2020ལོ་ནི་སྤྱིར་བཏང་གཏན་ནས་མིན་པའི་ལོ་ཞིག་རེད། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཁ་སྒྱུར་ཕྱོགས་སྟོན་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་བྱམས་བརྩེའི་ཐུགས་ཁུར། རང་སྐྱོང་ལྗོངས་ཏང་ཨུད་ཀྱིས་ཞུམ་མེད་སྟོབས་ལྡན་གྱི་འགོ་ཁྲིད་བཅས་གནང་བའི་འོག ལྗོངས་ཡོངས་ཀྱི་མི་རིགས་ཁག་གི་མི་དམངས་ཀྱིས་མཐུན་སྒྲིལ་རྡོག་རྩ་གཅིག་སྒྲིལ་བྱས་ནས་དམག་འཐབ་ཆེན་མོ་དང་རྒྱུགས་སྤྲོད་ཆེན་མོའི་ཁྲོད་ལོ་ཧྲིལ་པོའི་དམིགས་ཚད་དང་ལས་འགན་གཙོ་བོ་བདེ་བླག་ངང་ལེགས་སྒྲུབ་བྱས་ཏེ་ཏང་ཀྲུང་དབྱང་ཐུགས་བློ་བདེ་བ་དང་། མི་དམངས་བློ་ཡིད་ཚིམ་པ། ལོ་རྒྱུས་སུ་འགོད་ཆོག་པ་བཅས་ཀྱི་ཕུལ་དུ་བྱུང་བའི་རྒྱུགས་ལན་ཕུལ་ཡོད།

—— ནད་ཡམས་འགོག་བཅོས་བྱེད་རྒྱུ་དང་གོང་འཕེལ་གཏོང་རྒྱུ་གཉིས་གཅིག་གྱུར་འཆར་འགོད་བྱས་ནས་ཕན་འབྲས་ཆེན་པོ་ཐོབ་པ། མི་དམངས་གོང་དུ་བཀུར་བ་དང་ཚེ་སྲོག་གོང་དུ་བཀུར་རྒྱུ་མཐའ་འཁྱོངས་བྱས་ཏེ་ནད་ཡམས་སྔོན་འགོག་དང་ཚོད་འཛིན་བྱེད་པའི་མི་དམངས་ཀྱི་དམག་འཐབ་དང་། སྤྱི་ཡོངས་ཀྱི་དམག་འཐབ། འགོག་རྒོལ་གྱི་དམག་འཐབ་བཅས་མྱུར་དུ་བརྒྱབ་སྟེ་དང་ཐོག་མར་ནད་རྟགས་གཏན་འཁེལ་གྱི་ནད་པ་དྲག་སྐྱེད་ཐུབ་པ་བྱུང་བ་དང་། དང་ཐོག་མར་ལས་ཀ་དང་ཐོན་སྐྱེད་སླར་གསོ་བྱས་པ། དང་ཐོག་མར་དཔལ་འབྱོར་དངོས་འཕར་ཐུབ་པ་བཅས་བྱུང་ཡོད། ལོ་ཧྲིལ་པོར་དཔལ་འབྱོར་7.8%འཕར་བ་དང་ས་གནས་ཀྱི་ཐོན་སྐྱེད་སྤྱིའི་རིན་ཐང་སྒོར་དུང་ཕྱུར་1900ལས་བརྒལ་ཡོད། གྲོང་ཁྱེར་དང་གྲོང་གསེབ་ཀྱི་གྲོང་མི་མི་རེའི་ཆ་སྙོམས་ལག་ཐོག་ཡོང་འབབ་ཁག་སོ་སོར་10%དང་12.7%འཕར་ནས་འཕར་ཚད་རྒྱལ་ཡོངས་ཀྱི་མདུན་གྲལ་དུ་སླེབས་ཡོད། མི་རེའི་ཆ་སྙོམས་སྔོན་དཔག་ཚེ་ཚད་ལོ་71.1ཟིན་ཡོད།

—— དབུལ་པོ་དབུལ་ནག་མེད་པ་བཟོ་རྒྱུར་རྒྱལ་ཁ་ཆེན་པོ་ཐོབ་པ། རྒྱལ་ཡོངས་ཀྱི་ཞིང་ཆེན་རིམ་པའི་གཅིག་སྡུད་ཡུག་འབྲེལ་གྱི་ཤིན་ཏུ་དབུལ་བའི་ས་ཁུལ་གཅིག་པུ་དེ་ཧྲིལ་པོ་དབུལ་གྲོལ་བྱུང་ཞིང་། དབུལ་ཕོངས་མང་ཚོགས་མི་རེའི་ཆ་སྙོམས་འབབ་སྨར་སྒོར་ཁྲི་1ལས་བརྒལ་བ་དང་། བསྟུད་མར་ཀྲུང་དབྱང་གིས“ཕྱོཌ་བསྡུས་གདེང་འཇོག་བཟང་པོའི”ཁོངས་སུ་གཏན་འཁེལ་གནང་ཡོད།

—— དུས་རབས་རང་བཞིན་གྱི་ལས་གྲྭར་སྐུལ་འདེད་ཤུགས་ཆེ་བཏང་བ། མངའ་རིས་དང་བོད་དབུས་ཀྱི་གློག་དྲ་སྦྲེལ་མཐུད་ལས་གྲྭ་ཁྱོན་ཡོངས་ནས་ལེཌ་གྲུབ་ཟིན་ཏེ་རྒྱལ་ཡོངས་ནང་གི་གྲོང་ཁྱེར་རིམ་པའི་གློག་དྲ་རྐྱང་པ་འཁོར་རྒྱུག་བྱེད་པའི་ལོ་རྒྱུས་མཇུག་སྒྲིལ་ཡོད། ཁྲོན་བོད་ལྕགས་ལམ་ཁྱོན་ཡོངས་ནས་སྐྲུན་འགོ་བཙུགས་པ་དང་། ལྷ་ཉིང་ལྕགས་ལམ་ཆ་ཚང་བཏིང་ཟིན་པ་རེད།

—— མི་རིགས་ཁག་གི་མང་ཚོགས་ཀྱི་འཚོ་བར་འཕོ་འགྱུར་ཆེན་པོ་བྱུང་བ། འགན་བབས་སློབ་གསོ་སྲ་བརྟན་གཏོང་ཚད་95%ཟིན་པ་དང་། ལས་ཡོང་ན་ཚོད་ཀྱི་མི་འབོར་གཙོ་བོར་སློབ་གསོ་ཐོབ་ཚད་ལོ་10.2ཟིན་ཡོད། གྲོང་ཁྱེར་དང་གྲོང་རྡལ་གྱི་ལས་ཞུགས་པ་མེད་པའི་ཁྱིམ་ཚང་ལ་བབ་བསྟུན་ལས་ཞུགས་པ་ཡོད་པ་དང་། ཆད་འགོག་སློབ་འཁྱོངས་ཐུབ་པ། ཐུམ་འབུའི་ནད་ཕྱོགས་བསྡུས་འགོག་བཅོས་བྱས་ནས་བབ་བསྟུན་མེད་པ་བཅས་བཟོས་ཡོད།

—— མཛེས་སྡུག་ལྡན་པའི་མདུན་ལྗོངས་ཆེས་ཆེར་མངོན་པ། སྤྱི་ཁྱབ་ཧྲུའུ་ཅི་ཞི་ཅིན་ཕིང་སྐུ་ངོ་མས་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པ་འཆར་འགོད་བཀོད་སྒྲིག་གིས་སྐོང་འཚོགས་གནང་སྟེ་དུས་རབས་གསར་པའི་ཏང་གི་བོད་སྐྱོང་མཛད་ཇུས་གཏན་འཁེལ་གནང་བ་དང་སྤྱི་ཚོགས་རིང་ལུགས་དེང་རབས་ཅན་གྱི་བོད་གསར་འཛུགས་སྐྲུན་བྱེད་པའི་བརྗིད་ཆེའི་འཆར་གཞི་བཀོད་གནང་ཡོད། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་དུ་གཏོང་རྒྱུའི་འཐབ་ཇུས་ཀྱི་ལས་འགན་དེ་བས་ཁ་གསལ་བྱུང་བ་དང“དོན་ཆེན་བཞི”ཡིས་མི་སེམས་ལ་ཡར་སྐུལ་ཐེབས་ནས་ལྗོངས་ཡོངས་ཀྱི་མི་རིགས་ཁག་གི་མི་དམངས་རྣམས་སྤྲོ་སེམས་རབ་ཏུ་འཁོལ་ཞིང་དཔའ་སྟོབས་ཆེས་ཆེར་འཕེལ་ཡོད།

1སྤྱི་ཚོཌ་བརྟན་ལྷིང་དང་མི་རིཌ་མཐུན་སྒྲིལ་སྲུང་སྐྱོང་བྱེད་རྒྱུར་ཤུགས་གང་ཡོད་བརྒྱབ་པ།

སྤྱི་ཚོགས་ཁྱོན་ཡོངས་རྒྱུན་མཐུད་དང་ཕྱོགས་ཡོངས་ནས་བརྟན་ལྷིང་བྱུང་བ། ཀྲུང་དབྱང་གིས་བཏོན་གནང་བའི་ཏཱ་ལའི་རུ་ཚོགས་ཀྱི་ངོ་བོ་དང་དེར་འཐབ་རྩོད་བྱེད་པའི་མཛད་ཕྱོགས་གཡོ་འགུལ་མེད་པར་མཐའ་འཁྱོངས་བྱས་ཏེ་རིགས་འདྲ་མིན་གྱི་ཁ་ཕྲལ་གཏོར་བཤིག་གི་བྱེད་སྤྱོད་ལ་འགོག་ཟོན་ནན་པོ་དང་རྡུང་རྡེག་ཚ་ནན་བཏང་ཡོད། ནག་སེལ་གཤེད་འཇོམས་ཀྱི་ཆེད་དོན་འཐབ་རྩོད་ལ་རྒྱལ་ཁ་ཆེན་པོ་ཐོབ་ཡོད། ལོ་ལྔ་བསྟུད་མར་ཆབ་སྲིད་རང་བཞིན་དང་མི་དཔུང་ཁྱུ་ཚོགས་རང་བཞིན་གྱི་ཚབས་ཆེའི་དོན་རྐྱེན་དང་གཏུམ་སྤྱོད་འཇིགས་སྐུལ་གྱི་གྱོད་གཞིའི་རིགས་ཐོན་མེད།

ཆོས་ལུགས་བཅོས་སྐྱོང་བྱེད་པར་རྒྱུན་མཐུད་ནས་ཤུགས་སྣོན་བརྒྱབ་པ། ཏང་གི་ཆོས་ལུགས་ལས་ཀའི་གཞི་རྩའི་མཛད་ཕྱོགས་ཕྱོགས་ཡོངས་ནས་ལག་བསྟར་བྱས་ཐོག ཆོས་ལུགས་བྱ་བར་དོ་དམ་བྱེད་རྒྱུར་ཁྲིམས་བཞིན་ཤུགས་སྣོན་བརྒྱབ་པ་དང་། མི་རིགས་ཁག་གི་མང་ཚོགས་ཀྱི་ཆོས་དད་རང་མོས་ལ་ཁྲིམས་བཞིན་འགན་སྲུང་བྱས་ཡོད། “ཚད་གཞི་བཞི་བརྩི་སྲུང་ལག་བསྟར་གྱིས་སྔོན་ཐོན་གྲྭ་བཙུན་བརྩོན་ལེན་བྱེད་པའི”སློབ་གསོ་ལག་ལེན་བྱེད་སྒོ་གསར་གཏོད་ལྡན་པའི་ངང་སྤེལ་བ་དང་། དགོན་པའི་དོ་དམ་གྱི་ཕུགས་ཕན་ལམ་སྲོལ་རྒྱུན་ཆད་མེད་པར་ལེགས་སུ་བཏང་ཐོག ཏཱ་ལའི་རུ་ཚོགས་དང་རྒྱལ་མཚམས་ཕྱིའི་དགྲ་འཛིན་ཕྱོགས་གཏོགས་ཀྱིས་ཆོས་ལུགས་བེད་སྤྱད་ནས་སིམ་འཛུལ་གཏོར་བཤིག་གཏོང་རིགས་བཀག་འགོག་མཐའ་གཅིག་ཏུ་བྱས་པ་དང་། ཆོས་དད་མང་ཚོགས་ལ་གོམས་སྲོལ་སྒྱུར་རྒྱུར་སློབ་གསོ་ཁྲིད་སྟོན་བྱས་ནས་ཆོས་ལུགས་དེ་སྤྱི་ཚོགས་རིང་ལུགས་ཀྱི་སྤྱི་ཚོགས་དང་འཚམ་མཐུན་ཡོང་བའི་ཁྲིད་སྟོན་ཧུར་ཐག་བྱེད་པར་གོམ་པ་གསར་པ་སྤོས་ཡོད།

མི་རིགས་མཐུན་སྒྲིལ་རྒྱུན་མཐུད་ནས་སྲ་བརྟན་དུ་བཏང་བ། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་དུ་གཏོང་རྒྱུར་ཤུཌ་གང་ཡོད་བརྒྱབ་ནས་འདྲ་མཉམ་དང་། མཐུན་སྒྲིལ། རོགས་རེས། ཞི་མཐུན་བཅས་ཀྱི་སྤྱི་ཚོགས་རིང་ལུགས་ཀྱི་མི་རིགས་འབྲེལ་བ་སྲ་བརྟན་དུ་གཏོང་བ་དང་གོང་འཕེལ་བཏང་ནས་མི་རིགས་ཁག་དབར་འགྲོ་འོང་དང་། སྤེལ་རེས། མཉམ་འདྲེས་བཅས་བྱེད་པར་སྐུལ་འདེད་བཏང་བ་དང་། མི་རིགས་མཐུན་སྒྲིལ་ཡར་ཐོན་སྲོལ་ཡིག་ཞིབ་འཇུག་བཟོ་འབེབས་དང་དོན་འཁྱོལ་བྱས་ཡོད།

བདེ་འཇགས་ཐོན་སྐྱེད་རྒྱུན་མཐུད་ནས་ལེགས་པའི་ཕྱོགས་སུ་གོང་འཕེལ་སོང་བ། རང་བྱུང་གནོད་འཚེ་འགོག་བཅོས་ཀྱི“ལས་གྲྭ་ཁག་དགུ”ཏན་ཏིག་ངང་སྤེལ་ཡོད། འབྲི་ཆུ་དང་ཡར་ཀླུང་གཙང་པོའི་འགག་མཚོའི་ཉེན་ཁ་ཚན་རིག་དང་མཐུན་པའི་ངང་འཕྲལ་མར་སེལ་བ་དང་། རིམ་པ་4ཡན་གྱི་ས་ཡོམ་ཐེངས་128དང་ནགས་ཚལ་མེ་སྐྱོན་ཆེ་ཙམ་རིགས་ཐེངས་6ཉེན་སེལ་ལེགས་སྒྲུབ་བྱས་ཡོད། བདེ་འཇགས་དོན་རྐྱེན་རིགས་ཀྱི་ཐོན་གྲངས་དང་མི་ཤི་གྲངས་དེ“ལོ་ལྔ་ཚན་བཅུ་གཉིས་པ”དང་བསྡུར་ན་ཁག་སོ་སོར་24.8%དང་31.1%ཆག་ཡོད་ཅིང་། ལོ་ལྔ་བསྟུད་མར་ཧ་ཅང་ཚབས་ཆེའི་དོན་རྐྱེན་ཐོན་མེད་པ་དང་། ལོ་བཞི་བསྟུད་མར་རྒྱལ་སྲིད་སྤྱི་ཁྱབ་ཁང་བདེ་འཇགས་ཐོན་སྐྱེད་ཨུ་ལྷན་གྱིས་ཞིབ་དཔྱད་བྱས་པའི་ནང“ཕུལ་བྱུང”ཐོབ་ཡོད།

2.“འགག་སྒྲོལ་དམག་འཐབ་ཆེན་པོ་གསུམ”ལ་རྒྱལ་ཁ་ལེན་རྒྱུར་ཤུགས་གང་ཡོད་བརྒྱབ་པ།

དབུལ་གྲོལ་འགག་སྒྲོལ་ལ་གྲུབ་འབྲས་མངོན་གསལ་དོད་པོ་ཐོབ་པ། “སེམས་ཁྲལ་མེད་པ་གཉིས་དང་འགན་སྲུང་གསུམ”བྱེད་པར་དམིགས་ནས་ཞིང་འབྲེལ་མ་དངུལ་སྒོར་དུང་ཕྱུར་753.9སྒྲིལ་བཅོས་བྱས་ཤིང་། དབུལ་ཕོངས་མི་འབོར་ཁྲི་62.8ཆ་ཚང་དབུལ་གྲོལ་བྱུང་བ་དང་། རྫོང(ཆུད)74ཆ་ཚང་དབུལ་ཞྭ་ཕུད་པ། དབུལ་ཕོངས་མི་ཁྲི་11.1གི་མ་མཐའི་འཚོ་བའི་འགན་སྲུང་བྱེད་དགོས་རིགས་ཆ་ཚང་འགན་ལེན་བྱས་ཡོད། དབུལ་གྲོལ་འགག་སྒྲོལ་ཡོངས་བཤེར་ཕྱོགས་ཡོངས་ནས་ལེགས་འགྲུབ་བྱུང་ནས་མང་ཚོགས་ཀྱི་མོས་ཚད་99%ཡན་ཟིན་ཡོད།

སྦགས་བཙོག་འགོག་བཅོས་བྱེད་པར་གྲུབ་འབྲས་མངོན་གསལ་དོད་པོ་ཐོབ་པ། “མཚོན་རྟགས་རང་བཞིན་གྱི་དམག་འཐབ་5”ལ་སྐུལ་འདེད་གཏིང་ཟབ་བཏང་ཡོད། གཙང་ཆུ་མཚོ་མཚེའུ་གཙོ་གནད་ཀྱི་ཆུའི་སྤུས་ཚད་ཚང་མ་རིགས་Ⅲཔ་ཡན་གྱི་ཚད་གཞིར་སླེབས་པ་དང་། ས་གནས་རིམ་པ་ཡན་གྱི་གྲོང་ཁྱེར་གྱི་མཁའ་རླུང་སྤུས་ཚད་ལེགས་པའི་ཉིན་གྲངས་བསྡུར་ཚད་99.4%ཟིན་པ། གྲོང་ཁྱེར་དང་གྲོང་རྡལ་གྱི་གཅིག་སྡུད་འཐུང་ཆུའི་ཆུ་རྩའི་སྤུས་ཚད་100%ཟིན་ཡོད། སྦགས་བཙོག་འགོག་བཅོས་ཀྱི་འགག་སྒྲོལ་དམག་འཐབ་ལ་དཔྱད་ཞིབ་བྱས་པར་རྒྱལ་ཡོངས་ནང“ཕུལ་བྱུང”ཐོབ་ཡོད།

ཉེན་ཁ་ཚབས་ཆེན་འགོག་སེལ་བྱེད་པར་གྲུབ་འབྲས་མངོན་གསལ་དོད་པོ་ཐོབ་པ། གཞི་ཆེའི་འགྱོགས་མདའི་ཚད་གཞི་རྩ་བའི་ཆར་བརྟན་འཁྱོངས་ཐུབ་པ་དང་། དངུལ་རྩའི་ལས་རིགས་འཁོར་སྐྱོད་བརྟན་སྙོམས་བྱུང་ཐོག དངོས་གཞིའི་དཔལ་འབྱོར་ལ་ཞབས་འདེགས་ཞུ་བའི་ནུས་པ་ཆེ་རུ་མངོན་གསལ་དོད་པོ་སོང་ཡོད། དངུལ་རྩའི་ལས་ཁུངས་ཀྱི་རང་དངུལ་དང་ཕྱི་དངུལ་གྱི་དངུལ་བུན་ལྷག་གྲངས་སྒོར་དུང་ཕྱུར་4957ཟིན་ཞིང་། “ལོ་ལྔ་ཚན་བཅུ་གཉིས་པའི”དུས་མཇུག་གི་ལྡབ་2.3ཡིན།

3རྨང་གཞིའི་སྒྲིག་བཀོད་འཐུས་ལེགས་སུ་གཏོང་རྒྱུར་ཤུགས་གང་ཡོད་བརྒྱབ་པ།

འགྲིམ་འགྲུལ་དྲ་རྒྱ་ཉིན་བཞིན་འཐུས་ལེགས་སུ་སོང་བ། རླངས་འཁོར་ཤར་གཏོང་ཐུབ་པའི་གཞུང་ལམ་སྤྱི་ལེ་ཁྲི་11.7ཟིན་ཞིང་། “ལོ་ལྔ་ཚན་བཅུ་གཉིས་པའི”དུས་མཇུག་དང་བསྡུར་ན་50%འཕར་ཡོད། རིམ་མཐོའི་གཞུང་ལམ་སྤྱི་ལེ་688ཟིན་པ་དེ“ལོ་ལྔ་ཚན་བཅུ་གཉིས་པའི”དུས་མཇུག་གི་ལྡབ་18ཟིན་ཡོད། ལྷ་ས་ནས་ཉིང་ཁྲི་བར་དང་། གོང་དཀར་གནམ་ཐང་ནས་རྩེད་ཐང་བར། གཞིས་རྩེ་གནམ་ཐང་བཅས་ཀྱི་རིམ་མཐོའི་གཞུང་ལམ་བཟོས་ནས་རླངས་འཁོར་ཤར་གཏོང་ཐུབ་པ་དང་། ནག་ཆུ་ནས་ལྷ་ས་བར་དང་། ལྷ་ས་ནས་གཞིས་རྩེའི་གནམ་ཐང་བར། ལྷ་ས་ནས་རྩེད་ཐང་བར་བཅས་ཀྱི་རིམ་མཐོའི་གཞུང་ལམ་གང་མགྱོགས་སྐྲུན་བཞིན་ཡོད། ལྕགས་ལམ་སྐྱེལ་འདྲེན་གཉེར་སྐྱོང་ལམ་ཚད་སྤྱི་ལེ་954ཟིན་པ་དེ“ལོ་ལྔ་ཚན་བཅུ་གཉིས་པའི”དུས་མཇུག་དང་བསྡུར་ན་སྤྱི་ལེ་253འཕར་ཡོད།

ཆུ་བེད་སྒྲིག་བཀོད་ཉིན་བཞིན་འཐུས་ལེགས་སུ་བཏང་བ། ཕོད་མདོ་དང་ལ་ལྷོའི་ཆུ་བེད་ལྟེ་གནས་ནས་དྲ་སྦྲེལ་གློག་འདོན་ཐུབ་པ་དང་ཆུ་འདྲེན་ཁུལ་དུ་ཆུ་གཏོང་ཐུབ་ཡོད། ཤངས་ཆུ་དང་། ཡར་ཀླུང་། ཕྱཱ་གཡང་བཅས་ཀྱི་ཆུ་མཛོད་ཡོངས་སུ་སྐྲུན་ཟིན་པའམ་ཆུ་རྒྱུན་བཀག་བཅད་ཐུབ་ཡོད། གཙོ་གནད་གཙང་ཆུ་60ཡི་རྒྱུག་ཁུལ་ཕྱོགས་བསྡུས་འཆར་འགོད་བྱེད་པར་ཕྱོགས་ཡོངས་ནས་སྐུལ་འདེད་བཏང་ཡོད། གཙོ་གནད་ཆུ་འདྲེན་ཁུལ་དང་ཆུ་བསྲི་ནུས་ཆེའི་ལས་གྲྭ་ཁག་68གཏིང་ཟབ་སྤེལ་བ་དང་། གྲོང་གསེབ་ཀྱི་འཐུང་ཆུའི་བདེ་འཇགས་གནད་དོན་གཞི་རྩའི་ཆར་ཐག་གཅོད་ཐུབ་ཡོད། ཞིང་ཁར་ཆུ་འདྲེན་ནུས་ལྡན་ཐུབ་པའི་རྒྱ་ཁྱོན་མུའུ་ཁྲི་73མང་དུ་སོང་ཡོད། འབྲུབ་ཐན་གཉིས་འགོག་གི་ནུས་པ་ཆེ་རུ་གཏོང་རྒྱུར་མུ་མཐུད་ཤུགས་སྣོན་བརྒྱབ་སྟེ་བོད་ཀྱིས་གནམ་ལ་བརྟེན་ནས་ལྟོ་ཟ་བ་དང་རང་བྱུང་ལ་བརྟེན་ནས་འབྲུབ་ཐན་གཉིས་འགོག་ཁོ་ན་བྱེད་པའི་ལོ་རྒྱུས་ཐོག་མའི་ཆར་མཇུག་སྒྲིལ་ཡོད།

ནུས་ཁུངས་འགན་སྲུང་བྱེད་རྒྱུ་ཉིན་བཞིན་འཐུས་ལེགས་སུ་བཏང་བ། ལྗོངས་ནང་ཁུལ་གྱི་གློག་དྲ་གཅིག་ཏུ་སྦྲེལ་ཞིང་གློག་དྲ་ཨ་མ་རྫོང(ཆུད)74ལ་ཁེབས་པ་དང་མི་འབོར་ཁྲི་330ལ་གློག་མཁོ་འདོན་ཐུབ་པ་དེ“ལོ་ལྔ་ཚན་བཅུ་གཉིས་པའི”དུས་མཇུག་དང་བསྡུར་ན་མི་ཁྲི་111.5མང་དུ་སོང་ཡོད། “ཁུལ་གསུམ་ཀྲོའུ་གསུམ”གྱི་གྲོང་གསེབ་གློག་དྲ་བསྒྱུར་བཀོད་རིམ་སྤོར་ཕྱོགས་ཡོངས་ནས་ལེགས་འགྲུབ་ཟིན་ཏེ་མི་ཁྲི་67.2ལ་གློག་སྤྱོད་ཐུབ་པ་བཟོས་ཡོད། སྐྲུན་ཟིན་པ་དང་སྐྲུན་མུས་ཀྱི་གློག་འདོན་འཕྲུལ་ཤུགས་ཆན་ཝ་ཁྲི་1020ཟིན་ཞིང་ལྡབ་1.6འཕར་ཡོད།

ཆ་འཕྲིན་ཅན་གྱི་སྒྲིག་བཀོད་ཉིན་བཞིན་འཐུས་ལེགས་སུ་བཏང་བ། ལོ་ལྔའི་ནང་ཀྲུང་དབྱང་སྔོན་རྩིས་ནང་གི་ཆ་འཕྲིན་ཅན་གྱི་རྨང་གཞིའི་སྒྲིག་བཀོད་ཐད་མ་འཇོག་སྒོར་དུང་ཕྱུར་31.3དོན་འཁྱོལ་བྱས་པ་དང་ལྡབ་2ལྷག་ཙམ་འཕར་ཡོད། “དྲ་གཅིག་སྤྲིན་གཅིག་ལྟེ་གནས་གཅིག”གི་ཆ་འཕྲིན་ཅན་སྒྲོམ་གཞིའི་མ་ལག་རྩ་བའི་ཆར་བསྐྲུན་ཟིན་ཡོད། ཚན་པ་ཁག་4798ལ་གློག་རྡུལ་སྲིད་དོན་ཕྱི་དྲ“དྲ་གཅིག”ཏུ་གྱུར་ཡོད།

4“ཐོན་ལས་ཆེན་པོ་བདུན”འཛུགས་སྐྱོང་བྱེད་པར་ཤུགས་གང་ཡོད་བརྒྱབ་པ།

ས་མཐོའི་སྐྱེ་དངོས་ཐོན་ལས་འཛུགས་སྐྱོང་བྱས་ནས་སྟོབས་ཆེར་བཏང་བ། ནས་ཐོན་འཕར་དང་འབྲི་གཡག་བཤས་གཏོང་བྱ་སྤྱོད་ལག་བསྟར་བྱས་ཤིང་། འབྲུ་རིགས་ཐོན་འབོར་དང་འབྲི་གཡག་བཤས་གྲངས་དེ“ལོ་ལྔ་ཚན་བཅུ་གཉིས་པའི”དུས་མཇུག་དང་བསྡུར་ན་ཁག་སོ་སོར་12.2%དང་25.2%འཕར་བ་དང་། ལོ་ལྔ་བསྟུད་མར་འབྲུ་རིགས་ཐོན་འབོར་ཀྲོན་ཁྲི་100ཡན་བརྟན་གནས་ཐུབ་པ། འབྲུ་རིགས་འགན་ལེན་བྱེད་པའི་ཐད་ཧྲེང་ཀྲང་གིས་འགན་འཁུར་བའི་ལམ་ལུགས་ཞིབ་དཔྱད་ནང་ལོ་3བསྟུད་མར་བྱས་འབྲས་བཟང་པོ་ཐོབ་ཡོད།

རིག་གནས་ཡུལ་སྐོར་ཐོན་ལས་འཛུགས་སྐྱོང་བྱས་ནས་སྟོབས་ཆེར་བཏང་བ། གྲོང་གསེབ་ཀྱི་ཡུལ་སྐོར་ལས་ཀའི་ནང་ཞིང་འབྲོག་པ་མི་ཁྲི་8.6ལས་ཞུགས་ཐུབ་པ་དང་། ལོ་རེར་མི་རེའི་ཆ་སྙོམས་འབབ་འཕར་སྒོར་4300ཟིན་ཡོད། རིག་གནས་ཐོན་ལས་དཔེ་སྟོན་རྟེན་གཞི(སྡེ་གླིང)234ཟིན་པ་དང་། ཐོན་སྐྱེད་རིན་ཐང་སྒོར་དུང་ཕྱུར་60ལས་བརྒལ་ཏེ་ལོ་རེར་ཆ་སྙོམས་15%འཕར་ཡོད།

གཙང་ལྡན་ནུས་རྒྱུའི་ཐོན་ལས་འཛུཌ་སྐྱོང་བྱས་ནས་སྟོབས་ཆེར་བཏང་བ། ཟླ་ཆུ་དང་འབྲི་ཆུའི་སྟོད་རྒྱུད་ཀྱི་གཙང་ལྡན་ནུས་རྒྱུའི་རྟེན་གཞི་བདེ་བླག་ངང་སྐྲུན་པ་དང་། ཝ་ཐོག་དང་། གསེར་ཟམ། རྒྱ་ཚ་བཅས་ཀྱི་ཆུ་གློག་བསྐྲུན་ནས་གློག་གཏོང་འགོ་ཚུགས་ཡོད། དབུལ་སྐྱོར་འོད་ཤུགས་རྣམ་གྲངས་24དྲ་སྦྲེལ་ལེགས་འགྲུབ་ཟིན་ཡོད། སྡེབ་རྩིས་བྱས་ན་ཕྱིར་འདྲེན་གློག་ཤུགས་ཆན་ཝ་ཆུ་ཚོད་དུང་ཕྱུར་63ཟིན་ནས་བོད་ཀྱི་གློག་ཤུགས་དཀོན་ཞིང་ཆད་པ་ནས་གློག་ཤུགས་འབེལ་པོ་བྱུང་ནས་ཕྱིར་གཏོང་བྱེད་པའི་ཕྱོགས་སུ་ལོ་རྒྱུས་རང་བཞིན་གྱི་འཕོ་འགྱུར་བྱུང་ཡོད།

འབྱུང་འཕྲོད་བཟོ་ལས་འཛུགས་སྐྱོང་བྱས་ནས་གོང་འཕེལ་བཏང་བ། གཞི་ཁྱོན་ཡན་གྱི་བཟོ་ལས་ཁེ་ལས་152ཟིན་པ་དེ“ལོ་ལྔ་ཚན་བཅུ་གཉིས་པའི”དུས་མཇུག་དང་བསྡུར་ན་46.2%འཕར་ཡོད། རང་བྱུང་འཐུང་ཆུ་བྲིན་འབོར་ལོ་རེར་ཆ་སྙོམས་10%ཡན་འཕར་བ་དང་། ཀྲུང་ལུགས་བཟོས་སྨན་ལོ་རེར་ཐོན་འབོར་ཀྲོན་3586ཟིན་ཡོད།

དེང་རབས་ཞབས་ཞུའི་ལས་རིགས་འཛུགས་སྐྱོང་བྱས་ནས་གོང་འཕེལ་བཏང་བ། གྲོང་ཁྱེར་དང་། རྫོང་། ཤང་། གྲོང་ཚོ་བཅས་རིམ་པ་བཞིའི་གློག་རྡུལ་ཚོང་ལས་ཞབས་ཞུ་ཁྱོན་ཡོངས་ནས་སྤེལ་བ་དང་། དྲ་ཐོག་སིལ་ཚོང་བྱས་འབོར་སྡེབ་རྩིས་བྱས་ན་སྒོར་དུང་ཕྱུར་200ལས་བརྒལ་བ་དང་ལྡབ་20འཕར་ཡོད། སྤྱི་ཚོགས་ཀྱི་འཛད་སྤྱོད་དངོས་ཟོག་སིལ་ཚོང་སྤྱི་འབོར་ལོ་རེར་ཆ་སྙོམས་9.3%འཕར་ཡོད།

མཐོ་གསར་གྲངས་འཛིན་ཐོན་ལས་འཛུགས་སྐྱོང་བྱས་ནས་གོང་འཕེལ་བཏང་བ། ཆ་འཕྲིན་ཅན་གྱི་སྟོན་གྲངས་དེ“ལོ་ལྔ་ཚན་བཅུ་གཉིས་པའི”དུས་མཇུག་གི་63.3ནས་75.8བར་འཕར་ཡོད། མཉེན་ཆས་དང་ཆ་འཕྲིན་ལག་རྩལ་ཞབས་ཞུའི་ཁེ་ལས་ཁག་300ལས་བརྒལ་བ་དང་། གྲངས་འཛིན་དཔལ་འབྱོར་གྱི་གཞི་ཁྱོན་སྒོར་དུང་ཕྱུར་330ལས་བརྒལ་ཡོད།

མཐའ་མཚམས་ཚོང་དོན་ཟོག་འགྲུལ་ཐོན་ལས་འཛུགས་སྐྱོང་བྱས་ནས་གོང་འཕེལ་བཏང་བ། གྲོང་ཁྱེར་དང་གྲོང་གསེབ་ཀྱི་འཁོར་རྒྱུག་མ་ལག་རིམ་བཞིན་འཐུས་ཚང་དུ་སོང་ཞིང་། ཕྱིར་གཏོང་ནང་འདྲེན་ཚོང་དོན་བྱས་འབོར་སྡེབ་རྩིས་བྱས་ན་སྒོར་དུང་ཕྱུར་230ཙམ་ཟིན་ཡོད།

ལོ་ལྔའི་ནང་ཐོན་ལས་འཛུགས་སྐྱོང་ལེགས་སྒྲིག་བྱས་པ་བརྒྱུད་ཐོན་ལས་ཕྲེང་སྦྲེལ་དང་མཁོ་འདོན་ཕྲེང་སྦྲེལ་རྒྱུན་མཐུད་ནས་གསབ་སྐྱོང་སྟོབས་ཆེར་སོང་ཞིང་། ཐོན་ལས་གསུམ་གྱི་བསྡུར་ཚད་དེ“ལོ་ལྔ་ཚན་བཅུ་གཉིས་པའི”དུས་མཇུག་གི་9:32.8:58.2ཡིན་པ་ནས་7.9:42:50.1ལ་ལེགས་སྒྲིག་བྱུང་ནས་གྲུབ་ཚུལ་སྔར་བས་ལེགས་སུ་སོང་ཡོད།