“ལོ་ལྔ་ཚན་བཅུ་གསུམ་པའི”རིང་རང་ལྗོངས་ཀྱིས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་དང་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ལས་དོན་བླང་བྱ་དོན་འཁྱོལ་ནན་ཏན་བྱས་པ་དང་ཞན་ཆར་དམིགས་ནས་གནད་སྨིན་འགག་སྒྲོལ་བྱས་པས་ཞིང་འབྲོག་མང་ཚོགས་ཀྱི་དམངས་འཚོའི་བདེ་རྩ་ཟམ་མི་ཆད་པར་ཆེ་རུ་ཕྱིན་པ་དང་བདེ་སྐྱིད་ལྡན་པའི་འཚོ་བ་སྐྱེལ་བའི་མང་ཚོགས་ཀྱི་གདེང་ཚོད་དེ་བས་ཆེ་རུ་ཕྱིན་པ་རེད།

རྨང་གཞིའི་སྒྲིག་བཀོད་ཟམ་མི་ཆད་པར་འཐུས་སྒོ་ཚང་དུ་ཕྱིན་པ།

གཞིས་རྩེ་གྲོང་ཁྱེར་གཏིང་སྐྱེས་རྫོང་འདྲེན་ཐང་གྲོང་རྡལ་སློབ་ཆུང་དུ་གློག་དཀོན་པའི་རྐྱེན་གྱིས་འདྲེན་ཐང་གྲོང་རྡལ་གྱི་དགེ་རྒན་ཚོས་ཉིན་ལྟར་སློབ་གྲྭ་གྲོལ་རྗེས་སློབ་མར་སློབ་གྲྭའི་ནང་ཁྱིམ་སྦྱོང་འབྲི་རུ་འཇུག་པ་དང་མཚན་མོ་གློག་བཞུར་བརྟེན་ནས་སློབ་ཚན་གྲ་སྒྲིག་བྱེད་དགོས་ཀྱི་ཡོད། གོང་རིམ་གློག་ཁུངས་ཡིན་པའི་མངའ་རིས་དྲ་སྦྲེལ་ལས་གྲྭ་ནས་གློག་གཏོང་འགོ་ཚུགས་རྗེས་ཁུལ་གསུམ་དང་ཀྲོའུ་གསུམ་གྱི་གློག་དྲའི་ལས་གྲྭར་དྲ་སྦྲེལ་ཆེན་པོའི་གློག་བཏང་བས་ད་ཆ་ཕྲུ་གུ་ཚོ་སློབ་གྲྭར་འགྲོ་བ་དང་། དགེ་རྒན་གྱིས་སློབ་ཁྲིད་བྱེད་པ། སློབ་གྲྭའི་རྒྱུན་གཏན་གློག་སྤྱོད་བཅས་ཚང་མའི་གནད་དོན་ཐག་གཅོད་ཐུབ་ཡོད་པ་རེད།

“ལྷ་ཉིང་རིམ་མཐོའི་གཞུང་ལམ་དང་ཡངས་པ་ཅན་ནས་ལྷ་ས་བར་གྱི་རིམ་མཐོའི་གཞུང་ལམ་སོགས་ཤར་གཏོང་ཐུབ་རྗེས་གཤམ་སྐྱོད་དང་གཉེན་འཕྲད་དམ་ཡང་ན་ཡུལ་སྐོར་བཅས་གང་ཞིག་བྱེད་ཀྱང་སྟབས་བདེ་པོ་འདུག”ཅེས་ལྷ་ས་ལྷུན་གྲུབ་རྫོང་ནས་ཡིན་པའི་གྲོང་མི་ཉི་མ་དབང་འདུས་ཀྱིས་དགའ་ཚོར་ཆེན་པོས་བཤད།

“ལོ་ལྔ་ཚན་བཅུ་གསུམ་པའི”རིང་རང་ལྗོངས་ཀྱི་ཕྱོགས་བསྡུས་འགྲིམ་འགྲུལ་བཀོད་པ་དེ་བས་འཐུས་སྒོ་ཚང་དུ་ཕྱིན་པ་དང་འགྲིམ་འགྲུལ་དང་། ནུས་རྒྱུ། ཆ་འཕྲིན། ཆུ་བེད་སོགས་རྣམ་གྲངས་གལ་ཆེན་ལ་སྐུལ་འདེད་མགྱོགས་མྱུར་བཏང་ནས་ཁྲོན་བོད་ལྕགས་ལམ་ལྷ་ཉིང་དུམ་བུ་བསྐྲུན་ཟིན་ཉེར་ཡོད་པ་དང་། གཡག་རྔ་ནས་ཉིང་ཁྲི་བར་གྱི་དུམ་བུའི་འཛུགས་སྐྲུན་ལས་འགོ་བཙུགས་པ། མངའ་རིས་དང་བོད་དབུས་ཀྱི་གློག་དྲ་དྲ་སྦྲེལ་ལས་གྲྭ་བསྐྲུན་ཟིན་ནས་འཁོར་རྒྱུག་བྱས་པ། ལ་ལྷོ་ཆུ་བེད་ལྟེ་བའི་ལས་གྲྭའི་ཕུག་ལམ་ཚང་མ་ཏལ་འབིགས་ཐུབ་པ་བཅས་རེད།

ས་མཐོའི་ལམ་དྲ་ཚགས་དམ་དུ་འགྲོ་བ་དང་བསྟུན་ནས་ལམ་བུ་ཇེ་ཡག་ཏུ་ཕྱིན་པ་དང་ཡུལ་སྐོར་ལས་རིགས་དང་། ཁྱད་ལྡན་ཐོན་ལས། ཟོག་འགྲེམས་ལས་རིགས་བཅས་དེ་དང་བསྟུན་ནས་འཕེལ་རྒྱས་ཕྱིན་ཡོད། རྒྱལ་ཡོངས་མི་དམངས་ཀྱིས་དོ་ཁུར་བྱེད་པའི་མཐའ་མཚམས་རྫོང་གྲོང་མེ་ཏོག་གི“ས་མཐོའི་ཁེར་ཆགས་གླིང་ཕྲན”ཞེས་པའི་མིང་མེད་པར་གྱུར་པ་དང་རྫོང་ཡོངས་ཀྱི་ཡུལ་སྐོར་དཔལ་འབྱོར་ཡང་མགྱོགས་མྱུར་འཕེལ་རྒྱས་ཕྱིན་ཡོད།

རྣམ་གྲངས་ཆེན་པོས་འཕེལ་རྒྱས་ཆེན་པོར་སྐུལ་ཁྲིད་བྱས་པ་དང་འཕེལ་རྒྱས་ཆེན་པོས་དམངས་འཚོ་ཆེན་པོར་ཕན་བཏགས་ཤིང་། 4Gདྲ་རྒྱ་གྲོང་ཁྱེར་དང་གྲོང་གསེབ་ཡོངས་སུ་ཁྱབ་པ་དང་སྦྲགས་རྒྱ་ཆེའི་ཞིང་འབྲོག་མང་ཚོགས་ཀྱིས་ཀྱང་དྲ་རྒྱ་ལས་བྱུང་བའི་ཕན་པ་ལོངས་སྤྱོད་ཐུབ་ཡོད། ལྷོ་ཁ་གྲོང་ཁྱེར་མཚོ་སྨད་རྫོང་བྲག་རྩ་སློབ་ཆུང་གི་2020ལོར་ལོ་རིམ་བཞི་པར་སླེབས་མ་ཐག་པའི་སློབ་མ་སྒྲོལ་དཀར་གྱིས་རང་ཉིད་ལ་མཁོ་བའི་ཆ་འཕྲིན་སྣ་ཚོགས་ལྟ་ཐུབ་པ་མ་ཟད། ད་དུང་དྲ་རྒྱའི་སློབ་ཚན་བརྒྱུད་ནང་སའི་སྤུས་ལེགས་ཀྱི་སློབ་ཁྲིད་ཐོན་ཁུངས་མཉམ་སྤྱོད་ཀྱང་ཐུབ་ཀྱི་ཡོད།

ཐོན་ལས་འཕེལ་རྒྱས་ཟམ་མི་ཆད་པར་སྟོབས་ཆེར་ཕྱིན་པ།

2020ལོའི་འབྲས་ལྡན་དུས་སྐབས་སུ་ཡར་ཀླུང་གཙང་པོའི་ངོགས་གཉིས་སུ་ལྗོན་ཤིང་གིས་ཁེངས་པ་དང་ཉིང་ཁྲི་གྲོང་ཁྱེར་སྨན་གླིང་རྫོང་ཆབ་ནག་ཤང་གི་མུའུ་སྟོང་ཕྲག་ཟིན་པའི་འབྲས་ཤིང་ར་བའི་ནང་བོངས་ཚད་ཆུང་བའི་ཀུ་ཤུའི་སྡོང་པོ་སྟར་པ་རེ་རེ་བཞིན་ཡལ་འདབ་རབ་ཏུ་རྒྱས་ཏེ་ཀུ་ཤུ་དམར་ཆིལ་ཆིལ་དུ་བཏགས།

གསེར་ངོགས་གྲོང་ཚོའི་སྐལ་བཟང་གཡུ་སྒྲོན་གྱིས་ཤིང་འབྲས་འཐུ་གིན་གསར་འགོད་པར“ང་རང་ཟླ་ཕྱེད་གོང་ནས་འདི་གར་ལས་ཀར་ཡོང་བ་དང་ཉིན་གཅིག་ལ་ཡོང་འབབ་སྒོར་140རག་གི་འདུག་པས། ཁོམ་པ་ཡོད་པ་དང་བསྟུན་ནས་དུས་ཡུན་རིང་ཙམ་ལས་ཀ་བྱེད་རྩིས་ཡོད”ཅེས་བཤད།

ཞིང་འབྲོག་མང་ཚོགས་ཐག་ཉེ་ས་དང་སྟབས་བདེ་སར་དང་ལས་ཐུབ་པ་དང་ལས་ཤེས་པ་དག་ཐོན་ལས་འཕེལ་རྒྱས་ནང་ཞུགས་རྒྱུར་སྐུལ་འདེད་ནུས་ལྡན་བཏང་བ་དང་རང་ལྗོངས་ཀྱིས་ད་དུང་ལས་ཞུགས་གསོ་སྦྱོང་བྱས་ཏེ་ཞིང་འབྲོག་པའི་ངལ་རྩོལ་རྩལ་ནུས་ཆུ་ཚད་མཐོ་རུ་བཏང་ནས་ལས་གནས་གསར་འབྱེད་བྱེད་ཤུགས་ཆེ་རུ་བཏང་སྟེ། མི་འབོར་དབུལ་པོའི་ལས་ཞུགས་ཐབས་ལམ་ཟམ་མི་ཆད་པར་རྒྱ་ཆེར་བཏང་བ་རེད།

“ལོ་ལྔ་ཚན་བཅུ་གསུམ་པའི”རིང་རང་ལྗོངས་ཀྱི་ཁྱད་ལྡན་ཐོན་ལས་དང་ས་མཐོའི་སྐྱེ་དངོས་ཐོན་ལས་མགྱོགས་མྱུར་འཕེལ་རྒྱས་ཕྱིན་ནས་ཡུལ་སྐོར་བར་སྣེ་ལེན་ཞུ་ཚད་དང་ཡུལ་སྐོར་ཡོང་འབབ་མགྱོགས་མྱུར་འཕར་བའི་འཕེལ་ཕྱོགས་རྒྱུན་འཁྱོངས་ཐུབ་པ་དང་། རང་བྱུང་འཐུང་ཆུ་དང་ཞིང་ཕྱུགས་ཐོན་ཟོག་ལས་སྣོན་ལས་རིགས་སོགས་རྒྱུན་སྲིང་བརྟན་པོའི་ངང་འཕེལ་རྒྱས་ཕྱིན་པ། རིམ་རྩིས་བརྒྱབ་ན་ཕྱི་ཕྱོགས་སུ་བཏང་བའི་གློག་ཆན་ཝ་ཆུ་ཚོད་དུང་ཕྱུར་65ལས་ཚད་བརྒལ་བྱུང་བ། དེང་རབས་ཞབས་ཞུའི་ལས་རིགས་ཁྱོན་ཡོངས་ནས་འཕེལ་རྒྱས་ཕྱིན་པ། མཐོ་གསར་གྲངས་འཛིན་ཐོན་ལས་གསར་གཏོད་འཕེལ་རྒྱས་དང་གྲངས་འཛིན་དཔལ་འབྱོར་གྱི་གཞི་ཁྱོན་སྒོར་དུང་ཕྱུར་330ལས་ཚད་བརྒལ་བྱུང་བ། མཐའ་མཚམས་ཚོང་དོན་ཟོག་འགྲེམས་ཐོན་ལས་མཆོང་སྐྱོད་ལྟ་བུའི་འཕེལ་རྒྱས་བྱུང་བ། གྲོང་ཁྱེར་དང་གྲོང་གསེབ་ཀྱི་ཟོག་འགྲེམས་མ་ལག་རིམ་བཞིན་འཐུས་སྒོ་ཚང་དུ་སོང་བ་བཅས་རེད།

གསར་གཏོད་ཀྱི་གསོན་ཤུགས་རྒྱུན་སྲིང་ངང་འཕེལ་བ།

རང་ལྗོངས་ཀྱི་ནོར་སྲིད་ནས་ཚན་རྩལ་ལ་གཏོང་ཆ་གཏོང་ཤུགས་དང་མཐོ་གསར་ལག་རྩལ་གྱི་ཁེ་ལས་ཞིབ་སྤེལ་ལ་གཏོང་ཆ་གཏོང་ཤུགས་ཟམ་མི་ཆད་པར་ཆེ་རུ་ཕྱིན་པ་དང་སྦྲགས། བོད་ལྗོངས་ཚན་རྩལ་གྱི“གཉིས་གཏོད”ལས་དོན་ལ་གྲུབ་འབྲས་རབ་དང་རིམ་པ་ཐོབ་པ་དང་གསར་གཏོད་ལས་གཏོད་ཀྱིས་ལས་སྟེགས་ལ་འདེགས་སྐྱོར་དང་ལས་གཏོད་ཀྱིས་ལས་ཞུགས་ལ་སྐུལ་ཁྲིད་བྱེད་ནུས་ཟམ་མི་ཆད་པར་ཆེ་རུ་ཕྱིན་པ་རེད།

ཁེ་ལས་འཕེལ་རྒྱས་ནི་ཚན་རྩལ་གསར་གཏོད་དང་ཁ་བྲལ་ཐབས་མེད་པ་དང་ཁྱད་ལྡན་ཞིང་འབྲོག་ལས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་འགག་རྩ་ནི་ལག་རྩལ་ཡར་ཐོན་ལ་ཐུག་ཡོད། “ལོ་ལྔ་ཚན་བཅུ་གསུམ་པའི”རིང་རང་ལྗོངས་ཀྱི་ཞིང་འབྲོག་ཚན་རྩལ་སྡེ་ཚན་གྱིས་ཞིང་འབྲོག་པའི་འབབ་འཕར་དང་གནད་སྨིན་དབུལ་སྒྲོལ་གྱི་ལྟེ་བའི་ལས་འགན་ལ་དམ་པོར་དམིགས་ནས་སོན་བཟང་རྨང་གཞིར་བྱེད་པ་དང་ནད་འབུའི་གནོད་འཚེ་སྔོན་འགོག་ཚོད་འཛིན་འགན་ལེན་དུ་བྱེད་པ། ཁྱད་ལྡན་ཞིང་ལས་ཐོན་ཟོག་ལས་སྣོན་གྱི་ལག་རྩལ་གསར་གཏོད་བྱ་རྒྱུ་གཙོ་གནད་དུ་བྱེད་པ་བཅས་མཐའ་འཁྱོངས་ཀྱིས་ཞིང་འབྲོག་ལས་ཀྱི་སོན་བཟང་རྒྱུད་བཟང་དང་གསོ་སྤེལ་སྐྱེད་སྲིང་ལག་རྩལ་ཁྱབ་གདལ་ཤུགས་ཆེན་བཏང་བ་དང་ཁྱད་ལྡན་ཞིང་ལས་ཐོན་ཟོག་ལས་སྣོན་ལག་རྩལ་དང་ཐོན་ཟོག་ཞིབ་སྤེལ་ཤུགས་ཆེན་བྱས་པས། ནས་ཐོན་འཕར་དང་འབྲོག་ལས་ཀྱི་སྤུས་ཚད་དང་ཕན་ནུས་འཕར་བ་དང་ཕྱོགས་སྒྱུར་འཕེལ་རྒྱས། བོད་ཀྱི་ཤིང་འབྲས་དང་སྔོ་ཚལ་ཐོན་ནུས་རིམས་སྤོར། ཞིང་ལས་ཐོན་ཟོག་ཐོན་ལས་ཅན་གསར་སྤེལ་བཅས་ལ་སྐུལ་མ་ནུས་ལྡན་ཐེབས་པ་རེད།

“གློག་སྤྱོད་ཐུབ་པ”ནས“གློག་ཡག་པོ་སྤྱོད་རྒྱུ་ཡོད་པའི”བར་དང་། ཆུ་འཐེན་པ་དང་ཆུ་སྒལ་པར་འཁུར་དགོས་པ་ནས་རང་འབབ་ཆུ་ཀ་ལ་ཁྲིད་པའི་བར། འབར་འབུར་དང་འདམ་རྫབ་ཀྱིས་ཁེངས་པའི་ལམ་ཆུང་ནས་ཇེ་མང་དུ་འགྲོ་བའི་ས་མཐོའི་ལམ་དྲའི་བར་མདོར་ན་ད་ཆ་བོད་ཀྱིས་དེ་བས་སྒོ་དབྱེ་དང་དེ་བས་གསོན་ཤུགས་ལྡན་པའི་ཉམས་འགྱུར་ཐོག་ནས་སྤུས་ཚད་མཐོ་བའི་འཕེལ་རྒྱས་ལམ་བུའི་ཐོག་མགྱོགས་ནས་མྱུར་དུ་སྐྱོད་བཞིན་ཡོད།