ཉིང་ཁྲི་ནས་ཡིན་པའི་ཉི་བཟང་ཆོས་སྒྲོན་2019ལོར་སློབ་གྲྭ་ཐོན་ཞིང་། སློབ་གྲྭ་ཐོན་རྗེས་ལས་ཀ་ཁ་ཤས་ཚོད་ལྟ་བྱས་མོད། འོན་ཀྱང་རང་ཉིད་ལ་འཚམ་པའི་ལས་ཀ་ཞིག་ཡེ་ནས་མ་རག
ཁོ་མོ་གང་སར་ལས་ཀ་འཚོལ་བར་སྐྱོད་སྐབས། ཀོང་ཏུང་ཞིང་ཆེན་བྱ་གཞག་ཚན་པའི་ཆེད་དོན་ལས་མི་བསྡུ་བའི་སྐོར་ཐོས་པ་ལས་ཁོ་མོར་རེ་བ་གསར་པ་ཞིག་སྦྱིན། ཡིན་ཡང་འགྲོ་འམ་མི་འགྲོ། གལ་ཏེ་ཕྱིན་ཚེ་ལས་ཀ་དེ་ང་རང་ལ་འཚམ་པོ་ཨེ་ཡོད་ལ་སོགས་ཐེ་ཚོམ་གྱི་གནས་སུ་གྱར། ལས་ཀར་བསྡུས་པ་ཤེས་སྐབས་ཀྱང་། ཉི་མ་ཆོས་སྒྲོན་གྱིས་ད་དུང་སེམས་ཐག་བཅད་མེད་པ་རེད། ཁོ་མོས“དང་ཐོག་ཀོང་ཏུང་དུ་ལས་ཀ་བྱེད་པར་ཡོང་བར་གདེང་ཚོད་ཆེན་པོ་མེད་པས་ཉིན་ལྟར་སེམས་ཁྲལ་ཆེན་པོ་ཡོང་གི་འདུག འོན་ཀྱང་ལོ་ཟླ་རིམ་གྱིས་བཞུད་པ་དང་བསྟུན་ནས་ངས་ཀྱང་འགོ་ཁྲིད་དང་ལས་རོགས་ཚང་མ་སེམས་རྩ་འཁོལ་ལ་བློ་སྐྱེད་ཡངས་པ་དང་། རང་ཉིད་ལ་དགའ་གཅེས་གང་ལེགས་བྱེད་པ་ཚོར་བྱུང་བས། རིམ་བཞིན་ཡིད་སེམས་ལྷོད་ལ་བབས་སོང”ཞེས་བཤད།
2020ལོའི་ཟླ་5པར། ཉི་བཟང་ཆོས་སྒྲོན་དངོས་སུ་ཀོང་ཏུང་ཞིང་ཆེན་ཧུའེ་ཀྲོའུ་གྲོང་ཁྱེར་སློབ་འབྲིང་བརྒྱད་པར་བསྐྱོད་ནས་ལས་ཀར་ཞུགས་ཤིང་། མཐར་ཕྱིན་མ་ཐག་པའི་སློབ་གྲྭ་ཆེ་མོ་བ་མང་དག་དང་འདྲ་བར། ལས་གནས་སུ་ཞུགས་མ་ཐག་ཁོ་མོས་ལས་ཀར་སེམས་ཁྲལ་ཆེན་པོ་བྱས་ལ། ལྷག་པར་དུ་ཆ་མེད་རྒྱུས་མེད་ཀྱི་ཧུའེ་ཀྲོའུ་གྲོང་ཁྱེར་འདི་རུ་ཉི་བཟང་ཆོས་སྒྲོན་ག་དུས་ཡིན་ཡང་དངངས་སྐྲག་ཆེན་པོ་བྱེད་ཅིང་། ཐ་ན་ཉེ་འཁོར་གྱི་ལས་རོགས་དང་འབྲེལ་འདྲིས་བྱེད་འདོད་མེད་པ་རེད།
“འདི་གར་སླེབས་མ་ཐག སློབ་གྲྭས་ང་ལ‘གཅིག་གཏད་གཅིག’གི་མཛུབ་སྟོན་སློབ་དཔོན་བཀོད་སྒྲིག་བྱས་བྱུང་། ཁོང་ནི་ང་ཚོ་བོད་ལྗོངས་པུའི་གཙོ་གཉེར་བ་ཡིན་ལ་སློབ་སྤྱི་གཞོན་པའང་རེད། ཁོང་དང་མཉམ་དུ་སློབ་སྦྱོང་བྱེད་དུས་མི་ཤེས་པ་ཡོད་ཚེ་ཁོང་གིས་ང་ལ་ཞིབ་ཚགས་ངང་སློབ་ཀྱི་འདུག འཚོ་བའི་ཐད་སློབ་གྲྭས་ང་ལ་ཉལ་ཁང་བཀོད་སྒྲིག་བྱས་པ་མ་ཟད། ཁྱིམ་ཆས་ཀྱང་གྲ་སྒྲིག་བྱས་ནས་ཕྱོགས་གང་ཅིའི་ཐད་ལྟ་རྟོག་ཆེན་པོ་བྱས་བྱུང”ཞེས་ཉི་བཟང་ཆོས་སྒྲོན་གྱིས་བཤད།
གསར་འགོད་པར་ཤེས་རྟོགས་བྱུང་བར། ཐེམ་ཁུངས་བོད་ནས་ཡིན་པའི་གྲངས་ཉུང་མི་རིགས་ཀྱི་མཐོ་སློབ་སློབ་ཐོན་སློབ་མ་རྣམས་གང་མགྱོགས་ཀོང་ཏུང་གི་ལས་ཀ་དང་འཚོ་བར་གོམས་པ་དང་། དེ་སྔའི་ལས་ཞུགས་ལས་གཏོད་ཀྱི་འདུ་ཤེས་རྙིང་པ་དང་། ཡིད་ཆེས་མི་འདང་བ། འཚམ་མཐུན་ནུས་པ་ཅུང་ཞན་པ། ལས་རིགས་ཀྱི་བྱང་ཚད་མི་འདང་བ་སོགས་ཀྱི་དཀའ་གནད་སེལ་བ། དེ་བས་ལེགས་པའི་སྒོ་ནས་རང་ཉིད་ཀྱི་ལས་གནས་ཐོག་ལས་དོན་ཏན་ཏིག་སྒྲུབ་པ་དང་འཇོན་ཐང་ཆེ་རུ་གཏོང་བ་བཅས་བྱ་ཆེད། ལས་ཞུགས་བོད་སྐྱོར་གྱི་འབྲེལ་ཡོད་འགན་འཁུར་བས་ཀོང་ཏུང་ཞིང་ཆེན་གྱི་མི་སྤྱོད་ཚན་པ་ཁག་དང་ཆེད་མངགས་འབྲེལ་གཏུག་བྱས་ཏེ། ཐེམ་ཁུངས་བོད་ནས་ཡིན་པའི་གྲངས་ཉུང་མི་རིགས་ཀྱི་མཐོ་སློབ་སློབ་ཐོན་སློབ་མར“གཅིག་གཏད་གཅིག”གི་མཛུབ་སྟོན་སློབ་དཔོན་བཀོད་སྒྲིག་གིས་རོགས་སྐྱོར་བྱས་པ་རེད།
ཉི་བཟང་ཆོས་སྒྲོན་གྱི་རོགས་སྐྱོར་མཛུབ་སྟོན་སློབ་དཔོན་ནི་ཧུའེ་ཀྲོའུ་གྲོང་ཁྱེར་སློབ་འབྲིང་བརྒྱད་པའི་སློབ་སྤྱི་གཞོན་པ་ཀྲུང་དབྱིང་ཆིའུ་ཡིན་ཞིང་། ཁོང་དགེ་རྒན་བྱས་ནས་ལོ་20ལྷག་ཙམ་སོང་བས་བོད་ལྗོངས་འཛིན་གྲྭར་སློབ་ཁྲིད་བྱས་པའི་ཉམས་མྱོང་ཕུན་སུམ་ཚོགས་པོ་ཡོད། ད་ཆ་རྒན་ཀྲུང་ལགས་ཉི་བཟང་ཆོས་སྒྲོན་གྱི་ལས་ཀ་དང་འཚོ་བའི་དགེ་རྒན་བཟང་པོ་དང་གྲོགས་པོར་གྱུར་ཡོད།
ཀྲུང་དབྱིང་ཆིའུ་ཡིས“ལོ་ཕྱེད་ལྷག་ཙམ་འབྲེལ་འདྲིས་བྱས་པ་བརྒྱུད། ངས་ཉི་བཟང་ཆོས་སྒྲོན་ནི་ཡར་ཐོན་གྱི་བསམ་པ་ཆེན་པོ་ལྡན་པའི་དགེ་རྒན་ཞིག་ཡིན་པ་ཚོར་བྱུང་། ཁོ་མོ་སློབ་ལ་བརྩོན་པ་མ་ཟད། ད་དུང་དུས་ཚོད་ཡོད་རིམ་བཞིན་དགེ་རྒན་གཞན་པའི་སློབ་ཚན་ཡང་ཉན་པར་འགྲོ་ཡི་ཡོད། ལོ་ཕྱེད་ལྷག་ཙམ་སྦྱོང་བརྡར་བྱས་པ་ལས་ཁོ་མོར་ད་ཆ་དགེ་རྒན་ཞིག་གི་ཆ་རྐྱེན་ཡོངས་སུ་འཛོམས་ཡོད”ཅེས་བཤད།
མཛུབ་སྟོན་སློབ་དཔོན་གྱིས“གཅིག་གཏད་གཅིག”གི་ཐོག་ནས་སེམས་ནུས་ཡོད་རྒུས་རོགས་སྐྱོར་བྱས་པ་དེས། ཉི་བཟང་ཆོས་སྒྲོན་གྱི་འཚོ་བ་དང་། སློབ་སྦྱོང་། མི་དང་མིའི་དབར་གྱི་འབྲེལ་བ་སོགས་ཕྱོགས་གང་ཅིའི་ཐད་ལ་སྐུལ་འདེད་ཀྱི་ནུས་པ་ཆེན་པོ་ཐོན་ཡོད།
“རྒན་ཉི་བཟང་ཆོས་སྒྲོན་ལགས་ཀྱིས་ང་ཚོར་འགན་ཆེན་པོ་འཁུར་གྱི་ཡོད་ལ། ལས་ཀ་ཡང་ཧ་ཅང་ནན་ཏན་བྱེད་ཀྱི་ཡོད། དགེ་རྒན་རྣམ་པས་ཕ་མ་དང་འདྲ་བར་ང་ཚོ་འཚར་ལོངས་ཡོང་ཆེད་འབད་བརྩོན་གནང་བ་མ་ཟད། ང་ཚོའི་སློབ་སྦྱོང་ཡང་ཡག་ཐོག་ཡག་བརྩེགས་ཡོང་ཆེད་དཀའ་སྤྱད་འབད་བརྩོན་ཡང་གནང་གི་ཡོད”ཅེས་ཧུའེ་ཀྲོའུ་གྲོང་ཁྱེར་སློབ་འབྲིང་བརྒྱད་པའི་སློབ་མ་ཚེ་བརྟན་ལྷ་མོས་བཤད།
ཁོར་ཡུག་ལ་རིམ་བཞིན་འཕྲོད་པ་ནས་དམའ་འབྲིང་ལོ་རིམ་དང་པོའི་ཆབ་སྲིད་ཟུར་ཁྲིད་ཀྱི་ལས་འགན་ཁུར་བ་དང་། དེ་ནས་སློབ་གྲྭས་བཀོད་སྒྲིག་བྱས་པའི་ལས་ཀ་གཞན་དག་ཅུང་ལེགས་པའི་སྒོ་ནས་ལེགས་སྒྲུབ་ཐུབ་སྟེ། ད་ཆ་ཉི་བཟང་ཆོས་སྒྲོན་གྱི་ལས་ཀའི་ངར་ཤུགས་སྔར་བས་འཕེལ་ཡོད། “ཐོག་མའི་གདམ་ག་འདིར་ང་རང་འགྱོད་པ་མེད་པ་མ་ཟད། དེ་ལས་ལྡོག་སྟེ་ངའི་བསམ་པར་ཧུའེ་ཀྲོའུ་རུ་ལས་ཀ་བྱེད་པ་ནི་གདམ་ག་ཡང་དག་ཅིག་རེད”ཅེས་ཁོ་མོས་གིས་བཤད།