འདི་ནི་ཚེ་རིང་གཡུ་སྒྲོན་གྱི་སྡོད་ཁང་གསར་པའི་ཚོམས་ཆེན་ཡིན་པ།
འདི་ནི་ཚེ་རིང་གཡུ་སྒྲོན་ནང་མི་བཞི་པོས་སྡོད་ཁང་གསར་པའི་མདུན་དུ་པར་ལེན་བཞིན་པ།
“ཏང་དང་སྲིད་གཞུང་གི་རོགས་སྐྱོར་འོག ང་ཚོའི་ཁང་པ་ཉམས་བཟོ་དང་རྒྱས་བསྐྲུན་བྱས་པ་ཡིན། སྲིད་གཞུང་གིས་ད་དུང་ང་ཚོར་འཁྱགས་སྒམ་དང་། གོས་འཁྲུད་འཕྲུལ་ཆས། འབོལ་ཁྲི་སོགས་གློག་ཆས་དང་ཁྱིམ་ཆས་རིན་མེད་ངང་སྤྲད་བྱུང་། བུ་མོ་ཆུང་བའང་སློབ་ཆེན་དུ་ཚུད་སོང་། ད་ཆའི་བདེ་སྐྱིད་ལྡན་པའི་འཚོ་བར་ང་ཚོ་བློ་ཡིད་ཚིམ་པོ་འདུག”ཅེས་ཁྱིམ་དུ་གཙང་སྦྲ་བྱེད་བཞིན་པའི་སྣང་རྫོང་སྣང་གྲོང་རྡལ་སྐྱིད་རྩེ་གྲོང་ཚོའི་གྲོང་མི་ཚེ་རིང་གཡུ་སྒྲོན་གྱིས་འཛུམ་དམུལ་དམུལ་ངང་དེ་ལྟར་བཤད།
ཚེ་རིང་གཡུ་སྒྲོན་ད་ལོ་ལོ་60ལ་སླེབས་པ་དང་ཁྱིམ་དུ་བུ་མོ་གཉིས་ཡོད། ཚེ་རིང་གཡུ་སྒྲོན་ཁྱིམ་དུ་འཛུལ་མ་ཐག་མིག་ལམ་དུ་འཆར་བ་ནི་གཙང་སྦྲ་དོད་པའི་སྒོ་ར་དང་། ཡངས་ཤིང་རྒྱ་ཆེ་བའི་ཁང་པ། གང་དགོས་ཅི་ཡོད་ཀྱི་ཁྱིམ་ཆས་དང་གློག་ཆས་བཅས་རེད། “ང་ཚོའི་དེ་སྔའི་ཁང་པར་སྨི་ངོས་གྲུ་བཅུ་ཙམ་ལས་མེད་པ་དང། ཆར་པ་འབབ་རིམ་བཞིན་ཆར་ཐིགས་རྒྱག་གི་ཡོད། 2016ལོར་སྲིད་གཞུང་གིས་ང་ཚོར་ཁང་པ་ཉམས་བཟོ་དང་རྒྱས་བསྐྲུན་བྱས་པ་དང་། ང་ཚོ་རང་ཉིད་ཀྱིས་སྒོར་5000ལས་བཏོན་དགོས་མ་བྱུང་། ད་ཆའི་ཁང་པ་གསར་པར་སྨི་ངོས་གྲུ་250ལྷག་ཙམ་ཡོད”ཅེས་བུ་མོ་རྒན་པ་ཚེ་རིང་དབྱངས་ཅན་གྱིས་བཤད།
དེ་སྔོན་ཁྱིམ་གྱི་འཚོ་རྟེན་གཙོ་བོ་ནི་ནས་བཙོངས་པའི་ཡོང་འབབ་ཁོ་ན་ཡིན་པའི་ཁར་བུ་མོ་གཉིས་ཀྱི་སློབ་ཡོན་སྤྲོད་དགོས་སྟབས་ཚེ་རིང་གཡུ་སྒྲོན་ཁྱིམ་གྱི་འཚོ་བ་ཧ་ཅང་སྐྱོ་པོ་ཡོད། དེར་བརྟེན་གྲོང་ཚོའི་ཡིག་ཚགས་དང་གཱ་བཟོས་པའི་དུད་ཚང་དབུལ་པོར་གཏན་འཁེལ་བྱས་པ་རེད། དབུལ་སྒྲོལ་འགག་སྒྲོལ་གྱི་ལས་དོན་སྤེལ་ཚུན། རྒྱལ་ཁབ་ཀྱི་དབུལ་སྐྱོར་སྲིད་ཇུས་ཀྱི་རོགས་སྐྱོར་འོག་ཚེ་རིང་གཡུ་སྒྲོན་ཁྱིམ་མི་བཞི་པོར་ལོ་ལྟར་མི་རེར་སྒོར་3500ཡི་སྣོད་བཅུད་ལས་གནས་གསབ་དངུལ་ལེན་རྒྱུ་ཡོད་པ་མ་ཟད། བུ་མོ་རྒན་པ་གྲོང་གསེབ་ཀྱི་གཞུང་ལམ་བདག་སྐྱོང་བ་བྱས་ནས་ལོ་ལྟར་ཡོང་འབབ་སྒོར་12000རག་གི་ཡོད། དེས་མ་ཚད་ཚེ་རིང་གཡུ་སྒྲོན་གྱིས་འབྲི་གཡག་བཞི་དང་མཛོ་མོ་གསུམ་གསོས་ནས་ཁྱིམ་གྱི་ཡོང་འབབ་གསབ་སྣོན་བྱེད་ཀྱི་ཡོད།
གྲོང་ཚོའི་ནང་གི་གཞུང་ལམ་ཉམས་བཟོ་བྱས་རྗེས་བརྔ་བསྡུའི་འཕྲུལ་འཁོར་ཡང་གྲོང་ཚོར་གཏོང་ཐུབ་པས་ཚེ་རིང་གཡུ་སྒྲོན་ཁྱིམ་གྱིས་ནས་འདེབས་ཁྱོན་མུའུ་ཁ་ཤས་མང་དུ་བཏང་བ་དང་། བུ་མོ་རྒན་པ་ཞིང་དལ་སྐབས་སུ་གླ་པ་རྒྱུག་པར་འགྲོ་གི་ཡོད་པས། 2018ལོར་ཚེ་རིང་གཡུ་སྒྲོན་གྱི་ཁྱིམ་ཚང་དབུལ་སྒྲོལ་ཐུབ་པ་རེད།
ཁྱིམ་ཚང་གི་ལོ་རྒྱུས།
ཚེ་རིང་གཡུ་སྒྲོན། ད་ལོ་ལོ་60ལ་སླེབས་པ་དང་ཉིང་ཁྲི་གྲོང་ཁྱེར་སྣང་རྫོང་སྣང་གྲོང་རྡལ་སྐྱིད་ཚེ་གྲོང་ཚོར་ཡོད། ཁྱིམ་དུ་ངལ་རྩོལ་ནུས་ཤུགས་མེད་པས། 2016ལོར་ཡིག་ཚགས་དང་གཱ་བཟོས་པའི་དུད་ཚང་དབུལ་པོར་གཏན་འཁེལ་བྱས། རྒྱལ་ཁབ་ཀྱི་དབུལ་སྐྱོར་སྲིད་ཇུས་ཀྱི་རོགས་སྐྱོར་འོག་ཚེ་རིང་གཡུ་སྒྲོན་གྱི་ནང་མི་བཞི་པོར་ལོ་ལྟར་མི་རེར་སྒོར་3500ཡི་སྣོད་བཅུད་ལས་གནས་གསབ་དངུལ་ལེན་རྒྱུ་ཡོད་པ་མ་ཟད། བུ་མོ་ཆུང་བ་སྐལ་བཟང་སྒྲོལ་དཀར་སློབ་ཆེན་དུ་རྒྱུགས་འཕྲོད་རྗེས་ལོ་ལྟར་སློབ་གསོའི་རོགས་སྐྱོར་མ་དངུལ་སྒོར་7900ལེན་རྒྱུ་ཡོད་པ་རེད། བུ་མོ་རྒན་པ་ཚེ་རིང་དབྱངས་ཅན་གྲོང་གསེབ་ཀྱི་གཞུང་ལམ་བདག་སྐྱོང་བ་བྱས་ནས་ལོར་ཡོང་འབབ་སྒོར་12000རག་གི་ཡོད། གཞན་ཡང་ཚེ་རིང་དབྱངས་ཅན་གྱིས་ད་དུང་ཞིང་དལ་སྐབས་སུ་ཕྱི་ཕྱོགས་སུ་གླ་པ་རྒྱུག་ནས་ཁྱིམ་གྱི་ཡོང་འབབ་གསབ་སྣོན་བྱེད་ཀྱི་ཡོད། 2018ལོར་ཚེ་རིང་གཡུ་སྒྲོན་གྱི་ཁྱིམ་དབུལ་སྒྲོལ་ཐུབ་པ་རེད།