རྩྭ་མདའ་རྫོང་བསྟི་ཡག་ཤང་གི་ཟ་ཁང་ནང་མི་ཚོས་བུད་མེད་མ་བྱན་ཚེ་རིང་བཟང་མོའི་བྲེལ་བརྩོན་ཆེ་བའི་གཟུགས་བརྙན་མཐོང་རྒྱུ་ཡོད་པ་དང་ཁོང་གིས་བཟོས་པའི་ལྟོ་ཆས་བྲོ་བ་ཞིམ་པས་ཤང་ཡོངས་ཀྱི་ལས་བྱེད་པ་དང་ལས་བཟོའི་ཁས་ལེན་མགྲིན་གཅིག་ཏུ་ཐོབ་པ་རེད། དེ་སྔ་ཚེ་རིང་བཟང་མོ་ནི་ཡུལ་དེའི་དུད་ཚང་དབུལ་པོ་ཞིག་ཡིན་པ་དང་ལག་རྩལ་སྣ་གཅིག་ཀྱང་མ་ཤེས་སྟབས་རང་ཉིད་ལ་འཚམ་པའི་ལས་ཀ་ཞིག་རག་མེད། ས་གནས་དེའི་སྲིད་གཞུང་གིས་ཁོང་གི་གནས་ཚུལ་ཤེས་རྗེས་རྩྭ་མདའ་རྫོང་གིས་སྒྲིག་འཛུགས་བྱས་པ་དང་། ཧོ་པེའི་ཧན་ཏན་དུ་གཉེར་བའི་དུས་ཐེངས་གསུམ་པའི་ཨར་ཁང་གི་བཟའ་བཏུང་གསོ་སྦྱོང་ནང་ཞུགས་པ་དང་འབྲེལ་རྒྱ་ཟས་ཏན་ཞིམ་བཟོ་མཁན་གྱི་རིམ་པ་ལྔ་པའི་ལག་ཁྱེར་བདེ་བླག་ངང་རག་པས་བསྟི་ཡག་ཤང་ཟ་ཁང་གི་ཆེད་བསྐོས་མ་བྱན་བྱས་པ་རེད།

“ད་ཆ་ངར་ལོ་ལྟར་ཡོང་འབབ་སྒོར་ཁྲི་3ལྷག་ཙམ་ཡོད་པས་དབུལ་སྒྲོལ་ཐུབ་པ་མ་ཟད། ཁྱིམ་ཚང་གི་ཁུར་པོ་ཡང་དུ་ཕྱིན་སོང་། ང་གང་ཡང་མི་ཤེས་པའི་ཞིང་པ་དཀྱུས་མ་ཞིག་ནས་ལག་རྩལ་སྣ་གཅིག་ཁོང་དུ་ཆུད་པའི་ཆེད་ལས་མ་བྱན་དུ་གྱུར་པ་ནི་ཏང་དང་སྲིད་གཞུང་གི་བཀའ་དྲིན་ཡིན་པས་ལས་སླ་པོར་ཐོབ་པ་ཞིག་མིན་པའི་གོ་སྐབས་དེར་གཅེས་སྤྲས་བྱས་ཏེ་རང་ཉིད་ཀྱི་ལག་རྩལ་མཐོ་རུ་བཏང་ཐོག་ནང་མིར་དེ་བས་མཛེས་སྡུག་ལྡན་པའི་འཚོ་བ་སྐྱེལ་རྒྱུ་ཡོང་བ་བྱེད་ངེས་ཡིན”ཞེས་ཚེ་རིང་བཟང་མོས་དགའ་སྤྲོའི་ངང་བཤད།

ད་ཕན་ལོ་ཤས་རིང་མངའ་རིས་ས་ཁུལ་གྱིས་ཐོག་མཐའ་བར་གསུམ་དུ་ལས་ཞུགས་ལས་དོན“བརྟན་པོ་དྲུག”དང“འགན་ལེན་དྲུག”གི་ལས་ཀའི་ཨང་དང་པོར་བརྩིས་ཏེ་ལས་ཞུགས་འགན་ལེན་དང་། དམངས་འཚོ་འགན་ལེན། བརྟན་ལྷིང་འགན་ལེན་བཅས་དམིགས་ཡུལ་དུ་བྱེད་པ་དང་། རྩལ་ནུས་གསོ་སྦྱོང་ལ་ཤུགས་སྣོན་རྒྱག་པ་དང་། ཞིང་པ་ལས་མིའི་བྱང་ཚད་དང་ལས་ཞུགས་ཀྱི་འཇོན་ཐང་ཆེ་རུ་གཏོང་བ་འགོ་འཛུགས་སར་བྱས་ཏེ་ལས་ཞུགས་ཞབས་ཞུའི་སྤུས་ཚད་ཟམ་མི་ཆད་པར་མཐོ་རུ་བཏང་བ། ལས་ཞུགས་ཀྱི་ལས་སྟེགས་སྐྲུན་པ་དང་ལས་ཞུགས་ཀྱི་གོ་སྐབས་གཏོད་པ་ཚད་བརྒལ་སར་བྱས་ཏེ་ལས་ཞུགས་ལས་དོན་གྱི་ཆུ་ཚད་ཟམ་མི་ཆད་པར་མཐོ་རུ་བཏང་བ་བཅས་བྱས་པ་རེད།

མངའ་རིས་ས་ཁུལ་གྱིས་ས་ཨུད་དང་སྲིད་འཛིན་ཀུང་ཧྲུའུ་ཡི་འགོ་ཁྲིད་གཙོ་བོས་སྣེ་ཁྲིད་བྱས་པའི་ལས་ཞུགས་ལས་དོན་འགོ་ཁྲིད་ཚོགས་ཆུང་བཙུགས་ཏེ་ལས་ཞུགས་ཀྱི་ལས་དོན་ཡག་པོ་སྒྲུབ་པར་བླང་བྱ་ཞིབ་ཕྲ་བཏོན་པ་དང་ལས་ཀའི་བསམ་ཕྱོགས་གསལ་པོ་བཟོས་ནས་ལས་ཞུགས་ཀྱི་ལས་དོན་སྔར་བས་ཡག་པོ་སྒྲུབ་པར་རྩ་འཛུགས་ཀྱི་འགན་ལེན་བྱས་པ་རེད། ས་ཁུལ་མི་སྤྱི་ཅུས་ཀྱིས་རྫོང་བདུན་དུ་ཐེངས་མང་བསྐྱོད་དེ་ས་གནས་ས་ཐོག་གི་བརྟག་ཞིབ་བྱས་པ་དང་རྫོང་ཁག་གི་དོན་དངོས་དང་ཟུང་འབྲེལ་བྱས་ཏེ་ལས་ཞུགས་ཀྱི་དམིགས་ཚད་དང་ལས་འགན་གཏན་འཁེལ་བྱས་ནས་ལས་ཞུགས་ཀྱི་དམིགས་ཚད་དང་ལས་འགན་དང་འགན་འཁྲི་རྫོང་དང་མི་ཐོག་ཏུ་དོན་འཁྱོལ་ཞིབ་ཕྲ་བྱས་པས་མངའ་རིས་ས་ཁུལ་གྱི་ལས་ཞུགས་ལས་དོན་ལ་རིམ་པ་བཞིན་སྐུལ་འདེད་དང་རིམ་པ་བཞིན་དོན་འཁྱོལ་གྱི་རྣམ་པ་བཟང་པོ་ཞིག་ཆགས་པ་རེད།

ཞིང་འབྲོག་པའི་ལས་རིགས་རྩལ་ནུས་དང་ཆུ་ཚད་སྔར་བས་མཐོ་རུ་གཏོང་ཆེད་མངའ་རིས་ས་ཁུལ་གྱིས་ས་ཁུལ་གྱི་འབྲིང་རིམ་ལས་རིགས་ལག་རྩལ་སློབ་གྲྭ་དང་། དམངས་འཛུགས་ལས་རིགས་རྩལ་ནུས་གསོ་སྦྱོང་སྒྲིག་གཞི། ཁེ་ལས་བཅས་ལ་བརྟེན་ནས་ཞིང་འབྲོག་ཁུལ་གྱི་ལས་ཞུགས་གཞན་སྒྱུར་གྱི་ངལ་རྩོལ་བ་དང་ལྷག་པར་དུ་ཡིག་ཚགས་དང་གཱ་བཟོས་པའི་ངལ་རྩོལ་བ་དབུལ་པོ་དང་། དམའ་རིམ་དང་མཐོ་རིམ་སློབ་འབྲིང་ནས་སློབ་གྲྭར་མ་ལོན་སློབ་མ། ལས་ཤོར་ཐོ་འགོད་མི་སྣ། ལས་སྒྱུར་ལས་བཟོ། དམག་ཞབས་ཐིམ་པའི་དམག་མི། སློབ་གྲྭ་ཐོན་རྗེས་ལས་ཞུགས་ཐུབ་མེད་པའི་མཐོ་སློབ་སློབ་ཐོན་སློབ་མ། ལས་ཞུགས་ལ་དཀའ་ངལ་ཡོད་པའི་གཙོ་གནད་ཚོགས་སྤྱི་བཅས་ལ་དམིགས་ནས“མངགས་ཐོའི་རྣམ་པ”དང“ལས་གནས་གཏན་འཁེལ་རྣམ་པའི”རྩལ་ནུས་རིམ་སྤོར་གསོ་སྦྱོང་བྱས་ཏེ་མངའ་རིས་ས་ཁུལ་གྱི་ཞིང་འབྲོག་པའི་རྩལ་ནུས་གསོ་སྦྱོང་གི་རྣམ་པ་གསར་པ་ཟམ་མི་ཆད་པར་བཏོད་པ་རེད།

མངའ་རིས་ས་ཁུལ་གྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་གཙོ་ཁྲིད་ཐོན་ལས་ཏེ་ཡུལ་སྐོར་ལས་རིགས་ནི་མང་ཚོགས་དབུལ་སྒྲོལ་འབབ་འཕར་ལ་སྐུལ་ཁྲིད་བྱེད་པའི་བྱེད་ཐབས་གལ་ཆེན་རེད། ད་ཕན་ལོ་ཤས་རིང་མངའ་རིས་ས་ཁུལ་གྱིས་རིམ་རྩིས་བརྒྱབ་ན་གྲོང་གསེབ་ཀྱི་ཡུལ་སྐོར་ཞབས་ཞུའི་རྩལ་ནུས་གསོ་སྦྱོང་ཐེངས་15བྱས་པར་སྦྱོང་བརྡར་ལ་ཞུགས་པའི་མི་གྲངས་538ཟིན་ཡོད། 2020ལོར་བཟའ་བཏུང་ལས་རིགས་དང་དེ་བཞིན་ཁྱིམ་ཚང་མགྲོན་ཁང་སྐོར་གྱི་གསོ་སྦྱོང་དུས་ཐེངས་གཉིས་གཉེར་ནས་མང་ཚོགས་185ལ་གསོ་སྦྱོང་བྱས་པའི་ནང་མང་ཚོགས་དབུལ་པོ་26ཡོད་པ་རེད། 2020ལོའི་ཟླ་11པའི་ཟླ་འགོར་ས་ཁུལ་ལས་རིགས་སློབ་གྲྭའི་སློབ་མ་20ཧོ་པེའི་ཡུལ་སྐོར་ལས་རིགས་སློབ་གླིང་དུ་མཛེས་ལྗོངས་ཁུལ་གྱི་འགྲེལ་བཤད་པའི་གསོ་སྦྱོང་ལ་ཞུགས་པ་རེད།

རྩལ་ནུས་གསོ་སྦྱོང་ལ་སྐུལ་ཁྲིད་ནུས་ལྡན་བྱས་པའི་འོག་2020ལོར་མངའ་རིས་ས་ཁུལ་དུ་མི་2520གསར་དུ་ལས་ཞུགས་ཐུབ་ནས་གྲོང་ཁྱེར་དང་གྲོང་རྡལ་གྱི་ལས་ཤོར་ཐོ་འགོད་བྱེད་ཚད་3%ནང་ཚུན་དུ་ཚོད་འཛིན་ཐུབ་པ་རེད། རིམ་རྩིས་བརྒྱབ་ན་ལས་རིགས་རྩལ་ནུས་གསོ་སྦྱོང་དུས་ཐེངས་80གཉེར་ནས་ཞིང་འབྲོག་པ་7253ལ་གསོ་སྦྱོང་བྱས་པ་དང་། གསོ་སྦྱོང་བྱས་པ་བརྒྱུད་མི་5013ལས་ཞུགས་ཐུབ་ནས་ཞིང་འབྲོག་ཁུལ་གྱི་ངལ་རྩོལ་ནུས་ཤུགས་ཀྱི་ལས་ཞུགས་གཞན་སྒྱུར་ཐུབ་ཚད་མི་8681ཟིན་པ་དང་ཡོང་འབབ་སྒོར་ཁྲི་12732.8བཏོད་པ། ཞིང་འབྲོག་པ་329སྤྱི་ཚོགས་ཅན་གྱི་ལས་རིགས་རྩལ་ནུས་གསལ་འབྱེད་ལ་ཞུགས་པར་ཚང་མ་ལས་རིགས་རྩལ་ནུས་གསལ་འབྱེད་ཀྱི་རྒྱུགས་ལོན་པ། 2020ལོའི་ལོ་འདི་གའི་མཐོ་སློབ་སློབ་ཐོན་སློབ་མ་559ཟིན་ནས་མི་552ལས་ཞུགས་ཐུབ་ནས་ལས་ཞུགས་ཐུབ་ཚད་99.6%ཟིན་པ་རེད།