འདི་ལོ་ཚུན། རང་སྐྱོང་ལྗོངས་ཞིང་ལས་ཚན་རིག་ཁང་གི་སྔོ་ཚལ་ཐོན་འབབ་མང་གཏོང་གི་ལྷ་སའི་ལག་རྩལ་ཞབས་ཞུ་ཚོགས་ཆུང་གི་ཚན་རྩལ་བ་སྔ་རྗེས་སུ་ས་གནས་ཁག་གི་སྔོ་ཚལ་འདེབས་འཛུགས་རྟེན་གཞིར་བསྐྱོད་དེ། ས་ཁོད་སྙོམས་པ་དང་། སོན་སྦོང་བ། སོན་འདེབས་པ། སྨན་རྒྱག་པ་སོགས་བཀོལ་སྤྱོད་བྱེད་སྟངས་སྣ་ཚོགས་དང་དུས་མཇུག་གཡོག་བྱེད་བྱེད་སྟངས་སོགས་ས་གནས་ས་ཐོག་ཏུ་མཛུབ་ཁྲིད་བྱས་ནས་རྒྱ་ཆེའི་འདེབས་འཛུགས་དུད་ཆེན་གྱི་འདེབས་འཛུགས་ལག་རྩལ་དང་ཐོན་འབབ་མང་དུ་གཏོང་རོགས་བྱས་ཤིང་། འདི་ནི་ཆུ་ཤུར་རྫོང་རྟ་དཀར་ཤང་གི་སྔོ་ཚལ་འདེབས་འཛུགས་འགྱིག་ཤོག་དྲོད་ཁང་ཆེ་མོའི་ནང་ཚན་རྩལ་པས་སྔོ་ཚལ་འདེབས་སྟངས་སློབ་བཞིན་པ། 

མང་ཚོགས་ཀྱི་ཁེ་ཕན་ནི་དོན་ཆུང་ཞིག་མ་ཡིན་ལ། “ཤ་ཚལ་སྒོང་གསུམ”གྱི་འདུ་འགོད་ནི་དམངས་འཚོ་དང་འབྲེལ་བ་ཡོད་པའི་དོན་ཆེན་ཞིག་དེ་བས་ཡིན།

ལྷག་པར་དུ་འདི་ལོ་ཚུན། རིམས་ནད་ཀྱིས་རང་ལྗོངས་ཀྱི་སྔོ་ཚལ་མཁོ་སྤྲོད་ཐད་ཕོག་པའི་ཤུགས་རྐྱེན་ལ་ཁ་གཏད་བཅག་ནས་ལྗོངས་ཡོངས་ཀྱི་སྔོ་ཚལ་རྒྱུན་གཏན་ལྟར་ཐོན་སྐྱེད་དང་མཁོ་སྤྲོད་བརྟན་པོ་ཡོང་བའི་འགན་ལེན་བྱ་ཆེད། རང་ལྗོངས་ཀྱི་འབྲེལ་ཡོད་སྡེ་ཚན་གྱིས“ཤ་ཚལ་སྒོང་གསུམ”གྱི་ཧྲི་ཀྲང་གི་འགན་འཁྲིའི་ལམ་ལུགས་སྐོར་གྱི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་། དེ་བཞིན་ལྗོངས་ཏང་ཨུད་དང་སྲིད་གཞུང་གི་བཀོད་སྒྲིག་བླང་བྱ་ནུས་ཤུགས་ཡོད་རྒུས་དོན་འཁྱོལ་བྱས་ཏེ“ཤ་ཚལ་སྒོང”གསུམ་གྱི་འདུ་འགོད་འདི་ཉིད་དམངས་འཚོའི་འདུ་འགོད་ལ་བརྩིས་ནས་དམ་འཛིན་ཏན་ཏིག་དང་ཡག་པོ་བྱས་ཏེ་རིམས་ནད་སྔོན་འགོག་དང་ཚོད་འཛིན་གྱི་འགོག་རྒོལ་དམག་འཐབ་ལ་རྒྱལ་ཁ་ལེན་ཆེད་དངོས་པོའི་འགན་ལེན་བྱས་ཡོད་པ་རེད།

ཚད་གཞི་མཐོ་པོས་སྐུལ་འདེད་བཏང་བས་ཐོན་སྐྱེད་ནུས་པ་མངོན་གསལ་དོད་པོས་ཆེ་རུ་ཕྱིན་པ། 

ལྷོ་ཁ་གྲོང་ཁྱེར་ལྷུན་རྩེ་རྫོང་དུ་ལོ་42ལ་སླེབས་པའི་ཆོས་འཕེལ་ཚལ་ཀྭ་ལ་ཡུར་མ་རྒྱག་བཞིན་འདུག དེ་སྔ་ཆོས་འཕེལ་གྱི་ཁྱིམ་ལ་ལོ་གཅིག་གི་ཡོང་འབབ་སྒོར་4000ཙམ་ལས་མེད་པས་ནང་མི་ཚོའི་ལྟོ་གོས་ཕྱིད་ཙམ་ལས་མེད། ཉེ་བའི་ལོ་ཤས་རིང་ས་གནས་དེ་གའི་སྣེ་འདྲེན་ཁེ་ལས་དང་གནད་སྨིན་ལག་བསྟར་བྱས་པའི“ལོ་ལྔ་ཚན་བཅུ་གསུམ་པའི”ཐོན་ལས་དབུལ་སྐྱོར་གྱི་གཙོ་ཁྲིད་རྣམ་གྲངས་སོགས་ལ་བརྟེན་པ་དང་སྔོ་ཚལ་སོས་པའི་ཁྲོམ་རར་དམིགས་ནས་སྔོ་ཚལ་ཐོན་སྐྱེད་ཤུགས་ཆེན་བྱས་པ་རེད། ད་ཆ་ཆོས་འཕེལ་གྱི་ནང་མི་ཚོའི་ལོའི་ཡོང་འབབ་སྒོར་ཁྲི་10ཙམ་ཟིན་གྱི་ཡོད། “ཤ་ཚལ་སྒོང་གསུམ”གྱི་འདུ་འགོད་ལས་འདེབས་འཛུགས་དུད་ཚང་གི་འབབ་འཕར་ཐབས་ལམ་རྒྱ་ཆེར་ཕྱིན་ཏེ་རྫོང་ཁོངས་དཔལ་འབྱོར་འཕེལ་རྒྱས་ཀྱི་ཆུ་ཚད་མཐོ་རུ་ནུས་ལྡན་ཕྱིན་ཡོད།

རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཐོག་མཐའ་བར་གསུམ་དུ“ཤ་ཚལ་སྒོང་གསུམ”གྱི་འདུ་འགོད་འདི་ཉིད་དོན་ཆེན་ཨང་དང་པོར་བརྩིས་ནས་དམ་འཛིན་ཏན་ཏིག་དང་ཡག་པོ་བྱས་ཏེ། “ཤ་ཚལ་སྒོང་གསུམ”་རིམ་ཁག་སྲིད་གཞུང་གི་ལས་ཕྱོད་དཔྱད་དཔོག་ནང་བཅུག་པ་དང་ཆབས་ཅིག འབྲེལ་ཡོད་སྡེ་ཚན་གྱིས“ཤ་ཚལ་སྒོང་གསུམ”གྱི་བདེ་འཇགས་ཐོན་སྐྱེད་ཀྱི་འགན་འཁྲི་འཁུར་ཤུགས་ཆེ་རུ་བཏང་བ་དང་ལམ་ལུགས་ཀྱི་འགན་ལེན་བྱེད་ཤུགས་ཟམ་མི་ཆད་པར་ཆེ་རུ་བཏང་ཡོད།

དོན་འཁྱོལ་ལ་དམ་འཛིན་བྱས་པས་ལག་རྩལ་ཞབས་ཞུའི་ནུས་པ་ཆེ་རུ་ཕྱིན་པ།

“2016ལོར་ང་སྔོ་ཚལ་འདེབས་འཛུགས་དང་ཞིང་འཕྲུལ་བཀོལ་སྤྱོད་སོགས་ལག་རྩལ་གསར་པའི་གསོ་སྦྱོང་ནང་ཞུགས་པས་ད་ཆའི་ལས་གནས་འདི་རག་བྱུང”ཞེས་ཆོས་འཕེལ་གྱིས་བཤད།

རང་ལྗོངས་ཀྱིས་ཚན་རྩལ་ཞབས་ཞུ་དང་གསོ་སྦྱོང་ལས་དོན་ཤུགས་ཆེན་སྤེལ་བ་ལས་ཕན་པ་ཐོབ་པའི་དཔེ་མཚོན་མི་སྣ་ཆོས་འཕེལ་གྱིས་བརྗོད་པ་ནི་མི་མང་པོའི་ཐུན་མོང་གི་མྱོང་ཚོར་ཞིག་རེད།

ལྷག་པར་དུ་འདི་ལོ་ཚུན་རིམས་ནད་ཐོན་རིང་ལྗོངས་ཡོངས་ཀྱི་ཞིང་ཕྱུགས་ཐོན་རྫས་རྒྱུན་གཏན་ལྟར་ཐོན་སྐྱེད་དང་མཁོ་སྤྲོད་འགན་ལེན་བྱ་ཆེད། རང་ལྗོངས་ཀྱིས་སྔ་རྗེས་སུ་ཞིང་འབྲོག་ཚན་རྩལ་ཞབས་ཞུ་བ་2600ལྷག་ཙམ་ལ་ལག་རྩལ་ཞབས་འདེགས་ཞུས་ཏེ་ཞིང་འབྲོག་པའི་སྤྱོད་གོ་ཆོད་པའི་ལག་རྩལ་དང་ཚན་རྩལ་གྲུབ་འབྲས་ཞིང་ནང་དང་འབྲོག་རར་ཁྱབ་གདལ་བཏང་བ་དང་ཞིང་འབྲོག་ལས་ཐོན་སྐྱེད་ཐད་རོགས་རམ་བྱས་ཏེ་ཞིང་འབྲོག་ཚན་རྩལ་ཞབས་ཞུའི“མཐའ་མའི་འགག་གནད”མེད་པ་བཟོས་པ་རེད།

གྲོང་ཁྱེར་དང་ས་ཁུལ་རིམ་ངོས་སུ་འབྲེལ་ཡོད་གྲོང་ཁྱེར་དང་ས་ཁུལ་གྱིས་བེད་མེད་དུ་ལུས་པའི་སྔོ་ཚལ་འགྱིག་ཤོག་དྲོད་ཁང་ཆེ་མོ་ཉམས་བཟོ་བྱས་ནས་གང་ལེགས་སྤྱད་དེ་འདེབས་འཛུགས་དུད་ཚང་ལ་འདེབས་འཛུགས་ཀྱི་དུས་ཚོད་ཐུང་བ་དང་ཐོན་འབབ་མང་བའི་ཁར་མང་ཚོགས་ཀྱིས་ཧ་ཅང་དགའ་པོ་བྱེད་པའི་ཞའོ་པད་ཚལ་དང་ཧྲང་ཧའེ་ཆིང་སོགས་འདེབས་འཛུགས་ཐད་མཛུབ་ཁྲིད་བྱས་པས་སྔོ་ཚལ་གྱི་ཐོན་འབབ་ལེགས་སུ་ཤུགས་ཆེན་ཕྱིན་ཡོད།

ལྗོངས་ཡོངས་མཉམ་དུ་སྐུལ་སློང་བྱས་པས་སྔོ་ཚལ་སོས་ལ་རིན་གོང་ཁེ་བ།

ལྗོངས་ཡོངས་ཀྱི་གྲོང་ཁྱེར་དང་ས་ཁུལ་ཁག་གིས་བྱེད་ཐབས་མཉམ་དུ་སྤྱད་དེ་ཞིང་ཚོང་འབྲེལ་མཐུད་དང་། ཐད་ཐོན་ཐད་འཚོང་། གྲོང་གསེབ་ཏུ་གློག་རྡུལ་ཚོང་དོན་ཁྱབ་གདལ་གཏོང་བའི་ཕྱོགས་བསྡུས་དཔེ་སྟོན་སོགས་ཀྱི་རྣམ་པ་བརྒྱུད་ཞིང་ཞོར་ཐོན་རྫས་འཁོར་རྒྱུག་གི་ལས་ཕྱོད་ཆེ་རུ་དང་མ་གནས་དམའ་རུ་བཏང་སྟེ་ཞིང་འབྲོག་ཁུལ་གྱི་མཁོ་སྤྲོད“འདང་ངེས་མེད་པ་དང་། སྟབས་བདེ་མེད་པ། བདེ་འཇགས་མེད་པ། དངོས་ཕན་མེད་པ”བཅས་ཀྱི་གནད་དོན་ནུས་ཤུགས་ཡོད་རྒུས་ཐག་གཅོད་བྱས་པར་དུས་མཚམས་རང་བཞིན་གྱི་ཕན་འབྲས་ཐོན་ཡོད།

བསྡོམས་རྩིས་བྱས་པར་གཞིགས་ན། རང་ལྗོངས་ནས་ཐོན་སྐྱེད་བྱས་པའི་སྔོ་ཚལ་ཞིང་འབྲོག་པ་རང་ཉིད་ཀྱིས་སྤྱོད་པ་ཕུད་85%ལྷག་ཙམ་ཞིང་ཞོར་ཐོན་རྫས་ཁྲོམ་ར་ཆེ་གྲས་ཁག་ཏུ་བསྐྱལ་ནས་གྲོང་ཁྱེར་དང་གྲོང་རྡལ་གྱི་གྲོང་མིའི་སྔོ་ཚལ་གྱི་དགོས་མཁོ་སྐོང་བ་དང་། གྲོང་ཁྱེར་དང་གྲོང་རྡལ་དུ་སྔོ་ཚལ་ཐོན་མང་བའི་ཟླ་5པ་ནས་9པ་བར་ཁྲོམ་རར་སྔོ་ཚལ་85%ཙམ་རང་མཁོ་རང་སྤྲོད་ཐུབ་ཀྱི་ཡོད། སྔོ་ཚལ་ཐོན་མང་པོ་མེད་པའི་ཟླ་10པ་ནས་4པ་བར་ཐོན་རྫས་ཁྲོམ་རར་སྔོ་ཚལ་40%ནས་50%བར་འདང་གི་མེད་པ་རེད།

སྤུས་འབོར་གཉིས་ལྡན་ཡོང་བར་བྱས་པས་སྤུས་ཚད་ལྟ་འདོམས་ཀྱི་ནུས་པ་ཇེ་ཆེར་སོང་བ།

རང་ལྗོངས་ཀྱིས་ཞིང་ཞོར་ཐོན་རྫས་ཀྱི་སྤུས་ཚད་བདེ་འཇགས་ལྟ་འདོམས་ལས་དོན་འདི་ཉིད་སྲིད་གཞུང་གི་དམིགས་ཚད་ལས་རྗེས་དོ་དམ་གྱི་དཔྱད་དཔོག་མ་ལག་ནང་བཅུག་སྟེ་གཏོགས་ཁོངས་དོ་དམ་གྱི་འགན་འཁྲིའི་ལམ་ལུགས་དང་སྡེ་ཚན་གྱི་ལྟ་འདོམས་འགན་འཁྲིའི་ལམ་ལུགས་དོན་འཁྱོལ་ནན་པོ་བྱས་ནས་ལྟ་འདོམས་ལས་དོན་གོ་རིམ་ལྡན་པའི་ངང་སྤེལ་རྒྱུའི་འགན་ལེན་བྱས་ཡོད།

བརྟག་དཔྱད་བྱས་འབྲས་ལས་མངོན་པར། ཉིང་ཁྲི་གྲོང་ཁྱེར་གྱི“ཤ་ཚལ་སྒོང་གསུམ”གྱི་ཐོན་རྫས་མཁོ་སྤྲོད་ཕུན་སུམ་ཚོཌ་པ་དང་། རིན་གོང་བརྟན་པ། སྤུས་ཚད་ལེགས་པ་བཅས་ལས་བཟའ་བཅའི་བདེ་འཇགས་ཐད་མང་ཚོགས་བློ་ཡིད་ཚིམ་ཚད་90%ལྷག་ཙམ་ཟིན་ཡོད། མིག་སྔར་ཉིང་ཁྲི་གྲོང་ཁྱེར་འདི་ཉིད་ཁག་གསུམ་པའི་བཟའ་བཅའི་བདེ་འཇགས་གཏོད་འཛུགས་ཀྱི་ཚོད་ལྟའི་གྲོང་ཁྱེར་ནང་བཅུག་ཡོད།