“ང་ཚོས་ཡུས་ཀུང་གིས་རི་བོ་སྤོས་པ་ལྟར་གྱི་སྙིང་སྟོབས་ལ་བརྟེན་ནས་དམིགས་ཚད་གཏན་འཁེལ་དང་དངོས་སྒྲུབ་དཀའ་སྤྱད་ཀྱིས་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་མཐའ་གཅིག་ཏུ་བླངས་ཏེ་2020ལོར་སླེབས་སྐབས་ས་ཁུལ་དབུལ་པོ་དང་མི་འབོར་དབུལ་པོ་ཚང་མ་ཕྱོགས་ཡོངས་ནས་འབྱོར་འབྲིང་སྤྱི་ཚོགས་ཕྱོགས་སུ་མཉམ་དུ་སྐྱོད་པའི་འགན་ལེན་བྱེད་དགོས”ཞེས་2015ལོའི་ཟླ་11ཚེས་27ཉིན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་དབྱང་གི་དབུལ་སྐྱོར་གསར་སྤེལ་ལས་དོན་ཚོགས་འདུའི་ཐོག་སྙན་ཞིང་འཇེབས་ལ་ནུས་ལྡན་གྱི་བཀའ་རྒྱ་བཏང་གནང་ཡོད།

དུས་དེ་ནས་བཟུང་། གངས་ལྗོངས་ས་མཐོར་དབུལ་སྒྲོལ་འགག་སྒྲོལ་གྱི་གདོང་མཆོང་དུང་བརྡ་གྲགས་ཡོད།

ལོ་5ཡི་རིང་། ཉིང་ཁྲི་གྲོང་ཨུད་དང་གྲོང་ཁྱེར་སྲིད་གཞུང་གིས་གནད་སྨིན་དབུལ་སྐྱོར་དང་གནད་སྨིན་དབུལ་སྒྲོལ་དེ་ཆབ་སྲིད་ཀྱི་ལས་འགན་གལ་ཆེན་དང་། དོན་ཆེན་ཨང་དང་པོ། དམངས་འཚོའི་འདུ་འགོད་ཨང་དང་པོ་བཅས་ལ་བརྩིས་ནས“གནད་སྨིན”གྱི་བཀོད་སྒྲིག་ཇུས་འགོད་ལ་དམ་པོར་དམིགས་པ་དང་། བརྟག་ཞིབ་གཏིང་ཟབ་དང་། བསམ་ཕྱོགས་གསལ་བཟོ། བྱ་ཐབས་གཏན་འཁེལ། དོན་འཁྱོལ་ལ་དམ་འཛིན་བཅས་བྱས་ནས། “ཕར་ཆིན་རྒྱག་པའི”སྙིང་སྟོབས་སྤྱད་དེ“གངས་ལྗོངས་ཀྱི་སྔོ་ལྗང་མཛེས་ལྗོངས་ཁུལ”དུ་དབུལ་སྒྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་ལེན་པའི་ལོ་རྒྱུས་ཀྱི་ལེའུ་གསར་པ་བརྩམས་ཡོད།

2020ལོའི་ཟླ་10པ་བར། ཉིང་ཁྲི་གྲོང་ཁྱེར་གྱིས་རིམ་རྩིས་བྱས་ན་དུད་ཚང་དབུལ་པོ་6958ཀྱི་མི་གྲངས23893ཉུང་དུ་བཏང་བ་དང་། མི་འབོར་དབུལ་པོ་ཚང་མ་དབུལ་པོ་ཐོན་རིམ་བཞིན་དབུལ་སྒྲོལ་བྱས་པ། རྫོང་ཆུས་7ཚང་མ་དུས་བཀག་ལྟར་དབུལ་ཞྭ་ཕུད་པ། གྲོང་ཚོ་དབུལ་པོ་490ཚང་མ་དབུལ་སྒྲོལ་ཐུབ་ཐབས་བྱས་པ། དབུལ་པོ་དབུལ་རྐྱང་གཞི་རྩའི་ཆ་ནས་སེལ་བ། ས་ཁོངས་རང་བཞིན་གྱི་སྤྱི་ཡོངས་དབུལ་ཕོངས་ཐག་གཅོད་ནུས་ལྡན་བྱས་པས། དབུལ་སྒྲོལ་འགག་སྒྲོལ་ལ་ཐག་གཅོད་རང་བཞིན་གྱི་རྒྱལ་ཁ་ཆེན་པོ་ཐོབ་ཡོད།

མ་དངུལ་གཏོང་ཤུགས་ཆེ་རུ་བཏང་ནས་རྨང་གཞིའི་སྒྲིག་བཀོད་སྔར་བས་འཐུས་སྒོ་ཚང་དུ་བཏང་བ།

སྔོན་ཆད་ཚ་བ་རོང་དུ་དོན་སྙིང་ངོ་མ་ལྡན་པའི་གཞུང་ལམ་གཅིག་ཀྱང་མེད་པ་དང་། ཕྱི་ཕྱོགས་སུ་སྐྱོད་པར་རྒྱལ་མོ་རྔུལ་ཆུའི་འཁྲིས་ཀྱི་གཡང་གཟར་སྟེང་གི་རྟ་དྲེལ་གྱི་བགྲོད་ལམ་རེ་རེ་དང་རྒྱལ་མོ་རྔུལ་ཆུའི་འབྲེང་ཐག་འབའ་ཞིག་དེ་ལས་མེད་སྟབས། དངོས་ཟོག་ཚང་མ་རྟ་དྲེལ་ལ་བརྟེན་ནས་དབོར་དགོས་པ་དང་། འགྲིམ་འགྲུལ་ནི་རྐང་པ་དང་འཕྲིན་གཏོང་ནི་སྐད་བརྡར་བརྟེན་དགོས་སྟབས། མང་ཚོགས་ཀྱི་ཐོན་སྐྱེད་བྱེད་སྟངས་རྐྱང་པ་དང་འབབ་འཕར་གྱི་ཐབས་ལམ་ཉུང་ཉུང་ཡིན་པ་ནི་དེ་གའི་གནས་ཚུལ་ངོ་མ་ཞིག་རེད།

འདི་ལོ་ལོ་43ལ་སླེབས་པའི་ཚེ་རིང་གྲགས་པའི་ཕ་མེས་ཚོ་ཚ་བ་རོང་ཤང་ཁྲོ་ཉི་གྲོང་ཚོར་འཚོ་བ་སྐྱེལ་གྱི་ཡོད། ཁོང་ལོ་7ལ་སླེབས་སྐབས་འབྲེང་ཐག་བརྒྱུད་རྫ་ཡུལ་རྫོང་གྲོང་དུ་འཚོ་བའི་དངོས་ཟོག་ཉོ་བར་སྐྱོད་ཐེངས་དང་པོ་དེ་ཡིན། “འགྲོ་འོང་བྱེད་ཐེངས་ཚང་མར་ཤི་གསོན་གྱི་ཉེན་ཁ་ཆེན་པོ་འཕྲད་ཀྱི་ཡོད་པ་དང་གཡང་གཟར་སར་མི་གཅིག་མ་གཏོགས་འགྲོ་སྐྱོད་བྱེད་ཐུབ་ཀྱི་མེད”ཅེས་ཚེ་རིང་གྲགས་པས་བརྗོད།

ད་ཆ་རྒྱལ་ཁབ་ཀྱི་དམངས་ཕན་སྲིད་ཇུས་ཀྱི་རོགས་སྐྱོར་འོག་ཁྲོ་ཉི་གྲོང་ཚོས་ཞིང་འབྲོག་ལས་ཚན་རིག་དང་མཐུན་པའི་སྒོ་ནས་འདེབས་འཛུགས་དང་གསོ་ཚགས་དང་། ནགས་ཁྲོད་ཐོན་ཁུངས་འཚོལ་བསྡུ། ངལ་རྩོལ་ནུས་ཤུགས་ལས་ཞུགས་གཞན་སྒྱུར་སོགས་ཀྱི་ཐབས་ལམ་བརྒྱུད་གྲོང་མི་མི་རེར་ཆ་སྙོམས་བཀོལ་སྤྱོད་ཆོག་པའི་ཡོང་འབབ་ལོ་ལྟར་འཕར་ཚད་16%ཡན་རྒྱུན་འཁྱོངས་ཐུབ་པ་དང་། དུད་ཚང་རེར་བཅོལ་དངུལ་བསྡོམས་འབོར་སྒོར་ཁྲི་10ཡན་ཟིན་པ། ཟོག་འདྲེན་རླངས་འཁོར་སོགས་རླངས་འཁོར་འདྲ་མིན་སྣ་ཚོགས་མི་སེར་དཀྱུས་མའི་ཁྱིམ་གྱི་སྒོ་རྩར་མཐོང་རྒྱུ་ཡོད་པ་རེད།

ཁྲོ་ཉི་གྲོང་ཚོའི་གྲོང་མིའི་འཚོ་བའི་ཆུ་ཚད་མཐོ་རུ་སོང་བ་དེ་ནི་འགྲིམ་འགྲུལ་གྱི་ཆ་རྐྱེན་ལེགས་སུ་ཕྱིན་པ་དང་ཁ་འབྲལ་ཐབས་མེད། 2016ལོར། སྐེད་རི་ཡུག་ཁུལ་གྱི“གྲོང་ཚོ་ཚང་མར་ཤར་གཏོང་ཐུབ་པའི”གཞུང་ལམ་དང་རྒྱལ་མོ་རྔུལ་ཆུའི་ཁྲོ་ཉི་ཟམ་པ་སྐྲུན་འགོ་ཚུགས་ཤིང་། ལམ་ཐག་སྤྱི་ལེ་12.5ལས་མེད་པའི་སྐེད་རི་གྲོང་ཚོ་དང་ཁྲོ་ཉི་གྲོང་ཚོ་བར་གྱི་གཞུང་ལམ་ལ་ཁྱོན་མ་དངུལ་སྒོར་ཁྲི་2894བཏང་ཡོད། ད་ཆ་རྒྱལ་མོ་རྔུལ་ཆུའི་ཁྲོ་ཉི་ཟམ་པར་རླངས་འཁོར་ཤར་གཏོང་ཐུབ་པ་དང་འགྲོ་ལམ་ཤར་གཏོང་ཐུབ་ཚད་མངོན་གསལ་དོད་པོས་མཐོ་རུ་ཕྱིན་ནས་ས་གནས་དེ་གའི་མང་ཚོགས་རྣམས་འབྲེང་ཐག་དང་དཔྱང་ཟམ་དུ་སྐྱོད་པའི་ལོ་རྒྱུས་མཇུག་འགྲིལ་ཡོད།

ལམ་ཤར་གཏོང་ཐུབ་པས་གྲོང་མིའི་བསམ་བློའི་ལྟ་བར་འགྱུར་ལྡོག་ཆེན་པོ་ཕྱིན་ཞིང་། ཉེ་བའི་ལོ་ཤས་རིང་། ཁྲོ་ཉི་གྲོང་ཚོའི“ཨུ་ལྷན་གཉིས”ཀྱི་ཚན་ཁག་གི་ཁོངས་མི་དང་གྲོང་ཚོར་བཅའ་སྡོད་བོད་ལྗོངས་ཞིང་འབྲོག་སློབ་གླིང་གི་ལས་དོན་རུ་ཁག་གིས“ཞན་ཆ་སེལ་བ་དང་འཕེལ་རྒྱས་ལ་སྐུལ་འདེད་གཏོང་བའི”བསམ་ཕྱོགས་བཏོན་ནས་ཚ་བ་རོང་ཤང་རྒྱལ་མོ་རྔུལ་ཆུའི་ཁྱད་ལྡན་ཞིང་ཞོར་ཐོན་རྫས་ཚད་ཡོད་ཀུང་སི་བཙུགས་ཏེ་རྣ་ཅོག་མེ་ཏོག་གི་ཆང་དང་རི་སྐྱེས་སྟར་ཁའི་སྣུམ་ཁྲོམ་རར་བཏོན་པ་དང་། ཕུ་ཉི་ཚོགས་ཆུང་གི་རང་བྱུང་རི་མཐོའི་འབྲོག་རའི་རྟ་ནོར་ལུག་སོགས་སྒོ་ཕྱུགས་གསོ་ཚགས་ཀྱི་གཞི་ཁྱོན་སྔར་བས་ཆེ་རུ་བཏང་ཡོད། མི་རིང་བའི་གོང་། ཁྲོ་ཉི་གྲོང་ཚོ་དང་ཁྲེང་ཏུའི་འབྲེལ་ཡོད་ཀུང་སིའི་དབར་ཚབ་ཚོང་གྲོས་མཐུན་བཞག་སྟེ་ཐུ་ནི་སིའི་སེ་འབྲུ་འདེབས་ཁྱོན་ཆེ་རུ་བཏང་བས་ཐོན་ལས་ཀྱི་བཀོད་པ་གྲུབ་ཡོད།

དབུལ་སྒྲོལ་འགག་སྒྲོལ་བྱས་ནས་ཐོན་ལས་སྔོན་ལ་ལག་བསྟར་བྱས་པ།

“ཕག་གསོ་ར་བའི་ཕན་འབྲས་ཀྱིས་ང་ཚོའི་ཁྱིམ་ཚང་ཚུད་པའི་དུད་ཚང་19ཡི་འཚོ་བར་ཐད་ཀར་ཤུགས་རྐྱེན་བཟང་པོ་ཐེབས་མོད། འོན་ཀྱང་རང་ཉིད་ལ་ཁོ་ཚོའི་སྣེ་ཁྲིད་དེ་ཕྱུག་འགྱུར་འབྱོར་འབྲིང་ཕྱོགས་སུ་སྐྱོད་པར་ཡིད་ཆེས་ཆེན་པོ་ཡོད”ཅེས་ཉིང་ཁྲི་གྲོང་ཁྱེར་རྫ་ཡུལ་རྫོང་རྫ་ཡུལ་རོང་སྨད་གྲོང་རྡལ་སྤྱི་གཏོང་གྲོང་ཚོའི་བོད་ཕག་ཐོན་ལས་ཀྱི་ཕྱུག་འགྱུར་སྣེ་ཁྲིད་པ་ཨ་ཕང་གིས་ཕག་གསོ་ར་བར་མཛུབ་མོ་བཙུགས་ཏེ་གདེང་ཚོད་ཀྱིས་ཁེངས་བཞིན་བཤད།

ཕྱུག་འགྱུར་སྣེ་ཁྲིད་པ་ཞིག་དང་སྤྱི་གཏོང་གྲོང་ཚོའི་གྲོང་ཚོ་ཨུ་ལྷན་གྱི་ཀྲུའུ་རེན་གྱི་ངོས་ནས། ཕག་གསོ་ར་བ་བཙུགས་ནའང་གུང་ཁྲན་ཏང་ཡོན་ཞིག་གི་འགན་འཁྲི་དུས་དང་རྣམ་པ་ཀུན་ཏུ་སེམས་ལ་བརྟན་པོར་བཅངས་ཡོད། ཁོང་གི་ཕག་གསོ་ར་བས“མཉམ་ལས་ཁང་+དུད་ཚང་དབུལ་པོའི”བྱེད་སྟངས་སྤྱད་དེ་དུད་ཚང་དབུལ་པོ་ལས་མིར་གླས་པ་མ་ཟད། ཕག་གསོའི་ལག་རྩལ་བསླབས་ནས་དུད་ཚང་དབུལ་པོར་མ་རྐང་ལྟར་ཁེ་སྤོགས་བགོ་བཤའ་རྒྱག་གི་ཡོད། བསྡོམས་རྩིས་བརྒྱབ་པར་གཞིགས་ན། ཁོང་གི་ཕག་གསོ་ར་བས་སྤྱི་གཏོང་གྲོང་ཚོའི་དུད་ཚང་དབུལ་པོར་ལོ་རེར་དུད་ཚང་རེར་ཆ་སྙོམས་ཡོང་འབབ་སྒོར་5000འཕར་བར་སྐུལ་ཁྲིད་བྱས་ཡོད།

ཉིང་ཁྲི་གྲོང་ཁྱེར་གྱི་གྲོང་དཔོན་གཞོན་པ་ཞུས་ལུང་ཧའེ་ཡིས་ངོ་སྤྲོད་བྱས་པར་གཞིགས་ན། ཉེ་བའི་ལོ་ཤས་རིང་། “རྒྱུད་གཅིག་དང་རྟེན་གཞི་བཞིའི”ཐོན་ལས་ཀྱི་བཀོད་པར་དམིགས་པ་དང“རྫོང་མང་པོར་སྤུས་རྟགས་གཅིག་དང་། ཐོན་ལས་མཉམ་འགུལ”གྱི་འཕེལ་རྒྱས་བསམ་ཕྱོགས་གཞིར་བཟུང་། ཉིང་ཁྲི་གྲོང་ཁྱེར་གྱིས་ཁེ་ལས་དང་དེ་བཞིན་མཉམ་ལས་ཁང་གིས་ཡུག་སྦྲེལ་འདེབས་འཛུགས་དང་གཞི་ཁྱོན་འོས་འཚམ་གྱི་གསོ་ཚགས་ལ་ཁྲིད་སྟོན་ཧུར་ཐག་བྱས་པས། ཀོང་པོ་རྒྱ་མདའ་དང་། སྨན་གླིང་། སྤོ་བོ། བྲག་ཡིབ་སོགས་རྫོང(ཆུས)གཙོ་བོར་བྱས་པའི་བོད་ཕག་ཐོན་ལས་རྟེན་གཞི་དང་། སྤོ་བོ་དང་། རྫ་ཡུལ། མེ་ཏོག་སོགས་རྫོང(ཆུས)གཙོ་བོར་བྱས་པའི་ཇའི་ཐོན་ལས་རྟེན་གཞི། བྲག་ཡིབ་དང་། སྨན་གླིང་། སྤོ་བོ། རྫ་ཡུལ་སོགས་རྫོང(ཆུས)གཙོ་བོར་བྱས་པའི་ཤིང་འབྲས་འདེབས་འཛུགས་རྟེན་གཞི། སྨན་གླིང་རྫོང་གཙོ་བོར་བྱས་པའི་བོད་སྨན་སྨན་རྩྭ་འདེབས་འཛུགས་རྟེན་གཞི། བྲག་ཡིབ་ཆུས་གཙོ་བོར་བྱས་པའི་སྔོ་ཚལ་འདེབས་འཛུགས་རྟེན་གཞི་བཅས་རིམ་བཞིན་ཆགས་ཡོད། མིག་སྔའི་བར་ཉིང་ཁྲི་གྲོང་ཁྱེར་གྱིས་རིམ་རྩིས་བྱས་ན་འབྲས་ཤིང་མུའུ་ཁྲི་27.68བཏབ་པ་དང་། ཇ་ལོ་མུའུ་ཁྲི་4.6བཏབ་པ། སྒྲིག་བཀོད་སྔོ་ཚལ་མུའུ་ཁྲི་0.9བཏབ་པ། བོད་སྨན་སྨན་རྩྭ་མུའུ་ཁྲི་1.47བཏབ་པ། བོད་ཕག་མགོ་གྲངས་ཁྲི་23གསོ་ཚགས་བྱས་ཡོད།

འདེབས་འཛུགས་དང་གསོ་ཚགས་ཀྱི་གཞི་ཁྱོན་ཆེ་རུ་བཏང་བ་དང་ཆབས་ཅིག ཉིང་ཁྲི་གྲོང་ཁྱེར་གྱིས་གཟིགས་སྐྱོང་སྲིད་ཇུས་ལ་བརྟེན་ནས་ས་གནས་དེ་གའི་ཁེ་ལས་ལ་རོགས་སྐྱོར་མཐའ་འཁྱོངས་བྱས་ཏེ། ཚོང་འགུགས་མ་འདྲེན་ལ་བརྟེན་ནས་སྣེ་འདྲེན་ཁེ་ལས་ནང་འདྲེན་དང་། ཁྲོམ་རའི་ལམ་སྲོལ་ལ་བརྟེན་ནས་སྣེ་འདྲེན་ཁེ་ལས་ལ་སྐུལ་འདེད་གཏོང་བ། ལག་རྩལ་སྒྱུར་བཀོད་ལ་བརྟེན་ནས་སྣེ་འདྲེན་ཁེ་ལས་རིམ་པ་སྤོར་བ་བཅས་ཀྱིས་ཁེ་ལས་ལ་དཔེ་སྟོན་སྣེ་ཁྲིད་ཀྱི་ནུས་པ་གང་ལེགས་འདོན་པར་ཁྲིད་སྟོན་ཧུར་ཐག་བྱས་ཏེ་ཐོན་ལས་རྩ་འཛུགས་ཅན་གྱི་འཕེལ་རྒྱས་ཆུ་ཚད་རྒྱུན་ཆད་མེད་པར་མཐོ་རུ་བཏང་ཡོད།

ཁོར་ཡུག་དམངས་ལ་འཚམ་པར་བྱས་ནས་བདེ་སྐྱིད་སྟོན་གྲངས་མཐོ་རུ་བཏང་བ།

ལོ་ཤས་གོང་། ལྗོན་ཤིང་གང་བྱུང་དུ་གཅོད་པ་སོགས་ཀྱིས་རྐྱེན་པས་སྤོ་བོ་རྫོང་རྡོ་རྗེ་ཤང་ཤིས་པ་གྲོང་ཚོའི་ཉེ་འགྲམ་རི་སྟེང་གི་ལྗོན་ཤིང་ཇེ་ཉུང་དུ་སོང་ནས་ལྷགས་པ་བརྒྱབ་རྗེས་གྲོང་ཚོ་དེ་སྐྱ་ཐིང་ཐིང་དུ་འགྱུར་གྱི་ཡོད། ད་ལྟའི་གནས་ཚུལ་ལ་འགྱུར་ལྡོག་གཏོང་ཆེད། ཤང་སྲིད་གཞུང་དང་ཤིས་པ་གྲོང་ཚོ“ཨུ་ལྷན་གཉིས”ཀྱི་ཚན་ཁག་གིས་ཚོགས་འདུ་འཚོགས་ནས། ཐག་གཅོད་ཇུས་གཞི་གྲོས་བསྡུར་བྱས་ནས་བཟོས་པ་རེད། “ཐོག་མར་གྲོང་མིས་ལྗོན་ཤིང་གང་བྱུང་དུ་གཅོད་པ་གཏན་འགོག་དང་། ནགས་སྲུང་བས་ཉིན་ལྟར་དུས་ངེས་མེད་དུ་སྐོར་ཞིབ། དེ་རྗེས་གད་སྙིགས་བཤོ་བའི་གནས་ཚུལ་ཚད་ལྡན་བཟོ་བ་དང་། ཉིན་ལྟར་གྲོང་མི་བཀོད་སྒྲིག་བྱས་ཏེ་རེས་མོས་ངང་གྲོང་ཚོར་གཙང་སྦྲ་བྱས་ནས་གྲོང་མིར་ཁོར་ཡུག་ལ་གཅེས་སྐྱོང་བྱེད་པའི་གོམས་གཤིས་ཡག་པོ་ཞིག་འཇགས་པར་སྐུལ་མ་ཧུར་ཐག་བཏང་ཡོད”ཅེས་གྲོང་ཚོ་དེའི་ཏང་ཀྲི་པུའི་ཧྲུའུ་ཅིས་གསར་འགོད་པར་ངོ་སྤྲོད་བྱས་བྱུང་།

གྲོང་གསེབ་ཀྱི་ཁོར་ཡུག་བཅོས་སྒྲིག་ལས་དོན་ཟམ་མི་ཆད་པར་གཏིང་ཟབ་སྤེལ་བས། དེ་སྔོན་གྱི་གྲོང་ཚོ་དབུལ་པོ་ད་ཆ་རྡོ་རྗེ་ཤང་གི་གྲོང་གསེབ་ཀྱི་ཁོར་ཡུག་བཅོས་སྒྲིག་གི་ཚད་ཤིང་ཞིག་ཏུ་གྱུར་ཡོད། “ད་ཆ་ཏང་གི་དབུལ་སྐྱོར་སྲིད་ཇུས་བཟང་པོའི་འོག་ང་ཚོས་རང་ཉིད་ཀྱི་ལག་གཉིས་ལ་བརྟེན་ནས་ཕྱུག་པོ་ཆགས་པ་དང་གྲོང་ཚོའི་ཁོར་ཡུག་མཛེས་སུ་གཏོང་གི་ཡིན”ཞེས་ལོ་63ལ་སླེབས་པའི་གྲོང་མི་ཚེ་རིང་གིས་བཤད།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་དུ། ཉིང་ཁྲི་གྲོང་ཁྱེར་གྱིས་སྣོད་བཅུད་ལ་བརྟེན་ནས་གྲོང་ཁྱེར་འཛུགས་སྐྲུན་དང་། སྣོད་བཅུད་ལ་བརྟེན་ནས་གྲོང་ཁྱེར་ཕྱུག་འགྱུར། སྣོད་བཅུད་ལ་བརྟེན་ནས་དམངས་ལ་ཕན་འདོགས་པ་བཅས་ཀྱི་གཞི་རྩའི་བསམ་ཕྱོགས་མཐའ་འཁྱོངས་བྱས་ཏེ། སྔོ་ལྗང་འཕེལ་རྒྱས་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་བརྒྱུད་རིམ་ཧྲིལ་པོར་ཁྱབ་པར་བྱས་ཡོད།

ལོ་ལྔ་ཡི་རིང་། ཉིང་ཁྲི་གྲོང་ཁྱེར་གྱིས་རིམ་རྩིས་བྱས་ན་ཤིང་འཛུགས་ནགས་བཟོ་མུའུ་ཁྲི་36བྱས་པ་དང་། བྱེ་ས་མུའུ་ཁྲི་45བཅོས་སྒྲིག་བྱས་པ། ནགས་ཚལ་མུའུ་ཁྲི་18གསོ་སྤེལ་བྱས་པ། དཔལ་འབྱོར་སྡོང་ཕྲུག་སོན་བཟང་རྟེན་གཞི་མུའུ་ཁྲི་1ལྷག་ཙམ་བསྐྲུན་པ། སྣོད་བཅུད་བདེ་འཇགས་སྲུང་ཡོལ་གྱི་འཛུགས་སྐྲུན་རྣམ་གྲངས་70ལེགས་སྒྲུབ་བཅས་བྱས་པ་དང་རྒྱལ་ཁབ་ཀྱི་མ་དངུལ་སྒོར་དུང་ཕྱུར་2.63དོན་འཁྱོལ་གྱིས་སྣོད་བཅུད་ཁོར་ཡུག་སྲུང་སྐྱོང་ལ་ཆེད་སྤྱོད་མ་དངུལ་སྒོར་དུང་ཕྱུར་9.95བཏང་ཡོད།

དཀའ་བའི་ལས་ལ་བརྩོན་གྱུར་ན། མི་འགྲུབ་བྱ་བ་ཅི་ཡང་མེད། ཉིང་ཁྲི་གྲོང་ཁྱེར་གྱིས་སྔ་བར་ཕྱི་གསུམ་དུ་ཕུགས་ལ་གཞི་ཚུགས་པ་དང་མིག་སྔར་དམིགས་ཏེ། ལོ་ལྟར་བྱ་བ་དངོས་ཁག་གཅིག་སྒྲུབ་པ་དང་བྱ་བ་ཆེན་པོ་འགའ་ཤས་སྒྲུབ་ཀྱི་ཡོད། སྐྱིད་སྣང་གི་སྦྲང་ཆར་ཟིལ་མས་མི་སེར་ཚོའི་སེམས་ཀྱི་ཞིང་ས་བརླན། དཀའ་སྤྱད་འབད་འཐབ་ལ་བརྟེན་ནས་འཚོ་བ་ལེགས་སུ་གཏོང་མཁན་མང་ཚོགས་ཀྱིས་འཚོ་བ་ཇི་ཙམ་བསྐྱལ་བ་དེ་ཙམ་གྱིས་བདེ་སྐྱིད་ལྡན་ངེས་རེད་ལ་འབྱུང་འགྱུར་ལའང་རེ་བས་ཁེངས་ཡོད།