ཟླ་11ཚེས་30ཉིན་གྱི་སྔ་དྲོ། རང་སྐྱོང་ལྗོངས་དབུལ་སྒྲོལ་འགག་སྒྲོལ་བཀོད་འདོམས་པུས་2020ལོའི་ཆེད་དོན་ཚོགས་འདུ་ཐེངས་14པ་འཚོགས་ཏེ། 2020ལོའི་ཞིང་ཆེན་རིམ་པའི་ཏང་ཨུད་སྲིད་གཞུང་གི་དབུལ་སྒྲོལ་འགག་སྒྲོལ་གྱི་ཕན་འབྲས་ལ་དཔྱད་ཞིབ་བྱ་རྒྱུའི་སྐོར་གྱི་འབྲེལ་ཡོད་དགོངས་དོན་དང་བླང་བྱ་བརྒྱུད་བསྒྲགས་བྱས་པ་དང་། རང་ལྗོངས་ཀྱི་2020ལོའི་དབུལ་སྒྲོལ་འགག་སྒྲོལ་གྱི་ཕན་འབྲས་དཔྱད་ཞིབ་ལས་དོན་ལ་ཞིབ་འཇུག་དང་བཀོད་སྒྲིག་བྱས་པ་རེད།

ལྗོངས་ཏང་ཨུད་ཀྱི་རྒྱུན་ཨུ་དང་། རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ། རང་སྐྱོང་ལྗོངས་དབུལ་སྒྲོལ་འགག་སྒྲོལ་བཀོད་འདོམས་པུའི་བཀོད་འདོམས་དཔོན་བཅས་ཡིན་པའི་ནོར་བུ་དོན་གྲུབ་ཚོགས་འདུར་ཕེབས་པ་དང་འབྲེལ་གསུང་བཤད་ཀྱང་གནང་བ་རེད། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་རང་སྐྱོང་ལྗོངས་དབུལ་སྒྲོལ་འགག་སྒྲོལ་བཀོད་འདོམས་པུའི་བཀོད་འདོམས་དཔོན་གཞོན་པ་དབང་ཧའེ་ཀྲོའུ་ཡིས་ཚོགས་འདུ་གཙོ་སྐྱོང་གནང་བ་རེད།

ནོར་བུ་དོན་གྲུབ་ཀྱིས་རིམ་པ་ཁག་དང་སྡེ་ཚན་ཁག་གིས་དཔྱད་ཞིབ་ཀྱི་བྱ་ཐབས་དང་། ནང་དོན། བླང་བྱ་བཅས་ཡང་དག་པའི་སྒོ་ནས་གོ་བ་ལེན་པ་དང་ཁོང་དུ་ཆུད་པ་བྱས་ནས་རིམ་པ་བཞིན་ཞིབ་བསྡུར་དང་། གནད་ལ་འཁེལ་བའི་ངང་མཐིལ་རྟོགས། ཡང་དག་པའི་སྒོ་ནས་ཁོང་དུ་ཆུད་པ། དམིགས་སར་ཕོག་པ་བཅས་བྱས་ནས་དབུལ་སྐྱོར་གྱི་ཕན་འབྲས་དངོས་དང་དབུལ་སྒྲོལ་གྱི་སྤུས་ཚད་འབུར་དུ་ཐོན་པ་དང་། རང་ལྗོངས་ཀྱི་དབུལ་སྒྲོལ་འགག་སྒྲོལ་གྱི་གྲུབ་འབྲས་དང་། ཉམས་མྱོང་། དཔེ་མཚོན། བཀྲག་མདངས་འཚེར་ས་བཅས་གང་ལེགས་མངོན་པ། ལྗོངས་ཡོངས་ཀྱི་རྒྱ་ཆེའི་ལས་བྱེད་པ་དང་མང་ཚོགས་ཀྱི་ས་བབ་མཐོ་རུང་གོ་རྟོགས་དེ་བས་མཐོ་བའི་བསམ་པའི་ཉམས་འགྱུར་གང་ལེགས་མངོན་པ་བཅས་བྱེད་དགོས་པ་དང་། དུས་བཀག་ལྟར་ལས་ཡུན་ལྡོག་རྩིས་དང་གྲ་སྒྲིག་ཞིབ་ཚགས་བྱས་ནས་བྱེད་པོའི་འགན་འཁྲི་ནན་དུ་གཏོང་བ་དང་། མཐུན་སྦྱོར་གཞོགས་འདེགས་ལ་ཤུགས་སྣོན་བརྒྱབ་ནས་ལས་དོན་ཁག་ཞིབ་ཚགས་སྤེལ་བ་དང་། ལས་དོན་ཁག་ཏན་ཏན་ཏིག་ཏིག་དང་ཇི་མ་ཇི་བཞིན་གྱི་སྒོ་ནས་དོན་འཁྱོལ་ཡག་པོ་བྱས་ཏེ་2020ལོའི་དབུལ་སྒྲོལ་འགག་སྒྲོལ་གྱི་ཕན་འབྲས་ཞིབ་དཔྱད་ལ་བསུ་བ་ཞུ་དགོས་པའི་བླང་བྱ་བཏོན་གནང་བ་རེད།