འདི་ནི་བོད་ལྗོངས་ཉིང་ཁྲི་གྲོང་ཁྱེར་སྨན་གླིང་རྫོང་ཆབ་ནག་ཤང་གི་ཉིང་ཁྲིའི་དེང་རབས་ཀུ་ཤུ་ཚད་ལྡན་ཅན་གྱི་དཔེ་སྟོན་ལྡུམ་རར་གླ་པ་ཚོ་ལས་ལ་བྲེལ་བཞིན་པ། 

སྟོན་དུས་སུ་ཡར་ཀླུང་གཙང་པོའི་ངོགས་གཉིས་སུ་གསེར་མདངས་ལྷག་པར་འཕྲོ་ཞིང་། བོད་རང་སྐྱོང་ལྗོངས་ཉིང་ཁྲི་གྲོང་ཁྱེར་སྨན་གླིང་རྫོང་ཆབ་ནག་ཤང་གི་མུའུ་སྟོང་ཡན་གྱི་ཤིང་འབྲས་ལྡུམ་རའི་ནང་གི་ཀུ་ཤུའི་སྡོང་པོའི་ཐོག་ཀུ་ཤུས་ཁེངས་ནས་སླར་ཡང་ལོ་ལེགས་ཀྱི་དུས་ལ་སླེབས།

དེ་གར་ནི“བོད་ལྗོངས་ཉིང་ཁྲིའི་དེང་རབས་ཀུ་ཤུ་ཚད་ལྡན་ཅན་གྱི་དཔེ་སྟོན་ལྡུམ་ར”ཡིན་པ་དང་2017ལོར་གསར་དུ་བཙུགས་པ་དང་ས་ཁྱོན་མུའུ་1800ལྷག་ཙམ་ཟིན་གྱི་ཡོད། “རྣང་མ་རྒྱ་ཆེར་གཏོང་བ་དང་། འདེབས་ཚད་མང་དུ་གཏོང་བ། ས་རྒྱུ་གཤིན་པ། ཆུ་ལུད་དབོར་འདྲེན། ཞིང་འཕྲུལ་ཆུང་གྲས་དང་ཞིང་ལས་ལག་རྩལ་ཟུང་འབྲེལ”བཅས་ཀྱི་བྱེད་ཐབས་གཞིར་བཟུང་ལེགས་བསྡུས་ཞིབ་གཉེར་གྱི་ཐོན་མཐོའི་འདེབས་གསོ་བྱེད་བཞིན་ཡོད།

ཉིང་ཁྲིར་ཆ་སྙོམས་ས་བབ་མཐོ་ཚད་སྨི་3100ཟིན་པ་དང“བོད་ཀྱི་སྔོ་ལྗང་མཛེས་ལྗོངས་ཁུལ”ཞེས་པའི་མཚན་སྙན་ཡོད། དེ་ནི་བོད་ཀྱི་ཤིང་འབྲས་ཐོན་སྐྱེད་རྟེན་གཞི་གལ་ཆེན་ཞིག་རེད། ལྡུམ་རའི་འགན་ཁུར་བ་དབྱང་ཁའེ་ཕིང་གིས་ཉེ་བའི་ལོ་ཤས་ནང་ཁོང་ཚོས་སོན་བཟང་སྣ་ཁ་16ནང་འདྲེན་བྱས་པར། བསྡོམས་སྡོང་རྐང་ཁྲི་བཅུ་ལྷག་ཙམ་ཡོད་པ་དང་། ཞིང་འཕྲུལ་དང་ཞིང་ལས་ལག་རྩལ་ཟུང་དུ་འབྲེལ་བ། ཆུ་ལུད་གཞི་གཅིག་ཅན་བཅས་དང་དེ་བཞིན“ཤིང་འབྲས་དང་། རྩྭ། ཕྱུགས་རིགས”བཅས་རེས་མོས་ཀྱི་ལྗང་མདོག་སྣོད་བཅུད་འདེབས་འཛུགས་བྱས་པས། ཐོན་སྐྱེད་ཀྱི་ཕན་འབྲས་མངོན་གསལ་དོད་པོས་མཐོ་རུ་ཕྱིན་པ་དང་། མུའུ་རེ་ནས་ཐོན་འབབ་སྤྱི་རྒྱ་4000ཡན་ཡོང་རེ་ཡོད་ཅེས་ངོ་སྤྲོད་བྱས།

ཤིང་འབྲས་ལྡུམ་རའི་ནང་སྐྱོད་སྐབས་དེ་སྔོན་གྱི་ཁོད་མི་སྙོམས་པའི་ཞིང་ས་དག་ད་ཆ་གྲལ་འགྲིག་པའི་འབྲས་ཤིང་གིས་ཁེངས་པ་དང་། ཀུ་ཤུའི་སྡོང་པོའི་ཐོག་འབྲས་བུ་བྱུར་བུར་བཏགས་ཡོད།

ས་གནས་དེ་གའི་གྲོང་མི་བཅུ་ཕྲག་གིས་ལྡུམ་རའི་ནང་རྩྭ་ངན་འཐུ་བ་དང་། ཀུ་ཤུ་འཐོག་པ། ཞིང་འཕྲུལ་བཏང་ནས་ཆུ་གཏོར་བ་སོགས་ཀྱི་ལས་ལ་བྲེལ་བཞིན་འདུག

གསེར་ངོགས་གྲོང་ཚོ་ནས་ཡིན་པའི་སྐལ་བཟང་གཡུ་སྒྲོན་ལྡུམ་རའི་ལས་ལ་བྲེལ་བཞིན་མཆིས། ཁོ་མོས་གསར་འགོད་པར“ང་ཟླ་ཕྱེད་ཀྱི་གོང་འདིར་ལས་ཀར་ཡོང་བ་ཡིན། ཉེ་དུས་ཁྱིམ་དུ་ལས་ཀ་མང་པོ་མེད་པས་འདི་གར་ལས་ཀ་རྒྱུན་རིང་ཙམ་བྱེད་རྩིས་ཡོད”ཅེས་བཤད།

“ད་ཆ་ཉིན་གཅིག་ལ་ཡོང་འབབ་སྒོར་140འདུག 2017ལོ་ནས་ད་བར་ལོ་ལྟར་གླ་ཆ་སྤོར་གྱི་འདུག”ཅེས་སྐལ་བཟང་གཡུ་སྒྲོན་གྱི་གམ་དུ་ཡོད་པའི་ཚེ་རིང་དབྱངས་ཅན་གྱིས་བཤད། ཚེ་རིང་དབྱངས་ཅན་ནི་ཉ་ལུང་གྲོང་ཚོ་ནས་ཡིན་པ་དང་། ཁ་གསང་པོ་ཡོད། ཁོང་ནི་འདི་གར་ལས་ཀར་ཡོང་མཁན་སྔ་ཤོས་ཀྱི་ས་གནས་དེ་གའི་མང་ཚོགས་ཀྱི་གྲས་ཤིག་ཡིན་པས་ལྡུམ་རའི་ནང་གི་གནས་ཚུལ་ལ་རྒྱུས་མངའ་ཆེན་པོ་ཡོད།

སོ་སོའི་ཁྱིམ་དང་ཐག་ཉེ་ལ་ཡོང་འབབ་ཀྱང་མང་བས། ལྡུམ་རའི་ནང་ལས་ཀ་བྱེད་མཁན་གྲོང་ཚོའི་དུད་ཚང་32ཚང་མ་ནས་མི་རེ་ཡོད། ཁོང་གིས“དུས་ཚོད་བྱུང་རིམ་བཞིན་འདི་གར་ཡོང་གི་ཡོད། དང་ཐོག་གང་ཡང་ཤེས་ཀྱི་མེད་པས་ཚང་མ་རྒན་ལགས་ཀྱི་ས་ནས་སྦྱོང་དགོས་ཀྱི་ཡོད། ད་ཆ་ལས་ཀ་གང་བྱས་ཀྱང་སྣང་དག་མི་འདུག”ཅེས་བཤད།

དཔེ་སྟོན་ལྡུམ་རའི་ཟུར་ཞིག་ཏུ་འགྱིག་ཤོག་དྲོད་ཁང་ཆེ་མོ་བཅུ་ཕྲག་གྲལ་འགྲིག་པོས་བརྒྱབ་ཡོད་པ་དང་། དེའི་ནང་འབྲས་ཤིང་གི་སྡོང་ཕྲུག་བཏབ་ཡོད་པ་རེད། དབྱང་ཁའེ་ཕིང་གིས་ཀུ་ཤུ་ཕུད་དཔེ་སྟོན་ལྡུམ་རའི་ནང་ཁམ་བུ་དང་། ལི། རྒུན་འབྲུམ་སོགས་སོན་བཟང་ནང་འདྲེན་བྱས་ཡོད་པས། སླད་ཕྱིན་སོན་བཟང་གི་རིགས་ཕུན་སུམ་ཚོགས་སུ་འགྲོ་རྒྱུ་རེད་ཅེས་ངོ་སྤྲོད་བྱས།

དཔེ་སྟོན་ལྡུམ་ར་དེ་ལས་ས་གནས་དེ་གའི་མང་ཚོགས་ལ་དཔལ་འབྱོར་གྱི་ཕན་འབྲས་མངོན་གསལ་དོད་པོ་བྱུང་ཡོད། དབྱང་ཁའེ་ཕིང་གིས་ལྡུམ་རའི་ས་ཞིང་ནི་ལོ་རེར་མུའུ་རེར་སྒོར་1000བྱས་ཏེ་ཆབ་ནག་ཤང་གི་གྲོང་ཚོ་4ནས་བརྒྱུད་བཤུག་བཏང་བ་ཞིག་ཡིན་པ་དང་། ལོ་ལྟར་བོགས་དངུལ་སྒོར་ཁྲི་190ལྷག་ཙམ་སྤྲོད་དགོས་ཀྱི་ཡོད། དེ་མིན་ལྡུམ་རའི་ནང་ངལ་ནུས་འབོར་ཆེན་དགོས་པས། ན་ནིང་འདི་གར་གླ་པར་ཡོང་མཁན་མི་ཐེངས་9000ཟིན་ནས་ངལ་ནུས་ཡོང་འབབ་སྒོར་ཁྲི་120ལྷག་ཙམ་བྱུང་ཡོད། འདི་ལོ་གླ་པའི་ཡོང་འབབ་སྒོར་ཁྲི་200ལས་བརྒལ་རེ་ཡོད་ཅེས་བཤད།

“ལོ་གཅིག་ནང་ངར་ཡོང་འབབ་སྒོར་ཁྲི་གཉིས་ལྷག་ཙམ་བྱུང”ཞེས་ལིང་པ་གྲོང་ཚོའི་གྲོང་མི་སྒྲོལ་མས་གད་མོ་དགོད་བཞིན་གསར་འགོད་པར་བཤད།