལ་ཁུལ། བོད་མཚོ་བཟོ་ལས་སྡེ་གླིང་། གཞིས་རྩེ་སོགས་ཀྱི་རིམ་རིགས་ཁག་གི་གསར་སྤེལ་ཁུལ་རྒྱ་སྟོབས་ཆེ་རུ་བཏང་ནས་སྡེ་གླིང་བཟོ་ལས་ཀྱི་ཐོན་སྐྱེད་རིན་ཐང་20%ཡན་འཕར་ཐུབ་པ་བྱེད་རྒྱུ།

ཕྱི་ཕྱོགས་སུ་སྒོ་མོ་འབྱེད་རྒྱ་རྒྱུན་མཐུད་ནས་ཆེ་རུ་གཏོང་རྒྱུ། ཧི་མ་ལ་ཡ་རྒྱུད་ཀྱི་དཔལ་འབྱོར་མཉམ་ལས་ཁུལ་ཧུར་ཐག་འཛུགས་རྒྱུ། སྐྱིད་རོང་མཐའ་མཚམས་དཔལ་འབྱོར་མཉམ་ལས་ཁུལ་དང་གསར་སྤེལ་སྒོ་འབྱེད་ཀྱི་གཙོ་གནད་ཚོད་ལྟ་ཁུལ་ལོ་འདིའི་ནང་བསྐྲུན་རྒྱུའི་ཆོག་མཆན་ཐོབ་རྒྱུར་སྐུལ་སྤེལ་གཏོང་རྒྱུ། འགྲམ་འགག་སྒོའི་ཚོང་ཟོག་ཤར་གཏོང་བྱེད་ནུས་གོང་མཐོར་གཏོང་བ་དང་། གྲོ་མོ་དང་འདྲེན་ཐང(རི་འོག)གི་འགག་སྒོ་གསར་སྤེལ་སྒོ་འབྱེད་བྱེད་རྒྱུར་སྐུལ་སྤེལ་གཏོང་བ། ལ་རྩེའི་འགག་སྒོ་འཛུགས་སྐྲུན་བྱེད་མགྱོགས་སུ་གཏོང་བ། ལྷ་སའི་རྒྱལ་སྤྱིའི་མཁའ་འགྲུལ་འགག་སྒོའི་བྱེད་ནུས་རྒྱ་ཆེར་གཏོང་བ། མངའ་རིས་དགུན་ས་རྒྱལ་སྤྱིའི་འགག་སྒོ་འཛུགས་སྐྲུན་གྱི་སྔོན་གྲབས་ལས་དོན་མགྱོགས་སུ་སྤེལ་བ་བཅས་བྱེད་རྒྱུ། ཀྲུང་ནེའི་མཛའ་གྲོགས་བཟོ་ལས་སྡེ་གླིང་བསྐྲུན་རྒྱུར་སྐུལ་འདེད་གཏོང་རྒྱུ། ལྷ་སའི་ཕྱོགས་བསྡུས་ཁྲལ་མེད་ཁུལ་དུ་ཁེ་ལས་20ཡན་བཅའ་སྡོད་ཐུབ་པ་བྱེད་རྒྱུ་དང་ཕྱིར་གཏོང་ནང་འདྲེན་བྱེད་འབོར་སྒོར་དུང་ཕྱུར་10ཡན་ཟིན་པ་བྱེད་རྒྱུ།