གྲོང་ཁྱེར་དང་གྲོང་གསེབ་ཀྱི་ཡུལ་མིའི་ཡོང་འབབ་མཐོ་རུ་གཏོང་རྒྱུ། མ་མཐའི་གླ་ཕོགས་ཀྱི་ཚད་གཞི་ལེགས་སྒྲིག་བྱེད་རྒྱུ། གྲོང་གསེབ་ཀྱི་ཐོན་ཁུངས་རྒྱུ་ནོར་དང་མ་དངུལ་ཕན་སྒྱུར་ཐུབ་པར་བྱས་ཏེ་ཐོན་ཁུངས་རྒྱུ་ནོར་ལ་འགྱུར་བ་དང་། མ་དངུལ་རྐང་དངུལ་ལ་འགྱུར་བ། ཞིང་འབྲོག་པ་རྐང་བདག་ལ་འགྱུར་བ་བཅས་བྱས་ཐོག རྒྱུ་ནོར་རང་བཞིན་གྱི་ཡོང་འབབ་མང་དུ་གཏོང་རྒྱུ། མང་ཚོགས་ལྗོངས་ཕྱི་ནང་དུ་ལས་ཞུགས་བྱེད་པའི་ཆེད་དོན་འབྲེལ་མཐུད་ལམ་སྲོལ་འཐུས་ཚང་བཟོ་རྒྱུ། “གུད་གསབ་ལས་སྤྲོད”བྱེད་པའི་ཁྱབ་ཁོངས་དང་གཞི་ཁྱོན་ཆེ་རུ་གཏོང་རྒྱུ་དང་། སྒོར་ཁྲི་400མན་གྱི་སྲིད་གཞུང་གི་མ་འཇོག་རྣམ་གྲངས་འོས་ཐོབ་ཡོད་པའི་ཞིང་འབྲོག་པའི་ཨར་ལས་ཁེ་ལས་ལ་མུ་མཐུད་སྐྲུན་འགན་སྤྲད་དེ་ཨར་སྐྲུན་ཚན་པའི་ནང་ལྗོངས་ནང་ཁུལ་གྱི་ཞིང་འབྲོག་པའི་ལས་མི་སྤྱོད་ཚད་60%ཡན་ཟིན་པ་བྱེད་རྒྱུ། ཞིང་འབྲོག་པ་ཁ་སྒྱུར་ལས་ཞུགས་མི་ཁྲི་60ཡན་ཟིན་པ་དང་ངལ་ནུས་ཡོང་འབབ་སྒོར་དུང་ཕྱུར་50ཡན་ཟིན་པ་བྱེད་རྒྱུ།

སྤྱི་ཚོགས་ཀྱི་ལས་ཞུགས་འགན་སྲུང་བྱེད་ཤུགས་ཆེ་རུ་གཏོང་རྒྱུ། ཐབས་མང་མཉམ་དུ་སྤྱད་དེ་ལས་ཞུགས་རྒྱ་ཆེར་གཏོང་རྒྱུ། མཐོ་རིམ་སློབ་ཐོན་སློབ་མའི་ཕྱོགས་མང་གཞི་གཅིག་གི་ལས་ཞུགས་མ་ལག་འཐུས་སྒོ་ཚང་དུ་བཏང་སྟེ་ལོ་དེ་གའི་མཐོ་རིམ་སློབ་ཐོན་སློབ་མ་སྤྱི་ཡོངས་ལས་ཞུགས་ཐུབ་ཚད་95%ཡན་ཟིན་ཐུབ་པ་བྱེད་རྒྱུ། ཞིང་འབྲོག་པའི་རྩལ་ནུས་མངག་ཐོ་དང་། འདེམས་ཐོ། ལས་ཐོ་བཅས“ཐོ་གསུམ་རྣམ་པའི”གསོ་སྦྱོང་དང“ལས་ཚབ་སྦྱོང་བརྡར”སྤྲོས་རྒྱུ་ཁྱབ་གདལ་བཏང་སྟེ་མི་ཁྲི་10ཡན་ལ་རྩལ་ནུས་སྦྱོང་བརྡར་སྤྲོས་ཐུབ་པ་བྱེད་རྒྱུ། སྒྲིག་འཛུགས་ཡོད་པའི་ངལ་ནུས་ཕྱིར་གཏོང་བྱས་པའི་མི་གྲངས་ཀྱིས་གནས་སྒྱུར་ལས་ཞུགས་བྱས་པའི་མི་གྲངས་ཀྱི་60%ཡན་ཟིན་པ་བྱེད་རྒྱུ།

སློབ་གསོ་གོང་འཕེལ་གཏོང་བའི་སྤུས་ཚད་ལེགས་སུ་གཏོང་རྒྱུ། “བློ་སྦྱོང་བསླབ་སྐྱོང་དང་ཚད་ལོན་ལྔའི”ལས་དོན་ལ་སྐུལ་སྤེལ་ཤུགས་ཆེ་གཏོང་རྒྱུ་དང་“མཐོར་འདེགས་དྲུག”མངོན་འགྱུར་ཧུར་ཐག་བྱས་ཏེ་ཀུན་སྤྱོད་དང་། ཤེས་རིག གཟུགས་པོ། མཛེས་དཔྱོད། ངལ་རྩོལ་བཅས་ཕྱོགས་ཡོངས་ནས་གོང་འཕེལ་འགྲོ་བའི་སྤྱི་ཚོགས་རིང་ལུགས་ཀྱི་འཛུགས་སྐྲུན་པ་དང་རྒྱུན་འཛིན་པ་གསོ་སྐྱོང་བྱེད་རྒྱུ། ལས་རིགས་ལག་རྩལ་སློབ་གསོའི་སློབ་གཉེར་བྱེད་ཕྱོགས་ལེགས་སྒྱུར་འཐུས་ཚང་བཟོས་ནས་སློབ་བསྡུའི་གཞི་ཁྱོན་20%འཕར་བར་བྱེད་རྒྱུ་དང་ཐོན་སློབ་མཉམ་འདྲེས་ཀྱི་དངོས་སྦྱོང་རྟེན་གཞི་8བཟོ་རྒྱུ། མཐོ་རིམ་སློབ་གསོའི་བཟོ་སྐྲུན་རིག་ཚན་གསར་པ་དང་། གསོ་རིག་རིག་ཚན་གསར་པ། ཞིང་ལས་རིག་ཚན་གསར་པ། རིག་གནས་ཚན་ཁག་གསར་པ་བཅས་འཛུགས་རྒྱུར་ཕྱོགས་ཡོངས་ནས་སྐུལ་འདེད་གཏོང་རྒྱུ།

མི་དམངས་ཀྱི་བདེ་ཐང་ཆུ་ཚད་གོང་མཐོར་གཏོང་རྒྱུ། ཐོལ་བྱུང་གི་སྤྱི་པའི་འཕྲོད་བསྟེན་དོན་རྐྱེན་ཚབས་ཆེན་རིགས་འཕྲལ་སྡོམ་ཐག་གཅོད་དང་སྐྱོབ་བཅོས་ནུས་པ་གོང་མཐོར་གཏོང་རྒྱུ། བདེ་ཐང་བོད་ལྗོངས་ཀྱི་ཆེད་དོན་བྱ་སྤྱོད་17མགྱོགས་མྱུར་སྤེལ་རྒྱུ། ཁུལ་ཁོངས་སྨན་བཅོས་ལྟེ་གནས་དང་སྨན་བཅོས་འབྲེལ་ཚོགས་སྐྲུན་ཤུགས་ཆེ་རུ་གཏོང་རྒྱུ། སྦྲུམ་མ་སྨན་ཁང་དུ་བསྡད་ནས་ཕྲུ་གུ་སྐྱེ་རིགས་98%ཡན་ཟིན་པ་བྱེད་རྒྱུ་དང་། སྦྲུམ་མ་ཤི་ཚད་དང་ཕྲུ་གྲུ་དམར་འབྱར་ཤི་ཚད་གཉིས་ཀ་རྒྱུན་མཐུད་ནས་ཆག་པར་བྱེད་རྒྱུ། བོད་སྨན་གྱི་ཚད་གཞིའི་ལོ་གསུམ་བྱ་སྤྱོད་འཆར་གཞིར་སྐུལ་སྤེལ་ཧུར་ཐག་གཏོང་རྒྱུ། བདེ་འཕྲོད་ཇ་མཁོ་འདོན་རྒྱ་ཆེར་གཏོང་རྒྱུ།

སྤྱི་ཚོགས་འགན་སྲུང་གི་ནུས་པ་ཆེ་རུ་གཏོང་རྒྱུ། སྨན་བཅོས་འགན་བཅོལ་གྱི་རྩིས་ཞུ་ཐེངས་གཅིག་རང་ལ་དུས་རྩིས་རྒྱག་ཐུབ་པ་དང་ཞིང་ཆེན་ལས་བརྒལ་ནས་ས་གནས་གཞན་དུ་ཐད་ཀར་དུས་རྩིས་རྒྱག་ཐུབ་པ་བྱེད་རྒྱུ། རྒན་གསོའི་ཞབས་འདེགས་འགན་སྲུང་ལ་ཤུགས་སྣོན་རྒྱག་རྒྱུ། བྱིས་པ་དང་དབང་སྐྱོན་མི་སྣར་གཅེས་སྐྱོང་བྱེད་པའི་མ་ལག་འཐུས་སྒོ་ཚང་པོ་བཟོ་རྒྱུ། གྲོང་ཁྱེར་དང་གྲོང་གསེབ་ཀྱི་མ་མཐའི་འགན་སྲུང་ཚད་གཞི་ཁག་སོ་སོར་མི་རེར་ལོ་རེར་སྒོར་10920དང་སྒོར་5060བར་མཐོ་རུ་གཏོང་རྒྱུ། གྲོང་ཁྱེར་དང་གྲོང་གསེབ་ཀྱི་ཡུལ་མིའི་རྨང་གཞིའི་རྒན་གསོའི་གྲོན་དངུལ་ཚད་གཞི་སླར་ཡང་སྒོར་15ཡན་མཐོ་རུ་གཏོང་རྒྱུ།

དམངས་ལ་སྟབས་བདེ་དང་ཕན་པ་སྐྲུན་པའི་ཕན་འབྲས་དངོས་ཆེ་རུ་གཏོང་རྒྱུ། མི་དམངས་མང་ཚོགས་ཀྱི་ཐོན་སྐྱེད་དང་འཚོ་བ། ཚན་རྩལ་ཞབས་ཞུ། རྩལ་ནུས་སྦྱོང་བརྡར་སོགས་དང་འབྲེལ་བ་ཡོད་པའི“དམངས་ཕན་བྱ་ཐབས་ཁག་བཅུ”མུ་མཐུད་ལག་བསྟར་བྱས་ཏེ་ནོར་སྲིད་ཀྱི་གཏོང་སྒོ་སླར་ཡང་10%འཕར་བར་བྱེད་རྒྱུ། གྲོང་རྡལ་གྱི་སྡེ་ཁུལ་རྙིང་པ་36དང་སྡོད་ཁང་སྐྱོ་ཁུལ་གྱི་སྡོད་ཁང་ཆ་ཚང་5432བཟོ་བཅོས་བྱེད་རྒྱུར་སྐུལ་སྤེལ་གཏོང་རྒྱུ།

སྐྱེ་ཁམས་སྲུང་སྐྱོབ་ལ་སྐུལ་འདེད་གཏིང་ཟབ་གཏོང་རྒྱུ། སྐྱེ་ཁམས་ཤེས་དཔལ་གྱི་མཐོ་ས་བསྐྲུན་རྒྱུའི་འཆར་འགོད་བཟོས་ནས་ལག་བསྟར་བྱེད་རྒྱུ་དང་། ཐཱན་འབུད་ཚད་བཀག་མཐོ་ཤོས་ཀྱི་བྱ་སྤྱོད་ཇུས་གཞི་ཞིབ་འཇུག་བྱས་ནས་བཟོ་རྒྱུ། གནམ་གཤོས་ནགས་འདེབས་ཚོད་ལྟར་བརྟན་པོའི་ངང་སྐུལ་འདེད་བཏང་ཐོག མཚོ་རྩིས་མཐོ་ཚད་སྨི་4300མན་གྱི“འགྲམ་བཞིར”ཤིང་བཏབ་སྟེ་ནགས་བཟོ་མུའུ་ཁྲི་110ལེགས་གྲུབ་ཐུབ་པ་བྱེད་རྒྱུ།

སྦགས་བཙོག་འགོག་བཅོས་ཀྱི་འགག་སྒྲོལ་དམག་འཐབ་གཏིང་ཟབ་ཡག་པོ་རྒྱག་རྒྱུ། སྐྱེ་ཁམས་ཁོར་ཡུག་སྲུང་སྐྱོབ་ཀྱི་ལྟ་སྐུལ་དཔྱད་ཞིབ་བྱེད་རྒྱུ། མཛེས་སྡུག་ལྡན་པའི་བོད་ལྗོངས་སྐྲུན་པའི“བཅོས་སྐྱོང་གསུམ་དང་མཐོར་འདེགས་གསུམ”གྱི་བྱ་སྤྱོད་གཏིང་ཟབ་སྤེལ་རྒྱུ་དང་། གྲོང་ཁྱེར་གྲོང་རྡལ་གྱི་གད་སྙིགས་རིགས་དབྱེ་དང་། བསྡུ་འདྲེན། གཙང་སེལ་བཅས་བྱེད་པའི་མ་ལག་འཐུས་ཚང་བཟོ་རྒྱུ། ས་རྒྱུའི་སྦགས་བཙོག་འགོག་བཅོས་བྱ་སྤྱོད་དང་། ཁྲའེ་ཡིའུ་སྣུམ་སྤྱོད་ཟོག་འཁོར་གྱི་སྦགས་བཙོག་བཅོས་སྐྱོང་། “འགྱིག་སྙིགས་ཀྱི་བཙོག་སྐྱོན”བཅོས་སྐྱོང་བཅས་འགྲིལ་འདེད་རྣམ་པའི་ལག་བསྟར་བྱེད་རྒྱུ་དང་། ས་གནས་རིམ་པ་ཡན་གྱི་གྲོང་ཁྱེར་གྱི་མཁའ་རླུང་སྤུས་ཚད་ལེགས་འཁྱོངས་ཉིན་གྲངས་བསྡུར་ཚད་99%ཡན་ཟིན་པ་བྱེད་རྒྱུ།

སྐྱེ་ཁམས་ལས་གཞི་གལ་ཆེན་གཏིང་ཟབ་སྤེལ་རྒྱུ། སྐྱེ་ཁམས་བདེ་འཇགས་སྲུང་བཅད་སྲུང་སྐྱོབ་དང་འཛུགས་སྐྲུན་བྱེད་རྒྱུ་གཏིང་ཟབ་ཏུ་གཏོང་རྒྱུ། “གཙང་གཉིས་ཆུ་བཞི”རྒྱུག་ཁུལ་གྱི་ནགས་བཟོ་སྔོ་འགྱུར་དང་བྱེ་སྐྱོན་འགོག་བཅོས་སོགས་ཀྱི་གཙོ་གནད་ལས་གཞི་རྒྱུན་མཐུད་ནས་སྤེལ་རྒྱུ།

མཐའ་མཚམས་ཀྱི་རྨང་གཞིའི་སྒྲིག་བཀོད་འཛུགས་སྐྲུན་བྱེད་ཤུགས་ཆེ་རུ་གཏོང་རྒྱུ། མཐའ་མཚམས་ས་ཁུལ་གྱི་གྲོང་ཁྱེར་གྲོང་གསེབ་མཉམ་འདྲེས་གོང་འཕེལ་ལ་སྐུལ་འདེད་གཏོང་རྒྱུ་དང་། མཐའ་མཚམས་ས་ཁུལ་གྱི་གྲོང་ཚོ་གྲོང་རྡལ་འཛུགས་སྐྲུན་བྱེད་པའི་འཆར་འགོད་བཟོས་ནས་ལག་བསྟར་བྱེད་རྒྱུ། མཐའ་མཚམས་ས་ཁུལ་གྱི་རྒྱ་ལམ་འགྲིམ་འགྲུལ་མ་ལག་སྔར་བས་འཐུས་སྒོ་ཚང་དུ་གཏོང་རྒྱུ་དང་། གློག་དྲ་ཨ་མ་དང་སྒུལ་ཁྱེར་འཕྲིན་གཏོང་དྲ་རྒྱ་གང་མགྱོགས་ཁེབས་པར་བྱེད་རྒྱུ། མཐའ་མཚམས་རྫོང་གྲོང་ལ་དྲོད་གཏོང་ལས་གྲྭ་གང་མགྱོགས་སྤེལ་རྒྱུ། སྤྱི་པའི་ཞབས་ཞུ་དང་དོ་དམ་ཚན་པའི་ཁྱབ་བཀོད་ལེགས་སྒྱུར་བྱེད་རྒྱུ།

མི་འབོར་དང་དཔལ་འབྱོར་གྱི་འདེགས་སྐྱོར་བྱེད་ཤུགས་ཆེ་རུ་གཏོང་རྒྱུ། མཐའ་མཚམས་གྲོང་གསེབ་ཀྱི་སློབ་གྲྭའི་སྤྱི་སྤྱོད་གྲོན་དངུལ་དང་། རིན་མེད་སློབ་གསོ། དགེ་རྒན་གྱི་འཚོ་བའི་རོགས་དངུལ་ཚད་གཞི་བཅས་མཐོ་རུ་གཏོང་རྒྱུ། སྨན་བཅོས་འཕྲོད་བསྟེན་ཞབས་ཞུའི་ཆུ་ཚད་གོང་མཐོར་གཏོང་རྒྱུ། མཐའ་མིའི་ཁྲོམ་རའི་ཉོ་ཚོང་ཚད་ལྡན་འཛུགས་སྐྲུན་ལ་ཤུགས་སྣོན་རྒྱག་རྒྱུ་དང་ཚོང་དོན་འཁོར་རྒྱུག་བྱེད་ལམ་ཤར་གཏོང་ཐུབ་པ་བཟོས་ནས་མཐའ་མཚམས་ཀྱི་དཔལ་འབྱོར་བར་ཁྱམས་འཛུགས་རྒྱུ། མཐའ་རྒྱུད་སྒོ་མོ་མགྱོགས་པོ་འབྱེད་པ་དང་མཐའ་མཚམས་ཡུལ་སྐོར་གོང་འཕེལ་བཏང་ཐོག འཐབ་ས་དང་པོའི་མཐའ་མིར་ལོ་རེར་མི་རེར་ཆ་སྙོམས་ཚད་གཞི་མཐོ་ཤོས་ལ་སྒོར་ཁྲི་1.2ཟིན་པ་བྱེད་རྒྱུ།

ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་མཐའ་འཁྱོངས་སྤེལ་རྒྱུ། “རྟེན་འབྲེལ་འཁེལ་ཚད་ལ་འགོག་རྐྱེན་བཟོ་བ་དང་དུས་ཆེན་འཁེལ་ཚད་ལ་རྙོག་དྲ་སློང་བ”ནི་དགྲར་འཛིན་ཕྱོགས་གཏོགས་ཀྱིས་རྒྱུན་དུ་སྤྱོད་པའི་ཇུས་ངན་ཞིག་རེད། ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་དུས་བབ་གསར་པ་དང་འགྱུར་ལྡོག་གསར་པར་ཁ་གཏད་ཧུར་ཐག་བཅག་སྟེ་ཆབ་སྲིད་ཀྱི་བདེ་འཇགས་དང་སྲིད་དབང་གི་བདེ་འཇགས་འགན་ལེན་བྱས་ཐོག སྤྱི་ཡོངས་རང་བཞིན་གྱི་རང་འགུལ་ལ་དམ་འཛིན་ཐུབ་པ་བྱེད་རྒྱུ། བརྟན་ལྷིང་སྲུང་སྐྱོང་གི་བྱ་ཐབས་ཁག་ཕྱོགས་ཡོངས་ནས་དོན་འཁྱོལ་གཏིང་ཟབ་བྱས་ཏེ་རྣམ་པ་འདྲ་མིན་རིགས་ཀྱི་ཁ་ཕྲལ་གཏོར་བཤིག་བྱེད་སྒོར་འགོག་ཟོན་དང་རྡུང་རྡེག་ཤུགས་ཆེན་བཏང་ཐོག “རང་འགུལ་གྱིས་བརྟན་ལྷིང་ཡོང་བ”བྱེད་པའི་རྨང་གཞི་མུ་མཐུད་སྲ་བརྟན་དུ་བཏང་ནས་སྤྱི་ཚོགས་ཀྱི་དུས་བབ་རྒྱུན་མཐུད་བརྟན་ལྷིང་དང་། ཡུན་རིང་བརྟན་ལྷིང་། ཕྱོགས་ཡོངས་ནས་བརྟན་ལྷིང་བཅས་ཡོང་བའི་འགན་སྲུང་བྱེད་རྒྱུ།

སྤྱི་པའི་བདེ་འཇགས་མ་ལག་འཐུས་ཚང་བཟོ་རྒྱུ་མཐའ་འཁྱོངས་བྱེད་རྒྱུ། གྲོང་ཁྱེར་ཁོངས་ཀྱི་སྤྱི་ཚོགས་བཅོས་སྐྱོང་དེང་རབས་ཅན་གྱི་་ཚོད་ལྟ་གཏིང་ཟབ་བྱེད་རྒྱུ་དང་། དུས་རབས་གསར་པའི“ཧྥུང་ཆའོ་ཡི་ཉམས་མྱོང”མཐའ་འཁྱོངས་དང་གོང་འཕེལ་བཏང་ནས་ཉེན་ཁའི་རྐྱེན་རྩ་སེལ་རྒྱུ། ཆོས་ལུགས་ཀྱི་བྱ་བ་དང་། དྲ་རྒྱའི་དོ་དམ། ཐོལ་བྱུང་དོན་རྐྱེན་ཚབས་ཆེན་ཐག་གཅོད་བྱེད་པ་སོགས་ཀྱི་ཁྲིམས་སྲོལ་དང་སྒྲིག་སྲོལ་གང་མགྱོགས་བཟོ་འདོན་བྱེད་རྒྱུ། “གངས་དཀར་ལས་གཞི”དང་“རིག་ལྡན་སྤྱི་བདེ”སོགས་ཀྱི་རྣམ་གྲངས་འཛུགས་སྐྲུན་ལ་སྐུལ་འདེད་གཏོང་རྒྱུ། སྐུད་མེད་གློག་འཕྲིན་གྱི་བདེ་འཇགས་འགན་སྲུང་བྱེད་རྒྱུ། སྲིད་ཁྲིམས་དཔུང་ཁག་དང་ལྕགས་ལམ་སྲུང་སྐྱོང་དཔུང་ཁག་འཛུགས་སྐྱོང་དང་འགན་སྲུང་ལ་ཤུགས་སྣོན་རྒྱག་རྒྱུ། “ལོ་ལྔ་ཚན་བརྒྱད་པའི”ཁྲིམས་ལུགས་ཁྱབ་གདལ་གཏོང་འགོ་བཙུགས་ཐོག གཞི་རིམ་གྱི་སྤྱི་པའི་ཁྲིམས་ལུགས་ཞབས་ཞུའི་དངོས་གཉེར་ལྟེ་གནས་འཛུགས་རྒྱུར་སྐུལ་འདེད་གཏོང་རྒྱུ།

བདེ་འཇགས་ངང་གོང་འཕེལ་གཏོང་བའི་མཐའ་ཚད་བརྟན་སྲུང་མཐའ་འཁྱོངས་བྱེད་རྒྱུ། རང་བྱུང་གནོད་འཚེའི་རིགས་ལ་ལྟ་དཔྱད་སྔོན་བརྡ་གཏོང་བ་དང་འགོག་བཅོས་བྱེད་པར་ཤུགས་སྣོན་རྒྱག་རྒྱུ། འཕྲལ་སྡོམ་སྔོན་ཇུས་ལག་བསྟར་དང་འཕྲལ་སྡོམ་རོགས་སྐྱོབ་མཉམ་སྒུལ་བྱེད་པའི་ལམ་སྲོལ་འཐུས་ཚང་བཟོ་རྒྱུ་དང་གཅིག་གྱུར་ལས་ཕྱོད་ཆེ་བའི་བཀོད་འདོམས་ལག་བསྟར་བྱེད་རྒྱུ། ས་མཐོ་ཡང་མཐོའི་མཁའ་འགྲུལ་རོགས་སྐྱོབ་རྟེན་གཞི་འཛུགས་སྐྲུན་བྱེད་རྒྱུ་དང་། རོགས་སྐྱོབ་དངོས་ཟོག་འགན་སྲུང་མ་ལག་འཐུས་ཚང་བཟོས་ཐོག་ཕྱོགས་བསྡུས་རྣམ་པའི་མེ་ཟོན་རོགས་སྐྱོབ་དཔུང་ཁག་ཚད་ལྡན་དུ་འཛུགས་སྐྱོང་བྱེད་རྒྱུ། བདེ་འཇགས་ཐོན་སྐྱེད་ཀྱི་ཆེད་དོན་བཅོས་སྐྱོང་བྱེད་པའི་ལོ་གསུམ་བྱ་སྤྱོད་གཏིང་ཟབ་སྤེལ་ཏེ་བདེ་འཇགས་ངང་གོང་འཕེལ་གཏོང་བའི་དཔེ་མཚོན་འཛུགས་རྒྱུ།

(ཚོགས་འདུ་གཉིས་ཀྱི་དྲུང་ཡིག་ཁྲུའུ་ནས་མཁོ་འདོན་བྱས་པ་གཞིར་བཟུང་གནད་བསྡུས་བྱས)