ཚེས་17ཉིན་གྱི་སྔ་དྲོར། བོད་རང་སྐྱོང་ལྗོངས་མི་དམངས་སྲིད་གཞུང་གསར་འགྱུར་གཞུང་ལས་ཁང་གིས་མངའ་རིས་ས་ཁུལ་གྱི་དབུལ་སྒྲོལ་འགག་སྒྲོལ་གྱི་གྲུབ་འབྲས་གནས་ཚུལ་སྐོར་གྱི་གསར་འགྱུར་ཡོངས་བསྒྲགས་ཚོགས་འདུ་འཚོགས་པ་རེད། ཚོགས་འདུའི་ཐོག་མངའ་རིས་ས་ཨུད་ཀྱི་ཨུ་ཡོན་སྲིད་འཛིན་ཀུང་ཧྲུའུ་ཡི་རྒྱུན་ལས་ཀྲོན་ཡོན་གཞོན་པ་ཡོན་ཧྥུའུ་གོས་གསར་འགྱུར་མགྲིན་ཚབ་པའི་ངོས་ནས་འབྲེལ་ཡོད་གནས་ཚུལ་ངོ་སྤྲོད་བྱས་པ་རེད། མིག་སྔའི་བར། ས་ཁུལ་ཡོངས་ཀྱི་ཡིག་ཚགས་དང་གཱ་བཟོས་པའི་མང་ཚོགས་དབུལ་པོའི་དུད་ཚང་6183གྱི་མི་23159ཚང་མ་དབུལ་སྒྲོལ་ཐུབ་པ་དང་། རྫོང་7ཚང་མ་དབུལ་ཞྭ་ཕུད་པ། གྲོང་ཚོ(གྲོང་ལྷན)དབུལ་པོ་139དབུལ་སྒྲོལ་ཐུབ་པ་བཅས་བྱུང་ནས་དབུལ་པོ་ཐོན་ཚད་28.7%ནས་ཀླད་ཀོར་བར་ཆག་ཡོད་པ་རེད།

དབུལ་སྒྲོལ་འགག་སྒྲོལ་གྱི་དམག་འཐབ་ལ་ཕྱོགས་ཡོངས་ནས་རྒྱལ་ཁ་ལེན་ཆེད། མངའ་རིས་ས་ཁུལ་གྱིས་ཐོག་མཐའ་བར་གསུམ་དུ་དབུལ་སྒྲོལ་འགག་སྒྲོལ་དོན་ཆེན་ཨང་དང་པོ་དང་། ཆབ་སྲིད་ཀྱི་ལས་འགན་གལ་ཆེན། དམངས་འཚོའི་འདུ་འགོད་ཨང་དང་པོ་བཅས་ལ་བརྩིས་ནས་དམ་འཛིན་དང་། “སེམས་ཁྲལ་མེད་པ་གཉིས་དང་འགན་ལེན་གསུམ”ལ་དམ་པོར་དམིགས་པ། གནད་སྨིན་དྲུག་མཐའ་འཁྱོངས། “མཚམས་མི་འཇོག་པ་བཞིའི”བླང་བྱ་དོན་འཁྱོལ་བཅས་བྱས་ཏེ་ཐོན་ལས་དབུལ་སྐྱོར་དང་། ཡུལ་གཞན་དུ་གནས་སྤོ། ལས་ཞུགས་གཞན་སྒྱུར། སྣོད་བཅུད་ཁ་གསབ། སློབ་གསོའི་དབུལ་སྐྱོར། བདེ་ཐང་དབུལ་སྐྱོར། སྤྱི་ཚོགས་ཐ་སྐྱོང་སོགས་ཀྱི་བྱ་ཐབས་ལ་སྤྱི་འདོམས་སྐུལ་འདེད་བཏང་བ་དང་། མི་ཤུགས་དང་། དངོས་ཤུགས། ནོར་ཤུགས་བཅས་སྤྱི་འདོམས་བསྡུ་སྒྲིལ་བྱས་ཏེ་དབུལ་སྒྲོལ་འགག་སྒྲོལ་གྱི་དམག་འཐབ་ཡག་པོ་བརྒྱབ་པར་བརྟེན། དབུལ་སྒྲོལ་འགག་སྒྲོལ་ལ་ཐག་གཅོད་རང་བཞིན་གྱི་གྲུབ་འབྲས་ཐོབ་ཡོད། དབུལ་སྒྲོལ་འགག་སྒྲོལ་བྱས་པ་བརྒྱུད། མངའ་རིས་ཀྱི་ཞིང་འབྲོག་ཁུལ་གྱི་ཐོན་སྐྱེད་དང་འཚོ་བའི་ཆ་རྐྱེན་ལ་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་བ་དང་། རྒྱ་ཆེའི་མང་ཚོགས་དབུལ་པོའི་དངོས་པོའི་འཚོ་བ་ཆེས་ཆེར་ལེགས་སུ་ཕྱིན་པ། བསམ་པའི་ཉམས་འགྱུར་གསར་རྐྱང་དུ་གྱུར་ནས་བལྟོས་བཅས་ཀྱི་དབུལ་པོའི་གནད་དོན་ཐག་གཅོད་བྱེད་པའི་ཕུགས་ཕན་ལམ་སྲོལ་སྔར་བས་འཛུགས་པ་དང་གྲོང་གསེབ་དར་རྒྱས་ཀྱི་འཐབ་ཇུས་ལ་སྐུལ་འདེད་གཏོང་ཆེད་རྨང་གཞི་བརྟན་པོ་བཏིངས་ཡོད།

ཤེས་རྟོགས་བྱུང་བར་གཞིགས་ན། མངའ་རིས་ས་ཁུལ་གྱིས་རིམ་པ་དེ་གའི་རྣམ་གྲངས་མ་དངུལ་90%དང་བོད་སྐྱོར་མ་དངུལ་80%ཤིན་ཏུ་དབུལ་བའི་རྫོང་དང་ཤང་ལ་བཏང་བ་དང་། རིམ་ཁག་ནོར་སྲིད་ཀྱི་ཞིང་འབྲེལ་མ་དངུལ་སྒོར་དུང་ཕྱུར་30.6སྤྱི་འདོམས་བསྡུ་སྒྲིལ་བྱས་ནས་དབུལ་སྒྲོལ་འགག་སྒྲོལ་ལ་སྤྱད་ཡོད། 2019ལོར་མིང་རྟགས་བཀོད་པའི་རྣམ་གྲངས་18ཚང་མ་དོན་འཁྱོལ་བྱས་པ་དང་། འདི་ལོ་བོད་སྐྱོར་དབུལ་སྐྱོར་རྣམ་གྲངས་53ལ་མིང་རྟགས་བཀོད་པ་དང་གན་རྒྱ་བཞག་པའི་མ་དངུལ་སྒོར་དུང་ཕྱུར་3.53ཟིན་ཡོད། རིམ་རྩིས་བྱས་ན་མ་དངུལ་སྒོར་དུང་ཕྱུར་287.1བཏང་ནས་རིམ་སྤོར་ལས་གྲྭ་བཅུ་ཡི་རྣམ་གྲངས་2009ལག་བསྟར་བྱས་པ་རེད།