གོག་ཚོ་གྲོང་ཚོ་ནི་ཞིང་ཆེན་ལམ་204ཡི་རྒྱུད་དུ་གནས་པ་དང་གམ་པ་རྫོང་གྲོང་དང་བར་ཐག་སྤྱི་ལེ་17ཡོད། ས་ཁམས་གནས་བབ་ཀྱི་ལེགས་ཆ་བཟང་མོད། འོན་ཀྱང་གྲོང་ཚོའི“ཨུ་ལྷན་གཉིས”ཀྱི་ཁོངས་མིའི་རིག་གནས་བྱང་ཚད་ཡོངས་ཁྱབ་ངང་དམའ་བ་དང་། ཏང་ཡོན་གྱི་གདོང་ལེན་དཔེ་བཟང་གི་ནུས་པ་འདོན་སྤེལ་བྱ་རྒྱུ་མི་འདང་བ། མང་ཚོགས་སྣེ་ཁྲིད་བྱེད་པའི་ཕྱུག་འགྱུར་འཇོན་ཐང་བཅས་མེད་པའི་རྐྱེན་གྱིས། 2018ལོར་གོག་ཚོ་གྲོང་ཚོ་གམ་པ་རྫོང་གིས་རྫོང་ཡོངས་ཀྱི་ནུས་མེད་ཟབ་ཟོབ་ཀྱི་ཏང་རྩ་འཛུགས་ལ་གཏན་འཁེལ་བྱས་པ་རེད། 2019ལོ་ནས་བཟུང་། གམ་པ་རྫོང་གིས་ནུས་མེད་ཟབ་ཟོབ་ཀྱི་ཏང་རྩ་འཛུགས་གཅིག་སྡུད་ཐོག་བཅོས་སྒྲིག་བྱས་པ་དང་གོག་ཚོ་གྲོང་ཚོའི་ཏང་ཡོན་ལས་བྱེད་པ་དང་མང་ཚོགས་སྐུལ་སློང་བྱས་ཏེ་དོ་དམ་དམངས་གཙོ་ཅན་དང་། འཕེལ་རྒྱས་གཞི་ཁྱོན་ཅན། སྡེ་ཁུལ་ཅན་འཛུགས་སྐྲུན་བཅས་ཀྱི་གྲོང་གསེབ་གསར་པ་འཛུགས་སྐྲུན་བྱེད་པའི་ལམ་བུར་བསྐྱོད་རྒྱུ་མཐའ་འཁྱོངས་བྱས་པ་རེད།

དུས་ཡུན་ལོ་གཅིག་ལྷག་ཙམ་རིང་། གོག་ཚོ་གྲོང་ཚོས་བྱ་སྤྱོད་དངོས་ཀྱི་ཐོག་ནས“གྲོང་ཚོའི་ཏང་ཀྲི་པུའུ་དང་། ཐོན་སྐྱེད་དང་འཚོ་བ། བསམ་བློའི་འདུ་ཤེས། གོམས་སྲོལ་སྒྱུར་བ”བཅས་མངོན་འགྱུར་བྱུང་བ་དང་གཞི་རིམ་ཏང་རྩ་འཛུགས་ཀྱི་ནུས་མེད་ཟབ་ཟོབ་ཀྱི་རྣམ་པར་རྦད་དེ་འགྱུར་ལྡོག་ཕྱིན་ནས། གྲོང་ཚོའི་མང་ཚོགས་སྣེ་ཁྲིད་དེ་ཕྱུག་འགྱུར་འབྱོར་འབྲིང་གི་ཕྱོགས་སུ་བསྐྱོད་པ་རེད།

གྲོང་ཚོའི“ཨུ་ལྷན་གཉིས”ཀྱི་འགྱུར་ལྡོག

“ཁ་ཐོར་རྣམ་པ”ནས“དམངས་སེམས་གཅིག་སྒྲིལ”བྱུང་བའི་བར།

“སྔོན་མ་གོག་ཚོ་གྲོང་ཚོའི‘ཨུ་ལྷན་གཉིས’ཀྱི་ཚན་ཁག་བློ་སེམས་གཅིག་ཏུ་སྒྲིལ་མི་ཐུབ་པ་དང་ལས་ཀར་ཡང་གཞོགས་འདེགས་དམ་ཟབ་བྱེད་མི་ཐུབ་པ་མ་ཟད། གོང་རིམ་གྱིས་སྤྲད་པའི་ལས་འགན་ཡང་དུས་ཐོག་ཏུ་སྒྲུབ་མི་ཐུབ་པའམ་ཡང་ན་སྒྲུབ་ཐུབ་ཀྱི་མེད།

 མང་ཚོགས་ཀྱི་རེ་བ་ཡང་ཐག་གཅོད་མི་ཐུབ་པས་ཏང་དང་མང་ཚོགས་དབར་དང་ལས་བྱེད་པ་དང་མང་ཚོགས་དབར་གྱི་འབྲེལ་བ་ཇེ་སྡུག་ཏུ་ཕྱིན་ཡོད”ཅེས་གམ་པ་རྫོང་སྲིད་གྲོས་ཀྱི་ཀྲུའུ་ཞི་གཞོན་པ་གོག་ཚོ་གྲོང་ཚོའི་ཏང་ཀྲི་པུའི་ཧྲུའུ་ཅི་ཝུའེ་ཝེ་ཡིས་གོག་ཚོ་གྲོང་ཚོར་ཐོག་མར་འབྱོར་སྐབས་ཀྱི་གནས་ཚུལ་དྲན་གསོ་བྱེད་བཞིན་བརྗོད་བྱུང་།

2019ལོར་གམ་པ་རྫོང་ཨུད་ཀྱིས་ཕུལ་བྱུང་ལས་བྱེད་པ་གཞི་རིམ་དུ་གཏོང་སྐབས། གམ་པ་རྫོང་སྲིད་གཞུང་གཞུང་ལས་ཁང་གི་ཀྲུའུ་རེན་ཝུའེ་ཝེ་གོག་ཚོ་གྲོང་ཚོར་བཏང་བ་རེད། བརྟག་ཞིབ་དང་བཅར་འདྲི་བྱས་པ་བརྒྱུད། ཝུའེ་ཝེ་ཡིས། གོག་ཚོ་གྲོང་ཚོའི་ད་ལྟའི་གནས་ཚུལ་ལ་འགྱུར་ལྡོག་གཏོང་བའི་གནད་དོན་གཙོ་བོ་ནི། གཞི་རིམ་ཏང་རྩ་འཛུགས་ཀྱི“འགག་རྩ་ཉུང་ཤས”ལ་དམ་འཛིན་བྱེད་དགོས་པ་དེ་ཡིན་པ་དང་། ངེས་པར་དུ་ཏང་ཡོན་ལས་བྱེད་པས་སྔོན་ལ་སྔོན་ཐོན་དཔེ་མཚོན་གྱི་ནུས་པ་ཡག་པོ་འདོན་དགོས་པ་ཤེས།

སྐབས་གསར་པའི་གྲོང་ཚོའི“ཨུ་ལྷན་གཉིས”ཀྱི་ཚན་ཁག་གིས་ཚན་ཁག་གི་གོང་བུ་འགྲིལ་ཤུགས་ཆེ་རུ་གཏོང་བ་དང་ནུས་མེད་ཟབ་ཟོབ་ཀྱི་རྣམ་པར་འགྱུར་ལྡོག་གཏོང་བ་ལས་ཀའི་རྣམ་པ་གཏོད་པའི་ཚད་བརྒལ་དུ་བརྩིས་པ་དང་། ཏང་ཡོན་དང་མང་ཚོགས་སྦྲེལ་མཐུད་ཧུར་ཐག་བྱས་ནས་ལྷག་པའི་གནད་དོན་ཤེས་རྟོགས་དང་རྒྱུ་རྐྱེན་བཙལ་འཚོལ་དང་དབྱེ་ཞིབ་བྱས་ཏེ་གནད་དོན་ཐག་གཅོད་བྱས་ཡོད།

གོག་ཚོ་གྲོང་ཚོའི“ཨུ་ལྷན་གཉིས”ཀྱི་ཚན་ཁག་གི་ཁོངས་མིའི་རིག་གནས་བྱང་ཚད་སྔར་བས་མཐོ་རུ་གཏོང་ཆེད། གྲོང་ཚོའི་ཏང་ཀྲི་པུས“སློབ་ཁང”དང་གྲོང་ཚོའི་ལས་བྱེད་པའི་མཚན་མོའི་སློབ་གྲྭའི་ལས་སྟེགས་སྤྱད་དེ“ཐོག་མའི་བསམ་འདུན་མ་བརྗེད་པར་འགན་འཁྲི་བློ་ལ་བརྟན་པོར་འཆང་བའི”བརྗོད་དོན་གཙོ་བོའི་སློབ་གསོ་དང་ཟུང་འབྲེལ་བྱས་ནས“ཐོག་མའི་བསམ་འདུན་གླེང་བ་དང་། ཐོག་མའི་བསམ་འདུན་བློ་ལ་ངེས་པ། ཐོག་མའི་བསམ་འདུན་སྲུང་བ། གནད་དོན་ཤོད་པ། གནད་དོན་གླེང་བ། ཧེ་བག་འཚོལ་བ”བཅས་ཀྱི་སློབ་སྦྱོང་གྲོས་བསྡུར་གྱི་བྱེད་སྒོ་སྤེལ་བ་རེད།

དེ་ལྟར་བྱས་པ་བརྒྱུད། ད་ཆ་གོག་ཚོ་གྲོང་ཚོར“མང་ཚོགས་ཀྱིས་ཏང་ཡོན་ལ་ལྟ་བ་དང་ཏང་ཡོན་གྱིས་ཀྲི་པུའུ་ལ་ལྟ་བའི”ལས་ཀའི་རྣམ་པ་ཆགས་པ་དང་། ཏང་ཡོན་ཚོས་མི་དམངས་ལ་ཞབས་འདེགས་ཞུ་བའི་འདུ་ཤེས་ཟབ་ཏུ་ཕྱིན་པ་མ་ཟད། ཚན་ཁག་གི་གོང་བུ་འགྲིལ་ཤུགས་དང་། བློ་ཁ་ཕྱོགས་ཤུགས། འཐབ་ནུས་བཅས་སྔར་བས་ཆེ་རུ་ཕྱིན་ཡོད།

ཐོན་ལས་ཀྱི་འགྱུར་ལྡོག

“ཐོན་ལས་དང་པོ་ཁེར་རྐྱང་ཅན”ནས“བྱེད་ཐབས་སྣ་མང་ཅན”བར།

གོག་ཚོ་གྲོང་ཚོ་གཞུང་ལམ་དང་ཐག་ཉེ་བ་དང་རྫོང་གྲོང་དང་ཡང་ཐག་ཉེ་པོ་ཡོད། སྔོན་མ་གོག་ཚོ་གྲོང་ཚོར་སྲོལ་རྒྱུན་གྱི་ཕྱུགས་ལས་དང་འདེབས་ལས་མ་གཏོགས་མེད། 2019ལོའི་གོང་དུ་གྲོང་ཚོར་ལོ་ལྟར་མཉམ་སྡེབ་དཔལ་འབྱོར་གྱི་ཡོང་འབབ་སྒོར་ཉིས་ཁྲི་ཙམ་ལས་མེད། སྐབས་དེར་བཙུགས་མ་ཐག་པའི“གོག་ཚོ་གྲོང་ཚོའི་སྒོ་ཕྱུགས་གསོ་ཚགས་ཆེད་ལས་མཉམ་ལས་ཁང”ལ་ཞུགས་མཁན་དུད་ཚང་5ལས་མེད་པ་དང་གསོ་ཚགས་བྱེད་པའི་ལུག་411ལས་མེད་པའི་གམ་པ་རྫོང་གི་མཉམ་ལས་ཁང་ཆུང་ཤོས་ཤིག་རེད།

མང་ཚོགས་ལ་འདི་འདྲ་བྱེད་དགོས་ཞེས་ཤོད་པ་ལས་མང་ཚོགས་ཀྱི་སྣེ་ཁྲིད་ནས་ལས་ཀ་བྱས་ན་དགའ། ད་ལྟའི་གནས་བབ་ལ་འགྱུར་ལྡོག་གཏོང་ཆེད། སྐབས་གསར་པའི་གྲོང་ཚོའི“ཨུ་ལྷན་གཉིས”ཀྱི་ཚན་ཁག་གིས་གཞིས་རྩེ་གྲོང་ཁྱེར་དང་གམ་པ་རྫོང་གིས་ཞིང་འབྲོག་པའི་ཆེད་ལས་མཉམ་ལས་ཁང་འཕེལ་རྒྱས་ཤུགས་ཆེན་གཏོང་བ་གོ་སྐབས་སུ་བྱས་ནས“གནས་གཏད་གནས”ཀྱི་བྱེད་ཐབས་སྤྱད་དེ། གྲོང་ཚོ་དང་དུད་ཚང་དུ་བསྐྱོད་ནས་འབྲེལ་ཡོད་སྲིད་ཇུས་དང་བསམ་ཕྱོགས་དྲིལ་བསྒྲགས་ཤུགས་ཆེན་བྱས་ཏེ་མང་ཚོགས་ཀྱི་བསམ་ཕྱོགས་ཆེ་རུ་འགྲོ་བ་དང་འདུ་ཤེས་སྒྱུར་བར་ཁྲིད་སྟོན་བྱས་པ་རེད།

གྲོང་ཚོའི་ལས་བྱེད་པ་དང་ཏང་ཡོན་སྐུལ་སློང་བྱས་ནས་ཟླ་གཅིག་ཀྱང་མ་སོང་བར་གྲོང་མི་ཚོས་འཚང་ཁ་ཤིག་ཤིག་ངང་ཁྱིམ་གྱི་ལུག་ཕྲུག་མཉམ་ལས་ཁང་དུ་བསྐྱལ། 2019ལོར། གོག་ཚོ་གྲོང་ཚོའི“གོག་ཚོ་གྲོང་ཚོའི་ལུག་གསོ་ཚགས་ཆེད་ལས་མཉམ་ལས་ཁང”ལུག་མགོ་གྲངས་3200ལྷག་ཙམ་ཡོད་པའི་རྫོང་ཡོངས་ཀྱི་མཉམ་ལས་ཁང་ཆེ་གྲས་གསུམ་པར་གྱུར་པ་དང་། ལུང་རོང་ཤང་དུས་ཐུང་སྡོམ་གསོས་ཀྱི་གསོ་ཚགས་རྟེན་གཞི་དང་པོར་གྱུར་པ་རེད།

གོང་ཡག་པོ་ཞིག་རག་ཆེད། གོག་ཚོ་གྲོང་ཚོའི“ཨུ་ལྷན་གཉིས”ཀྱིས་པའེ་ཡ་ཁྲེང་དང་ཧོ་ནན་ཧྲོང་ཧུའེ་སོགས་གྲགས་ཅན་ཁེ་ལས་དང་མི་སྒེར་དབར་ཕྱིར་ཚོང་གྲོས་མཐུན་བཞག་ཅིང་། 2019ལོར་གོག་ཚོ་གྲོང་ཚོས་ལུག་1892བཙོངས་པར་སྒོར་ཁྲི་79.72རག་ཡོད།

གྲོང་རྣམ་གྲོང་སྲོལ་གྱི་འགྱུར་ལྡོག

“གྲོང་ཚོ་རྙིང་པ”ནས“མཛེས་སྡུག་ལྡན་པའི་གྲོང་ཚོར་གྱུར་པའི”བར།

གྲོང་ཚོའི་ད་ལྟའི་གནས་བབ་ལ་འགྱུར་ལྡོག་གཏོང་ཆེད། གོག་ཚོ་གྲོང་ཚོའི“ཨུ་ལྷན་གཉིས”དང་གྲོང་སྡོད་ལས་དོན་རུ་ཁག་གིས་དུས་བཀག་དང་དུས་ངེས་མེད་ཀྱི་ཞིབ་བཤེར་དཔྱད་བསྡུར་བྱེད་ཐབས་སྤྱད་པ་དང་ཝུའེ་ཝེ་ཡིས་ཟླ་རེའི་ཁ་གསབ་ནས་སྒོར་500བཏོན་ཏེ། བྱ་དགའི་དངུལ་ལ་བྱས་ཏེ་འཕྲོད་བསྟེན་ཁོར་ཡུག་ལེགས་པའི་ཁྱིམ་ཚང་དང་འཕྲོད་བསྟེན་ལེགས་པའི་མི་སྒེར་ལ་གཟེངས་བསྟོད་བྱས་པར་བརྟེན། གྲོང་མིའི་གཙང་སྦྲ་འཕྲོད་བསྟེན་གྱི་གོམས་གཤིས་དང་གྲོང་ཚོའི་རྣམ་པར་འགྱུར་ལྡོག་ཕྱིན་ཏེ་མང་ཚོགས་ལ་འཕྲོད་བསྟེན་གྱི་གོམས་གཤིས་བཟང་པོ་ཞིག་འཇགས་ཡོད།

མང་ཚོགས་ཕྱིར་སྐྱོད་ནས་ལས་ཀ་བྱེད་པའི་ཧུར་སེམས་ཆེན་པོ་མེད་པའི་གནས་ཚུལ་ལ་དམིགས་ནས། གྲོང་ཚོའི“ཨུ་ལྷན་གཉིས”ཀྱི་ཚན་ཁག་གིས་སྔ་རྗེས་སུ་དུད་ཚང་20ལྷག་ཙམ་ལ་འཚམས་འདྲི་དང་སྙིང་གཏམ་གླེང་ནས་མང་ཚོགས་ཀྱི་བསམ་འདུན་ཤེས་རྟོགས་དང་དཀའ་ངལ་དངོས་ཐག་གཅོད་བྱས་ཏེ་ལས་ཀ་འཚོལ་འདོད་མཁན་མང་ཚོགས་ཀྱི་ལས་ཞུགས་ལ་རོགས་རམ་ཧུར་ཐག་བྱས་པ་རེད།

གོག་ཚོ་གྲོང་ཚོའི“ཨུ་ལྷན་གཉིས”ཀྱི་རོགས་རམ་འོག་གྲོང་མི་དབང་རྒྱལ་ལ་ལས་ཀ་བརྟན་པོ་ཞིག་རག་ཅིང་། དབང་རྒྱལ་གྱིས་བུ་མོ་སློབ་ཆུང་དུ་འགྲོ་བས། ལྟ་རྟོག་བྱེད་མཁན་མེད་པར་བརྟེན། ཕྱིར་ལས་ཀ་བྱེད་པར་འགྲོ་འདོད་མི་བྱེད་པའི་ཁར། བཟའ་ཚང་ཡང་ཁག་ཁག་བྱས་པའི་སེམས་སྡུག་གིས་རྒྱུན་དུ་ཆང་རག་བཏུངས་ནས་སྡོད་ཀྱི་ཡོད། གྲོང་ཚོའི“ཨུ་ལྷན་གཉིས”ཀྱིས་དབང་རྒྱལ་གྱི་གནས་ཚུལ་ཤེས་རྗེས། བུ་བཅོལ་ཁང་དུ་ཁོང་ལ་ལས་ཀ་བརྟན་པོ་ཞིག་འཚོལ་རོགས་བྱས་པ་རེད།

“ད་ཆ་ང་ལ་ཟླ་རེར་གླ་ཆ་སྒོར་1500ཡོད་པའི་ཁར། བུ་མོར་ཡང་ལྟ་རྟོག་ཐུབ་པས། སེམས་ཧ་ཅང་སྐྱིད་པོ་འདུག ད་ཆ་ཆང་རག་ཀྱང་བཅད་པ་ཡིན”ཞེས་གསར་འགོད་པར་དབང་རྒྱལ་གྱིས་དགོད་བཞིན་བཤད་བྱུང་།

ད་ཆ་གཞི་རིམ་རྩ་འཛུགས་སྟོབས་ཆེན་དུ་བསྐྲུན་པ་དང་། ཐོན་ལས་འཕེལ་རྒྱས་ཕྱིན་པ། བསམ་བློར་འགྱུར་ལྡོག་བྱུང་བ་བཅས་བརྒྱུད། གོག་ཚོ་གྲོང་ཚོའི་ཡུལ་མི་གྲོང་ཚོ་ཨུ་ལྷན་དུ་ཡོང་ནས་ཁྱིམ་ཚང་གི་འགྱུར་ལྡོག་སྐོར་ཤོད་མཁན་མང་དུ་ཕྱིན་པ་དང་། ཆང་རག་བཏུངས་ནས་ཤོ་རྒྱག་མཁན་ཉུང་དུ་ཕྱིན་པ། ལས་སྒྲུབ་ལས་གཏོད་བྱེད་མཁན་མང་དུ་ཕྱིན་པ་བཅས་མཐའ་མཚམས་ཀྱི་གྲོང་ཚོ་ཆུང་ཆུང་དེར་སྐྱེ་སྟོབས་ཀྱི་དཔལ་འབར་བའི་རྣམ་པ་གསར་པས་ཁེངས་བཞིན་ཡོད།